Romanos 1 - TÄ̧DO Ä̧CUÄ̧ I̧HUȨNȨ

Pablo huȩyu̧ti̧nö̧do Jesucristorö esetätörö Roma ötahuiyänä ka̧cuä̧tö̧rö̧

¹ Ttö Pablo, Dios huoina'attö, Jesucristo huȩ'ä̧hua̧sä̧. Ttörö pätetö hue'inö Dios, adihuä i̧huȩnȩ jidähua pä'ö.

² Mo täbocö Dios adihuä i̧huȩnȩ, iya päinö huȩnȩ, ji'ähuinätödo Dios i̧huȩnȩ jiäcuähuä isotö. Ja̧'hua̧ta̧nö̧ adihuä Huȩyu̧cuä̧ Huȩnȩ päi'önä huȩyu̧ti̧nä̧tö̧do.

³ Ja̧u̧ huȩnȩ jiähua'a Dios I̧tti̧rö̧, Tu̧ru̧hua̧ Jesucristorö. Ja̧u̧ ttö̧ja̧ i̧sa̧ uhuäpächinö ö̧tä̧mö̧ mi̧nä̧ttö̧ David isotö i̧sa̧ jö̧nä̧.

⁴ Ja̧'hua̧nö̧ ja̧'a̧nä̧ Dios I̧tti̧ jö̧nä̧ Espíritu Santo ujurunä i̧jȩcui̧nä̧cu̧do, Dios ja̧u̧ru̧ ttoädomenä.

⁵ Jesucristorö chesetomenä, Dios hueinäcusä Jesucristo i̧mi̧nä̧ i̧huȩnȩ jidähua pä'ö o'ca toi'önä ttö̧ja̧rö̧, yotöcunä i̧huȩnȩ esetö, Dios hueö jȩttä̧cua̧'a̧nö̧.

⁶ Ucutu'inä Roma ötahuiyä ttö̧ja̧, Dios huoinä̧u̧jä̧ Jesucristo umöhuäyotö cu'ätucua pä'ö.

⁷ Chi̧huȩnȩ huȩyu̧tu̧ hue'ösä ucuturu, Roma ötahuiyä ttö̧ja̧rö̧, Dios repeä̧u̧ru̧. Ja̧'hua̧ta̧nö̧ Dios huoinä̧u̧jä̧ umöhuäyotö cu'ätucua pä'ö. Tä'o Dios'inä, Tu̧ru̧hua̧ Jesucristo'inä ucuturu adiu ppättädäcua'a̧nö̧. Ja̧'hua̧ta̧nö̧ adiu kä̧cuä̧huä̧'i̧nä̧ ucuturu ttiyäcua'a̧nö̧.

Pablo Roma ötahuiyära̧'a̧ i̧'cha̧ päinö huȩnȩ

⁸ Äcuomenä ucuturu jidähua pä'ösä, Jesucristorö esetö, Diosrö eseunu ucuocusä ucuturu amöcuädö. O'ca juiyönä pa̧ja̧cu̧nä̧ Diosrö cuesetätucua'a ä̧ju̧cuä̧tö̧do.

⁹ Ja̧'hua̧ta̧nö̧ Dios I̧tti̧ i̧huȩnȩ o'ca juiyönä cha̧'cua̧ eseunu jidähua'attö, Dios huo̧jua̧ ucuturu amöcuädö Diosrö chucuocumä.

¹⁰ 'Cuäopönä jä'epösä Diosrö ucuocu, ja̧u̧ru̧ pä̧huä̧ rö̧jo̧mȩnä̧ ja̧'a̧tä̧ chicha pä'ö ucuturu do'ächö.

¹¹ Ttö pä̧huä̧ rö̧jä̧cu̧sä̧ tocha pä'ö ucuturu ppädäda pä'ö Espíritu Santonä, adiu cuami 'qui'ächi'ö cu̧ja̧cuä̧tu̧cua̧ pä'ö.

¹² Ja̧'hua̧nö̧ jidähuomenä, ka̧ra̧ ka̧ra̧'i̧nä̧ ppätäda pä'ö ji'äusä. Ucutu'inä, ttö'inä ji̧nä̧ ji̧yȩtȩ esetätöjä.

¹³ Chö̧jä̧hua̧tö̧, ucuturu jidähua pä'ösä. 'Cuäopönä ucuturu topö chicha päda'anä, ji̧nä̧ chichö juiyönä jä̧cu̧sä̧. Chicha pä'ösä ppädäda pä'ö ucuturu, cu̧ja̧cuä̧tu̧cuo̧mȩttö̧ yotöte tteseta pä'ö, koromettö ppädädinö'a̧nö̧.

¹⁴ O'ca toi'önärö adihuä huȩnȩ jidäu'a̧nö̧ ja̧'a̧, ttamöcuädö ku̧nä̧rä̧tö̧rö̧'i̧nä̧, ttamöcuädö jui'ätörö'inä, huo̧juȩcu̧nä̧ huo̧juä̧tö̧rö̧'i̧nä̧, jerupätörö'inä.

¹⁵ Ja̧'hua̧nö̧ ja̧'a̧ttö̧ ttömä jo̧mȩ päi'önä kö̧sä̧ Dios adihuä i̧huȩnȩ jidähua pä'ö ucuturu'inä, Roma ötahuiyä ttö̧ja̧rö̧.

Dios ujuru huȩnȩ

¹⁶ Ttömä dä'äcuocösä adihuä huȩnȩmä̧. Ja̧u̧ huȩnȩ esetätörö suronä jȩttö̧ jȩpö̧ icu Dios, äcuomenä judíos ttö̧ja̧rö̧'i̧nä̧, ja̧'hua̧ta̧nö̧ judíos huocotörö'inä.

¹⁷ Ja̧u̧ adihuä huȩnȩ jiähua'a, Diosrö esetätörötä jȩpö̧ ja̧u̧cu̧ ji̧nä̧ ji̧yȩtȩ huotö tta pä'ö. Huȩyu̧cuä̧ Huȩnȩ päa'a: “Dios ja̧u̧cu̧ ji̧nä̧ ji̧yȩtȩ hua̧ ö̧ja̧ pä'ö jȩä̧cu̧mä̧, Diosrö esetö ö̧jä̧cua̧.”

Ttö̧ja̧ suronä jȩttö̧ huȩnȩ

¹⁸ Dios mo̧ro̧jä̧ra̧'a̧ kä̧nö̧ ro̧'ȩpö̧ jarode'ätörö'inä, suronä jȩpä̧tö̧rö̧'i̧nä̧. Jahuätömä, suronä jȩtta̧'a̧ttö̧, korotö iso päi'önä huȩnȩ ttesetö juiya pä'ö jȩpä̧tö̧.

¹⁹ Jahuätömä adiu huo̧juä̧tö̧ Dios iso päi'önä kö̧ pä'ö. Dios ja̧'hua̧nö̧ i̧jȩpö̧ ttami iso'quinä.

²⁰ Dios pi̧jä̧ aditinö o'ca'a, pi̧jä̧ ttö̧ja̧ topö huö̧juä̧tö̧ Dios ujuru yoröiso beipächocö pä'ö. Ja̧'hua̧ta̧nö̧ huo̧juä̧tö̧ Dios iso päi'önä kö̧ pä'ö. Dios ujuru'inä, ö̧ja̧'a̧'i̧nä̧ tottoca'anä, iso päi'önä kö̧ pä'ö huo̧juä̧tö̧. O'ca juiyönä Dios aditinö topö, ja̧'hua̧nö̧ huo̧juä̧tö̧ pi̧jä̧ ttö̧ja̧. Ja̧'hua̧nö̧ ja̧'a̧nä̧ jitötä tta̧'cua̧ ko̧mȩnä̧ jȩpä̧tö̧.

²¹ Diosrömä ttu̧huo̧jua̧'a̧nä̧, adiunämä ucuotocotö Diosrö. Ja̧'hua̧ta̧nö̧ Dios jahuätörö ppädomenä, esehuocotö Diosrö. Ttamöcuädömä, micuähuocötä amöcuädätö. Ttamönä tta̧'cua̧rö̧ yo̧i̧pä̧chi̧nä̧u̧.

²² Ja̧'hua̧ta̧nö̧ huo̧juä̧tö̧jä̧ pätta'anä, yoröiso ttu̧'ȩpä̧ro̧co̧tö̧.

²³ Jahuätö adihuä Dios, yoröiso hua'ocörö, jaropi'inätö, pi̧jä̧ ttö̧ja̧ a̧'u̧cuä̧ ttu̧mö̧nä̧ adicuä juäi beipächä̧cuȩmä̧, ttamöcuäda pä'ö. Jahuätömä ppi̧yu̧ a̧'cua̧rö̧nä̧, ä̧ca̧tö̧ a̧'cua̧rö̧nä̧, isotö ttö̧jä̧pi̧yä̧ pa̧ja̧cuä̧nö̧ ku̧nä̧rä̧tö̧ a̧'cua̧rö̧nä̧ amöcuädätö.

²⁴ Ja̧'hua̧nö̧ ja̧'a̧ttö̧ Dios jaroi'inä̧u̧ jitörötä surojö pä̧huä̧ rö̧jö̧tä̧ jȩtta̧ pä'ö. Jahuätömä ucuotäcuähuä juiyönä jȩpä̧tö̧ korotö korotöcu.

²⁵ Jahuätömä Dios i̧huȩnȩ, iso päi'önä huȩnȩ, esetocotö pi̧nä̧tö̧. Yapareu huȩnȩtä̧ esetinätö. Ja̧'hua̧ta̧nö̧ eseunu amöcuädinätö Dios aditähuätä. Chutä, Diosrötä eseunu amöcuädocotö pi̧nä̧tö̧. Diosrö adiu ttucuocuaja 'cuäopönä. Amén.

²⁶ Ja̧'hua̧nö̧ ja̧'a̧ttö̧ Dios jaroi'inä̧u̧ jitörötä, surojö pä̧huä̧ rö̧jö̧ jȩtta̧'a̧ttö̧. Nä̧tö̧'i̧nä̧, u̧mä̧tö̧cu̧ jȩa̧cuä̧hua̧ jaropi'ö, jȩä̧cuä̧huo̧cö̧'i̧nä̧ nä̧tö̧ nä̧tö̧cu̧ suronä jȩpä̧tö̧.

²⁷ Ja̧'hua̧ta̧nö̧ ja̧u̧ juäinätä u̧mä̧tö̧ nä̧tö̧cu̧ jȩä̧cuä̧huä̧ jaropi'inätö. Jitörötä pä̧huä̧ rö̧jö̧tä̧ suronä jȩpä̧tö̧ u̧mä̧tö̧ u̧mä̧tö̧cu̧. Jitötä ttamönä jȩttö̧tä̧ surojuoepä̧u̧.

²⁸ Jahuätömä ttu̧huo̧jua̧ pä'ocotö Diosrö. Ja̧'hua̧nö̧ ja̧'a̧ttö̧ Dios jaroi'inä̧u̧, surojö amöcuädö jȩä̧cuä̧huä̧ jȩtta̧ pä'ö.

²⁹ O'ca juiyönä suronä jȩä̧cuä̧huä̧ su'pejä̧u̧. Ka̧ra̧ irecuarö usätö. Suronätä jȩpä̧tö̧. Rö̧ȩnä̧ ttu̧ju̧nä̧ra̧ pä'ätö. Korotörö suronä jȩpä̧tö̧. Korotö ttu̧ju̧nä̧rö̧'a̧nö̧, ttu̧ju̧nä̧ra̧ pä'ätö. Korotörö cuä'ö icuätö. Ja̧'hua̧ta̧nö̧ sȩ'ȩpä̧rö̧ rohuähuätö. Yapareu ucuocuätö. Korotörö yapareu amöcuädö ucuocuätö. Korotörö huȩnȩtö̧ ji'ähuätö.

³⁰ Korotörö suronä ucuocuätö. Diosrö kö'cocotö. Jerusehuä'chätö. Ttösä adihuä i̧sa̧ pä'ätö. Ja̧'hua̧ta̧nö̧ a'cuoyäunu ucuocuätö. Suronä jȩtta̧ pä'ö usätö. Ttä'o'inä, tta̧ju̧'i̧nä̧ huettö jarodö jȩpo̧co̧tö̧.

³¹ Ja̧'hua̧ta̧nö̧ ä̧ju̧cuo̧co̧tö̧. Pättö ta'anö jȩpo̧co̧tö̧. Ttahuaruhuärö repe'ocotö. Korotö suronä jȩttö̧, unichi'ocotö. Re rö̧jö̧nä̧ topocotö.

³² Jahuätö adiu huo̧juä̧tö̧ Dios hueinö. Huo̧juä̧tö̧ surojö jȩpö̧, hua'ö icuähuä. Ttu̧huo̧jua̧'a̧nä̧, jitörötä pä̧huä̧ rö̧jö̧ jȩpä̧tö̧. Korotö'inä ja̧'hua̧nö̧ jȩtto̧mȩnä̧, eseunu topätö.