1 KORINTO 15 - PIPÏLIA

Kitutunöto Kristo*

¹ Ochöman ye werköcho, ononwokwa, Lökoy cho Karamach cho kyomwokwa, atakakwa akï choni ye cho ghyongo kighanatenkwa

² akesörunenokwa choni ato ananakwa lasiny ngalechanye kyomwokwa, ato melö kwïle kighanatenkwa.

³ Ompöwölo kyokonokwa ngal cho pö kinyiwut cho kyonyorwan ante otini le tagh lö, kima Kristo ompö ngokicho kïrïp kegh nko Kikirut,

⁴ aketïp akututï asis nyo pö sömök kïrïp kegh nko Kikirut

⁵ akuporchï kegh Petro nko pïchay le taman nko odeny.

⁶ Atolapay kuporchï kegh kighönï cho tïlöy 500 cho kimi otini akonga, atökïsötote cho chang nyete le ye, kïrkegh kakïmeghö walaka.

⁷ Atolapay kuporchï kegh Yakopo akuporchï kegh Pïchay kiyoktö Yeso löwïr.

⁸ Ato mi lötuto pïchoni tïkwïl, kuporwanïn kegh tïkwïl, ani nyo alatan monïng nyo kakïyï kïtomö kwitïta osiswechi.

⁹ Ompöwölo ochan mïnïng tya ompö pïchoni löwïr Kiyoktö Yeso, amömïchinanïnye ompö kekurenanïn kiyoktoghin,* ompöwölo kyachopan kong kanisa Tororöt.

¹⁰ Wölo kalïkwan le wölo alatan ompö pöropcho Tororöt, amelö kikonanïn nyinte poropchenyi kwïle, wölo kyopöghisyan tya kïtïl chi anka tïkwïl ompö chane löwïr wölo melö ani, wölo pöropcho Tororöt nyo pöghisïyi nko ani.

¹¹ Kïlenyona ato ki ani nyo kyamta anta ki chane, kï choni cho kyomtonecha löwïr akï choni cho kyaghanakwa.

Kitutunötencha

¹² Kïlenyono ato kyomtonecha lö kitutï Kristo ompö ngwen, kwompö ne tökïmwoghöy pikö walaka cho omitekwa tïkwïl lö metutucha pich cho?

¹³ Ato möminye kitutunöto pich cho meghyot, kuporu lö kï chï metutïnye Kristo.

¹⁴ Ato kimetutïnye Kristo ompö ngwen, kwïle nyu ngalechï kyomtonecha akï kwïle tïkwïl kighanatenkwa.

¹⁵ Akïmöchonicha opïn, wölo kïlïkunecha söwi putintön ompö tawu Tororöt, ompöwölo kikïmïrchicha Tororöt putintön lö kigh Kristo kututunö ngwen akwanyï kïchï melö kigh nyinte kututunö wöloni ato man lö metutucha pich cho kimeghö.

¹⁶ Ompöwölo ato metutucha pich cho meghyot nyo pö nyoman, kïmelö kitutï Kristo tïkwïl.

¹⁷ Ato melö kitutï Kristo, kï kwïle kighanatenkwa akïtomitenökwa orïto ngokikwo.

¹⁸ Akïmöchonicha opïn, wölo kikupotyö kïpa kokay pich cho kimeghö ompö ori pö Kristo.

¹⁹ Ato pö kikönötencha nyo mi ompö Kristo söponete pö ye onkït, kechicha nyu pich cho mïchini kesyonchï kïtïl pipö ngwïny kïmïkul.

²⁰ Wölo nyoman kitutï Kristo ompö ngwen, atökïlïkwï kikïniniot nyo poru lö tutu tïkwïl asïyech pich cho karuyö ompö meghat.

²¹ Ompöwölo kïle otini kingwïna meghat chi akonga, kungwïno kitutunöto pich cho meghsot tïkwïl chi akonga lenyoni.

²² Ompöwölo kïle otini meghsot pich tïkwïl ompöwölo kinomnyö chane nko Adam, kïlenyoni tïkwïl, tutu pich tïkwïl cho kelinyö kegh nko Kristo.

²³ Wölo tutuno anka tïkwïl otöptanyi: Nyo pö tagh kï Kristo. Kïrïpta nyu pikachi asisoni itu Kristo.

²⁴ Ato wanta kegh, kwitï nyu söröm ato töni Kristo Tororöt Paponyi Pöyunöte, otini kewany Kristo kunategha paytagh anka tïkwïl nko wowïn nko owesyö.

²⁵ Ompöwölo pöytoy Kristo lenyini tökïtenö kïrïnta Tororöt pungkachi löwïr akutö chane ngwïnyito kelyechi.

²⁶ Punyon nyo pö löt nyo kinyoröy, kï meghat.

²⁷ Ompöwölo lentöy Kikirut, “Kikutö Tororöt tïkwïn löwïr ngwïnyito kelyechi.” Wölo otini mwoghöy Kikirut lö, “Kitöni tïkwïn löwïr ngwïnyito kelyechi atökïpayta,” kuporu lö melö kighomisot Tororöt nko tïkuchoni, ompöwölo nyinte nyo kitö tïkuchoni ngwïnyi Kristo.

²⁸ Wölo otini kaketö tïkwïn löwïr Paytaghpa Kristo, kutö nyu kegh Wero Tororöt ngwïnyito Kwanta nyo kitö tïkuchoni kïmïkul ngwïnyito Pöyunötenyi atökïpayta nyu Tororöt kïgh anka tïkwïl lasiny.

²⁹ Entökömökïmi nyu kitutunöto pich cho kimeghö, kötekönöy ne chane cho kakipötisönchï pich cho kimeghö? Antököle nyo kömekututucha pich cho meghsot, kwompö ne nyu tökepötisönöy pich ompö cho kimeghö?

³⁰ Akï ne nyo kawasecha, töketönö kegh tapan ompö sa anka tïkwïl?

³¹ Werköcho, wïranïn choghïn pö meghat asis anka tïkwïl! Keghanïn salata nyo otïngetan nko akwa ompö ghömïcho Kristo Yeso Echotyontenyo omwowan ngölyontononi.

³² Ntö kipö ptangengmöt kerötenyan, kötö kwïle poryenyan nko tïpö wudïn cho köromöch ompö wölete le Epeso. Ato metutucha pich cho kimeghö, kïlenyona le nyay kïlentöy, “Kyomisyenö nyu akegheghsyö, ompöwölo kïmeghsot asïyech.”

³³ Makany kelïsak! Nyoröy kongotnön nyo gha otöp nyo karam.

³⁴ Ochïkonchenö, alet tagh otïpï otöp nyo karam, amagha ngokï ngat. Kamwaghan ngalechoni ompöwölo mi kwenunkwa pich cho menkïtcha Tororöt. Onyorunonekwa ngalechoni arasï komwowokwa.

Por nyo tutu

³⁵ Wölo muköy chi anka kïtepöy lö, “Akututu pich cho kameghö lö ne? Akï pkonöy chane nko por nyo nen?”

³⁶ Ne nyï sölwe! Melö ghyöghöy kösïghyontononi ikötkötenyi ato manïnye.

³⁷ Ikötkötenyi kösïghyon pat, nyo kö pö nkanun anta kö pö mosyon anta kö kösïghyon anka kïnye kïtïkon, melö mosyonte kïmïkul nyo pitu asïyech.

³⁸ Tororöt nyo töni kösïghyontononi porini kömököy nyinte. Nyoru kösïghyontö anka tïkwïl portanyi kïsis.

³⁹ Melö karkegh porwöy löwïr cho pö tïkwïn cho kikigh. Tïngeto pich por nyo sis, kïtïng tyonkïn portö anka, kïtïng töritwö anka nyo sis, kïsis portö nyo pö kaghagh.

⁴⁰ Mito porwöy cho pö yïm, kïsis pïchighyo porwöy cho pö ngwïny.

⁴¹ Tïngeto asis pïchighyenyi, kïtïng arawa nyenyi, kïtïng kokel nyingwa. Akwompö chini le kokelye chane kï sisach chane ompö pïchighyö.

⁴² Kïlenyenyoni tïkwïl kitutunöto pich cho meghsot, kïtïpchini por ngwïny ompö otöp nyo nïnöy le kösïghyon, wölo kighöy kututï ompö otöp nyo melö nïnöy.

⁴³ Kïtïpöy kïtïng nyörkölelyö, keghöy kututï kïtïng owesyö.

⁴⁴ Por pö chi pat otinö kïtïpöy, wölo por pö mïkulögh otinö tutu. Ato mi por nyo kïyiytoy chi, kïmi por tïkwïl nyo pö mïkulögh.

⁴⁵ Ompöwölo lentöy Kikirut, “Kilïkwï Adam nyo pö tagh chi nyo söpote,” wölo kïlïkwï Adamto söröm Mïkulögh nyo töni pich söpon.

⁴⁶ Wölo melö ntöghoghu cho pö mïkulögh, wölo por nyaye kïyiyöy, atolapay kïrïpta nyu cho pö mïkulögh.

⁴⁷ Kikigha Adam nyo pö tagh nyïngwïtyanta ngwïny kungwïna chi nyo pö odeny yïm.

⁴⁸ Kïle wölo lata chichoni pö nyïngwïtyan kïlata choni tïkwïl chane cho pö nyïngwïtyan. Kïkany wölo lata nyinte nyo kingwïna yïm kïlata choni chane cho pö yïm.

⁴⁹ Kïle wölini kïkörecha kegh nko chichoni kikigha nyïngwïtyan kekörecha kegh tïkwïl nko chichoni kingwïna yïm.

⁵⁰ Omökan omwoghöy lö, tupchenichu: memukönye kïgh nyo kikigha por nko kisön ntökïmïl Pöyunöto Tororöt akïmemukönye kïgh nyo wïröy ntökïsïch otöp nyo möwïrönye.

⁵¹ Atere ya omwowokwa ngölyonto man nyo wïnyate, melö kïmeghsonecha löwïr, wölo kïwöghökecha löwïr,

⁵² panini lawel le ato kakimis kong akengany otini köchögh kontï nyo pö söröm. Ompöwölo otini köchögh kontinoni, kegh pich cho kimeghö kututï akïtïpï ompö otöp nyo melö tökïnïnöy ngat, akewaghakecha.

⁵³ Ompöwölo mïchini kulak kïyoni nïnöy otöp nyo mönïnöy, atökumï por nyo muköy kïmeghöy kulak otöp nyo mömeghönye.

⁵⁴ Ato lach porï nïnöy otöp nyo mönïnöy, ato lach kïgh nyo meghöy otöp nyo mömeghönye, kwitïta nyu ngölyontonay kikikir lö, “Kakiwur meghat, ketïta rïntagh!”

⁵⁵ “Mi onö rïntaghtangu nya meghat? Akïmi onö owesyengu nyo pö ngwonïn nya meghat?”

⁵⁶ Nyoruno meghat owesyenyi nyo rïmo pich ngokï, kïnyoruno ngokï owesyenyi kirurut.

⁵⁷ Wölo kesala Tororöt nyo konech rïntagh ompö Echotyontenyo Yeso Kristo.

⁵⁸ Kïlenyona Werköcho cho le chaman achïchïma, amakany ketimtimok, alet tagh agh ighisyo Echotyon kïtenö osis, ompöwölo onkïtökwa lö möpönye kwïle pöghisyenkwa nyo opöghisyechinekwa Echotyon.