1 KORINTO 11 - PIPÏLIA

¹ Arïpanïn nyu, le wölo orïptonan Kristo.*

Keyen möt ato kïsoghöy

² Osölokwa ompöwölo ononanïkwa ompö ngal lö poy, arïpekwa kinetutchay kyorurokwa.

³ Wölo omökan onkïtunekwa lö pöytoy Kristo mïrön anka tïkwïl, kïpöytoy mïrönö korkenyi, kïpöytoy Tororöt Kristo.

⁴ Kïlenyona, ato soghöy mïrönö anka tïkwïl, anta ato mwowu ngölyonto Tororöt ompö tawu pich akuyenote mötïnyi, kïmökonyïtönye Kristo.

⁵ Ato soghöy korka, anta ato mwowu ngölyonto Tororöt ompö tawu pich, ameyenotenye mötïnyi, kïmökonyïtönye santenyi, kïkarkegh nyinte pat nko korka nyo karwak möt.

⁶ Ato meyentonye korka mötïnyi, kïngwangwa kïrwach putechi. Wölo arasï ompö korka kïrwak mötïnyi anta mut putechi, kïlenyona mïchini kuyen mötïnyi.

⁷ Mömïchininye mïrönö kuyen mötïnyi, ompöwölo körkeyïn akï ororyo Tororöt nyinte, wölo körkeyïn pö ororyo mïrön korka,

⁸ ompöwölo melö kingwïna mïrönö korka, poto korka nyo kingwïna mïrön.

⁹ Melö kikigh mïrön ompöwölo korka, poto korka nyo kikigh ompöwölo mïrön.

¹⁰ Nka nyoni mïchini kuyen korka mötïnyi le kiporunöto paytagh nyo mi parakunyi nko ompö malayken tïkwïl.

¹¹ Wölo melö kïgh ompö tawu Echotyon korka ato möminye mïrönö, amökïghnye tïkwïl mïrönö ato möminye korka.

¹² Ompöwölo kïle otini kingwïna korka mïrön, kïlenye nyoni tïkwïl, yiyöy korka mïrön akungwïno kïgh anka tïkwïl wölo mi Tororöt.

¹³ Amute köny akwane, lö karam kïwö korka kïsagh Tororöt amelö yenote mötïnyi?

¹⁴ Menetokwanye so tïkwïn cho kikigh lö arasï ompö mïrön kïpïstö putechi kïkoghöchitu?

¹⁵ Wölo konyït ompö korka ato koghöchitu putechi, ompöwölo kikitö nyinte atökuyenö kegh.

¹⁶ Ato yöröy chi kwipu kimölöt ompö ngölyontononi, kïmïchini nyinte kunkïtï lö melö kïtïngetecha apite anka nyo pö saghat, amelö tïng tïkwïl kaniseni Tororöt.

Omisyo Echotyon

¹⁷ Wölo otini tomitan orurokwa ompö ngalechoni, kïmelö okwolokwa, ompöwölo kepï tuyotïnekwa cho pö saghat ngwonïn nyo wow kïtïl köromnyö.

¹⁸ Ompöwölo nyo pö tagh kalïman, lö mito pesyogh kwenunkwa otini koghömekwa ompö kanisa, aghönan pat lö lata choni ngalechoni.

¹⁹ (Mito pesyogh kwenunkwa nyo pö nyoman, atökesïwa pich cho pö man ompö kwenunkwa.)

²⁰ Otini koghömekwa tïkwïl, kïmelö omisyo Echotyon nyoni omekwa.

²¹ Ompöwölo otini omisïyekwa, kwomöy chi anka tïkwïl omisyenyi onkït, tö ato mi löt nyu, kudong pikö walaka nko kömöy, kï kitömesyö walaka!

²² Motïngetekwanye so kestonikwo wölo omisyegho agheghsyegho? Anta kasasakwa kanisa Tororöt, atö arasï pich cho le mey? Omwowokwa ne nyu nya? Asalakwa ompö ngölyontononi? Ewo, melö ompö nyoni!

²³ Ompöwölo kyatakan Echotyon kinetutchoni kyopïswokwa, lö kicheng Echotyon Yeso makatyan oghonini kikïwïchtoy nyinte,

²⁴ akwotini kökikuyokyï Tororöt sörö, kïmïnchïran akïlö, “Portönyan nyete, nyo mi ompö akwa. Agha le nyete otini ononanïkwa.”

²⁵ Kïlenyoni, otini kiwany kwomisïyi, kïcheng mpalaw akïlö, “Anyï kikompa nyo pö muma* nyo rel nyo kakikïninieghö kisönköchan. Agha le nyete kïnomnyö otini ononanïkwa.”

²⁶ Ompöwölo otini omekwa makatyantanete, aghegha mpalawunete, omitekwa omwotïtoy megha Echotyon tökïtenö kungwïn nyinte.

²⁷ Kïlenyona nyu, chi anka tïkwïl nyo omöy makatyantanoni anta ghegha mpalaw Echotyon ompö or nyo melö mïchinote, kurechini kegh kirwok nyo pö por nko kisön pö Echotyon.

²⁸ Nya kïchïkïl nyu chi kegh, atökwam makatyantanoni akïghegha mpalawunoni.

²⁹ Ompöwölo nyinte nyo omöy akïgheghöy, kwomöy akïgheghöy kirwokenyi kegh.

³⁰ Nka nyoni chang ompö akwa cho nyörkölöle akuchiryote akakïmeghö cho te.

³¹ Ntökakirosacha kegh lasiny achane, kötömelö kerwokyinecha Tororöt.

³² Wölo ato rwokyinecha Echotyon kuchumecha tömönyorwech nyarïl nko pipö ngwïnyinï.

³³ Kïlenyona nyu, werköcho, ato oghömö atama omisyo Echotyon, akany kegh akwane.

³⁴ Akwoto mi chi anka tïkwïl nyo amate kömöy, kwomisyö ompö katanyi, atömonyorï kirwok otini oghömsot. Kïkany ngale walaka cho köngötï, ongwïnan osötöy ato atwan.