1 PETRO 2 - PIPÏLIA

¹ Opïstenö nyu ghöyïn anka tïkwïl nko lïsa nko nyonyintön nko kiswomöt.

² Kïle mnyarkiltin cho möro kong chö, mïchinokwa tïkwïl amarena kong chepö mïkulögh, atoyetunö ompö owesyenyi tonyorunö sörunöt.

³ Kïle wölo mwoytoy Kikirut lö, “Kyonkïtukwa akwane lö karam Echotyon.”

⁴ Opkonchinö Echotyon, kogh nyinte nyo satate nyo kitagh pich, wölo kikïl Tororöt nyinte akï pö tösunöt nyo wow ompö tawunyi.

⁵ Opkonchinö nyinte le köghïn cho sötote, akonï kegh alïkwï koghi cho teko nyinte kö pö saghat, atopöghisyeghenö wöloni le tïsï cho tïlilöch cho tötoy köröstino mïkulögh cho chömöy Tororöt ompö ara Yeso Kristo.*

⁶ Ompöwölo mwoghöy Kikirut lö, “Arose! Kotönön kogh Sayon,* kogh nyo pö luch nyo pö olyot nyo wow nyo kyakïlan. Mölolïyönönye chi anka tïkwïl nyo ghönöy nyinte.”

⁷ Pö kinyiwut nyo wow koghoni ompö akwa cho kaghan nyinte, wölo ompö pich cho meghönöcha: “Kïkawaghaka koghay kitagh tekï kïlïkwï kogh pö luch nyo mötïnye.”

⁸ Akïmwoghöy Kikirutkö walaka lö, “Anyï kogh nyo kwötöy pich akï ghat nyo pïtyegho pich.” Pïtyot chane ompöwölo kimeghancha ngölyontononi. Lata nyoni wölo kikikïtat Tororöt lö igho ompö chane.

⁹ Wölo ochikwa pich cho kikekïlak akï tïsi pöytoghin, pich cho tïlilöch akï pipö Tororöt kegh, cho kikekïl kïpa kwamta ighisyewut cho pö töngönchin cho pö Tororöt nyo kikurokwa ongetunenö tuwïn, akulutokwa löpoyïntanyi nyo pö töngönchin.

¹⁰ Kimi ato kimochikwanye pich, wölo kalïkukwa ye pipö Tororöt, akimi ato kimonkïtökwanye lö ne kisyonöto Tororöt, wölo katakakwa ye kisyonötenyi.

Sekeyi Tororöt

¹¹ Oterwante tupchenichu cho ochï to, achï pïnot ompö ngwïnyinï. Mopïsï kuchutok pïrchintino por cho poryot nko mïkulögh.

¹² Mïchinokwa apartena otöp nyo karam nyoman ompö kwenu pich cho tomönye kughan, nyo kïrkegh kö mököy kïmïrchokwa put lö oghekwa tïkwïn cho ghach, kumuköy kïsïwa ighisyewutkökwa cho karamach akïsal Tororöt Asisto kingwïnatenyi.

¹³ Oterchï pich lapay cho kikitö owesyö kïpaytakwa atökukusa kaynata Echotyon. Oterchï ato kö pöytoghinto kore kïmïkul,

¹⁴ anta kö pöytoghï cho kiyoku nyinte kughyongchï korokay cho te atö kughïtö lelï akïsal cho ighöy nyo karam.

¹⁵ Ompöwölo machata Tororöt akarakwa kutïw pich cho ngölonöy sölwontön le pich cho mötïngcha chïreryö ompö ighisyewut cho karamach cho oghekwa.

¹⁶ Otïpinö le pich cho tyokote, wölo mopöghisyeghö kityakatengwo awïnga lelutkökwo, wölo otïpinö le mötwori Tororöt.

¹⁷ Okonyït pich lapay, acham tupchenikwo cho le kighönï, awagh Tororöt, akonyït pöytoghinto kor.

Körkeyïn pö kiwongunöto Kristo*

¹⁸ Mïchinokwa mötwor ateka echotkökwo, akonyït chane lasiny, kö cho karamach akï tölose anta kö cho kölköl.

¹⁹ Ompöwölo soyönokwa Tororöt ato omïkukönökwa ompö kichopata kong nyo ngwïnchinokwa ompö or nyo melö ompö lelutyenkwa otini onkïtökwa lö oghekwa kïrïp kegh nko machata Tororöt.

²⁰ Ompöwölo nyoru chi salat ne nyo mïkukönöy ato kïmi kemunyöy ompö lelutkachi? Wölo ato omïkukönökwa ompö nyörïlwok, kïrkegh omitenökwa oghöy nyo karam, soyönokwa Tororöt ngölyontononi.

²¹ Nka nyoni kini kikurchokwa Tororöt, ompöwölo kiwongwï Kristo ompö parakunkwa akïpïswokwa körkeyïn tarïpa kelyechi.

²² Kimeghnye nyinte ngokï nyonikïny, akimengwïna kutinyi putintön.

²³ Kikimwa nyinte, wölo kimöwöghökyïnye chane ompö kimwoghsyö. Otini kiwongu nyinte, kimelö kyotyeghö pïchoni kichopöy, wölo kitö kikönötenyi wölo mi Tororöt nyo rwokyini pich kong ompö man.

²⁴ Nyinte Kristo nyo kikasana portanyi ngokicha ompö kimurtöwon atökemuka kekarakegh nko pich cho kimeghö ompö ara ngokï akesöpchö ompö ara man. Kikisopokwa ompö perutöyichi.

²⁵ Kyalatekwa kechir cho kikupotyö, wölo kyoyokukwa kegh ye, atarïpa Mösöwon akï Ripinto mïkulöwekwa.