1 KORINTO 4 - PIPÏLIA

¹ Nya kuyitecha chi lö kichicha mötwori Kristo akechï komöni wïngut pö Tororöt.

² Kïgh nyu ngat nyo kïmöko komönini anka tïkwïl kï kighanat.

³ Melö kïgh ompö ani ato orwokwanïkwa anta rwokwanïn pich amelö wiranïn choghïn ompö.

⁴ Molïmchinanye kegh choghïn nyonikïny ompö söpontönyan, wölo meporunye nyoni lö motïngetanye lelut. Echotyon onkït nyo rwokyinanïn.

⁵ Kïlenyona, morwokyï chi anka tïkwïl kïtomö kwitïta asistanyi, opïstenö tökïtenö kungwïn Echotyon, nyinte nyo pköngöy tïkwïn cho kikïwïnchï wölo tuw akuporï möchut pö mïkulis pö pich, atökïnyorunö nyu Tororöt chi anka tïkwïl salat nyo mïchini.

⁶ Werköcho, kopöghisyeghan ngalechï löwïr kangalanan kegh nko Apolo kïlïkwï körkeyïn ompö akwa atamuka anetenecha kegh atömatïl kikirut cho lentöy, ato makany kïkwol kegh chi nyo le ompö akonga akïsas anka.

⁷ Ngo nyo keghinyi wowitunenö pikö walaka nya? Melö so Tororöt nyo kikoninyi tïkuchoni löwïr itïngetenyi? Ato lenye nyoni, kwompö ne tekwolenyi kegh le ato melö ropöw tïkuchoni itïngetenyi?

⁸ Kyopïghyekwa ye nyu! Kyalïkukwa sïkön! Kyalïkukwa pöytoghï amelö kïmitecha nko akwa! Owöy, wölo ntökopöytonekwa nyoman kuten, atökemukacha tïkwïl kepaytena nko akwa!

⁹ Olentan keghecha Tororöt chï kïchï kiyoktoghï kelïkuna cho pö löt, le pich cho kikerwokyï ketïgh akeghech kelïkuna pich cho topönöy ngwïny kïmïkul nko malayken nko pich.

¹⁰ Kichicha sölwöy akwompö Kristo, wölo ochikwa ngöghomöch ompö Kristo! Kichicha nyörkölöle, ochikwa owesöch. Ochikwa konyïtote, wölo melö kïtekecha.

¹¹ Amatecha kömöy nko maral ye, kïchicha chïrutöch, akemungecha. Melö kïtïngetecha wölo kïmöngöy.

¹² Kïsïngonecha ighisyewut cho kighonecha moricho. Kisoyönecha pich cho chopecha kong akemïkukönöy ato mïrchecha chane put.

¹³ Ato mïrchecha pich putintön kesoghsoghecha chane, kikelïkucha samï ompö ngwïny, tïkwïn cho kipuktoy akelasta nko ompö nyete le ye.

¹⁴ Melö kakirwakwa ngalechï lö tonyorunökwa arasï, wölo tanetakwa le monechu cho ochömöy.

¹⁵ Ompöwölo kïrkegh kotïngetekwa kintöghoghï cho möngörï ompö otöptönkwa nyo pö Kristo, kïmelö otïngetekwa papotïn cho chang. Ompöwölo alïkwan paponkwa ompö Kristo Yeso ompö ara Lökoy cho Karamach.

¹⁶ Kïlenyona, osomokwa lö arïpa otöptönyan.

¹⁷ Nka nyona koyonwokwa Timoteo. Montönyan nyinte nyo le chaman, akï ghanate ompö ighisyenyi nyo pöghisyechini nyinte Echotyon. Nonwekwa nyinte ortïnechan ompö Kristo le otini onetan kanisen löwïr ompö woptin löwïr.

¹⁸ Kokwolökwa kegh walaka ompö kwenungwa, ompöwölo ononekwa lö melö tongwïnan ngat orutowokwa.

¹⁹ Wölo ato cham Echotyon orutowokwa ato lekït, atonkïtwan nyu ante, owesyö nyo tïng pïchoni kwolöy kegh, amelö ngal pat cho mwoghöy chane.

²⁰ Ompöwölo pö Pöyunöto Tororöt owesyö, melö ngal kwïle.

²¹ Ne nyo kaykay ompö akwa nya? Ongwïnan nko lïkïp nya anta angwïnan ompö mïkulöwu chomnyogh nko tölosyö?