1 KORINTO 9 - PIPÏLIA

Man nko ighisyo kiyoktoghinto* Yeso

¹ Mochanye so chi nyo tyakate? Amochanye so kiyoktoghinto Yeso? Kimasïwanye so Echotyontenyo Yeso? Mochikwanye so pich cho konkïtï Echotyon ompö sïngenyan?

² Kïrkegh kömi pikö walaka cho kötöghöy lö mochanye chi nyo kiyoktö Yeso, wölo ochan chi nyo kiyoktö Yeso ompö akwa, amukekwa okïniniot ompö söponwekwo lö kiyoktanïn Yeso, ompöwölo kyolinyekwa akwane nko Echotyon.

³ Anyï nyu ngölyon nyo omölyöngunan ompö pich cho rwokyinanïn:

⁴ motïngetanye so man kekonanïn omisyö nko tïkwïn cho kïgheghöy ompö ighisyenyan?

⁵ Motïngetanye so man owestotan nko korka nyo ghönöy Kristo* ompö rutoghtinechan le wölo idoy pikö walaka cho kiyoktö Yeso nko werko ompö Echotyon nko Petro tïkwïlï?

⁶ Anta ani nko Parnapa opïn cho kïpöghisïyi akepöghöy kegh?

⁷ Akï askaryon ne nyo pögho kegh ropïyenichi kïmi poryot? Akï ngorinto par nyo nen nyo momönye akweko sapipunechi? Anta mösöwon ne nyo yokwïyi kyak amölï cheko kyakichi?

⁸ Kamwaghan ngalechï le ptangengmöt so? Mömwoghöcha Kirurut tïkwïl lenyoni so?

⁹ Kirate ompö Kirurut pö Musa lö, “Mekar egh kut ato mi kïpöghisyewunyi.” Sïngo so Tororöt tya ngala eghin?

¹⁰ Kimenonechanye so nyinte otini kingölonöy ngalechoni? Ay, nyoman, kikikir ngalechoni ompö acha, ompöwölo mïchini kwigh chi ighisyenyi nyo ngoröy nko nyo ilöy ompö kikönöt nyo poröy chane kwodeny ilsyononi.

¹¹ Ato kikïlechicha kösïgho mïkulögh kwenunkwa, kïpïchighitu tya ato kïsïkecha tösunöto por wölo omitekwa?

¹² Ato tïng pikö walaka man nyo nyorunonekwa tïkuchoni, ketïngetecha nyu man kïtïl chane. Wölo tomönye kepöghisyeghenöcha mantanoni. Nyo kitökïpöghisyeghonecha kemïkukönöcha ompö kïgh anka tïkwïl atömökitö Lökoy cho Karamach cho pö Kristo tömölöwon nyonikïny.

¹³ Monkïtökwanye so lö nyoruno pich omisyengwa Kö pö Tororöt cho pöghisïyi ompö Kö pö Tororöt,* akïtïng ngat pich cho ipu ropöw cho kïpelo watwa amöros karerantangwa ompö ropöwechoni?

¹⁴ Kïlenyoni tïkwïl, kimwochï Echotyon pikachi lö nyoruno chane omisyengwa amtaghpa Lökoy cho Karamach.

¹⁵ Wölo tomönye opöghisyeghan mantinechoni ompö nyo le akonga. Amelö okiran ngalechete lö tosïch mantinechoni, ompöwölo kötökaykay ameghan kïtïl aghan chi anka tïkwïl kïchengenanïn mantanyu nyo okwolo kegh kïlïkwï kwïle.

¹⁶ Ato omtonan Lökoy cho Karamach, kïmelö kïgh nyoni nyo okwolonan kegh, ompöwölo kakisikwanïn agh lenyoni. Wölo ochech ompö ani ato mamtanye Lökoyechete Karamach!

¹⁷ Ntökile nyo kyokïlchan kegh ighisyononi ompö machatenyan kegh, kötokönan nyu kïgh nyo kïghokwon, wölo oghan le achey nyo kighönwanïn Tororöt alïkwï ripinte.

¹⁸ Kïghokwanïn ne nyu nya? Nyoni kï kechömwanïn amta Lökoy cho Karamach kwïle amelö oghokan tïkwïn cho köle mantanyan ompö amtaghnoni.

¹⁹ Kïlenyona nyu, kïrkegh kö mochanye sekeyonto chi wölo kaghan kegh alïkwï sekeyonto pich löwïr, atömanyïl onyorï pich cho chang cho rïpöy Kristo ato muko.

²⁰ Kyotöpan le chi pö Yaudi otini kyopöghisyechinan pipö Yaudi atamuk otyï chane. Poru nyoni lö, kïrkegh kimelö kipöywanïn Kirurut pö Musa, wölo kyotöpan le ato kipöywanïn kirurut ompö chane atömanyïl otyï chane cho mi ngwïnyi kirurut.

²¹ Kïkany ompö pich cho lowöch nko kirurut, otöpan nko chane le chi nyo lowö kirurut atamuk otyï pïchoni lowö kirurut. Wölo meporunye nyoni lö motïngetanye Kirurut pö Tororöt, nyoman omitan ngwïnyi kirurut pö Kristo atömanyïl otyï chane cho mi sanypa kirurut.

²² Kalïkwan chi nyo nyarkalal ato omitan nko pich cho nyörkölöl, atamuk otyï chane. Kaghan kegh alïkwï kïgh anka tïkwïl ompö pich löwïr, atamuk osörï walaka ompö or anka tïkwïl.

²³ Kaghan choni lapay ompö Lökoyechoni Karamach atonyorï kiparat nyo pö kisoyönutkachi.

²⁴ Monkïtökwanye so lö ryöghöy pich cho chang cho omöy kanyanyighos ompö tömko pirö, wölo kïrkegh kïryagh tïkwïl, akonga ompö chane nyo nyoru ropöwon?

²⁵ Kilöy kegh chi anka tïkwïl nyo omöy kanyanyighos akïmul kegh tïkwïn cho mököy portanyi. Ighöy lenyoni atökïnyorï tenta nyo wïröy, wölo kighecha atökenyorunö tenta nyo töpo kokay.

²⁶ Nka nyoni nyu omitan orïpöy atopönöy tagh atarïnta. Nka nyoni alatan chi nyo wiro chi egh nyo keröy otini wiröy.

²⁷ Ochopan kong portanyu apöyï, tömötöp otini komchan pikö walaka kumuchö, ketaghanïn.