Romanos 7 - TÄ̧DO Ä̧CUÄ̧ I̧HUȨNȨ

Ttirecuarö ku̧nä̧rä̧tö̧rö̧ huȩnȩtö̧ jiäu huȩnȩ

¹ Chö̧jä̧hua̧tö̧, ucutu hueähuä huȩnȩ huo̧juä̧tö̧mä̧, huo̧juä̧tö̧jä̧ hueähuä huȩnȩ tta̧'cua̧rä̧i̧tä̧ hueö.

² Ja̧'hua̧nö̧ jä̧'i̧nö̧'a̧nö̧ yajute isaju kirecuorö ku̧nä̧rä̧ju̧mä̧, hueähuä huȩnȩnä̧ todepaju kirecuottö, ji̧nä̧ a̧'cua̧rä̧i̧tä̧ kirecuo. Kirecuo hua'ö icuomenä, ja̧u̧ hueähuä huȩnȩttö̧mä̧ täcö 'quȩ'ȩcuä̧chä̧ju̧.

³ Kirecuo ö̧ja̧'a̧nä̧, ka̧ra̧rö̧ amöcuädö kusuttumä, suronä jȩpä̧ju̧. Ja̧'hua̧nö̧ ja̧'a̧nä̧ kirecuo hua'ö icuomenä, hueähuä huȩnȩttö̧mä̧ 'quȩ'ȩcuä̧chä̧ju̧. Ja̧'hua̧ ja̧'a̧ttö̧ ka̧ra̧rö̧ kȩmö̧ttö̧mä̧, suronä jȩpo̧co̧ju̧ ja̧u̧nu̧mä̧.

⁴ Ja̧'hua̧ta̧nö̧ ttö chö̧jä̧hua̧tö̧, ucutu'inä Jesucristorö esetätömä, hueähuä huȩnȩttö̧mä̧ hua'ö icuinätöjä, ka̧ra̧ hue'ähuotö cu'ätucua pä'ö. Jitä Cristo, Dios hua'arettö ttoädinäcu umöhuäyotöjä. Dios ja̧u̧ru̧ ja̧'hua̧nö̧ tto'ädinö, ujutu Dios ä'ca jo̧mȩttö̧ adiu tö̧ja̧cua̧ pä'ö.

⁵ Äcuomenä ujututä tidepä pä̧huä̧ rö̧jö̧ jȩpö̧ tö̧ja̧cuo̧mȩnä̧, hueähuä huȩnȩ hueina'a ujuturu, suronä amöcuädö jȩta̧ pä'ö. Ja̧u̧ juäi hua'aretä i'cächinö ujuturu.

⁶ Ja̧'hua̧nö̧ ja̧'a̧nä̧ jitä täcö hua'ö icuinätöjä ja̧u̧ hueähuä huȩnȩttö̧mä̧, ujuturu hueinöttömä. Jitämä Dioscu eseunu aditö ka̧cuä̧tö̧jä̧, ta̧'cua̧rö̧ jareö Espíritu Santo iyö amöcuädö. Täbocö hueähuä huȩnȩ huȩyu̧cu̧'a̧nö̧mä̧ jȩpo̧co̧tö̧jä̧.

Suronä jȩä̧cuä̧huä̧ huea'a ttörö

⁷ Ja̧'hua̧ ja̧'a̧ttö̧ ¿tta̧'a̧nö̧ pätäcua'ajä̧ttö̧ hueähuä huȩnȩmä̧? ¿Hueähuä huȩnȩ surojö tä̧ji̧? Tta̧'a̧huä̧jä̧. Hueähuä huȩnȩmä̧ surojöcö̧. Ttö'inä surojö jerupajisä, hueähuä huȩnȩ hueö juiyinöttömä. Ja̧'hua̧ta̧nö̧ hueähuä huȩnȩ päa'a: “Korotö ttöäre pä̧huä̧ rö̧jö̧ tocu'ä'.” Hueähuä huȩnȩ ja̧'hua̧nö̧ päa'attö, korotö ttöäre pä̧huä̧ rö̧jö̧ toäcuähuämä surojö pä'ö huo̧jua̧sä̧.

⁸ Hueähuä huȩnȩ ka̧'a̧ttö̧, surojö rö̧ä̧chi̧na̧'a̧. Rö̧ȩnä̧ suronä chamöcuäda pä'ö hueina'a ttörö. Ja̧'hua̧ta̧nö̧ hueähuä huȩnȩ juiyomenä, surojö juiyuhua'a.

⁹ Pä'äjimä hueähuä huȩnȩ juiyönä ki̧nö̧sä̧. Ja̧'hua̧nö̧ ja̧'a̧nä̧ hueähuä huȩnȩ rȩbȩhuo̧mȩnä̧, surojö rö̧ä̧chi̧na̧'a̧ ttörö. Ja̧'hua̧nö̧ päi'omenä, 'corupä'i'ätö jä̧'i̧nö̧'a̧nö̧ ki̧nö̧sä̧.

¹⁰ Ja̧u̧ hueähuä huȩnȩ ji̧nö̧mä̧, Dios hue'inö kä̧cuä̧huä̧ iya pä'ö. Ja̧'hua̧nö̧ ja̧'a̧nä̧ ttörö 'corupä'i'ätö jä̧'i̧nö̧'a̧nö̧ chö̧ja̧ pä'ö hueina'a.

¹¹ Surojö ja̧u̧ hueähuä huȩnȩnä̧ yapareu ucuocuina'a ttörö. Ja̧'hua̧ta̧nö̧ hua'are ichina'a ttörö.

¹² Hueähuä huȩnȩ Diosttö ichina'a. Ja̧'hua̧ta̧nö̧ ttö̧ja̧ hueähuä, Diosrö pä̧huä̧ rö̧jo̧mȩnä̧ huea'a. Ja̧'hua̧ta̧nö̧ yoräteunä huea'a o'ca toi'önärö. Ja̧'hua̧ta̧nö̧ adiu huea'a ttö̧ja̧rö̧.

¹³ Ja̧'hua̧nö̧ ja̧'a̧nä̧ ¿ja̧u̧ adihuä juäimä chesetomenä, hua'are ttörö ichina'a tä̧ji̧? Ja̧'hua̧nö̧mä̧cö̧. Ttörö adiunämä surojötä 'corupä'i'ätö jä̧'i̧nö̧'a̧nö̧ chö̧jö̧nä̧ hueina'a ttörö, o'ca toi'önä surojö ttu̧huo̧jua̧ pä'ö. Ja̧'hua̧ta̧nö̧ hueähuä huȩnȩ surojö jȩtö̧ juiya pä'ö päa'anä, surojötä ji̧nä̧ isocu rö̧ä̧cha̧'a̧.

¹⁴ Ujutu huo̧juä̧tö̧jä̧ hueähuä huȩnȩ Diosttö icha'a pä'ö. Ja̧'hua̧nö̧ ja̧'a̧nä̧ ttömä chidepä hueötä jȩpö̧sä̧, surojö hueö jȩä̧cuä̧huä̧ i̧sa̧ cha'attö.

¹⁵ Chamönä jȩchö̧ jȩru̧pa̧sä̧. Jȩpo̧cö̧sä̧ ttörö pä̧huä̧ rö̧jö̧mä̧. Chöjö'cö juiyötä jȩpö̧sä̧ ttömä.

¹⁶ Chöjö'cö juiyötä jȩcha̧'a̧nä̧, huo̧jua̧sä̧ hueähuä huȩnȩ adiu pä'ö.

¹⁷ Ja̧'hua̧nö̧ jȩcho̧mȩnä̧, ttötä chamönämä jȩpo̧cö̧sä̧. Surojötä, chami iso'quinä kö̧tä̧, ja̧'hua̧nö̧ jȩcha̧ pä'ö huea'a.

¹⁸ Ttö huo̧jua̧sä̧ ttö chidepänämä adihuä juäi juiya'a. Adiu jȩcha̧ päda'anä, yoröiso adiu jȩpo̧cö̧sä̧.

¹⁹ Yoröiso adihuä juäi ttörö pä̧huä̧ rö̧jö̧mä̧ jȩpo̧cö̧sä̧. Suronä ttörö pä̧huä̧ juiyötä jȩpo̧'ä̧rö̧sä̧.

²⁰ Ja̧'hua̧ ja̧'a̧ttö̧ chöjö'cö juiyötä jȩchö̧ttö̧mä̧, ttötä chamönämä jȩpo̧cö̧sä̧. Surojötä, chami iso'quinä kö̧tä̧, ja̧'hua̧nö̧ jȩcha̧ pä'ö huea'a.

²¹ Ja̧'hua̧nö̧ 'cuäopa'a ttörömä, adihuä juäi jȩcha̧ päda'anä, ji̧yȩä̧cuȩtä̧ surojötä ja̧'a̧ ttörömä.

²² Ttö cha̧'cua̧nä̧ chamöcuädömä, Dios hueähuä pä̧huä̧ rö̧jä̧cu̧sä̧.

²³ Ja̧'hua̧nö̧ ja̧'a̧nä̧ cha̧'cua̧nä̧ adiu chamöcuäda päda'anä, chidepätä i̧mi̧cu̧nä̧ rohuähua'a. Chidepä rohuäumä surojötä ja̧'a̧. Ja̧'hua̧ta̧nö̧ cärenä ttö̧'a̧'a̧ jä̧'i̧nö̧'a̧nö̧ jä̧cu̧sä̧.

²⁴ Ttömä cha̧'cua̧ tta̧'ȩcu̧sä̧. Ttö chidepämä ttörö ȩpa̧'a̧ hua'arera̧'a̧. Ja̧'hua̧ ja̧'a̧ttö̧ ¿dijä̧ttö̧ ttörö ppä̧dä̧cua̧mä̧?

²⁵ Ya̧tȩtä̧ Diostä Tu̧ru̧hua̧ Jesucristorö tesetomenä ppä'ädö. Ttö eseusä Diosrö. Ja̧'hua̧nö̧ ja̧'a̧ ttö chamöcuädönämä ttörö pä̧huä̧ rö̧jö̧mä̧ Dios hueö jȩcha̧ pä'ösä. Ja̧'hua̧nö̧ ja̧'a̧nä̧ ttö chidepänä surojö hueötä jȩpö̧sä̧.