1 KORINTO 1 - PIPÏLIA

¹ Ani Paulö nyo kikïkïlan ompö machata Tororöt alïkwï kiyoktoghinto* Kristo* Yeso, nyete kakirwakwa palalyantanï nko werïnyo Sostene.

² Kakikirwakwa cho ochï kanisa Tororöt nyo mi Korinto. Kiketïlilokwa ompö Kristo Yeso akekurokwa alïkuna pipö Tororöt. Kakikiracha tïkwïl tökïnyorï pikö walaka löwïr cho soghöy Echotyontenyo Yeso Kristo akï Echotyontenyo tïkwïl.

³ Nya kïkonokwa Paponyo Tororöt nko Echotyon Yeso Kristo pöropchö nko kalya.

Kisoyönöt ompö Kristo

⁴ Oyokyinan Tororöt sörö kïnomnyö ompö akwa ompöwölo kökonokwa nyinte pöropchenyi ompö Kristo Yeso.

⁵ Kelinyekwa nko Kristo nyo kökonokwa sïkönöt nyo pö tïkwïn kïmi nyo pö ngalana nko ngöghomnyö.

⁶ Kikichïchim söwintöno Kristo ompö orinkwa,

⁷ tömörörchokwa konunötö anka tïkwïl nyo pö mïkulögh otini omitekwa oköngöy ato kiporu Echotyontenyo Yeso Kristo.

⁸ Komönokwa nyinte ntökwit söröm, atömökïsöchokwa lelut ompö Asisoni pö Echotyontenyo Yeso Kristo.

⁹ Ghanate Tororöt nyinte nyo kikurokwa oghömenö nko Werïnyi, Echotyontenyo Yeso Kristo.

Pesyogh ompö Kanisa

¹⁰ Osomokwa werköcho, ompö kaynata Echotyontenyo Yeso Kristo lö, oterchinö kegh akwane ompö kïgh anka tïkwïl nyo omwoghöy atömörumunö pesyogh kwenunkwa. Osïkö kinonut akonga nko keröt akonga.

¹¹ Kamwaghan lenyoni tupchenichu ompöwölo kömwowanïn pipö ka Kloe, lö, mi syala kwenunkwa.

¹² Kïyoni omwoghan kï nyï lentöy chi anka ompö akwa, “Opoyan Paulö,” kïlö anka, “Opo Apolo,” kïlö anka, “Opo Petro,” kïlö anka, “Opoyan Kristo.”

¹³ Ayo, pesyot so Kristo? Akï yeo, Paulö so nyo kikïwudochï kimurtöwon ompö parakunkwa? Anta kikipatisanakwa ompö kaynata Paulö?

¹⁴ Ochan ngarakat ompöwölo melö mi chi nyo kyapatisanan ompö kwenunkwa kïpoto Krispo nko Kayo,

¹⁵ tömölö chi kikipatisana kaynenyan.

¹⁶ (Kata anka nyo onkïton lö kyapatisanan kï ka Stepana, wölo mononanye lö kyapatisanan chitö anka.)

¹⁷ Melö kiyoktanïn Kristo apatisan pich, wölo kiyonwanïn nyinte amta Lökoy cho Karamach amelö ompö ngöghomnyo ptangengmöt, atömepot owesyo megha Kristo ompö kimurtöwon.

Kristo kï owesyö akï ngöghomnyo Tororöt

¹⁸ Sölwontön ngala megha Kristo ompö kimurtöwon ompö pich cho potyot, wölo ompö acha cho kïmi kesörwech, kï owesyo Tororöt.

¹⁹ Mwoghöy Kikirut lö, “Onyoran ngöghomnyo pich cho ngöghomöch awirtan chïreryo pich cho chïreröch.”

²⁰ Ato lenye nyoni, mi onö nyu chi nyo ngöghom? Anta mi onö psïkulyon? Akïmi onö ngöloninto könyiswechï nya? Ayo, melö so yitöy Tororöt ngöghomnyo ngwïnyinï lö sölwontön?

²¹ Ompöwölo kitagh Tororöt kunkïtï pich nyinte ompö ngöghomnyengwa kegh. Nyo kitölïku nyoni, kïcham nyinte kïsörï pich cho ghönöy ompö or nyo sïwïyi pich cho ngöghomöch lö sölwontön, choni kï lökoy cho kyomtonecha.

²² Yöröy pipö Yaudi kiporunöt, kïyöröy pipö Krik ngöghomnyö,

²³ wölo kyomtonecha Kristo nyo kikïwudochï kimurtöwon, ngölyon nyo le kimwagh ompö pipö Yaudi, akï sölwontön ompö pipö punton,

²⁴ wölo nyu owesyo Tororöt Kristo, akï ngöghomnyo Tororöt nyinte ompö pich cho kikekur ato kö chi pö Yaudi, anta chi pö Krik.

²⁵ Ompöwölo kïgh nyo lentöy chi sölwontöno Tororöt, kïtïng ngöghomnyö nyo tïlöy ngöghomnyo ptangengmöt, kïkany kïgh nyo lentöy chï nyörkölelyo Tororöt, kïtïng owesyö nyo tïlöy owesyo ptangengmöt.

²⁶ Anane ya wölo kyalatekwa otini kikurokwa Tororöt, werköcho, melö chang ompö akwa cho kyochï ngöghomöch ompö nyini le chïreryo ptangengmöt. Melö chang ompö kwenunkwa cho kyochï owesöch anta kyochï rumunote.

²⁷ Kisas nyu Tororöt kikïl tïkwïn cho yitöy ngwïnya lö sölwontön atökutö arasï pich cho ngöghomöch, akïkïl tïpö ngwïny cho nyörkölöl atökutö arasï pich cho owesöch.

²⁸ Kikïl tïkwïn cho sösöy kinonut pö ngwïny akuyitöy lö kwïle, tökunyar tïkwïn cho nonöy ptangengmöt lö pïchighöch.

²⁹ Möminye nyu chi nyo muköy kïkwolo kegh kïgh nyonikïny ompö tawu Tororöt.

³⁰ Wölo kelinyokwa Tororöt nyinte nko Kristo Yeso nyo kigh Tororöt nyinte kïlïkwï ngöghomnyencha, kaketenacha ye ompö tawu Tororöt ompö nyinte. Kakelïkucha pipö Tororöt cho tïlilöch cho tyokote.

³¹ Kïlenyona nyu, lentöy Kikirut, “Anka tïkwïl nyo mököy kïkwolöy kegh, kïkwolö kegh ighisyo Echotyon.”