Romanos 14 - TÄ̧DO Ä̧CUÄ̧ I̧HUȨNȨ

Jarode'ö cucuocuätucuä' cu̧jä̧hua̧tu̧cu̧ru̧

¹ Adiu esehuätucui Ttu̧ru̧hua̧rö̧ esetö kä̧nö̧ ttamöcuädö juiyupätörö'inä, cuamönä cuamöcuädätucu cucuocuätucuoca'a.

² Ja̧'hua̧nö̧ ja̧'a̧ttö̧ yotöte esetätömä o'ca juiyönä jähuä cuätö. Korotö'inä tteseta'anä, ttamöcuädö juiyupätömä, ji̧nä̧ cuocotö o'ca juiyönä jähuä. Ji̧yȩä̧cuȩtä̧ u̧huä̧ju̧tä̧ cuätö.

³ O'ca juiyönä jähuä cuätömä, cuju'cätucu jö̧ juiyönä cuamöcuädätucuä' koro juäi cuocotörö. Ja̧'hua̧ta̧nö̧ o'ca juiyönä jähuä cuocotö'inä, jarode'ö cucuocuätucuä' o'ca juiyönä jähuä cuätörömä. Dios ȩmi̧nö̧ jahuätörö.

⁴ ¿Di cu'ättö ucumä, adicuä u̧ru̧hua̧ hueö aditörö jarode'ö ucuocumä? Chutä adicuä u̧ru̧hua̧tä̧ adihuomenä'inä, adihua'a pä'ömä, surojomenä'inä, suroja'a pä'ömä. Ja̧'hua̧nö̧ ja̧'a̧ttö̧ adiu jȩä̧cua̧. U̧ru̧hua̧ Jesucristo ppä̧dä̧cua̧ adiu jȩa̧ pä'ö.

⁵ Korotö amöcuädätö koro mo̧ro̧ adihua'a Diosrö ucuocuäcuähuänä pä'ö. Ja̧'hua̧ta̧nö̧ korotö amöcuädätö o'ca juiyönä mo̧ro̧ yorätehua'a pä'ö. Ya̧cu̧nä̧ tta̧'cua̧ ko̧mȩnä̧ ttamöcuädömä adihua'a.

⁶ Korotö ttu̧ȩcuä̧nä̧ ka̧cuä̧tö̧ ja̧u̧ juäi mo̧ro̧, koro juäi'inä aditocotö, Ttu̧ru̧hua̧rö̧ ucuotö. Ja̧'hua̧ta̧nö̧ korotö o'ca juiyönä mo̧ro̧ yorätehua'a amöcuädätö'inä, Ttu̧ru̧hua̧rö̧ ucuotätö. O'ca juiyönä cuätömä, Ttu̧ru̧hua̧rö̧ tta̧'cua̧ huȩnä̧rö̧nö̧ cuätö, Diosrö eseunu ucuocu. Ja̧'hua̧ta̧nö̧ o'ca juiyönä cuocotö'inä, Ttu̧ru̧hua̧rö̧ tta̧'cua̧ huȩnä̧rö̧nö̧ cuocotö, Diosrö eseunu ucuocu.

⁷ Ujuturutä pä̧huä̧ rö̧jo̧mȩnä̧tä̧ ka̧cuo̧co̧tö̧jä̧. Ja̧'hua̧ta̧nö̧ ujuturutä pä̧huä̧ rö̧jo̧mȩnä̧tä̧ hua'ö icuocotöjä.

⁸ Tö̧jö̧'i̧nä̧, Tu̧ru̧hua̧nä̧ ka̧cuä̧tö̧jä̧. Hua'ö icu'inä, Tu̧ru̧hua̧nä̧ hua'ö icuätöjä. Ja̧'hua̧ ja̧'a̧ttö̧ ji̧nä̧ tö̧jä̧i̧'i̧nä̧, hua'ö ticuomenä'inä Tu̧ru̧hua̧ umöhuäyotöjä.

⁹ Cristomä 'corupä'i'äji'ca̧ tto'ächinö, hua'ö icuinätö'inä, a̧'cua̧rä̧tö̧'i̧nä̧ Ttu̧ru̧hua̧ päi'önä ö̧ja̧ pä'ö.

¹⁰ Ucumä, ¿dä̧bö̧ cu̧jä̧hua̧rö̧ “Suronä jȩpö̧jä̧” päcuhua'attö? Ja̧'hua̧ta̧nö̧ ¿dä̧bö̧ cu̧jä̧huä̧rö̧ cuju'cö juiyönä cuamöcuäda'attö? O'ca toi'önä ujutu Dios ä'ca jo̧mȩ ti̧jȩcuä̧cuä̧huä̧cuo̧tö̧jä̧: “Ucu adiu jȩpi̧nö̧jä̧”, “Ucu suronä jȩpi̧nö̧jä̧” päa pä'ö ujuturu.

¹¹ Huȩyu̧cuä̧ Huȩnȩ päa'a: Tu̧ru̧hua̧ pä'ödo, Ttö iso päi'önä pä'ösä o'ca toi'önä chä'ca jo̧mȩ ttihue'quiyunä ttö̧jä̧mä̧dä̧cuo̧tö̧. Ja̧'hua̧ta̧nö̧ o'ca toi'önä pättäcuotö, “Ucu Diosjä.”

¹² Ja̧'hua̧nö̧ ja̧'a̧ttö̧ o'ca toi'önä ujutu jȩti̧nö̧mä̧ jitähuäcuotöjä Diosrö.

Cu̧jä̧hua̧tö̧ suronä jȩpö̧ ma̧ttä̧chö̧nä̧ jȩcu̧'ä̧tu̧cuä̧'

¹³ Ja̧'hua̧nö̧ ja̧'a̧ttö̧ täcö juhua'a yabo korotörö jarode'ö tucuocu juiyö'a̧nö̧ ja̧'a̧. Amöcuädätucui. Yoröiso suronä jȩcu̧'ä̧tu̧cuä̧' Cristonä cu̧jä̧hua̧tö̧ ucu jȩcu̧'u̧ topö suronä jȩtta̧'a̧cu̧. Ja̧'hua̧ta̧nö̧ suronä jȩcu̧'ä̧tu̧cuä̧' cu̧jä̧hua̧tö̧ surojönä ma̧ttä̧ma̧'a̧cu̧.

¹⁴ Ttö huo̧jua̧sä̧ koro juäi yoröiso juiya'a iditö icumä. Ttö Chu̧ru̧hua̧ Jesucristorö cheseta'attö, ja̧'hua̧nö̧ huo̧jua̧sä̧. Ja̧'hua̧nö̧ ja̧'a̧nä̧ korotömä pi̧yȩmä̧ iditö icudo pä'ö ttamöcuädöttömä, jahuätörö surojö ja̧'a̧.

¹⁵ Ucu koro juäi cucuomenä, ya̧tȩ cucua'a topö a̧'cua̧ tta̧huȩpö̧ttö̧mä̧, cu̧jä̧hua̧rö̧ repeönö jȩpo̧cö̧jä̧. Ja̧'hua̧ta̧nö̧ koro juäi cucua'attö, ya̧tȩ cua̧hua̧ru̧hua̧ Cristo repe'ö 'corupäi'inäcuru surojuoächa'acu jȩcu̧'ä̧'.

¹⁶ Ucuturu adiumä, suronä ttucuocua'acu jȩcu̧'ä̧tu̧cuä̧'.

¹⁷ Dios hueömä ttu̧cuȩnä̧tä̧mä̧cö̧, ttaunätämäcö̧. Dios hueömä adiu jȩä̧cuä̧huä̧, tta̧'cua̧ adiu, tta̧'cua̧rö̧ eseu, Espíritu Santonä ttö̧jo̧mȩnä̧.

¹⁸ Ja̧'hua̧nö̧ ja̧'a̧ttö̧ Cristo korotörö amöcuädö jȩi̧nö̧'a̧nö̧ jȩpä̧tö̧mä̧, Dios öjö'cö jȩpä̧tö̧. Ttö̧ja̧rö̧'i̧nä̧ adiunä jȩpä̧tö̧.

¹⁹ Ja̧'hua̧nö̧ ja̧'a̧ttö̧ eseunu tusu'a̧nö̧ ja̧'a̧ adiu kä̧cuä̧huä̧, tesetö rö̧ä̧cha̧ pä'ö juhua'a yabocutä korotö korotönörö.

²⁰ Surojuocuhue'ätucuä' Dios aditähuämä cu̧cuȩtu̧cu̧nä̧. Iso päi'önä cuäcuähuämä o'ca juiyönä adihua'a. Ja̧'hua̧nö̧ ja̧'a̧nä̧ koro juäi tucuomenä, korotö ujuturu topö surojuottepöttömä suroja'a.

²¹ Ja̧'hua̧nö̧ ja̧'a̧ttö̧ idepä cucua'a'inä, vino cuahua'a'inä, koro jȩcu̧'a̧'a̧'i̧nä̧ cu̧jä̧hua̧ tomenä, suronä jȩpö̧, ijuiyuttumä, ja̧'hua̧nö̧ jȩcu̧'u̧ juiyö'a̧nö̧ ja̧'a̧, suronä jȩpö̧ ma̧ä̧cha̧'a̧cu̧.

²² Ucu cuesetömä, ucutä adiu amöcuädi Dios ä'ca jo̧mȩttö̧. Eseunu kö̧jä̧, jȩcu̧'u̧ ro̧cu̧huȩcu̧ juiyönä jȩcu̧'o̧mȩnä̧.

²³ Ya̧tȩ Diosrö esetäcuähuä juiyönä cumä, Dios ja̧u̧ru̧ ro̧'ȩpö̧, esetö jui'ö ucua'attö. O'ca juiyönä esetö jui'ö jȩttö̧mä̧, pi̧jä̧ usurä surojö jö̧.