Romanos 16 - TÄ̧DO Ä̧CUÄ̧ I̧HUȨNȨ

Pablo ahuaruhuä ö̧jä̧hua̧tö̧rö̧ teähuinö huȩnȩ

¹ Tö̧jä̧hua̧ju̧ Feberö cu̧huo̧juä̧tu̧cua̧ pä'ö huȩyu̧tu̧ hue'ösä. Jahuäju ppä'ädäju Cencrea ötahuiyä iglesia ruhuärö.

² Jahuäjuru adiu jȩpä̧tu̧cui̧ Tu̧ru̧hua̧ i̧mi̧nä̧ Jesucristorö esetätö jȩttö̧'a̧nö̧. Ja̧'hua̧ta̧nö̧ ppä'ädätucui koro juäi yajuru recua rö̧jö̧mä̧. Jahuäju recuätörö'inä, ttörö'inä ppä'ädinäju.

³ Te'ähuätucui Priscilarö'inä, Aquilarö'inä. Cristo Jesús aditähuänä ttöcu ppä'ädätö jahuätö.

⁴ Ttörö ra̧huȩpi̧jö̧ttö̧'i̧nä̧, 'corupätti'ö'a̧nö̧ jö̧ttö̧'i̧nä̧ ppä'ädinätö. Ja̧'hua̧nö̧ ja̧'a̧ttö̧ jahuätörö eseunu amöcuädösä. Ttötä katä chihueyemäcö̧, o'ca toi'önä chö̧jä̧hua̧tö̧ judíos huocotö'inä esehuätö jahuätörö.

⁵ Te'ähuätucui ji̧nä̧ yo̧mȩtȩ Diosrö ttucuocua pä'ö ca̧ca̧cui̧pä̧tö̧rö̧ Priscilacu, Aquilacu ttojusodenä. Ja̧'hua̧ta̧nö̧ te'ähuätucui adihuä cha̧hua̧ru̧hua̧ Epenetorö, äcuomenä Cristorö esetinörö Acaya rȩjȩttö̧.

⁶ Te'ähuätucui Maríarö, ucuturu rö̧ȩnä̧ aditinäjuru.

⁷ Te'ähuätucui ttötä chahuaruhuä isotö Andrónicorö'inä, Juniasrö'inä. Jahuätö ttöcu cärenä pi̧nä̧tö̧. Jahuätömä Jesús hue'ähuotö'inä ttu̧huo̧juä̧u̧. Jahuätömä ttöttö'inä ä'coji esetinätö Cristorö.

⁸ Te'ähuätucui Ampliasrö'inä, adihuä cha̧hua̧ru̧hua̧rö̧ Tu̧ru̧hua̧nä̧.

⁹ Te'ähuätucui Urbanorö, Cristo Jesús aditähuänä ttöcu ppä'ädörö. Ja̧'hua̧ta̧nö̧ adihuä cha̧hua̧ru̧hua̧ Estaquisrö'inä te'ähuätucui.

¹⁰ Te'ähuätucui Apelesrö, Cristo ka̧cuä̧mö̧ toinäcuru. Ja̧'hua̧ta̧nö̧ Aristóbulo ahuaruhuärö'inä te'ähuätucui.

¹¹ Te'ähuätucui ttötä cha̧hua̧ru̧hua̧ i̧sa̧ Herodiónrö. Narciso ahuaruhuä, Tu̧ru̧hua̧rö̧ esetätörö'inä te'ähuätucui.

¹² Te'ähuätucui Trifenarö'inä, Trifosarö'inä, Tu̧ru̧hua̧ aditähuä ppä'ädö aditätörö. Ja̧'hua̧ta̧nö̧ te'ähuätucui adihuä töjähuaju Pérsidarö, rö̧ȩnä̧ aditinäjuru Tu̧ru̧hua̧ aditähuä.

¹³ Te'ähuätucui Ruforö, adiu tu̧huo̧juä̧cu̧ru̧ U̧ru̧hua̧rö̧ esetinörö. Ja̧'hua̧ta̧nö̧ te'ähuätucui Rufo ja̧ju̧ru̧'i̧nä̧, ki̧tti̧ a̧'cua̧rö̧nä̧ ttörö jȩpi̧nä̧ju̧ru̧.

¹⁴ Te'ähuätucui Asíncritorö'inä, Flegonterö'inä, Hermasrö'inä, Patrobasrö'inä, Hermesrö'inä, tö̧jä̧hua̧tö̧ jahuätöcu ka̧cuä̧tö̧rö̧'i̧nä̧.

¹⁵ Te'ähuätucui Filólogorö'inä, Juliarö'inä, Nereorö'inä, Nereo öjähuajuru'inä, Olimpasrö'inä, Jesucristorö esetätö jahuätöcu ka̧cuä̧tö̧rö̧'i̧nä̧.

¹⁶ Korotö korotönö ttu̧mö̧ 'chu'ädö te'ähuätucui. O'ca toi'önä iglesias ruhuä hue'ätö ucuturu tettähua pä'ö.

¹⁷ Chö̧jä̧hua̧tö̧, adiu ttu̧ȩcuä̧nä̧ topö cu̧ja̧cuä̧tu̧cua̧ pä'ösä korotö korotörö 'quȩ'ȩpä̧tö̧rö̧'i̧nä̧, surojöcu ma̧ttä̧cha̧ pä'ö jȩpä̧tö̧rö̧'i̧nä̧. Jahuätö jȩttö̧mä̧ ucutu cu̧huo̧jui̧'i̧nä̧tu̧cu̧ttu̧'i̧nä̧ i̧mi̧cu̧nä̧ jö̧. 'Quȩ'ȩcuä̧chä̧tu̧cui̧ jahuätöttö.

¹⁸ Jahuätömä Tu̧ru̧hua̧ Jesucristorö pä̧huä̧ rö̧jö̧ jȩpo̧co̧tö̧. Jitörötä pä̧huä̧ rö̧jö̧tä̧ jȩpä̧tö̧. Tti̧huȩnȩ esetönö, repe'önänö ucuocuätö jerupätörö.

¹⁹ O'ca toi'önä huo̧juä̧tö̧ ucutu Dios i̧huȩnȩ päö ta'anö jȩcu̧'ä̧tu̧cu̧mä̧. Ja̧'hua̧nö̧ ja̧'a̧ttö̧ ttö eseusä ucuturu. Adiu jȩpö̧ cu̧ja̧cuä̧tu̧cua̧ pä'ösä, surojö jȩcu̧'ä̧tu̧cuo̧ca̧'a̧.

²⁰ Esecuä Dios cu̧jä̧pö̧ dȩa̧'a̧ jurunänö ö̧tä̧cua̧ ähuettärö. Tu̧ru̧hua̧ Jesucristo ucuturu ppädäcua'a̧nö̧.

²¹ Ttöcu ppä'ädömä Timoteo, ucuturu te'äu. Ja̧'hua̧ta̧nö̧ ttötä chahuaruhuä isotö Lucio'inä, Jasón'inä, Sosípater'inä ucuturu te'ähuätö.

²² Ttö Tercio, pi̧yȩ cuyäru huȩyu̧tu̧ huedömä, ucuturu te'äusä Tu̧ru̧hua̧ i̧mi̧nä̧.

²³ Gayo'inä ucuturu te'äu. Ttö ja̧u̧ ojusodenä kö̧sä̧. Ja̧u̧ ojusodettö o'ca toi'önä iglesia ruhuä ra̧'ä̧tö̧. Erasto'inä, ötahuiyättö pärätä tta̧'ä̧rö̧mä̧ ucuturu te'äu. Tö̧jä̧hua̧ Cuarto'inä te'äu ucuturu.

²⁴ O'ca toi'önä ucuturu Tu̧ru̧hua̧ Jesucristo ppädäcua'a̧nö̧. Amén.

Röji jiähuinö huȩnȩ

²⁵ Diosrö eseunu tucuocuaja. Ja̧u̧ jȩä̧cua̧ juhua'a yabonö adiunä 'quiyönä cu̧ja̧cuä̧tu̧cua̧ pä'ö. Ja̧'hua̧nö̧ jȩä̧cua̧ ttö̧ja̧ suronä jȩttö̧ jȩpö̧ icu jidäu huȩnȩ'i̧nä̧, Jesucristorö huo̧juȩcuä̧ huȩnȩ'i̧nä̧ cuesetätucuomenä. Ja̧'hua̧ta̧nö̧ pi̧jä̧ juiyäi'inä, Dios yä̧huä̧i̧nä̧ amöcuädinö tu̧huo̧jua̧ pä'ö iyinö pi̧yȩ adihuä huȩnȩ.

²⁶ Ja̧'hua̧nö̧ ja̧'a̧nä̧ jitämä Dios i̧huȩnȩ jiäcuähuä isotö tti̧huȩyu̧ti̧nö̧'i̧nä̧, Dios hueinö huȩnȩ'i̧nä̧ bahuecua'a jä̧'i̧nö̧'a̧nö̧ ja̧'a̧. Dios yä̧huä̧i̧nä̧ amöcuädinömä jitä hue'inö o'ca toi'önä ttö̧ja̧rö̧ jittähua pä'ö, Diosrö esetö i̧huȩnȩ päö ta'anö jȩtta̧ pä'ö.

²⁷ Ya̧tȩtä̧ Diosrötä, o'ca juiyönä huo̧jua̧rö̧, 'cuäopönä tesehuäcuähuätucuaja, Jesucristorö esetö. Amén.