Santiago 1 - TÄ̧DO Ä̧CUÄ̧ I̧HUȨNȨ

¹ Ttömä Santiagosä. Dios'inä, Tu̧ru̧hua̧ Jesucristo'inä hueö jȩpö̧sä̧. Israel ttö̧ja̧ttö̧ dö'ecuächinätö'cotö pi̧jä̧ pa̧ja̧cu̧nä̧ ka̧cuä̧tö̧rö̧, te'äusä.

Diosrö ta̧'cua̧ tu̧huȩnä̧rö̧ huȩnȩ

² Chö̧jä̧hua̧tö̧, eseunu ka̧cuä̧tu̧cui̧ surojö 'cuäopomenä.

³ Ucutu huo̧juä̧tö̧jä̧, surojö 'cuäopomenä adiu cuesetätucuomenä, cuami 'qui'ächi'ö cu̧ja̧cuä̧cuo̧tö̧jä̧.

⁴ Adiu cuami 'qui'ächi'ö ka̧cuä̧tu̧cui̧, tä̧mö̧ ttö̧ja̧'a̧ jä̧'i̧nö̧'a̧nö̧, 'quiyönä cu̧ja̧cuä̧tu̧cua̧ pä'ö, koro amöcuädäcuähuä juiyönä.

⁵ Ucututtu ya̧tȩ u̧huo̧jui̧'a̧ pä'ö recuä rö̧jö̧ttö̧mä̧, Diosrö jäepö'a̧nö̧ ja̧'a̧. Dios ja̧u̧ru̧ i̧yä̧cua̧. Dios o'ca toi'önärö iyö. Tä̧bo̧cuä̧ juiyönä rö̧ȩnä̧ iyö.

⁶ Iso päi'önä esetömä, jäepö'a̧nö̧ ja̧'a̧ jarodäcuähue'ö juiyönä. Ja̧u̧ jarode'ömä aje yuhuecu'a̧nö̧ a̧'cua̧ huȩnä̧rö̧mä̧. Kä̧ru̧'coppa kara'a päcuädotocu'inä, pä'äji ta'anö kara'a päcuädotocu ȩpa̧'a̧ jä̧'i̧nö̧'a̧nö̧ hua̧.

⁷ Ja̧'hua̧nö̧ amöcuädömä Chu̧ru̧hua̧ttö̧ chȩmä̧cua̧sä̧ pä'ö amöcuädö juiyö'a̧nö̧ hua̧.

⁸ Todärenä amöcuädömä 'quiyönä ko̧cö̧.

Usurä isotö'inä, järe ruhuotö'inä eseunu kä̧cuähuä̧ huȩnȩ

⁹ Jesucristorö esetömä usurä i̧sa̧'i̧nä̧ eseunu ö̧jö̧'a̧nö̧ ja̧'a̧, Dios ppädomenä amöcuädö.

¹⁰ Ja̧'hua̧ta̧nö̧ järe ru̧hua̧'i̧nä̧ Jesucristorö esetömä eseunu ö̧jö̧'a̧nö̧ ja̧'a̧, öärenätämä eseunu ö̧jö̧ juiyönä. Järe ru̧hua̧'i̧nä̧ hua'ö i̧cuä̧cua̧, ȩ'u̧ joi'ö hua'ö icu'a̧nö̧.

¹¹ Kä̧hua̧ räi'omenä, du'hui'omenä, ȩ'u̧ jo'i'ö rȩjȩ ma̧ä̧cha̧'a̧, ȩ'u̧ öadihuä jä̧ji̧ beipächa'a. Ja̧'hua̧ta̧nö̧ järe ru̧hua̧'i̧nä̧ hua'ö i̧cuä̧cua̧ öäre 'quȩtȩttö̧.

Diosmä suronä jȩa̧ päocö huȩnȩ

¹² Surojö 'cuäopomenä, ami 'qui'ächi'ö kö̧mä̧ adiu ö̧jä̧cua̧. Surojö 'cuäopäji o'ca'a, adiu kö̧mä̧ kä̧cuä̧huä̧ i'co ȩmä̧cua̧. Ja̧u̧ kä̧cuä̧huä̧ i'co Dios iya päinömä, Diosrö repe'ätörötä iyä̧cuȩ.

¹³ Ya̧tȩ suronä jȩa̧ pä'ö amöcuädomenä, Diosrömä päö juiyö'a̧nö̧ ja̧'a̧, Dios ttörö suronä jȩcha̧ pä'ö hue'äji pä'ömä. Diosmä suronä jȩa̧ pä'ömä amöcuädocö. Ja̧'hua̧ta̧nö̧ Diosmä hue'ocö korotörö, suronä jȩtta̧ pä'ömä.

¹⁴ Ja̧'hua̧nö̧ ja̧'a̧ ya̧tȩ suronä jȩa̧ pä'ö eseunu amöcuädomenä, suronä jȩpö̧.

¹⁵ Suronä amöcuädäcuähuättö ppöttächa'a suronä jȩä̧cuä̧huä̧mä̧. Suronä jȩä̧cuä̧huä̧mä̧ rö̧ä̧cho̧mȩnä̧, hua'ö tticu.

¹⁶ Chö̧jä̧hua̧tö̧, yapareu cucuocuätucuä' cuamönätucu.

¹⁷ O'ca juiyönä adiumä ttö̧ä̧nä̧huo̧mȩttö̧ icha'ado. Diosttö kä̧hua̧tö̧rö̧'i̧nä̧, si̧ri̧'cö̧rö̧'i̧nä̧ aditinöttö icha'ado. Diosmä yoröiso pärou icuocö. Tti jo̧mȩ pärohue'ö kö̧'a̧nö̧, pärohuocö Diosmä.

¹⁸ Chutä iso päi'önä huȩnȩttö̧, ujuturu iyinö kä̧cuä̧huä̧ i'co, ä'canä ttö̧ja̧, ucuo ttö̧ja̧ päti'a pä'ö Dios aditinä̧u̧ttu̧. Churutä pä̧huä̧ rö̧jo̧mȩnä̧ pä'inödo.

Adiu esetäcuähuä huȩnȩ

¹⁹ Chö̧jä̧hua̧tö̧, 'coruchi'ö pä̧nö̧ ä̧ju̧cuä̧tu̧cui̧. Adiu cuä̧ju̧cuä̧tu̧cu̧ o'ca'a ucuocuätucui. O'ca päi'önä cu̧ra̧huä̧rä̧tu̧cuä̧'.

²⁰ Ra̧huä̧rö̧mä̧ Diosrö pä̧huä̧ rö̧jö̧ jȩpo̧cö̧.

²¹ Ja̧'hua̧nö̧ ja̧'a̧ttö̧ o'ca juiyönä cuamönätucu cuiditäcuähuätucu juäi'inä suronä jȩä̧cuä̧huä̧mä̧ jaropi'ätucui. Adiu ä̧ju̧cuä̧tu̧cui̧ Dios i̧huȩnȩ, cuami iso'quinä ku̧nä̧huä̧ huȩnȩ, suronä jȩttö̧ jȩpö̧ icu huȩnȩ.

²² Dios i̧huȩnȩ päö ta'anö jȩpä̧tu̧cui̧. Ä̧ju̧cu̧tä̧mä̧ cuä̧ju̧cuä̧tu̧cuä̧'. Ä̧ju̧cu̧tä̧ cuä̧ju̧cuä̧tu̧cuo̧mȩnä̧, yapareu ucuocuätöjä cuamönätucutä.

^23-24 Ja̧'hua̧nö̧ ja̧'a̧ ya̧tȩ chutä amönä ö'ä toäcuähuodänä topäcuähui'ö rä'opächö, chutä amönä ö'ä toäcuähuäjimä unichi'ö. Pide jȩö̧'a̧nö̧ jȩpö̧ ä̧ju̧cu̧tä̧ ä̧ju̧cu̧mä̧, Dios i̧huȩnȩ päö'a̧nö̧mä̧ jȩpo̧cö̧.

²⁵ Ya̧tȩ ä̧ju̧cuä̧ji̧ unichi'ocömä, Dios i̧huȩnȩ, suronä jȩä̧cuä̧huä̧ttö̧ ejädö icu huȩnȩ hueö ta'anö adiu amöcuädö jȩpö̧, juhua'a yabocutä 'quiyönä amöcuädö kö̧. Dios i̧huȩnȩ päö ta'anö jȩpö̧ kö̧. Ja̧u̧mä̧ juhua'a yabocu Dios ppä̧dä̧cua̧ jȩö̧mä̧.

²⁶ Ya̧tȩ culto adiu ra̧hua̧'a̧nä̧, ttömä adihuä i̧sa̧sä̧ amöcuädöttömä, koronö'inä ucuocuomenä, adiu huȩnȩtä̧ ucuocu juiyöttömä, amönätä yapareu ucuocu. Diosrö yoröiso esetocö.

²⁷ Tä'o Diosrö adiu ami iso'quinä idicuächö juiyönä esetömä, reyotörö'inä, rȩcua̧mö̧rö̧'i̧nä̧ ppädö'a̧nö̧ ja̧'a̧, surojö 'cuäopomenä. Ja̧'hua̧ta̧nö̧ pi̧jä̧ jähuä suronä amöcuädö jȩpo̧cö̧.