Santiago 2 - TÄ̧DO Ä̧CUÄ̧ I̧HUȨNȨ

Yoräteunä amöcuädäcuähuä huȩnȩ

¹ Chö̧jä̧hua̧tö̧, adihuä Tu̧ru̧hua̧ Jesucristorö esetätömä, “Ka̧ra̧ ka̧ra̧ttö̧'i̧nä̧ abonänö adihuä i̧sa̧” päcuhuätucu juiyö'a̧nö̧ ja̧'a̧.

^2-3 Koro mo̧ro̧ päi'omenä, ya̧tȩ ubo cultonä do'ächö, ödo'che i̧so̧bö̧ orottö adicuo̧bö̧ rö̧nä̧rö̧, ö̧'ca̧tä̧huä̧ta̧'i̧nä̧ adihuä̧ta̧ 'ca̧tä̧u̧. Usurä i̧sa̧'i̧nä̧, ö̧'ca̧tä̧huä̧ta̧ täbo i̧sä̧ta̧ 'ca̧tä̧u̧, do'ächö. Adihuä̧ta̧ 'ca̧tä̧u̧ru̧ päcuhuätucuttumä, “Pä̧mä̧di̧ pȩnȩ päcuähuome adihuome”, päcuhuätucua'anä ka̧ra̧rö̧, täbo i̧sä̧ta̧ 'ca̧tä̧u̧, “Ä̧rä̧mi̧'ö̧ kä̧hui̧. Ju̧huȩnȩ cu̧juä̧mä̧dö̧ juiyöttömä, pä̧mä̧di̧ rȩjȩ.”

⁴ Ja̧'hua̧nö̧ päcuhuätucuomenä, yoräteunä amöcuädocotöjä. Suronä amöcuädätöjä.

⁵ Chö̧jä̧hua̧tö̧, ä̧ju̧cuä̧tu̧cui̧. Dios ȩmi̧nö̧ pi̧jä̧ttö̧ usurä isotörö'inä, adiu amöcuädö ttesetarö pä'ö, Dios ppädäcuähuä ttȩma̧ pä'ö. Ja̧u̧ ppädäcuähuä iya pä'inö churutä, Diosrötä repe'ätörö.

⁶ Ja̧'hua̧nö̧ ja̧'a̧nä̧'i̧nä̧ ucutu suronä amöcuädö pä'ätöjä usurä isotörö ttödäpecuächi'önä. Jahuätömä, järe ruhuotömä, ucuturu suronä jȩpä̧'i̧jä̧tö̧. Ja̧'hua̧ta̧nö̧ jahuätömä, järe ruhuotömä, ¿ucuturu ru̧hua̧ ä'ca jo̧mȩ ȩpo̧co̧tö̧ tä̧ji̧?

⁷ Ja̧'hua̧ta̧nö̧ ruhuotömä, ¿Jesucristo adihuä i̧mi̧nä̧ suronä ucuocuocotö tä̧ji̧? Ja̧u̧ i̧mi̧nä̧ pä'ätöjä “Cristorö esetätöjä.”

⁸ Dios hueähuä huȩnȩ päö ta'anö jȩcu̧'ä̧tu̧cu̧ttu̧mä̧, adiu jȩpä̧tö̧jä̧. Ja̧u̧ huȩnȩ päa'a: Cua̧hua̧ru̧hua̧rö̧ repe'i cuamönä repecuhuäu ta'anö.

⁹ Ja̧'hua̧nö̧ ja̧'a̧ttö̧ ka̧ra̧ ka̧ra̧ttö̧'i̧nä̧ abonänö adihuä i̧sa̧ päcuhuätucuttumä, suronä jȩpä̧tö̧jä̧. Dios hueähuä huȩnȩ päö ta'anö jȩpo̧co̧tö̧jä̧.

¹⁰ Ya̧tȩ hueähuä huȩnȩ o'ca juiyönä päö ta'anö jȩpö̧mä̧, ja̧u̧mä̧ ji̧'qui̧cha̧nö̧ i̧mi̧cu̧nä̧ amöcuädöttömä, o'ca juiyönä hueähuä huȩnȩ päö ta'anö jȩpo̧cö̧.

¹¹ Diosmä, “Karajuru jȩcu̧'ä̧tu̧cuä̧'” pä'inömä, ja̧'hua̧ta̧nö̧ pä'inödo: “Ka̧ra̧rö̧'i̧nä̧ cuä'ö cuicuätucuä'.” Ja̧'hua̧nö̧ ja̧'a̧ karajucu suronä jȩpo̧cö̧'i̧nä̧, a̧hua̧ru̧hua̧rö̧ cuä'ö icuttumä, hueähuä huȩnȩ päö ta'anö jȩpo̧cö̧.

¹² Ucutumä koro hueähuä huȩnȩ, suronä jȩä̧cuä̧huä̧ ejädö icu huȩnȩ hueö ta'anö jȩpä̧tö̧ ttö̧jö̧'a̧nö̧ ka̧cuä̧tö̧jä̧. Ja̧'hua̧nö̧ ja̧'a̧ttö̧ adiu jȩpö̧ ucuocu ka̧cuä̧tu̧cui̧.

¹³ Re juiyönä topätörö, re juiyönä ö̧tä̧bo̧tä̧cua̧ Diosmä. Korotömä re rö̧jö̧nä̧ topö ppä'ädätömä, ye'ecuocotö Dios ö̧tä̧bo̧tä̧cuȩmä̧.

Adiu jȩä̧cuä̧huä̧ huȩnȩ

¹⁴ Chö̧jä̧hua̧tö̧, ya̧tȩ “Ttö Jesucristorö esetösä” pä'ömä, adiu jȩä̧cuä̧huä̧ jȩö̧ juiyöttömä, ¿adihua'a tä̧ji̧? Ja̧'hua̧nö̧ ttesetomenä, ¿ttö̧ji̧pä̧cuo̧tö̧ tä̧ji̧?

^15-16 Ucututtu ya̧tȩ cu̧jä̧hua̧, yajute cujähuaju'inä ö̧'ca̧tä̧huä̧ta̧ jui̧'a̧, u̧cuȩ jui̧'a̧ ö̧jö̧ttö̧mä̧, ucututtu ya̧tȩ päöttömä: “Adiu kä̧hui̧. Cu̧'ca̧tä̧huä̧ta̧ adiu 'ca̧tä̧hui̧. Cu̧cuȩ'i̧nä̧ adiu cuiti.” Ja̧u̧ru̧ u̧cuȩ iyoca'a, ö̧'ca̧tä̧huä̧ta̧ iyoca'a, ja̧'hua̧nö̧ päömä ¿adihua'a tä̧ji̧?

¹⁷ Ja̧'hua̧nö̧ jä̧'i̧nö̧'a̧nö̧ ja̧'a̧ esetäcuähuämä. Adiu jȩ̈ä̧cuä̧huä̧ jȩttö̧ juiyöttömä, ja̧u̧ esetäcuähuämä 'corupäi'äcuähuä jä̧'i̧nö̧'a̧nö̧ jö̧do.

¹⁸ Ya̧tȩ pä̧cua̧: “Ucu esetöjä. Ttömä adiu jȩpö̧sä̧.” Ja̧'hua̧nö̧ ja̧'a̧ ji'ähuittö adiu jȩcu̧'o̧ca̧'a̧ cuesetö. Ttö ji̧dä̧huä̧cua̧sä̧ chesetö'inä adiu jȩchö̧mä̧.

¹⁹ Ucumä esetöjä Dios ya̧tȩtä̧ kö̧ pä'ö. Ja̧'hua̧nö̧ cuesetomenä, adiu esetöjä. Ja̧'hua̧nö̧ ja̧'a̧nä̧ espíritus suropätö'inä Diosrö esetö ttö̧'ä̧huä̧tö̧.

²⁰ Ucu ttö̧'ȩpä̧ro̧cö̧mä̧, esetötä ttesetöttömä adiu jȩä̧cuä̧huä̧ jȩttö̧ juiyöttömä, 'corupäi'äcuähuä jä̧'i̧nö̧'a̧nö̧ jö̧ ¿amöcuädocöjä tä̧ji̧?

²¹ Tä̧do̧ mi̧nä̧ Abrahammä i̧tti̧ Isaacrö sacrificio adicuome u̧huȩno̧mȩnä̧, adiu jȩa̧'a̧ttö̧, Dios ja̧u̧ru̧ pä'inö: “Surojömä jui̧'a̧jä̧ täcö.”

²² Ja̧'hua̧ ja̧'a̧ttö̧ huo̧jua̧jä̧ Abraham adiu esetina'attö, adiu jȩpi̧nö̧. Ja̧'hua̧ta̧nö̧ esetina'amä täcö yorätehuina'ado, adiu jȩi̧na̧'a̧ttö̧.

²³ Ja̧'hua̧nö̧ 'cuäopina'a Dios päinömä. Ja̧u̧ huȩnȩ päa'a: Abraham Diosrö esetomenä, Dios ja̧u̧ru̧ pä'inö “Surojömä jui̧'a̧jä̧ täcö.” Ja̧'hua̧nö̧ ja̧'a̧ttö̧ Abrahamrö pä'inätödo Dios a̧hua̧ru̧hua̧do pä'ö.

²⁴ Ja̧'hua̧ ja̧'a̧ topätöjä Dios pä'ö: “Surojömä jui'ätö täcö”, i̧huȩnȩ päö ta'anö jȩä̧cuä̧huä̧nä̧'i̧nä̧, esetötä esetäcuähuänätämäcö̧.

²⁵ Ja̧'hua̧ta̧nö̧ Israel ttö̧ja̧ttö̧ huettäjä̧u̧ru̧ adiu jȩja̧'a̧ttö̧, Dios pä'inö: “Surojömä jui'aju täcö”, yaju Rahab pä'ö micuaju mä̧nä̧ ruhuaju. Kara'anä mä̧nä̧nä̧ hue'inäju ppa̧ttä̧cha̧ pä'ö jahuätörö.

²⁶ Ttidepä tta̧'cua̧ru̧hua̧ toönämä hua'ö icu. Ja̧'hua̧nö̧ ja̧'a̧ esetötä esetäcuähuämä, adiu jȩä̧cuä̧huä̧ jȩttö̧ juiyöttömä, 'corupäi'äcuähuä jä̧'i̧nö̧'a̧nö̧ jö̧do.