Romanos 15 - TÄ̧DO Ä̧CUÄ̧ I̧HUȨNȨ

Ucututtu'inä abonänö kö'cönä topätucui cuahuaruhuärö

¹ Ujutu tesetöttö juruhuätömä, ppätädö'a̧nö̧ ja̧'a̧ tö̧jä̧hua̧tö̧ juiyupätörö, ujutu tamönätä töjö'cönätämäcö̧.

² Ujutu ya̧cu̧nä̧ tahuaruhuärö pä̧huä̧ rö̧jö̧tä̧ jȩtö̧'a̧nö̧ ja̧'a̧, jahuätörö adiu jö̧nä̧ ttesetö rö̧ä̧cha̧ pä'ö.

³ Cristo'inä churutä pä̧huä̧ rö̧jö̧tä̧mä̧ amöcuädocö pi̧nö̧. Ja̧u̧ru̧ 'cuäopina'a Huȩyu̧cuä̧ Huȩnȩ päö'a̧nö̧: “Ucuru suronä ttucuocuinömä, ttörö ma̧i̧na̧'a̧.”

⁴ O'ca juiyönä täbocö Huȩyu̧cuä̧ Huȩnȩ jiäumä, ujuturu huo̧juȩtö̧ huȩyu̧cua̧'a̧, ta̧'cua̧ pö̧nö̧ tö̧ja̧ pä'ö, Dios i̧huȩnȩ ppädäcuähuänä eseunu tta̧tä̧ra̧ pä'ö.

⁵ Diostä tta̧'cua̧ pö̧nö̧ kä̧cuä̧huä̧'i̧nä̧, ppädäcuähuä'inä iyäcua'a̧nö̧ ucuturu, adiu yoräteunä cuamöcuädätucua pä'ö korotö korotöcu Cristo Jesúsru esetö.

⁶ Ja̧'hua̧nö̧ o'ca toi'önä yoräteunä Tu̧ru̧hua̧ Jesucristo Jä'o Diosrö ji̧nä̧ ji̧yȩtȩ adiu cuesehuätucuäcua'a̧nö̧.

Judíos huocotö Diosrö ttesetinö huȩnȩ

⁷ Ja̧'hua̧nö̧ ja̧'a̧ttö̧ eseunu jȩpä̧tu̧cui̧ korotö korotöcu, Cristo jȩi̧nö̧'a̧nö̧ ujuturu, korotö Diosrö ttucuota pä'ö.

⁸ Ttö pa̧'a̧nö̧ pä'ösä, Cristo ichinö judíos ttö̧ja̧rö̧ ppäda pä'ö. Ja̧'hua̧nö̧ ichinö Dios ujutu tä̧do̧tö̧ mi̧nä̧rö̧ päinömä 'cuäopa pä'ö. Ja̧'hua̧ta̧nö̧ Dios iso päi'önätä ucuocu i̧jȩpi̧nö̧.

⁹ Ja̧'hua̧ta̧nö̧ Cristo ichinö judíos huocotö'inä Diosrö adiu ttucuocua pä'ö, Dios jahuätörö re rö̧jö̧nä̧ toina'attö Huȩyu̧cuä̧ Huȩnȩ päö'a̧nö̧: Ja̧'hua̧nö̧ ja̧'a̧ttö̧ judíos huocotö ttä'ca jo̧mȩ ucuru adiu chu̧cuo̧cuä̧cua̧sä̧. Adiu ucuotönö cui̧mi̧nä̧ ra̧dä̧cua̧sä̧.

¹⁰ Ja̧'hua̧ta̧nö̧ korome'inä Huȩyu̧cuä̧ Huȩnȩ päa'a: Esehuätucui ucutu judíos huocotö'inä Dios umöhuäyotöcu.

¹¹ Korome'inä Huȩyu̧cuä̧ Huȩnȩ päa'a: Cu̧ru̧hua̧rö̧ adiu ucuocuätucui, o'ca toi'önä judíos huocotömä. Chutä adiu jȩö̧mä̧ ucuocuätucui, o'ca toi'önä ttö̧ja̧.

¹² Isaías'inä huȩyu̧ti̧nö̧: Isaí isotöttö ya̧tȩ i̧chä̧cua̧. Ja̧u̧ judíos huocotö ttu̧ru̧hua̧ päi'önä ö̧jä̧cua̧. Ja̧u̧ru̧ tta̧'cua̧ ttu̧huȩnä̧rä̧cuo̧tö̧.

¹³ Dios, ta̧'cua̧ tu̧huȩnä̧ra̧ pä'ö iyömä, ucuturu suhuädi'önä iyäcua'a̧nö̧ eseäcuähuä'inä, cua̧'cua̧ adiu kä̧cuä̧huä̧'i̧nä̧, ja̧u̧ru̧ cuesetätucuomenä. Ja̧'hua̧ta̧nö̧ Espíritu Santo ujurunä cua̧'cua̧ cu̧huȩnä̧rä̧cuä̧huä̧ rö̧ȩnä̧ juoächö'a̧nö̧ ucuturu.

¹⁴ Ttö chö̧jä̧hua̧tö̧, ttötä iso päi'önä huo̧jua̧sä̧ ucutu yoröiso adiu jȩpä̧tö̧jä̧. Ja̧'hua̧ta̧nö̧ o'ca juiyönä huo̧juä̧tö̧jä̧. Ja̧'hua̧ta̧nö̧ ucutu huo̧juä̧tö̧jä̧ cu̧huo̧juȩtä̧tu̧cua̧ pä'ö korotö korotönörö.

¹⁵ Ja̧'hua̧nö̧ ja̧'a̧ttö̧ ja̧u̧ juäi pi̧yȩ cuyärunä yecuäcuähuä juiyönä huȩyu̧tä̧ji̧sä̧ cunichi'ätucuoca'a cuamöcuädätucua pä'ö. Ja̧'hua̧nö̧ huȩyu̧tä̧ji̧sä̧ Dios ttörö repe'ö hueina'attö.

¹⁶ Jesucristo i̧huȩnȩ judíos huocotörö jidähua pä'ö hue'inö. Ttö̧ja̧ suronä jȩttö̧ jȩpö̧ icu huȩnȩ, Dios iyömä ji'äusä judíos huocotörö, Espíritu Santo ȩmä̧u̧ru̧, Dios koro juäi ofrenda ȩma̧'a̧ jä̧'i̧nö̧'a̧nö̧ ȩma̧ pä'ö jahuätörö.

¹⁷ Ttö Cristo Jesúsru cheseta'attö, eseusä Dioscu chaditähuä.

¹⁸ Yecuäcuähuä juiyönä ji'äusä Cristo ppäda'anä jȩchi̧nö̧mä̧, judíos huocotö Diosrö tteseta pä'ö. Ja̧'hua̧nö̧ jȩpi̧nö̧sä̧ ucuocuäcuähuänä'inä, jȩä̧cuä̧huä̧nä̧'i̧nä̧.

¹⁹ Ja̧'hua̧ta̧nö̧ huo̧juȩtö̧ jȩä̧cuä̧huä̧nä̧'i̧nä̧, ttö̧ja̧ ttieru juäi jȩä̧cuä̧huä̧nä̧'i̧nä̧, Espíritu Santo ujurunä'inä ji'ähuinösä. Ja̧'hua̧nö̧ ja̧'a̧ttö̧ Cristo ttö̧ja̧ suronä jȩttö̧ jȩpö̧ icu huȩnȩ ji'ähuinösä Jerusalén ötahuiyättö kä̧mä̧dö̧, o'ca juiyönä jättäja'a Ilírico rȩjȩra̧'a̧ päi'önä.

²⁰ Ttömä Cristo i̧mi̧ jerupätörö jidähua pä'inösä. Korotö jittähuinä̧u̧ru̧ jidähua pä'ocö pi̧nö̧sä̧, korotö ttaditähuä ja̧'a̧ttö̧.

²¹ Ttö ji'ähuinösä Huȩyu̧cuä̧ Huȩnȩ päö'a̧nö̧: Chutä i̧huȩnȩ jittähuoco̧u̧'i̧nä̧ tottäcuotö. Ja̧'hua̧ta̧nö̧ ttä̧ju̧cuä̧cuo̧tö̧ jitö yoröiso ttä̧ju̧cuo̧cö̧ ji̧nö̧.

Pablo Roma ötahuiyära̧'a̧ i̧'cha̧ pä'ö amöcuädinö huȩnȩ

²² Ja̧'hua̧nö̧ ja̧'a̧ttö̧ 'cuäopönä ucuturu do'ächö chicha päda'anä, chichö juiyönä ji̧na̧'a̧.

²³ Jitä täcö cä'ädäcuäusä chaditähuämä porömä. Recuo a̧'ȩ pä̧huä̧ rö̧jö̧nä̧ amöcuädinösä, ucutu cu̧ja̧cuä̧tu̧cua̧'a̧ chicha pä'ö.

²⁴ Jitä dodächa pä'ösä España rȩjȩra̧'a̧ 'cuä'opö kä̧nö̧. Ucuturu eseunu tochö o'ca'a, ucutu ppäcuhuädätucu'a̧nö̧ ja̧'a̧ yo chi̧'chö̧mä̧.

²⁵ Ja̧'hua̧nö̧ ja̧'a̧nä̧ jitämä Jerusalén ötahuiyära̧'a̧ ofrenda ȩpö̧ 'chö̧sä̧ tö̧jä̧hua̧tö̧rö̧, juhua'a ka̧cuä̧tö̧rö̧.

²⁶ Macedonia rȩjȩ ttö̧ja̧'i̧nä̧, Acaya rȩjȩ ttö̧ja̧'i̧nä̧ amöcuädätö ttö̧ca̧ca̧ta̧ pä'ö pärätä ttu̧ju̧nä̧rö̧mä̧ huetta pä'ö tö̧jä̧hua̧tö̧ usurä isotörö, Jerusalén ötahuiyänä ka̧cuä̧tö̧rö̧.

²⁷ Ja̧'hua̧nö̧ jitötä amöcuädinätö adiu'a̧nö̧ ji̧na̧'a̧do ttamöcuädomenä. Ja̧'hua̧nö̧ ja̧'a̧ttö̧ iso päi'önä ppättädö'a̧nö̧ ja̧'a̧. Ja̧'hua̧ta̧nö̧ jitörö judíos ttö̧ja̧rö̧ ppättädö'a̧nö̧ ja̧'a̧ pi̧jä̧ jähuänä, koro juäi ttu̧ju̧nä̧rö̧mä̧, judíos ttö̧ja̧ judíos huocotörö ppättädinö ta'anö Dios jähuänä.

²⁸ Ja̧'hua̧nö̧ cädädäcuähuomenä, ja̧u̧ juäi iyipö, España rȩjȩra̧'a̧ 'chä̧nö̧ kä̧nö̧, ucuturu do̧dä̧chä̧cua̧sä̧.

²⁹ Huo̧jua̧sä̧ ucuturu chi̧rȩbȩhuo̧mȩnä̧, Cristo ucuturu rö̧ȩnä̧ ppä̧dä̧cua̧ ttö jidäunä.

³⁰ Chö̧jä̧hua̧tö̧, Espíritu Santo ujuturu repeähuä iyä̧u̧ ucuturu pä'ösä Tu̧ru̧hua̧ Jesucristorö esetö ttörö cucuocuätucua pä'ö Diosrö, ttörö ppäda pä'ö.

³¹ Diosrö jä'epätucui adiu ppädattö Judea rȩjȩttö̧ Diosrö esetocotö suronä jȩttö̧ juiyattö. Ja̧'hua̧ta̧nö̧ jä'epö ucuocuätucui ppädäcuähuä chȩpö̧ adiu ttȩmä̧cua̧'a̧nö̧ chö̧jä̧hua̧tö̧ Jerusalén ötahuiyättö.

³² Ja̧'hua̧ta̧nö̧ eseunu chichäcua'a̧nö̧ ucuturu Diosrö pä̧huä̧ rö̧jo̧mȩnä̧ ucuturu chesehuäcua'a̧nö̧ ucuocuätucuittö.

³³ Dios tta̧'cua̧ adiu kä̧cuä̧huä̧ iyömä, o'ca toi'önä ucutucu ö̧jä̧cua̧'a̧nö̧. Amén.