Romanos 5 - TÄ̧DO Ä̧CUÄ̧ I̧HUȨNȨ

Ujutu Dios ahuaruhuä huotöjä

¹ Ja̧'hua̧nö̧ ja̧'a̧ttö̧ ujutu tesetiniyäcu, Dios ujuturu jȩpi̧nö̧ chutäcu ji̧nä̧ ji̧yȩtȩ huotö ta pä'ö. Ja̧'hua̧ ja̧'a̧ttö̧ Diosmä aboiyotömäcö̧jä̧ Tu̧ru̧hua̧ Jesucristorö teseta'attö.

² Cristorö tesetomenä, Diosttö ppädäcuähuä tȩma̧ pä'ö ppä'ädö. Ja̧u̧ ppädäcuähuänä ka̧cuä̧tö̧jä̧ jitämä. Ja̧'hua̧nö̧ ja̧'a̧ttö̧ eseunu tta̧'ä̧rö̧ ka̧cuä̧tö̧jä̧, adihuä Dioscu mo̧ro̧jä̧ra̧'a̧ tö̧ja̧cuä̧cuo̧tö̧jä̧ pä'ö.

³ Ja̧'hua̧ta̧nö̧ ubara ttutomenä'inä, esehuätöjä. Huo̧juä̧tö̧jä̧ ubara ttutomenä, tami 'quitächi'a pä'ö ppä'ädö.

⁴ Tami 'qui'ächi'ö tö̧ja̧cuo̧mȩnä̧, ji̧nä̧ isocu tami 'qui'ächi'ö ka̧cuä̧tö̧jä̧. Ja̧'hua̧ta̧nö̧ tami 'quitächi'a'attö, eseunu tta̧'ä̧rä̧tö̧jä̧.

⁵ Ja̧'hua̧nö̧ eseunu tta̧tä̧ro̧mȩnä̧, ta̧'cua̧ tta̧'ȩcuo̧co̧tö̧jä̧. Dios ujuturu repe'ö, tami iso'qui suhuädi'önä Espíritu Santorö iyinä̧u̧jä̧.

⁶ Ujututä tamönämä yoröiso ppä'ädäcuähuocotö pi̧nä̧tö̧jä̧. Päinome pätecuächomenä, Cristo 'corupä'i'inö ujutu suronä jȩtö̧ imitähua pä'ö.

⁷ Ka̧ra̧mä̧ ka̧ra̧rö̧, adihuä i̧sa̧rö̧ ppä'ädö 'corupä'i'ocö paji. Ja̧'hua̧nö̧ ja̧'a̧nä̧ ya̧tȩ iso päi'önä re rö̧jö̧nä̧ jȩpö̧rö̧ ppä'ädö 'corupä'i'aji ka̧ra̧mä̧.

⁸ Ja̧'hua̧nö̧ ja̧'a̧nä̧ ujutu suronä jȩpö̧ tö̧ja̧cuo̧mȩnä̧, Cristo ujutu suronä jȩtö̧ mitäu 'corupäi'ina'attö, Dios ujuturu repeömä i̧jȩpö̧.

⁹ Cristo 'corupäi'ina'attö, Dios jȩpi̧nö̧ ujuturu chutäcu ji̧nä̧ ji̧yȩtȩ huotö ta pä'ö. Ja̧'hua̧ ja̧'a̧ttö̧ juhua'a yabocutä adiu u̧ju̧nä̧rä̧cua̧ ujuturu, tä̧bo̧cuä̧ ra̧huȩpi̧jö̧ 'cuäopa'anä.

¹⁰ Ujutu Dios aboiyotö pi̧nä̧tö̧jä̧. Ujutu ja̧'hua̧nö̧ jȩta̧'a̧nä̧'i̧nä̧, Diosmä hue'inö I̧tti̧rö̧ 'corupäi'a pä'ö, ahuaruhuä päti'a pä'ö. Ja̧'hua̧ ja̧'a̧nä̧ ujutu ahuaruhuä tö̧ja̧cua̧'a̧ttö̧, Dios I̧tti̧ ö̧ja̧'a̧ttö̧, juhua'a yabocutä tta̧huä̧rä̧cua̧ ujuturu.

¹¹ Ja̧u̧ ji̧yȩtȩtä̧mä̧ amöcuädocotöjä. Ja̧'hua̧ta̧nö̧ Tu̧ru̧hua̧ Jesucristorö teseta'attö, Diosrö esehuätöjä. Chutä Jesucristo ppä'ädinö ujuturu, Dios ahuaruhuä päti'a pä'ö.

Adánrö'inä, Jesucristorö'inä tamöcuädö huȩnȩ

¹² Ja̧'hua̧ ja̧'a̧ttö̧ ya̧tȩ ubottö suronä jȩä̧cuä̧huä̧ rȩbȩhui̧na̧'a̧ pi̧jä̧nä̧. Suronä jȩo̧mȩnä̧, hua'are i'cächinö. Ja̧'hua̧ ja̧'a̧ttö̧ suronä jȩi̧na̧'a̧ttö̧, o'ca toi'önä ttö̧ja̧, hua'ä ttö̧ja̧ juo'ähuinätö suronä jȩpö̧.

¹³ Moisés hueähuä huȩnȩ ji̧nä̧ juiyäi, ki̧na̧'a̧ suronä jȩä̧cuä̧huä̧ pi̧jä̧nä̧. Suronä jȩtti̧nö̧ huȩyu̧tu̧ ku̧no̧cö̧ pi̧nö̧, hueähuä huȩnȩ ji̧nä̧ juiyäi ja̧'a̧ttö̧.

¹⁴ Ja̧'hua̧nö̧ ja̧'a̧nä̧ Adán ö̧ji̧nö̧ pä̧nä̧ kä̧mä̧dö̧, Moisés ö̧ji̧no̧mȩ jubö päi'önä, o'ca toi'önä ttö̧ja̧ suronä jȩtto̧mȩnä̧ hua'ö icuinätö. Adán Dios ro̧ȩcuä̧ huȩnȩ iyinö huȩnȩ jȩo̧ca̧'a̧ ji̧nö̧'a̧nö̧mä̧, jȩpo̧co̧tö̧ pi̧nä̧tö̧ jahuätö ttö̧ja̧, hueähuä huȩnȩ juiya'attö. Ja̧'hua̧ta̧nö̧ Adánmä yodoji i̧chä̧cua̧ a̧'cua̧rö̧nä̧ ki̧nö̧.

¹⁵ Ja̧'hua̧nö̧ ja̧'a̧nä̧ Dios mippoönä iyömä, Adán suronä jȩi̧nö̧'a̧nö̧ jo̧cö̧. Iso päi'önä ya̧tȩtä̧ suronä jȩa̧'a̧ttö̧, recuätö ttö̧ja̧ hua'ö icuinätö. Ja̧'hua̧nö̧ ja̧'a̧nä̧ kä̧cuä̧huä̧ i'co Dios iyömä, ya̧tȩnä̧tä̧ Jesucristonä o'ca toi'önärö rö̧ȩnä̧ adihua pä'ö.

¹⁶ Kä̧cuä̧huä̧ i'co Dios iyömä, ya̧tȩ suronä jȩö̧'a̧nö̧ jo̧cö̧. Ya'utenätä suronä jȩa̧'a̧nä̧, hua'ä ttö̧ja̧ juo'ähuinätö. Ja̧'hua̧nö̧ ja̧'a̧nä̧ rö̧ȩnä̧, suronä jȩtta̧'a̧nä̧, Dios mippoönä iyö chutäcu ji̧nä̧ ji̧yȩtȩ huotö tta pä'ö.

¹⁷ Ja̧'hua̧ ja̧'a̧ttö̧ ya̧tȩ ubo suronä jȩa̧'a̧ttö̧, o'ca toi'önä ttö̧ja̧ hua'ä ttö̧ja̧ juo'ähuinätö. Ja̧'hua̧nö̧ ja̧'a̧nä̧ chutä Jesucristo jȩi̧nö̧mä̧, ya̧tȩ suronä jȩi̧nö̧ttö̧'i̧nä̧ abonänö adihua'a. O'ca toi'önä Dios chutäcu ji̧nä̧ ji̧yȩtȩ huotö tta pä'ö jȩä̧u̧mä̧, kä̧cuä̧huä̧ i'co ttu̧ju̧nä̧rä̧cuo̧tö̧, Jesucristorö tteseta'attö.

¹⁸ Ja̧'hua̧nö̧ ja̧'a̧ttö̧ Adán ya'utenätä suronä jȩa̧'a̧ttö̧, o'ca toi'önä ttö̧ja̧ hua'ä ttö̧ja̧ juo'ähuinätö. Ja̧'hua̧ta̧nö̧ Jesucristo ya'utenätä adiu jȩi̧na̧'a̧ttö̧, Dios tta̧'cua̧rö̧ iyö suronä jȩttö̧ jȩpö̧ icu o'ca toi'önä ttö̧ja̧rö̧.

¹⁹ Ja̧'hua̧ta̧nö̧ ya̧tȩ ubo Dios hueinö jȩo̧ca̧'a̧ttö̧, recuätö suronä jȩä̧cuä̧huä̧ ttö̧ja̧ juo'ähuinätö. Ja̧'hua̧ta̧nö̧ ya̧tȩ Dios hueinö jȩi̧na̧'a̧ttö̧, Dios recuätörö jȩä̧cua̧ chutäcu ji̧nä̧ ji̧yȩtȩ huotö tta pä'ö.

²⁰ Moisés hueähuä huȩnȩ ichina'a, suronä jȩä̧cuä̧huä̧ rö̧ä̧cha̧ pä'ö. Ja̧'hua̧nö̧ ja̧'a̧nä̧ suronä jȩä̧cuä̧huä̧ rö̧ä̧cha̧'a̧nä̧, Dios ppädäcuähuä suronä jȩä̧cuä̧huä̧ttö̧'i̧nä̧ abonänö rö̧ä̧chi̧na̧'a̧.

²¹ Ja̧'hua̧nö̧ ja̧'a̧ttö̧ suronä jȩtto̧mȩnä̧, hua'are juruhuina'a. Ja̧'hua̧ta̧nö̧ Dios ujuturu jȩo̧mȩnä̧ chutäcu ji̧nä̧ ji̧yȩtȩ huotö ta pä'ö, Dios ppädäcuähuä juruhuina'a. Ja̧'hua̧nö̧ ujuruhua'attö, kä̧cuä̧huä̧ i'co iyö, Tu̧ru̧hua̧ Jesucristorö tesetomenä.