Santiago 4 - TÄ̧DO Ä̧CUÄ̧ I̧HUȨNȨ

Pi̧jä̧ ahuaruhuä päi'önä amöcuädäcuähuä huȩnȩ

¹ ¿Tottö icha'attö suräjuä huȩnȩ'i̧nä̧, rohuäcuähuä huȩnȩmä̧? Ja̧'hua̧nö̧ ja̧'a̧ pi̧jä̧ jähuä pä̧huä̧ rö̧jö̧ cuamöcuädätucua'attö, ucututtu rohuähua'a surojö.

² Ucutu koro juäi korotö ttu̧ju̧nä̧rö̧ pä̧huä̧ rö̧jö̧ tocu'ätucuomenä, juicuhuätucuomenä, jahuätörö cuä'ö icuätöjä. Korotö ttu̧ju̧nä̧rö̧ cuȩmä̧tu̧cuo̧ca̧'a̧ jo̧mȩnä̧, rohuähuätöjä. Ja̧'hua̧nö̧ ja̧'a̧nä̧ ucuturu pä̧huä̧ rö̧jö̧mä̧ ȩmo̧co̧tö̧jä̧, Diosrö jäcuhue'ätucuoca'attö.

³ Ja̧'hua̧ta̧nö̧ jäcuhue'ätucumä ȩmo̧co̧tö̧jä̧, suronä amöcuädö jäcuhue'ätucua'attö, suronä jȩä̧cuä̧huä̧nä̧ be'epäjipö cuicuätucu'a̧nö̧ ji̧yä̧cu̧.

⁴ Ucutu ttö̧ja̧ suropätö, ucutu unichi'ätöjä Diosrö, pi̧jä̧ jähuä amöcuädö. ¿Jerupätöjä tä̧ji̧? Pi̧jä̧ ahuaruhuä päi'önä ka̧cuä̧tö̧mä̧ Dios aboiyotö. O'ca toi'önä pi̧jä̧ ahuaruhuä päi'önä amöcuädätömä Dios aboiyotö pä'i'ätö.

⁵ Amönä huȩnȩcö̧ Dios i̧huȩnȩ päömä: Espíritu Santomä, Dios ujutucu ö̧ja̧ pä'ö hueinäcumä, ujuturu a'cuoyäunu repe'ö tta̧'ä̧rö̧.

⁶ Ja̧'hua̧nö̧ ja̧'a̧ Dios rö̧ȩnä̧ ppä'ädö ujuturu. Huȩyu̧cuä̧ Huȩnȩ päa'a: Diosmä a'cuoyäunu jȩpä̧tö̧rö̧ kö'cocö. Usurä isotörötä eseunu ppä'ädö.

⁷ Ja̧'hua̧ ja̧'a̧ttö̧ Diosrötä pä̧huä̧ rö̧jö̧mä̧ jȩpä̧tu̧cui̧. Ähuettärö pä̧huä̧ rö̧jö̧mä̧ jȩcu̧'ä̧tu̧cuä̧'. Ja̧'hua̧nö̧ jȩcu̧'ä̧tu̧cuo̧mȩnä̧, ucututtu tö'ipächö ähuettämä.

⁸ Diosrö tö'cöpächätucui. Ja̧u̧ru̧ cutö'cöhuächätucuomenä, ja̧u̧'i̧nä̧ ucuturu ö̧tö̧'cö̧huä̧chä̧cua̧. Ucutu suronä jȩpä̧tö̧mä̧, cu̧mö̧pi̧yä̧ töcähuätucui. Ucutu Diosrö'inä, pi̧jä̧ jähuä'inä amöcuädätö ttö̧ja̧mä̧, Diosrötä amöcuädätucui cuami iso'quitucunä.

⁹ Cua̧'cua̧ tta̧nö̧ jö̧nä̧ amöcuädätucui. Suronä jȩcu̧'ä̧tu̧cu̧mä̧, a̧'u̧ rö̧jö̧nä̧nö̧ cuami iso'quitucunä ajuähuätucui. Ya̧'ä̧huȩ'ö̧ kä̧nö̧, eseu jȩcu̧'i̧nä̧tu̧cu̧mä̧ jaropi'ö, ajuäcuähuätucui, Diosrö amöcuädö. Ja̧'hua̧nö̧ ja̧'a̧ cuesehuinätucu jaropi'ö, cua̧'cua̧ tta̧nö̧ jö̧nä̧ amöcuädätucui.

¹⁰ Usurä isotö ttö̧jö̧'a̧nö̧ ka̧cuä̧tu̧cui̧. Ja̧u̧ ucutu suronä jȩcu̧'ä̧tu̧cu̧ jȩpö̧ i̧cuä̧cua̧.

Ttö̧jä̧huä̧rö̧ pä'chäcuähuä huȩnȩ

¹¹ Chö̧jä̧hua̧tö̧, suronä cucuocuätucuä' korotörö. Ya̧tȩ ö̧jä̧hua̧rö̧ suronä ucuocumä, ja̧u̧ru̧ suronä jȩpö̧ pä'ömä, hueähuä huȩnȩ suronä ucuocu, hueähuä huȩnȩ suronä päa'a pä'ö. Ja̧'hua̧ ja̧'a̧ hueähuä huȩnȩ suronä päa'a päcuttumä, hueähuä huȩnȩ päö ta'anö jȩpo̧cö̧jä̧. Tä̧bo̧cuä̧ ttö̧ja̧ jö̧'a̧nö̧ jȩpö̧jä̧.

¹² Ya̧tȩtä̧ Diostä hueähuä huȩnȩ iyinö. Ja̧u̧tä̧ Tä̧bo̧cuä̧ I̧sa̧ päi'önä kö̧mä̧. Ja̧u̧tä̧ kä̧cuä̧huä̧ iyö. Ja̧u̧tä̧ be'epäjipö i̧cuä̧cua̧. Ja̧'hua̧ ja̧'a̧ ¿dijä̧ttö̧ ucumä, cu̧jä̧hua̧rö̧ suronä jȩpö̧jä̧ pä'ä'chömä?

Koro mo̧ro̧ 'cuäopä̧cuȩ ttieru huȩnȩ

¹³ Ä̧ju̧cuä̧tu̧cui̧, ucutu ja̧'hua̧nö̧ pä'ätömä: “Jitä mo̧ro̧cö̧, yo̧ȩi̧ mo̧ro̧cö̧ ötahuiyära̧'a̧ ti̧huä̧cuo̧tö̧jä̧, ya'ute a̧'ȩ juhua'atä tö̧ja̧cua̧ pä'ö, järe iyä'chö pärätä tȩma̧ pä'ö.”

¹⁴ Ja̧'hua̧nö̧ päcuhuätucua'anä, jerupätöjä yo̧ȩi̧ mo̧ro̧ 'cuäopä̧cuȩmä̧. Ja̧'hua̧ ja̧'a̧ cu̧jä̧tu̧cu̧mä̧, ¿tta̧'a̧nö̧ jö̧jä̧ttö̧? Isoppa jä̧'i̧nö̧'a̧nö̧ jö̧ cu̧jä̧tu̧cu̧mä̧. Isoppamä jurunätä rä̧cua̧'a̧. Ju̧huȩnȩ o'comenä, täcö toepo'ö.

¹⁵ Pa̧'a̧nö̧ päcuhuätucu'a̧nö̧ ja̧'a̧: “Diosrö pä̧huä̧ rö̧jö̧ttö̧mä̧ ji̧nä̧ tö̧ja̧cuä̧cuo̧tö̧jä̧. Ja̧'hua̧ ja̧'a̧ pa̧'a̧nö̧ jȩtä̧cuo̧tö̧jä̧. Koro juäi'inä jȩtä̧cuo̧tö̧jä̧.”

¹⁶ Ja̧'hua̧nö̧ päcuhuä'inätucu juäimä, ucututä cuamöcuädätucutä ucuocuätöjä. Ja̧'hua̧nö̧ cucuocuätucuomenä, suroja'a.

¹⁷ O'ca toi'önä adiu jȩä̧cuä̧huä̧ ttu̧huo̧jua̧'a̧nä̧ jȩpo̧co̧tö̧mä̧, suronätä jȩpä̧tö̧.