San Mateo 28 - TÄ̧DO Ä̧CUÄ̧ I̧HUȨNȨ

Jesús ttoächinö huȩnȩ

¹ Ttö̧ja̧ 'cuättächi'ö mo̧ro̧ o'come mo̧ro̧ semana äcuomenä mo̧ro̧ juomenä, María Magdalenacu, karaju Maríacu idorära̧'a̧ topö 'chi̧nä̧tö̧do.

² Juhua'atä tti̧'chi̧'o̧mȩnä̧, rȩjȩ pä̧i̧cu̧nä̧ ttö̧ȩpi̧na̧'a̧do. Ya̧tȩ ángel i̧sa̧ Tu̧ru̧hua̧ huȩ'ä̧hua̧ mo̧ro̧jä̧ttö̧ mȩyȩu̧, idorä ä'ca mö̧ȩcuo'qui pporädö icuinödo. Juhuo'quinä pä̧mä̧di̧nö̧do ángelmä.

³ Cu'upä örohua'a jä̧'i̧nö̧'a̧nö̧ tȩa̧hui̧na̧'a̧do. Ö̧'ca̧tä̧huä̧ta̧ koro teö juäittö'inä abonänö teina'ado.

⁴ Ja̧u̧ru̧ tottomenä, su̧ro̧da̧u̧ ye'ö ttö̧'ä̧hui̧nä̧tö̧do. 'Corupä'i'ätö jä̧'i̧nö̧'a̧nö̧ pä'i'inätödo.

⁵ Ja̧'hua̧ ja̧'a̧ttö̧ ángel nä̧tö̧rö̧ pä'inödo: —Yecuhuecuätucuä'. Jesús, dau isodänä pȩ'o̧pö̧ ttu̧ju̧nä̧jä̧cu̧ru̧ topö ichäjätöjä huo̧jua̧sä̧.

⁶ Ja̧u̧mä̧ pȩnȩmä̧ toa'a. Päinö ta'anö tto'ächäji. Ja̧u̧ru̧ ttötäjome topächätucui.

⁷ Jitä jurunä tätucui. U̧huo̧juȩtä̧u̧ru̧ ji'ähuäjätucui: “'Corupäi'omettö tto'ächäji pä'ö. Jitämä cuä'catucunä 'chö̧ Galilea rȩjȩra̧'a̧. Juhua'atä ja̧u̧ru̧ tocu'äcuotöjä.” Pi̧yȩ ucuturu jidähua pä'ö ichäjisä, —pä'inödo ángel.

⁸ Ja̧'hua̧ ja̧'a̧ttö̧ jahuätö nä̧tö̧mä̧ jurunä rä'opächinätödo idorättö. Jahuätö ye'ecu'inä, ye'ecuinätödo. Eseunu'inä, esehuinätödo. U̧huo̧juȩtä̧u̧ru̧ jittähua pä'ö jurunä jopächinätödo.

⁹ Ja̧'hua̧nö̧ jottächomenä, Jesús jahuätörö ichi'ö esehuinödo. Jahuätö Jesúsru tö'cönänö ichi'ö, ö̧jä̧pö̧nä̧ 'chu'ädö eseunu ucuocuinätödo ja̧u̧ru̧.

¹⁰ Ja̧u̧ pä'inödo jahuätörö: —Yecuhuecuätucuä'. Chö̧jä̧hua̧tö̧rö̧ ji'ähuäjätucui Galilea rȩjȩra̧'a̧ tti̧'cha̧ pä'ö. Juhua'atä ttörö tottäcuotö.

Su̧ro̧da̧u̧ jittähuinö huȩnȩ

¹¹ Jahuätö nä̧tö̧ tti̧'cho̧mȩnä̧, su̧ro̧da̧u̧ ju̧huȩnȩ tta̧'ä̧rä̧tö̧ttö̧ korotömä ötahuiyära̧'a̧ 'chä̧nö̧, sacerdotes ruhuotörö o'ca juiyönä 'cuäopäjimä ji'ähuinätödo.

¹² Jahuätö sacerdotes ruhuotö judíos ttö̧ja̧ ancianos huotörö ucuocu 'chi̧nä̧tö̧do ji̧nä̧ ji̧yȩtȩ jittähua pä'ö ttö̧ja̧rö̧. Ja̧'hua̧nö̧ ttucuocuäji o'ca'a, su̧ro̧da̧u̧ru̧ rö̧ȩnä̧ pärätä iyinätödo.

¹³ Jahuätörö pä'inätödo: —Ucutu pa̧'a̧nö̧ ji'ähuätucui: “Ujutu yodo tä'i'a'anä, u̧huo̧juȩtä̧u̧ ichi'ö, Jesúsru nä̧u̧cu̧ ȩmi̧pä̧jä̧tö̧.”

¹⁴ Ja̧'hua̧ta̧nö̧ cu̧ru̧hua̧ pi̧yȩ huȩnȩ ä̧ju̧cu̧ttu̧mä̧, ujutumä ja̧u̧ru̧ tucuocuäcuotöjä, ucuturu ö̧tä̧bo̧tö̧ juiya pä'ö, —pä'inätödo.

¹⁵ Ja̧'hua̧ ja̧'a̧ttö̧ jahuätö su̧ro̧da̧u̧ pärätä ȩmi̧pö̧, rä'opächinätödo huettäji ta'anö jȩtta̧ pä'ö. Ja̧'hua̧nö̧ ja̧'a̧ttö̧ judíos ttö̧ja̧ ja̧'hua̧nö̧ pä'ö huo̧juȩtä̧tö̧ jitä mo̧ro̧ päi'önä.

Jesús u̧huo̧juȩtä̧u̧ru̧ hueinö huȩnȩ

¹⁶ Ja̧'hua̧nö̧ ja̧'a̧ttö̧ u̧huo̧juȩtä̧u̧mä̧ ttö̧jä̧pö̧ttö̧nö̧ ya̧tȩnö̧ Galilea rȩjȩra̧'a̧ 'chi̧nä̧tö̧do. Jesús päinähuänä tta̧'ä̧rö̧ 'chi̧nä̧tö̧do.

¹⁷ Jesúsru tottomenä, ja̧u̧ru̧ eseunu ucuocuinätödo. Ja̧'hua̧nö̧ ja̧'a̧nä̧ korotö pö̧nä̧ iso päi'önä Cristo ja̧ pä'ömä esetocotö pi̧nä̧tö̧do.

¹⁸ Ja̧'hua̧ ja̧'a̧ Jesús jahuätörö ichi'ö pä'inödo: —Mo̧ro̧jä̧nä̧'i̧nä̧, pi̧jä̧nä̧'i̧nä̧ o'ca juiyönä chujuruhua pä'ö iyinäcusä Diosmä.

¹⁹ Ja̧'hua̧nö̧ ja̧'a̧ttö̧ o'ca toi'önä ttö̧ja̧rö̧ pi̧jä̧ pa̧ja̧cu̧nä̧ 'chä̧nö̧, ji'ähuäjätucui ttörö ttesetäcua'a̧nö̧. Chä'o i̧mi̧nä̧'i̧nä̧, I̧tti̧ i̧mi̧nä̧'i̧nä̧, Espíritu Santo i̧mi̧nä̧'i̧nä̧ jahuätörö bautizando jȩpä̧tu̧cui̧.

²⁰ Ucuturu o'ca juiyönä chu̧huo̧juȩti̧nö̧, jȩtta̧ pä'ö huo̧juȩtä̧jä̧tu̧cui̧. Ja̧'hua̧ta̧nö̧ cu̧huo̧juä̧tu̧cua̧ pä'ö pä'ösä, ucutucu mo̧ro̧ji̧nö̧ a̧'u̧cuä̧ chö̧jä̧cua̧sä̧ pi̧jä̧ beipächome jubö päi'önä, —pä'inödo Jesús. Amén.