Santiago 3 - TÄ̧DO Ä̧CUÄ̧ I̧HUȨNȨ

Tti̧nȩnä̧ adiucu, surojöcu ucuocuäcuähuä huȩnȩ

¹ Chö̧jä̧hua̧tö̧, ucututtu a̧'u̧cu̧nä̧tä̧ ttu̧huo̧juȩtö̧'a̧nö̧ ja̧'a̧. Ucutu huo̧juä̧tö̧jä̧ ujutu huo̧juȩcuä̧ ttö̧ja̧rö̧mä̧ huo̧jui̧pä̧tö̧ttö̧'i̧nä̧ abonänö pä̧cua̧ Dios.

² Ujutu o'ca toi'önä koronö pö̧nä̧tä̧ suronä jȩpä̧tö̧jä̧. Ya̧tȩ yoröiso suronä ucuocuocömä täcö yoräteunä kö̧, adiu 'quiyönä ami 'qui'ächi'ö kö̧.

³ Ca̧ba̧llo̧stö̧ ttänä cuoräu i̧so̧bö̧ ȩnä̧tö̧jä̧, ujuturu pä̧huä̧ rö̧jo̧mȩnä̧ tti̧'cha̧ pä'ö. Ja̧'hua̧nö̧ caballo böo'inä pe'ächi'ö.

⁴ Ja̧'hua̧nö̧ ja̧'a̧ huoi'ca'inä topätucui. Huoi'ca rö̧ä'camä kä̧ru̧'coppa döa'anä ȩpa̧'a̧, ubö'ca ja̧'a̧nä̧ peädä̧rä̧bi̧ ji̧'qui̧chä̧jä̧bi̧mä̧ peädä̧rö̧rö̧ pä̧huä̧ rö̧jo̧mȩnä̧, pe'ädö i̧'cha̧ pä'ö.

⁵ Ja̧'hua̧ta̧nö̧ ti̧nȩ ji̧'qui̧cha̧ja̧'a̧nä̧'i̧nä̧ rö̧ȩnä̧ ucuocu. Ja̧'hua̧nö̧ ja̧'a̧ amöcuädätucui. De'a rö̧o̧mȩ'i̧nä̧ cuo'ö icu ocu i̧sa̧ri̧ ji̧'qui̧cha̧ja̧ri̧ttö̧ rȩdȩcuä̧cho̧mȩnä̧.

⁶ Ti̧nȩ ocurä jä̧'i̧nö̧'a̧nö̧ ja̧'a̧. Ti̧nȩnä̧ suronä tucuocuomenä, suronä jȩpä̧tö̧jä̧ ujutumä. Ocurä beipocarättö ti̧nȩnä̧ rȩdȩtö̧ ähuettä. Ja̧'hua̧ta̧nö̧ ujutu suronä jȩta̧ pä'ö o'ca juiyönä huea'a ti̧nȩmä̧.

⁷ De'a ka̧cuä̧tö̧rö̧'i̧nä̧ ppi̧yu̧ru̧'i̧nä̧, ä̧ca̧tö̧rö̧'i̧nä̧, jacuoto cuo̧'ä̧rä̧tö̧rö̧'i̧nä̧ ttiteyodö'a̧nö̧ ja̧'a̧ ttö̧ja̧mä̧. Ihueye teyodäcuähuä ttö̧ja̧.

⁸ Ja̧'hua̧nö̧ ja̧'a̧ tti̧nȩmä̧ yoröiso teyodocotö ttö̧ja̧mä̧. Ja̧'hua̧nö̧ ja̧'a̧ tti̧nȩmä̧ suroja'a, yoröiso huirochi'ocö. Ä̧ca̧ ö̧mä̧nȩhuä̧ jä̧'i̧nö̧'a̧nö̧ jö̧ su̧'pȩnö̧ ȩjä̧u̧ tti̧nȩnä̧.

⁹ Ti̧nȩnä̧ adiu ucuocuätöjä Tä'o Diosrö. Ja̧'hua̧ta̧nö̧ ti̧nȩnä̧ suronä ucuocuätöjä ttö̧ja̧rö̧, Dios chutä jö̧ ta'anö huotörö.

¹⁰ Jahuäyä ttänä räopa'a adiu ucuocuäcuähuä'inä, suronä ucuocuäcuähuä'inä. Ja̧'hua̧nö̧mä̧ jȩttö̧ juiyö'a̧nö̧ ja̧'a̧, chö̧jä̧hua̧tö̧.

¹¹ ¿Sa̧do̧ya̧'i̧nä̧, reoya'inä ajiya räopomettömä räopa'a tä̧ji̧?

¹² Chö̧jä̧hua̧tö̧, ¿jumari daunä, nu̧'ä̧ huȩja̧'a̧ tä̧ji̧? Ja̧'hua̧ta̧nö̧ ¿uva huipo daunä, jumari huȩja̧'a̧ tä̧ji̧? Ja̧'hua̧ta̧nö̧ reoya räopomettö räopoca'a sa̧do̧ya̧.

Iso päi'önä huo̧ju̧nä̧ jȩpö̧ kä̧cuä̧huä̧ huȩnȩ

¹³ Ucututtu ya̧tȩ huo̧ju̧nä̧ hua̧ ö̧jö̧ttö̧mä̧, 'cucuächi'önä ä̧ju̧cui̧nö̧ ö̧jö̧ttö̧mä̧, adiu jueönä amöcuädö, huo̧ju̧nä̧ jȩpö̧, ö̧jö̧'a̧nö̧ ja̧'a̧.

¹⁴ Ja̧'hua̧nö̧ ja̧'a̧ttö̧ ucutu cua̧'cua̧ ko̧mȩnä̧, cuami iso'quitucunä amöcuädö jȩcu̧'ä̧tu̧cu̧ttu̧mä̧, surojö jä̧'i̧nö̧'a̧nö̧ huotöjä. Ja̧'hua̧nö̧ jȩcu̧'ä̧tu̧cuo̧mȩnä̧: “Ujutu yoröiso huo̧juä̧tö̧jä̧” päcuhuätucuä'. Ja̧'hua̧nö̧ päcuhuätucuomenä, yapareu huȩnȩ ucuocuätöjä. Iso päi'önä huȩnȩ ä̧ppö̧tä̧rä̧tö̧jä̧.

¹⁵ Ja̧u̧ huo̧juä̧huä̧mä̧ Diosttö ichoca'a. Pi̧jä̧ttö̧ huo̧juä̧huä̧mä̧, esetocotö ttamöcuädömä, ähuettättö icha'ado.

¹⁶ Tta̧'cua̧ ko̧mȩnä̧ ttamöcuädomenä, jitötä jähuä jȩtto̧mȩnä̧, adiu ji̧nä̧ yo̧mȩtȩ amöcuädö jȩpo̧co̧tö̧. O'ca juiyönä surojö jȩä̧cuä̧huä̧tä̧ jȩpä̧tö̧.

¹⁷ Diosttö huo̧juä̧huä̧ ku̧nä̧rä̧tö̧mä̧, suronä jȩä̧cuä̧huä̧ juiyönä ka̧cuä̧tö̧. Ja̧'hua̧ta̧nö̧ ttami diyaunä ka̧cuä̧tö̧. Ucuotönö tta̧'ä̧rä̧tö̧ korotörö. Ttahuaruhuä pättö huȩnȩ ä̧ju̧cu̧ esetätö. Re rö̧jö̧nä̧ topö ppä'ädätö ttahuaruhuärö. Ja̧'hua̧nö̧ jȩpä̧tö̧mä̧ iso päi'önä jueö huȩnȩ ucuocuätö.

¹⁸ Eseunu ttö̧ja̧cua̧ pä'ätömä, korotöcu'inä eseunu ka̧cuä̧tö̧, adiunä ji̧nä̧ yo̧mȩtȩ amöcuädö ttö̧ja̧cua̧ pä'ö.