1 KORINTO 16 - PIPÏLIA

Pasa nyo kingöroko pipö Kristo*

¹ Omwoghan ye nyu kïparta pasa ropïyen cho kingöroko pipö Tororöt: agha le nyaye kyomwochan kaniseni Kalatia.

² Akanya kïror chi anka tïkwïl ompö akwa ropïyenichi Chumapili anka tïkwïl kïrïp kegh nko cho könyorï nyinte atömömi machata nyo pö pasa ropïyen ato atwan.

³ Otini katwan korenkwa, oyontonan pich ompö kwenunkwa cho okïlekwa, kwip palalaltin nko ropöwekwa kutang Yerusalem.

⁴ Ato mïchini owan ante owetan nyu tïkwïl nko chane.

Tötut pö Paulö

⁵ Onyoghan oweru Makedonia kïtomö orutowokwa ompöwölo otïngetan machat lö tawer Makedonia,

⁶ akïtöptoy otöponan nko akwa ompö osis cho te, anta otöpan köny nko akwa ompö osiswo kaghïtan löwïr atamukakwa nyu angarakanïn alet tagh nko pantanyu ompö woptin löwïr cho owetan.

⁷ Melö omökan okuskusöy oweröy korenkwa ompö rutoghtönyan. Ononan lö otöponan nko akwa osis cho te, ato cham Echotyon.

⁸ Wölo totöponan wölete le Epeso ntökwitïta asispa Pentekoste.

⁹ Ompöwölo kakeyotwanïn kukat ompö yete nyo pöro nyo mïchini ighisyenyan nyo wow, kïrkegh kömi pich cho chang cho miranïn.

¹⁰ Ato ngwïn Timoteo korenkwa, makany kïsïch nyökoryö nyonikïny otini omitekwa tïkwïl, ompöwölo ighöy nyinte ighisyo Echotyon le ani.

¹¹ Kïlenyona nyu, makany kïsas chi anka tïkwïl nyinte, wölo angarak kulet tagh nyinte nko rutoghtanyi ompö kalya atökumï kungwïn wölï omitan, ompöwölo okönan nyinte nko werköcho cho omitan tïkwïl.

¹² Ye nyu ompö ngala werïnyo Apolo, kyasaghan nyinte nyoman kïrutowokwa nko werköcho walaka, wölo katagh nyinte lakat kungwïn otï le ye, wölo ngwïnöy lawel ato muka.

Ngala söröm

¹³ Oripsyenö, achïchïm lasiny ompö kighanat, alïkwï nyökon cho tïng owesyö.

¹⁴ Opöghisyeghenö chomnyogh ompö kïgh anka tïkwïl nyo oghöy.

¹⁵ Onkïtökwa, werïnyo Stepana nko piko konyi lö chane cho kipö tagh kughan ompö Akaya, akikïkonï kegh chane kïpöghisyechï pipö Tororöt. Osoghokwa ye nyu, werköcho, lö

¹⁶ arïp kintöghoghchin nyo pö pich cho lata choni nko pikö walaka cho pöghisïyi nko chane.

¹⁷ Ochan ngarakate nyoman ompöwölo kipka ompö Stepana nko Portunato nko Akayko. Kïpka kunyïghit chane rartagh nyo kimi ompöwölo kimomitekwanye.

¹⁸ Akwighanïn angarak lenyini ighokwa tïkwïl ongörekyenö. Mïchini nyu ananakwa tïkwïl pich cho lata choni.

¹⁹ Ketakwesakwa kanisen tïkwïl cho mi Esya akutakwesakwa Akwila nko Priska nko kanisa kïmïkul nyo mi kongwa ompö kaynata Echotyon.

²⁰ Ketakwesakwa werköcho tïkwïl cho mi wölete wöl. Atakwesa kegh ompö kinkonköyöt nyo tïlil.

²¹ Kakiran ante, Paulö ompö morichu ngalechete.

²² Akanya kïchïpö chi anka tïkwïl nyo möchömönye Echotyon! Maranata, nyoni kï, Nyonö Echotyontyenyo!

²³ Nya kïtöpö pöropcho Echotyon Yeso nko akwa.

²⁴ Nya kïtöpö chomnyenyan nko akwa löwïr ompö Kristo Yeso.