1 PETRO 3 - PIPÏLIA

¹ Kïlenyoni tïkwïl, mïchinokwa kor oterchinö santokökwa, tötomi walaka cho tomöcha kughan ngölyonto Tororöt, kumuköy ompö otöptönkwa nyoni kumïtu chane kughan kïrkegh möminye ompö ngölyon nyo komwochikwa.

² Mukoy lenyoni ompöwölo sïwïyi chane wölo tïliltö otöptönkwa nyo tïng kiwaghat ompö tawu Tororöt.

³ Makany kipïchatengwo kïlïkwï nyo pö sany pat nyo lata: napata put anta kemina kegh koltin anta kelach sïro cho pïchighöch.

⁴ Wölo nya kïpöyit pïchighyenkwa nyo pö ori, pïchighyö nyo möwïrönye nyo pö mïkulögh nyo talase akï nyo pö kalya akï nyo pö olyot nyo wow ompö tawu Tororöt.

⁵ Ompöwölo lata nyoni tïkwïl wölo kipïchta kegh koru könyisyok cho kitïlilöch cho kitö kikönötengwa Tororöt kïterchï chane santokökwa.

⁶ Ki Sara akong ompö chane. Kitech nyinte Apraam nyoman ntökïkurö nyinte echotyon. Kalïkukwa ye nyu tipichi ato aghakwa nyo karam amakany kwotyeghenok kïgh anka tïkwïl.

⁷ Kïlenye nyoni tïkwïl ompö akwa cho ochï santoy, otïpïyenö nko korukwo ompö pköchin lö pich chane cho nyörkölöl. Agha nyu kïgh anka tïkwïl nko chane ompö konyït, ompöwölo toköy chane asïyech nko akwa ropöwonto Tororöt nyo pö söpon tömömi kïgh nyo rötöy sowutkökwa.

Kiwongunöt ato kighöy man

⁸ Anyï nyu ngölyonteto söröm, mïchinokwa alïkuna pich cho tïng kinonut akonga, acham kegh akwane le cho otupchö. Oporchï kegh köromnyo alïkwï cho mïnïngitöy kegh.

⁹ Matak ghöyityö ompö ghöyityö anka anta chïpö ompö chïpö anka, nyinö kötoghöy lenyoni, asagh Tororöt kusoyön chichona chïpokwa, ompöwölo kisoyönöt nyoni kiyomiswokwa Tororöt otini kikurokwa.

¹⁰ Kïle wölo mwoytoy Kikirut lö, “Anka tïkwïl nyo mököy kïngörökyini söpon akïpïrchï kïsïwa osiswo köromnyö, kïmïchini kïkïr ngalyapunyi mangalan cho ghach akïpïstö kïngalan putintön.

¹¹ Mïchini kulowitö kegh ghöyityö akwigh cho karamach, mïchini kïmara kong kalya akïpïrpïr ompö mïkulöwunyi kïmïkul.

¹² Ompöwölo topönöy Echotyon wölo mi pipö man, akïterchini sowutkökwa, wölo pörchini patagh mwokïyis.”

¹³ Ekï ngo nyu köny nyo tïghokwa ato opïrchikwa agha nyo karam?

¹⁴ Wölo kïrkegh kakinyarilakwa, ompöwölo kaghakwa nyo karam, wowitu atoni kïtya ngörekyö ompö akwa! Mawagh chi nyonikïny, amakany kususekwa kïgh.

¹⁵ Wölo okonyït Kristo* le Echotyon ompö mïkuliskökwo. Otïpï kïpsach kïtenö osis omwochï lasiny chi anka tïkwïl nyo tepokwa ngölyon kïrïp kegh nko kikönöt nyo mi orinkwa.

¹⁶ Wölo omwochï lenyoni ompö tölosyö nko konyït. Orip lasiny totöpinö ompö choghïn nyo karam, nyo ato mwagha pich, kïlolïyonchö choni ngölono nyo gha otöptönkwa nyo karam le pipö Kristo.

¹⁷ Ompöwölo karam tya kewongwï chi ato ighöy nyo karam kïrïp kegh nko machata Tororöt, kïsir ato ighöy nyo gha.

¹⁸ Ompöwölo kimegha tïkwïl Kristo ngokï kïnyïl akonga akumuchö. Kuwongwï chi nyo karam ompö mwokïyis atökumï kumïtakwa wölo mi Tororöt. Kima nyinte kïma ompö por, wölo kisöpote ompö mïkulögh,

¹⁹ akïwö ompö söpenyi nyo pö mïkulögh kwomchï mïkulis pö pich kikörchï ngwen.

²⁰ Ki mïkulis pö pich choni, cho kipeny ngala Tororöt otini kimi Tororöt kïkönyisïyi ompö mïkukönöt osiswechanya kimi Noa kïteköy melinyi. Ngörï kikïsörï pich pögh cho meket pögh melinoni: ki pich mut nko sömök kïpoto.

²¹ Kicheng ngalechoni körkeyïn pö kipatisanat nyo sörwokwa otï le ye ompö owesyo Kristo. Molenchï kegh kipatisanat kï kemwatïta sïmnyonto por, wölo ayomis nyo kïmwochini Tororöt ompö choghïn. Sörwokwa kipatisanata ompö kitutunöto Yeso Kristo,

²² nyo kikïwö yïm akïtöpö ewu tagh nyo pö Tororöt atökïpayta malayken lapay nko pöytoghï nko owesyö anka tïkwïl nyo mi yïm.