1 KORINTO 5 - PIPÏLIA

¹ Mi man, lö mi kwenunkwa ngala cheporesanan, akï cheporesnan nyo gha nyo tomönye ompö kelïmchï pich cho menkït Tororöt. Kakemwowanïn lö mi chi akong ompö akwa nyo katakalan nko korketo kwanta!

² Omukekwa nyu okwole kegh lö ne? Nyinö kötö okwolöy kegh, ayona kwenungwo chichini kegh lenyoni.

³ Kïkany ompö okuntönyan, kïrkegh kochan low nko akwa, Kï mi mïkulöwunyan nko akwa le ato kötomitan wöloni, kïlenyona, kyorwokyan chichoni kegh kïyoni pö arasï ompö kayna Echotyon Yeso.

⁴ Otini koghömekwa löwïr omitan tïkwïl nko akwa ompö mïkulögh, opkonyntö nyu chichoni ompö owesyo Echotyontenyo Yeso, nyo mi nko acha,

⁵ atö Onyöt tökuwur portanyi, tökemï kesörï mïkulöwunyi ompö Asis pö Echotyon.

⁶ Melö mïchinokwa okwole kegh! Monkïtökwanye so lö kutu mumar cho le tïkwïte pïsya cho chang cho kïmimïghöy kegho makatin?

⁷ Kïlenyona nyu alastena mumara ngokï cho pö köny atarelachituna le nkanun cho kakïtïntïr, cho puryö mumar, kïle wölini kömïchinokwa nyoman omitenö kïpuryö mumar. Ompöwölo kakepar Kristo* Wawa Kech nyo pö Tororöt kïlïkwï Pasakencha.

⁸ Kyama nyu ichonto Pasakenyo, amökyam nko makatyan nyo kaketö mumara köny cho pö ngokï nko ghöyityö, wölo nko makatyan nyo puryö mumar, nyoni kï makatyanta tïlilyö nko man.

⁹ Kyakirwekwa ompö palalyantenyan lö motuyö kegh nko cheporestin,

¹⁰ wölo molenchï kegh kyamwaghan ompö pipö ngwïny cho le cheporestin anta chepö mutïn anta chorï anta cho soghöy körkeyïntin. Ompöwölo kepesyö nko pich cho lata choni, kïlenye ato kakïpegha ngwïnyinï kokay!

¹¹ Wölo kyakirwekwa lö motuyö kegh nko chi anka tïkwïl nyo lentöy ochï kighönin, akwanyï cheporesyan nyinte anta che pö mu anta soghöy körkeyïntin anta mwosïyi anta tömösin anta chorin. Motöp ntomisyö ompö nko chi nyo lata nyoni.

¹² Nyo melö orwokyï pich cho mi sany. Melö so parakunkwa orwokyine pich cho omitekwa tïkwïl ghömïchö?

¹³ Kurwokyï Tororöt chane chinö mi sany. Kïlenyona ayona mwokïyis ompö kwenungwo.