Santiago 5 - TÄ̧DO Ä̧CUÄ̧ I̧HUȨNȨ

Järe ruhuotörö ä'canä ji̧ä̧huä̧rö̧ huȩnȩ

¹ ¡Ä̧ju̧cuä̧tu̧cui̧, ucutu järe ruhuotömä! Ajuäu huopätucui ucuturutä surojö 'cuäopä̧cuȩ.

² Cuhuäremä pparuhuächa'a. Cu̧'ca̧tä̧huä̧ti̧yu̧ adiu o̧ta̧ isotö cui'i'ätö.

³ Cuhuäre oro'inä, cuhuäre pärätä'inä ö̧tä̧nȩcuä̧cha̧'a̧. Ja̧u̧ ö̧tä̧nȩcuä̧cha̧'a̧ topö huo̧juä̧tö̧jä̧, järenätä tta̧'cua̧ huȩnä̧rä̧cuä̧huä̧nä̧mä̧ suroja'a. Ja̧'hua̧ta̧nö̧ cuidepä ocurä cuo'ö icua'a jä̧'i̧nö̧'a̧nö̧ jä̧cua̧'a̧. Röji mo̧ro̧ päi'a'anä'inä, ucutu cuhuäre ca̧ca̧tö̧ rötinätöjä.

⁴ Cui̧rȩjä̧nä̧ aditinätörö mitocotö pi̧nä̧tö̧jä̧. Ja̧'hua̧ ja̧'a̧ ttaditähuä micuä ji̧nö̧ huoa'a cuimitähuätucua pä'ö. Ja̧'hua̧ta̧nö̧ adicuä ttö̧ja̧ huottinömä ä̧ju̧cui̧nö̧ Dios, o'ca juiyönä Ttu̧ru̧hua̧mä̧.

⁵ Pi̧jä̧nä̧ ka̧cuä̧tö̧jä̧ a̧'cua̧ cui̧'ö̧, amöcuädäcuähuä juiyönä. Ucutumä bärepächätöjä pä̧cä̧yö̧ jä̧'i̧nö̧'a̧nö̧. Täcö pä̧cä̧yö̧ bärepätö cuä'ö tticu mo̧ro̧ päi'a'a jä̧'i̧nö̧'a̧nö̧ ja̧'a̧ ucuturu.

⁶ Adiu jȩpi̧nä̧tö̧rö̧ ucutu suronä jȩpö̧ cuä'ö icuinätöjä, ucuturu suronä jȩpo̧co̧tö̧ pi̧nä̧tö̧rö̧'i̧nä̧.

Ttami 'qui'ächi'ö kä̧cuä̧huä̧ huȩnȩ

⁷ Ja̧'hua̧nö̧ ja̧'a̧ttö̧ cuami 'qui'ächi'ö ka̧cuä̧tu̧cui̧, chö̧jä̧hua̧tö̧, Tu̧ru̧hua̧ ichome jubö päi'önä. Ku̧nä̧huä̧ ru̧hua̧mä̧, cuähuä u̧ju̧na̧ pä'ömä, ami 'qui'ächi'ö tta̧'ä̧rö̧ ajiya ichome jubö päi'önä.

⁸ Ucutu'inä cuami 'qui'ächi'ö ka̧cuä̧tu̧cui̧. Eseunu amöcuädö ka̧cuä̧tu̧cui̧. Tu̧ru̧hua̧ ichä̧cuȩ mo̧ro̧ tö'cöhuächa'a.

⁹ Korotörö pä'ä'chömä jȩcu̧'ä̧tu̧cuä̧', chö̧jä̧hua̧tö̧, Dios ucuturu ö̧tä̧bo̧tö̧ juiya pä'ö. Dios, Tä̧bo̧cuä̧ I̧sa̧mä̧, äpate ä'ca kö̧.

¹⁰ Chö̧jä̧hua̧tö̧, amöcuädätucui Dios i̧huȩnȩ jiäcuähuä isotörö, Tu̧ru̧hua̧ i̧mi̧nä̧ ucuocuinätörö. Jahuätö surojö 'cuäopa'anä'inä, ttami 'qui'ächi'ö ka̧'cui̧nä̧tö̧do.

¹¹ Ttami 'qui'ächi'ö ka̧cuä̧tö̧rö̧, “Eseunu ka̧cuä̧tö̧” pä'ätöjä ujutu. Ucutu ä̧ju̧cui̧nä̧tö̧jä̧ Jobrö, ami 'qui'ächi'ö ki̧nö̧rö̧. Huo̧juä̧tö̧jä̧, Dios ja̧u̧ru̧ jȩi̧nö̧mä̧ surojö 'cuäopinö o'ca'a. Dios a̧'cua̧ tta̧nö̧ re rö̧jö̧nä̧ topö tta̧'ä̧rö̧.

¹² Chö̧jä̧hua̧tö̧, mo̧ro̧jä̧ i̧mi̧nä̧ pä'ömä päcuhuätucuä'. Pi̧jä̧ i̧mi̧nä̧, koro juäi i̧mi̧nä̧ pä'ömä päcuhuätucuä', Diosttö tä̧bo̧cuä̧ 'cuäcuhuopätucu juiya pä'ö. “A̧” pä'ätömä, jueönätä “A̧” pä'ätucui. “Ja̧'hua̧nö̧cö̧” pä'ätömä, jueönätä “Ja̧'hua̧nö̧cö̧” pä'ätucui.

Diosrö esetö ucuocuäcuähuä huȩnȩ

¹³ Ucututtu ya̧tȩrö̧ barauttumä, Diosrö ucuocu'a̧nö̧ ja̧'a̧. Ucututtu ya̧tȩ eseunu ö̧jö̧ttö̧mä̧, Diosrö eseunu ra̧huä̧huä̧ ra̧u̧'a̧nö̧ ja̧'a̧.

¹⁴ Ucututtu ya̧tȩ na̧huä̧chö̧ttö̧mä̧, iglesia ruhuä ancianos huotörö jäepö'a̧nö̧ ja̧'a̧, Dios i̧mi̧nä̧ a̧dȩja̧ huȩnö̧, Diosrö ttucuocuarö pä'ö.

¹⁵ Diosrö esetö ttucuocuomenä, na̧'ä̧chö̧mä̧ ö̧'i̧pä̧cua̧. Dios ja̧u̧ na̧'ä̧chö̧rö̧ aditö i̧cuä̧cua̧. Suronä jȩi̧nö̧ttö̧mä̧, jȩpö̧ icu Diosmä.

¹⁶ Ja̧'hua̧nö̧ ja̧'a̧ttö̧ korotörö ji'ähuätucui suronä jȩcu̧'i̧nä̧tu̧cu̧. Ja̧'hua̧ta̧nö̧ Diosrö korotörö ppä'ädö ucuocuätucui, surojö aditö icuatö pä'ö Dios. Adiu esetömä Diosrö ucuocuomenä, i̧huȩnȩ iso päi'önä micuähua'a.

¹⁷ Dios i̧huȩnȩ jiäcuähuä i̧sa̧ Elías ujutu jö̧ ta'anö hua̧ ki̧nö̧do. Diosrö ucuocu, ajiya ichö juiya pä'ö jäepomenä, huäbodäcuä a̧'ȩ ja̧'a̧nä̧ ko̧ro̧mö̧ttö̧nö̧ ya̧tȩnö̧ kä̧hua̧tö̧ ichoca'a ji̧na̧'a̧do ajiyamä pi̧jä̧ra̧'a̧cu̧.

¹⁸ Ja̧u̧nu̧ ji̧nö̧ o'ca'a, pä'äji ta'anö Diosrö ucuocuomenä, mo̧ro̧jä̧ttö̧ ajiya ichina'a pä'äji ta'anö. Ja̧'hua̧nö̧ ja̧'a̧ rȩjȩttö̧ ba'i'ö cuähuä huȩji̧na̧'a̧.

¹⁹ Chö̧jä̧hua̧tö̧, ucututtu ya̧tȩ iso päi'önä huȩnȩttö̧ 'quȩi̧pä̧chö̧ttö̧mä̧, ka̧ra̧ a̧hua̧ru̧hua̧ ppa̧'ä̧chö̧ ȩmö̧'a̧nö̧ ja̧'a̧.

²⁰ Amöcuädätucui. A̧hua̧ru̧hua̧ o'ipö ucuocuäji o'ca'a ppa̧huä̧chö̧ttö̧mä̧, a̧'cua̧rö̧ 'corupäi'äcuähuättö ö̧ji̧pa̧ pä'ö ppä'ädö. Ja̧'hua̧ta̧nö̧ ja̧u̧ re'tehuächäjirö o'ipäjimä, recuätörö ppä'ädö Dios suronä jȩttö̧ töcö icua pä'ö.