Romanos 10 - TÄ̧DO Ä̧CUÄ̧ I̧HUȨNȨ

¹ Chö̧jä̧hua̧tö̧, ttö pä̧huä̧ rö̧jä̧cu̧sä̧ Israel ttö̧ja̧ Jesucristorö tteseta pä'ö. Ja̧'hua̧ta̧nö̧ Diosrö ucuocusä jahuätö suronä jȩttö̧ jȩpö̧ icuatö pä'ö.

² Huo̧jua̧sä̧ jitö Diosrö pä̧huä̧ rö̧jö̧ ttamöcuäda'anä, Diosrö pä̧huä̧ rö̧jö̧ adiunä jö̧ jerupätö.

³ Dios jȩö̧ jerupätö ja̧u̧cu̧ ji̧nä̧ ji̧yȩtȩ huotö tta pä'ö. Ja̧'hua̧ ja̧'a̧ttö̧ jitötä jȩä̧cuä̧huä̧ usätö Dioscu ji̧nä̧ ji̧yȩtȩ huotö tta pä'ö. Ja̧'hua̧nö̧ jȩtta̧'a̧nä̧, Dios jȩö̧ ja̧u̧cu̧ ji̧nä̧ ji̧yȩtȩ huotö tta pä'ö iyähuocotö.

⁴ Cristo be'epäjipö icuinö Moisés hueähuä huȩnȩ. O'ca toi'önä churutä esetätörömä, Dios jȩpö̧ chutäcu ji̧nä̧ ji̧yȩtȩ huotö tta pä'ö.

⁵ Moisés huȩyu̧ti̧nö̧: “Korotö hueähuä huȩnȩ hueö ta'anö jȩtto̧mȩnä̧, Dios jȩa̧tö̧ pä'ö chutäcu ji̧nä̧ ji̧yȩtȩ huotö tta pä'ö, ja̧u̧ huȩnȩnä̧tä̧ ttö̧ja̧cuä̧cuo̧tö̧.”

⁶ Ja̧'hua̧ta̧nö̧ Huȩyu̧cuä̧ Huȩnȩ päa'a korotörö, Diosrö esetö chutäcu ji̧nä̧ ji̧yȩtȩ huotö tta pä'ö jȩpä̧tö̧rö̧: “Cuami iso'quinä päcuhuä': ¿Dijä̧ttö̧ 'cha̧huä̧chä̧cua̧mä̧ mo̧ro̧jä̧ra̧'a̧?” Ja̧'hua̧nö̧ pädomenä, Cristorö i'cächa pä'örö pä'ösä.

⁷ “Ja̧'hua̧ta̧nö̧ päcuhuä': ¿Dijä̧ttö̧ hua'inätö ttö̧ja̧cuo̧mȩ i̧'chä̧cua̧mä̧?” Ja̧'hua̧nö̧ pädomenä, Cristorö ttoäda pä'örö pä'ösä.

⁸ Ja̧'hua̧ ja̧'a̧ttö̧ ¿tta̧'a̧nö̧ päa'attö Huȩyu̧cuä̧ Huȩnȩ? Pa̧'a̧nö̧ päa'a: “Dios i̧huȩnȩ tö'cö ja̧'a̧ ucuru, cuänä'inä, cuamöcuädönä'inä.” Ja̧u̧ huȩnȩ, Diosrö esetäcuähuä huȩnȩ, ji'ähuätöjä.

⁹ Ucu cuättö “Jesúsmä Chu̧ru̧hua̧” päcuttumä, Dios Jesucristorö hua'arettö tto'ädinö cuami iso'quittö cuesetöttömä, Dios ucuru ȩmä̧cua̧.

¹⁰ Ttami iso'quinä esetätörö, Dios jȩpö̧ chutäcu ji̧nä̧ ji̧yȩtȩ huotö tta pä'ö. Ja̧'hua̧ta̧nö̧ ttänä ji'ähuätörö, Dios ȩmö̧.

¹¹ Pa̧'a̧nö̧ päa'a Huȩyu̧cuä̧ Huȩnȩ: “Ja̧u̧ru̧ esetömä, dä'ä ttu'ocö.”

¹² O'ca toi'önä yorätehuätö, judíos ttö̧ja̧'i̧nä̧, judíos huocotö'inä. O'ca toi'önä Ttu̧ru̧hua̧, ya̧tȩä̧tä̧ ja̧'a̧. Ja̧'hua̧ta̧nö̧ o'ca toi'önä ja̧u̧ru̧ jä'epätörö, rö̧ȩnä̧ iyö.

¹³ Huȩyu̧cuä̧ Huȩnȩ päa'a: “O'ca toi'önä Tu̧ru̧hua̧ i̧mi̧nä̧ jä'epätörö, ȩmä̧cuo̧tö̧.”

¹⁴ Ja̧'hua̧nö̧ ja̧'a̧nä̧ ¿tta̧'a̧nö̧ jättepattö ttesetoca'ara̧'a̧mä̧? ¿Tta̧'a̧nö̧ ttesetattö Dios i̧huȩnȩ ttä̧ju̧cuo̧ca̧'a̧ra̧'a̧mä̧? ¿Tta̧'a̧nö̧ ttä̧ju̧cua̧ttö̧ jittähuoca'ara̧'a̧mä̧?

¹⁵ ¿Tta̧'a̧nö̧ jittähuattö hueähuoca'ara̧'a̧mä̧? Huȩyu̧cuä̧ Huȩnȩ päa'a: “Eseunu kä̧cuä̧huä̧ huȩnȩ i'cächö, adihuä huȩnȩ jittähuomenä, adiu rȩbȩhuä̧tö̧.”

¹⁶ Ja̧'hua̧nö̧ ja̧'a̧nä̧ adihuä huȩnȩ ttä̧ju̧cua̧'a̧nä̧, o'ca toi'önämä ä̧ju̧cu̧ esetocotö. Isaías pa̧'a̧nö̧ pä'inö: “Chu̧ru̧hua̧, ujutu jitähuomenä, ¿dijä̧ttö̧ esetäjimä?”

¹⁷ Ja̧'hua̧ ja̧'a̧ttö̧ jittäu ttä̧ju̧cuo̧mȩnä̧, esetätö. Ja̧'hua̧ta̧nö̧ ttä̧ju̧cu̧mä̧, Cristo i̧huȩnȩ ja̧'a̧.

¹⁸ Ja̧'hua̧nö̧ ja̧'a̧nä̧ ttö jä'epösä: ¿Adihuä huȩnȩ ä̧ju̧cuo̧co̧tö̧ tä̧ji̧? Isocö̧. Ä̧ju̧cui̧nä̧tö̧. Huȩyu̧cuä̧ Huȩnȩ päa'a: Ttucuocumä rä̧mi̧pi̧na̧'a̧ o'ca juiyönä pi̧jä̧nä̧. Tti̧huȩnȩ rȩbȩhui̧na̧'a̧ o'ca juiyönä jättäja'a.

¹⁹ Pä'äji ta'anö jä'epösä: ¿Israel ttö̧ja̧mä̧ jerupinätö tä̧ji̧? Äcuomenä Moisés pä'inö: Ucuturu jȩchä̧cua̧sä̧ a'cuoyäunu cuamöcuädätucua pä'ö korotö ttö̧ja̧rö̧. Ja̧'hua̧ta̧nö̧ ucuturu jȩchä̧cua̧sä̧ cu̧ra̧huä̧rä̧tu̧cua̧ pä'ö korotö jerupätörö.

²⁰ Ja̧'hua̧ta̧nö̧ Isaías yecuäcuähuä juiyönä pä'inö: Ttörö usocotö'inä, po̧cui̧pi̧nä̧tö̧ ttörö. Ja̧'hua̧ta̧nö̧ i̧jȩcui̧nö̧sä̧, ttörö jättepoca'anä'inä.

²¹ Ja̧'hua̧ta̧nö̧ Israel ttö̧ja̧rö̧ pä'inö Isaíasmä: “Mo̧ro̧ beipächönä o̧'i̧pä̧ri̧nö̧sä̧ ä̧ju̧cu̧ jui'ö jarode'ätörö.”