San Mateo 26 - TÄ̧DO Ä̧CUÄ̧ I̧HUȨNȨ

Jesúsru cuä'ö tticua pä'inätödo

¹ Jesús ja̧u̧ huȩnȩ o'ca juiyönä jiähuäji o'ca'a, u̧huo̧juȩtä̧u̧ru̧ pä'inödo:

² —Ucutu täcö huo̧juä̧tö̧jä̧, todäre mo̧ro̧ o'ca'a pascua fiesta päi'äcua'a. Ubo I̧tti̧rö̧ ttiyäcuotö daunä pȩ'o̧pö̧ ttu̧ju̧na̧rö̧ pä'ö.

³ Ja̧'hua̧ ja̧'a̧ sacerdotes ruhuotö'inä, hueähuä huȩnȩ huo̧juȩtä̧tö̧'i̧nä̧, judíos ttö̧ja̧ ancianos huotö'inä ca̧ca̧cui̧pi̧nä̧tö̧do Caifás ojusode u̧mi̧ i̧so̧ca̧nä̧. Ja̧u̧mä̧ Caifás, sacerdotes ttu̧ru̧hua̧ pi̧nö̧do.

⁴ Juhua'attö Jesúsru yapareu ji'äu 'chu'ädö, cuä'ö tticuarö pä'ö ucuocuinätödo.

⁵ Ja̧'hua̧nö̧ ttucuocuomenä pä'inätödo: —Pascua fiesta jȩtto̧mȩnä̧, Jesúsru jȩtö̧ juiyö'a̧nö̧ ja̧'a̧ ttö̧ja̧ ttö̧ra̧huä̧ra̧'a̧cu̧.

Yajute isaju Jesúsru da'epinäjudo amehuoya

⁶ Jesús Betania ötahuiyänä, Simón, lepra öttahuiyä märichei na̧'ä̧chö̧ pättäcu ojusodenä ki̧nö̧do.

⁷ Juhuodenä ö̧jo̧mȩnä̧, yajute isaju adihuä juäi alabastro ido'quittö adicuä̧yu̧ amehuoya rö̧ȩnä̧ micuähuoya a̧cuä̧yu̧ 'chu̧huä̧rä̧nö̧, Jesús ö̧'o̧mȩcu̧ ichi'inäjudo. Jesús mesa isodänä ö̧'o̧mȩnä̧, unä da'epinäjudo juhuoya amehuoya.

⁸ U̧huo̧juȩtä̧u̧ ja̧'hua̧nö̧ dajepomenä topö ra̧huä̧ri̧nä̧tö̧do. Pä'inätödo: —Ja̧'hua̧nö̧ toäunä ¿dä̧bö̧ dacuhuepäjättö?

⁹ Juhuoya iyö icumä pärätä rö̧ȩnä̧ ȩma̧ja̧tö̧jä̧ usurä isotörö tiya pä'ö.

¹⁰ Pätta'amä ä̧ju̧cui̧nö̧do Jesús. Jahuätörö pä'inödo: —Ja̧'hua̧nö̧mä̧ ¿dä̧bö̧ päcuhuätucuättö jahuäjuru? Jahuäjumä adihuä juäi jȩpä̧jä̧ju̧ ttörö.

¹¹ Usurä isotömä 'cuäopönä ttö̧ja̧cuä̧cuo̧tö̧ cu̧'quȩtȩtu̧cu̧nä̧. Ttörömä 'cuäopönämä topocotö cuäcuotöjä.

¹² Piju isaju, ttörö amehuoya dajepomenä, ttörö ttu'turäcua'a ä'canä jȩpä̧jä̧ju̧.

¹³ Iso päi'önä pä'ösä ucuturu, pi̧jä̧nä̧ pa̧ja̧cu̧nä̧ ttö̧ja̧ suronä jȩttö̧ jȩpö̧ icuähuä huȩnȩ jittähuomenä, piju isaju jȩjä̧ji̧'i̧nä̧ jittähuäcuotö, jahuäjuru ttamöcuäda pä'ö, —pä'inödo Jesús.

Judas Iscariote Jesúsru iyö icua pä'ö ucuocuinö huȩnȩ

¹⁴ Ja̧u̧nu̧ pä̧nä̧ Jesús ttö̧jä̧pö̧ttö̧nö̧ ta̧ju̧nu̧ u̧huo̧juȩtä̧u̧ttu̧ ya̧tȩ, Judas Iscariote pä'ö mi̧cua̧mä̧, sacerdotes ruhuotörö ucuocu 'chi̧nö̧do.

¹⁵ Jahuätörö pä'inödo: —Ucuturu Jesúsru chiyöttömä, ¿tta̧'a̧nö̧ rö̧ȩnä̧ pärätä cuiyätucuäcua'ajä̧ttö̧? Ja̧'hua̧nö̧ päomenä, treinta jo̧mȩnä̧ pärätä o̧bi̧ ttiyinäcudo.

¹⁶ Ja̧'hua̧nö̧ ttiyinö o'ca'a, Judas tta̧'ä̧ri̧nö̧do jo̧mȩ päi'önä Jesúsru iya pä'ö jahuätörö ttö̧ja̧ ttieruhua'anä.

Ttu̧ru̧hua̧cu̧ ttu̧cuȩ ttucuinö huȩnȩ

¹⁷ Pascua fiesta äcuomenä pan ppö̧ä̧mö̧ juiyönä ttucuinö mo̧ro̧, Jesús u̧huo̧juȩtä̧u̧ Jesúsru ichi'ö jä'epinätödo: —Pascua fiesta tucuäcuome, ¿tottö jȩtä̧cua̧'a̧jä̧ttö̧?

¹⁸ Jahuätörö pä'inödo: —Ötahuiyära̧'a̧ tätucui. Juhua'atä ya̧tȩrö̧, ttö pädäcuru, cu̧'o̧cui̧'ä̧cuo̧tö̧jä̧. Ja̧u̧ru̧ pä'ätucui: “Huo̧juȩcuä̧ I̧sa̧ pä'äji: Täcö jo̧mȩ pä'i'ösä. Cuojusodenä pascua fiesta chu̧cuä̧cua̧sä̧ chu̧huo̧juȩtä̧u̧cu̧.”

¹⁹ Jesús u̧huo̧juȩtä̧u̧ hueäji ta'anö jȩpi̧nä̧tö̧do. O'ca juiyönä jo̧mȩ päi'önä jȩpi̧nä̧tö̧do, pascua fiesta ttucua pä'ö.

²⁰ Ja̧u̧nu̧ yodo päi'omenä, Jesús ttö̧jä̧pö̧ttö̧nö̧ ta̧ju̧nu̧ u̧huo̧juȩtä̧u̧cu̧ mesa isodänä ttu̧cuȩ cuä̧nö̧ pȩji̧nä̧tö̧do.

²¹ Ttu̧cuȩ ttucuomenä, Jesús pä'inödo jahuätörö: —Iso päi'önä pä'ösä ucuturu, ya̧tȩ ucututtu ttörö i̧yä̧cua̧ suronä jȩpä̧tö̧rö̧.

²² Ja̧'hua̧nö̧ päomenä, rö̧ȩnä̧ tta̧'cua̧ tta̧'ȩcui̧pi̧nä̧tö̧do. Ka̧ra̧'i̧nä̧ ka̧ra̧'i̧nä̧ jä'epinätödo: —Chu̧ru̧hua̧, ¿dijä̧ttö̧, ttö tä̧ji̧?

²³ Ja̧'hua̧ ja̧'a̧ Jesús jahuätörö ädätinödo: —Ttöcu ji̧nä̧ ji̧bä̧tȩ sä̧rä̧bä̧nä̧ cu, ja̧u̧tä̧ ttörö i̧yä̧cua̧ suronä jȩpä̧tö̧rö̧.

²⁴ Ubo I̧tti̧ Huȩyu̧cuä̧ Huȩnȩ päö'a̧nö̧ 'co̧ru̧juo̧ä̧chä̧cua̧. Ja̧'hua̧ ja̧'a̧nä̧ ja̧u̧ru̧, suronä jȩpä̧tö̧rö̧ i̧yä̧cua̧rö̧, suronä 'cuäopäcua'a. Ttörö i̧yä̧cua̧mä̧ yoröiso uhuäpächinö juiyöttömä, adihuaja'a.

²⁵ Ja̧u̧nu̧ o'ca'a Judas, suronä jȩpä̧tö̧rö̧ i̧yä̧cua̧mä̧, jä'epinödo: —Huo̧juȩcuä̧ I̧sa̧, ucuru chi̧yä̧cua̧mä̧, ¿ttö tä̧ji̧? Jesús ädätinödo: —A̧, a̧, ucutä.

²⁶ Ja̧'hua̧nö̧ ttu̧cuȩ ttucuomenä, Jesús i̧ri̧si̧ u̧mö̧nä̧ 'chu̧'ä̧rö̧ Jä'o Diosrö ucuocuinödo. Ucuocuäji'ca̧, 'tȩ'chä̧rö̧ iyinödo u̧huo̧juȩtä̧u̧ru̧. Jahuätörö pä'inödo: —Cuätucui. Pi̧yȩmä̧ ttötä jä̧ttä̧pä̧ya̧sä̧.

²⁷ Ja̧u̧nu̧ o'ca'a i̧so̧'ta̧ u̧mö̧nä̧ 'chu̧'ä̧rö̧ Jä'o Diosrö ucuocuinödo. Ucuocuäji'ca̧ jahuätörö iyö, pä'inödo: —Ucutu o'ca toi'önä pi̧yȩ ahuätucui.

²⁸ Pi̧yȩmä̧ ttö chucuoja ja̧'a̧, jareö huȩnȩ chiya pä'ö ucuturu. Pi̧yȩ chucuojamä eräcua'a recuätö ttö̧jä̧ suronä jȩttö̧ jȩpö̧ icua pä'ö.

²⁹ Ja̧'hua̧nö̧ ja̧'a̧nä̧ ucuturu pä'ösä, pä'äji ta'anö pi̧yȩ juäi uva isoya ahuocösä, Chä'o Dios ö̧jo̧mȩttö̧ ucutucu jareoya chahuome jubö päi'önä, —pä'inödo Jesús.

Pedro Jesúsru ä̧ppö̧tä̧rä̧cuȩ huȩnȩ

³⁰ Ya'ute ra̧huä̧huä̧ ra̧ttä̧ji̧ o'ca'a rä'opächö, Olivos inähuära̧'a̧ 'chi̧nä̧tö̧do.

³¹ Juhua'attö Jesús pä'inödo u̧huo̧juȩtä̧u̧ru̧: —Jitä yodo ucutumä o'ca toi'önä ttörö jarocu'ipäcuotöjä. Huȩyu̧cuä̧ Huȩnȩ päa'a: “O̧vȩja̧stö̧rö̧ tta̧huä̧rä̧cuä̧huä̧ i̧sa̧rö̧ cuä'ö chi̧cuä̧cua̧. Ja̧u̧ru̧ cuä'ö chicu o'ca'a, o̧vȩja̧stö̧ töttipächäcuotö.”

³² Ja̧'hua̧nö̧ ja̧'a̧nä̧ 'corupädi'ö o'ca'a ttodächomenä, cuä'catucunä Galilea rȩjȩra̧'a̧ chi̧'chä̧cua̧sä̧, —pä'inödo Jesús.

³³ Ja̧'hua̧ ja̧'a̧ttö̧ Pedro ädätinödo: —O'ca toi'önä ucuru jarotti'öttö'inä, ttömä jaropi'ocösä.

³⁴ Ja̧'hua̧nö̧ päcu, Jesús pä'inödo: —Iso päi'önä pä'ösä ucuru, jitä yodo äcärä huoäcua'a ä'canä, ucumä huäbodäcuä jo̧mȩnä̧ cuä̧ppö̧tä̧rä̧cua̧jä̧ ttörö.

³⁵ Pedro pä'inödo: —Isocö̧. 'Corupädi'öttö'inä ucuru ä̧ppö̧tä̧ro̧cö̧sä̧. Korotö u̧huo̧juȩtä̧u̧'i̧nä̧ ja̧'hua̧ta̧nö̧ pä'inätödo.

Getsemaníra̧'a̧ Diosrö ucuocuinödo Jesús

³⁶ Ja̧u̧nu̧ o'ca'a Jesús u̧huo̧juȩtä̧u̧cu̧ Getsemaní pättome 'chä̧hui̧'i̧nö̧do. Jahuätörö pä'inödo: —Pȩnȩtä̧ pä̧mä̧dä̧tu̧cui̧. Ttömä yabonänöttö Chä'orö ucuocu 'chö̧sä̧.

³⁷ Ja̧u̧cu̧ tti̧'cha̧ pä'ö o'ipinödo Pedrorö'inä, Zebedeo i̧tti̧mö̧ ta̧ju̧ru̧'i̧nä̧. Yabonänö i̧'cho̧mȩnä̧, rö̧ȩnä̧ a̧'cua̧ tta̧'ȩcui̧pi̧nö̧do.

³⁸ Jahuätörö pä'inödo: —Ttö 'corupädi'ometä päi'a'a cha̧'cua̧ tta̧'ȩcui̧pö̧sä̧. Ucutumä pȩnȩtä̧ kä̧nö̧, ttöcu to̧pä̧rä̧tu̧cui̧ cuä'ätucuoca'a.

³⁹ Ja̧u̧nu̧ o'ca'a Jesús yabonänö 'chä̧nö̧, ö'ä rȩjȩcu̧ ja̧rȩyu̧nu̧ pä'i'ö Diosrö ucuocuinödo. Pä'inödo: —Ttö Chä'o, ucuru pä̧huä̧ rö̧jö̧ttö̧mä̧ pi̧yȩmä̧ ttö ubara ttudä̧cuȩmä̧ ubara ttudu juiya pä'ittö. Ja̧'hua̧ta̧nö̧ ja̧'a̧nä̧ ucuru pä̧huä̧ rö̧jö̧tä̧ jȩpi̧, ttörö pä̧huä̧ rö̧jö̧mä̧cö̧.

⁴⁰ Ja̧'hua̧nö̧ ucuocu cä'ädi'ö, u̧huo̧juȩtä̧u̧ ttö̧'ö̧jo̧mȩ ppa̧'ä̧chi̧'i̧nö̧do. Jahuätö ä'ö, ttö̧'ö̧ja̧'a̧ toinä̧u̧do. Pedrorö pä'inödo: —¿A̧'u̧cua̧'a̧ ttöcu to̧pä̧rö̧ cu'ujätucu juiyönä jä̧u̧jä̧ tä̧ji̧?

⁴¹ To̧pä̧rö̧ ka̧cuä̧tu̧cui̧. Diosrö ucuocuätucui ucuturu ähuettä jȩo̧mȩnä̧, suronä jȩcu̧'ä̧tu̧cu̧ juiya pä'ö. Iso päi'önä cua̧'cua̧ru̧hua̧ adiu jȩa̧'a̧nä̧, cuidepämä adiumä jȩo̧cö̧.

⁴² Todärenä päi'önä ucuocu 'chi̧nö̧do. Pä'inödo: —Ttö Chä'o, ttö ubara ttudä̧cuȩmä̧ ubara ttudu juiya pä̧huä̧ juiyöttömä, ucurutä pä̧huä̧ rö̧jo̧mȩnä̧ jȩpi̧.

⁴³ Pä'äji ta'anö u̧huo̧juȩtä̧u̧ ttö̧'ö̧jo̧mȩ ppa̧'ä̧chi̧'ö̧, ä'ö ttö̧'a̧'a̧ toinä̧u̧do. Jahuätömä ja̧'a̧tä̧ ä'inätödo ppödittö.

⁴⁴ Pä'äji ta'anö jahuätörö jaropi'ö, Diosrö ucuocu 'chi̧nö̧do huäbodäcuänä päi'önä. Pä'äji ucuocuäji ta'anö ucuocuinödo.

⁴⁵ Ja̧'hua̧nö̧ ucuocu cädomenä, u̧huo̧juȩtä̧u̧ ttö̧'ö̧jo̧mȩ ppa̧'ä̧chi̧'ö̧, jahuätörö pä'inödo: —Ye, jitämä ä'iopo'ätucui. Täcö Ubo I̧tti̧rö̧ suronä jȩpä̧tö̧rö̧ ttiyometä päi'a'a.

⁴⁶ Ä̧rä̧mi̧'ä̧tu̧cui̧ ti̧'chä̧tu̧cua̧. Ttörö suronä jȩpä̧tö̧rö̧ i̧yä̧cua̧mä̧ täcö ichö.

Jesúsru ȩmi̧pi̧nä̧tö̧do

⁴⁷ Jesús ji̧nä̧ ucuocuomenä, Judas, ttö̧jä̧pö̧ttö̧nö̧ ta̧ju̧nu̧ u̧huo̧juȩtä̧u̧ttu̧ i̧sa̧ pi̧nö̧ ichinödo. Ja̧u̧cu̧ recuätö ttö̧ja̧ curodiyä'inä, dauhuiyä'inä 'chu̧huä̧rä̧nö̧ ichinätödo. Sacerdotes ruhuotö'inä, judíos ttö̧ja̧ ancianos huotö'inä huettäjä̧u̧mä̧ ichinätödo.

⁴⁸ Judas, Jesúsru i̧yä̧cua̧mä̧, ä'canä pä'inödo jahuätörö: —Ttö hua'adi'ö chesehuäcumä, ja̧u̧tä̧ jä̧cua̧'a̧ Jesúsmä. 'Chu'ädi'ö cuȩmi̧pä̧tu̧cua̧rö̧jä̧.

⁴⁹ Ja̧'hua̧ ja̧'a̧ Jesús ö̧jo̧mȩ ichi'ö, Jesúsru pä'inödo: —¿Tta̧'a̧jä̧, Huo̧juȩcuä̧ I̧sa̧? —Ja̧'hua̧nö̧ pä'ö kä̧nö̧, Jesúsru hua'adi'inödo.

⁵⁰ Jesús ja̧u̧ru̧ pä'inödo: —Cha̧hua̧ru̧hua̧, ¿dä̧bö̧ cuichäjättö? Ja̧u̧nu̧ o'ca'a korotömä ichi'ö, Jesúsru 'chu'ädinätödo, cärenä ttötarö pä'ö.

⁵¹ Ja̧'hua̧nö̧ 'chuttädomenä, ya̧tȩ Jesúscu cue'ächä'ijömä, ucurodä ȩmo̧po̧'ö̧ sacerdotes ru̧hua̧ u̧mö̧huä̧ya̧ ä̧ja̧ 'cui'opö icuinödo.

⁵² Ja̧'hua̧nö̧ ja̧'a̧ttö̧ Jesús pä'inödo: —Cucurodä hua'adö ku̧ni̧. O'ca toi'önä curodänä rohuähuätömä, curodänä hua'ö tticuäcuotö.

⁵³ ¿Ucutu jerupätöjä tä̧ji̧? Chä'orö jädepöttömä, jitä ángeles recuätörö hueö'a̧nö̧ ttörö tta̧ttä̧ra̧ pä'ö.

⁵⁴ Ja̧'hua̧nö̧ ja̧'a̧nä̧ ja̧'hua̧nö̧ jädepöttömä, ¿tta̧'a̧nö̧ 'cuäopäcua'ajä̧ttö̧ Huȩyu̧cuä̧ Huȩnȩ päö'a̧nö̧mä̧?

⁵⁵ Ja̧u̧nu̧ o'ca'a Jesús ttö̧ja̧rö̧ pä'inödo: —Ucutumä ya̧tȩ nä̧u̧cuä̧rä̧cuä̧huä̧ i̧sa̧rö̧ ȩmö̧ ttichö'a̧nö̧ curodiyä'inä, dauhuiyä'inä 'chu̧huä̧rä̧nö̧ ichäjätöjä. 'Cuäopönä mo̧ro̧ji̧nö̧ a̧'u̧cuä̧ ucutu cu̧'quȩtȩtu̧cu̧nä̧ Diosrö ucuocuäcuähuodenä pä̧nö̧ huo̧juȩti̧nö̧sä̧. Ja̧'hua̧nö̧ chu̧huo̧juȩto̧mȩnä̧, 'chu'ädocotö pi̧nä̧tö̧jä̧.

⁵⁶ Ucutu ja̧u̧nu̧mä̧ 'chu'ädocotö pi̧nä̧tö̧jä̧, Dios i̧huȩnȩ jiäcuähuä isotö tti̧huȩyu̧ti̧nö̧mä̧ 'cuäopa'a pä'ö. Ja̧'hua̧nö̧ päomenä, u̧huo̧juȩtä̧u̧mä̧ Jesúsru jaropi'ö tö'ipächinätödo.

Jesús ruhuotö ttä'ca jo̧mȩ ö̧ji̧nö̧ huȩnȩ

⁵⁷ Jesúsru 'chu'ädinätömä Caifás, sacerdotes ru̧hua̧, ä'ca jo̧mȩ ȩpi̧nä̧tö̧do Jesúsru. Caifáscu hueähuä huȩnȩ huo̧juȩtä̧tö̧'i̧nä̧, judíos ttö̧ja̧ ancianos huotö'inä ka̧cui̧nä̧tö̧do.

⁵⁸ Juhua'a tti̧'cho̧mȩnä̧, Pedro otonänö tto'ca'anä 'chi̧nö̧do ru̧hua̧ ojusode jubö. Juhuodenä u̧mi̧ i̧so̧ca̧nä̧ do'ächö, su̧ro̧da̧u̧ ttippeyänä pä̧mä̧di̧nö̧do, Jesúsru jȩttö̧ toa pä'ö.

⁵⁹ Sacerdotes ruhuotö'inä, judíos ttö̧ja̧ ancianos huotö'inä, judíos ttö̧ja̧ ji̧nä̧ isocu ruhuotö'inä, Jesúsru suronä ucuocuätörö'inä, yapareu huȩnȩ ucuocuätörö'inä usinätödo. Jahuätö pättö esetö, Jesúsru cuä'ö tticua pä'inätödo.

⁶⁰ Ja̧'hua̧nö̧ ttusomenä, suronä jȩi̧nö̧mä̧ po̧cui̧po̧co̧tö̧ pi̧nä̧tö̧do, recuätö ttö̧ja̧ yapareu ttucuocuomenä'inä. Recuonänö o'ca'a ta̧ju̧ yapareu huȩnȩ ucuocu pä'inätödo:

⁶¹ —Pidemä pä'inö: “Ttömä Diosrö ucuocuäcuähuode cuä'epö icu, korode huäbodäcuä mo̧ro̧ jo̧mȩnä̧ chaditö'a̧nö̧ ja̧'a̧.”

⁶² Ja̧'hua̧ ja̧'a̧ sacerdotes ru̧hua̧ ä̧rä̧mi̧'ö̧, Jesúsru pä'inödo: —¿Ucumä yoröiso ädätocöjä tä̧ji̧? Pi̧yȩ ucuru pättömä ¿tta̧'a̧nö̧ pätta'ajä̧ttö̧?

⁶³ Ja̧'hua̧nö̧ päomenä, Jesús 'coruchi'inödo. Ja̧u̧nu̧ o'ca'a sacerdotes ru̧hua̧ päinäcudo: —Dios kö̧ i̧mi̧mä̧ iso päi'önä päcuhua pä'ö pä'ösä ucuru. Ji'ähuitö, ¿ucumä iso päi'önä Cristojä tä̧ji̧? ¿Ucumä Dios I̧tti̧jä̧ tä̧ji̧?

⁶⁴ Ja̧'hua̧ ja̧'a̧ Jesús pä'inödo: —A̧, päcu ta'anö ttötäsä. Ja̧'hua̧ta̧nö̧ pä'ösä ucuturu, Ubo I̧tti̧rö̧ Dios, o'ca juiyömä ju̧ru̧hua̧mä̧ u̧huo̧jua̧'a̧nä̧ ö̧'a̧'a̧ tocu'äcuotöjä ucutumä. Ja̧'hua̧ta̧nö̧ mo̧ro̧jä̧ra̧'a̧ttö̧ ajiya isoppanä i̧mȩyȩhuo̧mȩnä̧, tocu'äcuotöjä ucutumä.

^65-66 Ja̧'hua̧nö̧ päji o'ca'a sacerdotes ru̧hua̧mä̧ ö̧'ca̧tä̧huä̧ta̧ seropö icu, ra̧huä̧rö̧ pä'inödo: —Pidemä suronä ucuocu Diosrö. Juhua'a yabonö tä̧ju̧cu̧ juiya pä'ätucui. Ucuocumä ä̧ju̧cuä̧jä̧tö̧jä̧ ucutumä. ¿Tta̧'a̧nö̧ cuamöcuädätucuättö? Jahuätö pä'inätödo: —Iso päi'önä suronä ucuocu. Huäinä hua'ö icu.

^67-68 Ja̧'hua̧nö̧ ja̧'a̧nä̧ ö'änä su'u, cuäcuäpinätödo Jesúsru. Korotömä ö'änä cuäcuäpö, pä'inätödo: —Ucumä Cristo cu'uttumä, ucuru cuä'örö ji'ähuitö.

Pedro Jesúsru ä̧ppö̧tä̧ri̧nö̧do

⁶⁹ Jesúsru ja̧'hua̧nö̧ ttucuocuomenä, Pedro u̧mi̧ pä̧nö̧ tta̧'ä̧ri̧nö̧do. Yajute ru̧hua̧ umöhuäyaju ja̧u̧ru̧ tö'cönänö ichi'ö pä'inäjudo: —Ucu'inä Jesús Galilea i̧sa̧cu̧ cue'ächinöjä.

⁷⁰ Ja̧'hua̧nö̧ päjäcu, Pedro o'ca toi'önä ttä'ca jo̧mȩttö̧ ä̧ppö̧tä̧rö̧ pä'inödo: —Ucu päcumä yoröiso jȩru̧pa̧sä̧.

⁷¹ Ja̧u̧nu̧ o'ca'a Pedro äpate ä'ca ö̧jo̧mȩnä̧, karaju'inä ja̧u̧ru̧ topö pä'inäjudo ju̧huȩnȩ ka̧cuä̧tö̧rö̧: —Pidemä Jesús Nazaret i̧sa̧cu̧ cue'ächinödo.

⁷² Pä'äji ta'anö Pedro ä̧ppö̧tä̧rö̧ pä'inödo: —Ja̧u̧mä̧ yoröiso chieruhuäcu.

⁷³ A̧'u̧cua̧'a̧ o'ca'a ju̧huȩnȩ pȩjä̧tö̧mä̧ Pedrorö ichi'ö pä'inätödo: —Iso päi'önä ucumä jahuätötä i̧sa̧jä̧. Jahuätö ta'anö ucuocujä.

⁷⁴ Ja̧'hua̧ ja̧'a̧ttö̧ Pedro suronä ucuocu kä̧nö̧, pä'inödo: —Ja̧u̧ ubomä yoröiso chieruhuäcu. Ja̧'hua̧nö̧ päomenä, äcärä huopinödo.

⁷⁵ Ja̧'hua̧nö̧ päi'omenä, Pedro amöcuädinödo Jesús ucuocuäjimä: “Äcärä huoäcua'a ä'canä, huäbodäcuä jo̧mȩnä̧ ttörö cuä̧ppö̧tä̧rä̧cua̧jä̧.” Jesús päji ta'anö ä̧ppö̧tä̧ri̧nö̧do. Ja̧'hua̧ ja̧'a̧ Pedro juhua'attö rä'opächö, pä̧i̧cu̧nä̧ ajuähuinödo.