1 KORINTO 14 - PIPÏLIA

Ropöw walaka cho pö Mïkulögh nyo Tïlil

¹ Okilö kegh nyoman ayara chomnyogh, akil kegh tonyorunö konutkö walaka cho pö ara mïkulögh, kïmïr tya nyo pö amtaghata ngölyonto Tororöt.

² Melö ngölonöy chi nyo ngölonöy kut nyo sis nko pich, wölo ngölonöy nko Tororöt, ompöwölo möminye chi nyo lïmöy ngalechi. Ngölonöy nyinte ngal cho pö wïngut ompö owesyo Mïkulögh.

³ Wölo chi nyo tïng ropöwonto amtaghata ngölyonto Tororöt, kïngölonöy nko pich tökïtek, akïsaghsagh, akukil chane.

⁴ Kilöy kegh onkït chi nyo ngölonöy kut nyo sis, wölo kilöy kanisa kïmïkul chi nyo omtoy ngölyonto Tororöt.

⁵ Omökan ongölonekwa kut nyo sis, wölo kötomökan tya osïkekwa ropöwon nyo pö amtaghata ngölyonto Tororöt, ompöwölo tïng kinyiwut tya chi nyo omtoy ngölyonto Tororöt, kïtïl chi nyo ngölonöy kut nyo sis, kïpoto ato mi chi nyo wöghöku ngalechoni mwoghöy nyinte, atökukil kanisa.

⁶ Kïlenyona nyu werköcho, ekungörokokwa ne ato orutoghwokwa, angölonwokwa ompö kut nyo sis? Melö nyiwu kïgh nyonikïny ompö akwa, kïpoto pat ato okonokwa ngongut nyo ngwïno wölo mi Tororöt, anta kinetutkö walaka.

⁷ Kïlenye nyoni tïkwïl karïn cho melö tïng söpon, cho chöghsot le kurerun anta pïkantis. Muköy tumin kunkïtu lö ne tum nyo kïtumöy ato chumponchö chöghöto karichoni?

⁸ Kïkany ato chögh kontï amölïmönye chi lasiny, ngo nyu nyo nopöy kegh ompö poryot?

⁹ Kïlenyoni tïkwïl ompö akwa, muköy chi kunkïtu lö ne kini omwoghekwa ato kïmwowï ngalekwa ompö kut nyo sis? Kutöy yomöt ngalekwa pat.

¹⁰ Mito ngala cho chang ngwïny akï möminye nyo le ompö akonga nyo chopöy kïgh nyo mwowu.

¹¹ Wölo ato möpköchinanïnye ngala cho ngölonöy chitö anka kïlïku chichoni chi anka ompö ani alïkwan tïkwïl chi anka ompö nyinte.

¹² Kïlenyoni ompö akwa tïkwïl, kïle otini opïrchinekwa lasiny lö tökïsïch ropöwo Mïkulögh, kïmïchini okilökwa kegh tya ayar tïkwïn cho ngöroköy kukilöy kanisa.

¹³ Kïkany chi nyo ngölonöy ngala pich cho, kïmïchini kïsagh atökumï kïwöghökwï ngalechoni.

¹⁴ Ompöwölo ato asaghan kut nyo mölïmönye chi, kï mïkulöwunyan nyo soghöy, wölo mötïngnye pköchin ngöghomnyenyan.

¹⁵ Oghan ne nyu nya? Osoghonan mïkulöwunyu, asoghonan ngöghomnyenyu. Otumonan mïkulöwunyu, atumonan ngöghomnyenyu tïkwïl.

¹⁶ Ato isalenyi mïkulöwu Tororöt kïpoto, kumuköy nyu lö ne chitö anka nyo mi tuyononi kughönöy saghatengu nyo pö kisoyönöt lö, “Amen,”* ato melö kenkïtï nyinte kïyoni kemwaghanyi?

¹⁷ Kïrkegh kö karam saghatengu nyo pö kisoyönöt lö ne, wölo möminye kingarakata nyo könyorï chitö nyinö anka.

¹⁸ Oyokyinan Tororöt sörö ompöwölo ongölonan kutïw cho sis kïtïlakwa löwïr.

¹⁹ Wölo ochöman tya ongölonöy ngal mut cho lïmöy pich ato kïtuyegho kanisa atamuk anet pikö walaka, kïtïl kengalan ngal cho mökïrar ompö kutïw cho mökïlïmöy.

²⁰ Makarkegh, werköcho nko tengon ompö kinonutkökwo, wölo alïkuna le tengon ompö ngal cho ghach, alïkwï pich cho echön ompö kinonutkökwo.

²¹ Kikikir ompö kirurut lö, lentöy Echotyon, “Ongölonchinan pïchï ompö pich cho le to, angölonchï chane ompö kutïw cho sis, akï kïrkegh aghan lenyoni, melö terwanïn.”

²² Kïlenyona nyu, ropöwonto ngalanata kutïw cho sisach kï machey nyo melö pö pich cho ghönote, wölo macheypa pich cho tomönye kughan, wölo ropöwonto amtaghta ngölyonto Tororöt kï macheypa pich cho ghönote.

²³ Kwoto tuyö nyu kanisa kïmïkul akïngalana chi anka tïkwïl kutïw cho sisöch akwitï pikö walaka kanisanoni cho tomöcha kughan anta pich walaka kïnye kïtïkon, mömwoghöcha chane lö ipotokwa oy?

²⁴ Wölo ato amta chi anka tïkwïl ngölyonto Tororöt akungwïn chi kanisanoni nyo tomönye kughan anta chi anka tïkwïl kïnye kïtïkon, kurwokyini ngokichi ompö ngalechoni lïmöy nyinte. Rwokyini ngalechoni löwïr lïmöy nyinte,

²⁵ yotisyot kinonutkachi cho wïngote. Kïtïngo nyu nyinte tawu Tororöt akughan lö, “Mito Tororöt nyoman nko akwa.”

Tatat nyo mi kanisa

²⁶ Anyï kïyoni omwoghan, werköcho. Otini karyamakwa asagh, tumö chitö anka, kunetisyö anka, kïmwowï anka ngongut nyo ngwïno wölo mi Tororöt, kïmwowï anka ngölyon ompö kut nyo sis, kïwöghökwï anka ngalechoni. Mïchini kegh kïgh nyo kilöy kanisa.

²⁷ Ato mito pich cho tïng ropöwon nyo kïngölono kutïw cho sis, akany kïngalan pich odeny anta sömök melö cho chang, akukentoy kegh chane. Kïmi chitö anka nyo wöghöku ngalechoni.

²⁸ Wölo ato möminye chi nyo muköy kiwöghöku, kïsï ompö tuyot chichoni ngölonöy ngal cho sis, akïngalan onkït nko Tororöt.

²⁹ Kïkany pich cho tïng ropöwon nyo netöy ngölyonto Tororöt, opïsï kïngalan cho le odeny anta sömök, kïmi pikö walaka kïtötöpöy ngalechoni kakïmwa.

³⁰ Wölo ato töp chitö anka nyo mi tuyononi tökïlïm ngölyon nyo köngongchï Tororöt, kïmïchini nyu kïsï chi pö köngölonöy.

³¹ Ompöwölo omukekwa ongölone tïkwïl ngölyonto Tororöt okentoy kegh, atamuka löwïr aneta kegh akil kegh.

³² Mïchini kïpöyï chichoni tïng ropöwon nyo omteghoy ngölyonto Tororöt ropöwontononi,

³³ ompöwölo Tororöt kïmelö Tororöt pö kiwulyot, wölo pö nyinte kalya. Kïle wölo lata kaniseni Tororöt kïmïkul,

³⁴ mïchini kïsisyö korï ompö tuyotïno kanisen. Melö kïchömchini chane kïngölonöy, kïle wölo mwoytoy kirurut pö pipö Yaudi lö mïchini kïrïng kegh chane,

³⁵ ato mököy chane kunetöy kegh kïgh, akany kïtep santokökwa ompö kestonikwa, ompöwölo arasï ato ngalan korï ompö kanisen.

³⁶ Ne nyu nya? Olentekwa so kingwïna ngölyonto Tororöt wölo omitekwa? Anta kingwïnchokwa opïnï?

³⁷ Ato nonöy chi anka tïkwïl lö ochï werkoyon anta otïng ropöwon ompö ara mïkulögh, kïmïchini kïpköchï lö kirurutyo Echotyon nyoni kakirwakwa.

³⁸ Wölo ato möpköchïnye chi ngalechoni lenyoni, kïmömïchininye nyu kunan chi nyinte.

³⁹ Kïlenyona nyu, werköcho, mïchinokwa osïkö machat nyo wow nyo omtoy ngölyonto Tororöt, wölo matagha chi kïngalana kutïw cho sis.

⁴⁰ Wölo akanya kwighisyö choni löwïr ompö konyït nko ompö tata nyo tenate.