1 KORINTO 2 - PIPÏLIA

Ngal cho ngölono Yeso nyo kikïwudochï kimurtöwon

¹ Atanye kyangwïnan wölo omitekwa werköcho, kïmelö kyamtan ngala Tororöt cho wïngote ompö onyïnio ngal anta ompö ngöghomnyo ptangengmöt.

² Ompöwölo kimamakanye onkïtï kïgh anka tïkwïl atanye kyomitan nko akwa, kïpoto Yeso Kristo* nyinte nyo kikïwudochï kimurtöwon.

³ Kyochan nyarkalal atanye kyomitan nko akwa apotanan ompö otyogh nyo wow.

⁴ Amelö kipö ngalechan nko amtaghtanyan chïreryo ngal cho pö ngöghomnyo pich, wölo kikikïniniö akeporï ompö owesyo Mïkulöwu Tororöt.

⁵ Melö ghyongo nyu kighanatenkwa ngöghomnyo ptangengmöt, wölo ghyongo owesyo Tororöt.

Ngöghomnyo Tororöt

⁶ Kïrkegh kïlenyoni, kepöghisyeghonecha ngala ngöghomnyö ompö pich cho kikilyö ompö kighanat, wölo melö ngöghomnyo ngwïnyinï anta nyo pö pöytoghi ngwïnyinï cho mi owesyengwa kïwonyotoy.

⁷ Ngöghomnyö nyo kïpöghisyeghonecha kï ngöghomnyo Tororöt nyo kikiwïnya ptangengmöt kïngeta nyini le towunöto ngwïny, wölo kikikïkïl nyinte ompö ororyencha.

⁸ Möminye pöytoghinto ngwïnyinï nyo pköchini ngöghomnyoni. Ntökinkït kitömelö wudochini chane Echotyonto ororyö kimurtöwon.

⁹ Wölo kïle wölo mwoghtoy Kikirut lö, “Kighchï Tororöt pich cho chömöy nyinte tïkwïn cho kitomöcha kïsïwa kong anta lïm yit, tïkwïn cho kitomöcha kïpköchï ptangengmöt.”

¹⁰ Köngongwecha Tororöt tïkuchoni ompö ara Mïkulöwunyi. Ompöwölo sökosöy Mïkulögh tïkwïn löwïr cho pö Tororöt, kïrkegh ompö cho mi ori tya.

¹¹ Ompöwölo chi ngo nyo nkït tïkwïn cho mi mïkulöwu chi kïpoto mïkulöwuto chichoni onkït? Kïlenyoni tïkwïl, möminye chi nyo nkït tïpö Tororöt kïpoto Mïkulöwu Tororöt.

¹² Melö kakïtakacha ye mïkulöwu ngwïnyinï, wölo kakïtakacha Mïkulögh nyo ngwïno wölo mi Tororöt atökemuka kenkïtunö tïkwïn cho kikonecha Tororöt.

¹³ Kïlenyona, melö kinetecha ngal cho kikinetecha ompö ngöghomnyo ptangengmöt, wölo ngal cho kinetecha Mïkulögh, otini kïmitecha kenetöy ngala man cho pö mïkulögh ompö pich cho tïng Mïkulöwu Tororöt.

¹⁴ Melö toköy chi nyo mi otöp nyo pö por ropöw cho konu Mïkulöwu Tororöt, ompöwölo sölwontön tïkuchoni ompö nyinte, ompöwölo kinkïtuno tïkuchoni ara mïkulögh.

¹⁵ Wölo muköy chi anka tïkwïl nyo tïng Mïkulöwu Tororöt kunkïtu wölo karamta kïgh anka tïkwïl akï möminye chi nyo muköy kurwokyini nyinte.

¹⁶ Kïle wölo mwoghöy Kikirut lö, “Ngo nyo nkït kinonut pö Echotyon? Ngo nyo muköy kururöy nyinte?” Wölo kïtïngetecha kinonutyo Kristo.