Tito 3 - TÄ̧DO Ä̧CUÄ̧ I̧HUȨNȨ

Creta kä'co i̧sä̧sa̧ ttö̧ja̧rö̧ jiähuinö huȩnȩ

¹ Ji'ähui jahuätörö o'ca toi'önä ruhuotörö ttucuota pä'ö. O'ca juiyönä ruhuotö huettömä jȩttä̧cua̧'a̧nö̧. 'Cuäopönä adiu jȩttä̧cua̧'a̧nö̧.

² Korotörö suronä ttucuocu juiya. Ja̧'hua̧ta̧nö̧ ttami diyaunä ttö̧ja̧cua̧. Korotörö'inä eseunu ppättäda pä'ö ji'ähui.

³ Iso päi'önä täbocö ujutumä ja̧'a̧tä̧ cue'ächö, Diosrö esetocotö pi̧nä̧tö̧jä̧. Re'tehuächätö cuettächö'a̧nö̧ cue'ächinätöjä. Ujutumä suronä amöcuädö cue'ächinätöjä. Ja̧'hua̧ta̧nö̧ suronä jȩpi̧nä̧tö̧jä̧ korotörö. Korotö ttu̧ju̧nä̧rö̧ ta'anö, tu̧ju̧nä̧ra̧ pä'inätöjä. Korotörö pä̧huä̧ juiyönä topö cue'ächinätöjä.

⁴ Ja̧'hua̧nö̧ cuetächomenä, Dios ujuturu ppä'ädinö.

⁵ Diosmä suronä jȩtö̧ jȩpö̧ icuinö. Ujututä adiu jȩpo̧co̧tö̧ pi̧nä̧tö̧jä̧. Chutä, Diostä, re rö̧jö̧nä̧ topinö ujuturu.

⁶ Tu̧ru̧hua̧ Jesucristorö tesetomenä, Dios repeähuä juiyönä iyinä̧u̧jä̧ Espíritu Santorö.

⁷ Chutä ppäda'attö, i̧tti̧mö̧jä̧. Ja̧'hua̧nö̧ ja̧'a̧ kä̧cuä̧huä̧ i'co tta̧tä̧rö̧mä̧ i̧yä̧cua̧ ujuturu.

⁸ Pi̧yȩ huȩnȩ iso päi'önä adihuä huȩnȩ. Pi̧yȩ huȩnȩ cu̧huo̧juȩta̧ pä'ösä, Diosrö esetätö adiu jȩtta̧ pä'ö. Pi̧yȩ huȩnȩ o'ca toi'önärö adiu päa'a.

⁹ Ja̧'hua̧nö̧ ja̧'a̧nä̧ ttö̧ja̧ amönä ttucuocu huȩnȩ'i̧nä̧, tä̧do̧tö̧ mi̧nä̧ ttö̧ji̧nö̧ ttucuocu huȩnȩ'i̧nä̧ cucuocuä'. Ja̧'hua̧ta̧nö̧ ttahuaruhuärö ra̧huä̧rö̧ ttucuocu huȩnȩ'i̧nä̧, Moisés hueähuä huȩnȩ ttucuocu huȩnȩ'i̧nä̧ cucuocuä' Tito. Ja̧u̧mä̧ yoröiso micuähuocö huȩnȩ ja̧'a̧.

¹⁰ Ya̧tȩ iglesia ruhuärö 'quȩ'ȩpö̧ icua päöttömä, todärenätä ucuocuirö. Ja̧'hua̧nö̧ cucuocuomenä, esetö juiyöttömä 'quȩ'i̧pä̧chi̧rö̧.

¹¹ Ja̧'hua̧nö̧ jȩpö̧rö̧mä̧ adihuä huȩnȩ jaropi'inö pä'ö huo̧jua̧jä̧. Chutä suronä jȩö̧tä̧ huo̧jua̧.

Röji jiähuinö huȩnȩ

¹² Artemas pä'ö mi̧cua̧rö̧'i̧nä̧, Tíquico pä'ö mi̧cua̧rö̧'i̧nä̧ ucu cu̧ja̧'a̧ huedomenä, ucutä Nicópolis ötahuiyära̧'a̧ cuichaja, ji̧nä̧ yo̧mȩtȩ päti'a. Ju̧huȩnȩ chö̧ja̧ pä'ösä ya'ute a̧'ȩ.

¹³ Ja̧'hua̧ta̧nö̧ Apolos pä'ö mi̧cua̧rö̧'i̧nä̧, pi̧jä̧ jähuä hueähuä huȩnȩ huo̧jua̧rö̧ Zenas pä'ö mi̧cua̧rö̧'i̧nä̧ tti̧'cho̧mȩnä̧, jahuätörö recuä rö̧jö̧mä̧ iyö ppä'ädi.

¹⁴ Ujutu tahuaruhuä tö̧jä̧hua̧tö̧rö̧ huo̧juȩti̧ recuä rö̧jä̧u̧ru̧ iyö ppättäda pä'ö. Ja̧'hua̧nö̧ jȩpö̧ kä̧nö̧, adiu ttö̧ja̧cuä̧cuo̧tö̧.

¹⁵ O'ca toi'önä ttöcu ka̧cuä̧tö̧mä̧ te'ähuätö ucuru. Ucu'inä tahuaruhuä tö̧jä̧hua̧tö̧ Diosrö esetätörö te'ähui. Dios ucuturu o'ca toi'önärö adiu ppädaja. Amén.