1 KORINTO 6 - PIPÏLIA

¹ Mukychini chi nyo ghanate lö ne ompö kwenunkwa kïnyökönitu ntökwip werïngwa ka kirwoko pich cho menkïtcha Tororöt nyo kötemïtöy tawu pipö Tororöt?

² Monkïtökwanye so lö, rwokyini pipö Tororöt ngwïny? Kïkany nyu ato orwokyinekwa ngwïny, kïmomukekwanye ompö orwokyine ngal cho mïnkech?

³ Monkïtökwanye so lö kirwokyinecha malayken asïyech? Ekemukecha nyu kerwokyine kïnyïl cho tya tïkwïn cho pö söponï?

⁴ Ato töp ngala cho lata choni ntökwitï, opchinekwa so pich cho möyongöcha kanisa kïmutöy?

⁵ Kosïkökwa akwane arasï! Poru so nyoni lö möminye chi nyo le ompö akonga kwenunkwa nyo ngöghom nyo muköy kïsötöy kömpölelyo pipö kanisa?

⁶ Nyo kötölïku nyoni, kwip kighönintö werïngwa ka kirwok kïmut ngalekwa pich cho melö tïng kighanat.

⁷ Nyo pö nyoman ato orwokyinekwa kegh akwane, kuporu nyoni lö kikerïntakwa nyoman! Mö kökaram so ato kigheghchokwa? Mö kökaram so ato kïmasenakwa tïkukwo?

⁸ Wölo nyo kötoghekwa lenyoni, olelchikwa kegh, amasa tïkwïn pïchini le kighöni le akwa.

⁹ Anta monkïtökwanye lö mönyorucha pich cho ghach Pöyunöto Tororöt? Malïs kegh! Melö nyoru Pöyunöto Tororöt pich cho le cheporesay anta cho soghöy körkeyïntin anta ptakalis anta kalomök

¹⁰ anta mosï anta sïköyö anta ptamasis anta kiswomï anta chorï.

¹¹ Kimi pich walaka ompö kwenunkwa cho kighöy le pïchoni. Wölo kikemwatakwa ye aketïlilokwa akelinyokwa nko Tororöt ompö kaynata Echotyon Yeso Kristo* nko ompö ara Mïkulöwu Tororötïnyo.

Opöghisyeghenö porwöyikwo ompö ororyo Tororöt

¹² Lentöy chitö anka, “Kïchömwanïn oghöy kïgh anka tïkwïl.” Owöy, wölo melö karam kïgh anka tïkwïl ompö chi. Omukan amwagh lö, mokïranye kïgh anka tïkwïl, wölo mochömanye olïku sekeyonto kïgh anka tïkwïl.

¹³ Mwoghöy chitö anka lö, “Pö omisyö mu akï pö mu omisyö.” Owöy, wölo nyoröy Tororöt choni kwodeny. Melö pö por pö chi cheporesnan wölo pö pöghisyo Echotyon, akï Echotyon nyo pö por.

¹⁴ Kigh Tororöt Echotyon kututunö ngwen akwighecha tïkwïl ketutune ompö owesyenyi.

¹⁵ Monkïtökwanye lö ngichayayi por pö Kristo porwöyikwa? Ononekwa nyu lö omukan ogh kareranpa por pö Kristo kïlïkwï kareranpa por pö chepkartayan? Puryö!

¹⁶ Anta monkïtökwanye nya lö lïku chi por akonga nko chepkartayan ato ryam portanyi nko nyenyi? Le wölo kirate lö, “Lïku chane kwodeny por akonga.”

¹⁷ Wölo chi nyo kelinyö kegh nko Echotyon kïlïku mïkulögh akonga nko nyinte.

¹⁸ Okïrenö kegh cheporesnan. Ighisyegho ngokï walaka löwïr sanypa por, wölo igho chi nyo le cheporesyan ngokï portanyi ori.

¹⁹ Monkïtökwanye so lö porwöyikwa kï kö pö Mïkulögh nyo Tïlil nyo mitonekwa, akï Tororöt nyo kikonokwa? Melö opoyekwa nyu kegh.

²⁰ Kikyalenakwa olyot nyo wow. Kïlenyona, opöghisyeghenö porwöyikwo ompö salata Tororöt.