San Mateo 14 - TÄ̧DO Ä̧CUÄ̧ I̧HUȨNȨ

Juan el Bautista 'corupäi'inö huȩnȩ

¹ Ja̧u̧nu̧ pä̧nä̧ Herodes, Galilea ru̧hua̧mä̧, Jesús jȩa̧'a̧ ä̧ju̧cui̧nö̧do.

² Ja̧u̧cu̧ ka̧cui̧nä̧tö̧rö̧ pä'inödo: —Ja̧u̧mä̧ Juan el Bautistamä 'corupäi'ina'attö tto'ächinö. Ja̧'hua̧nö̧ ja̧'a̧ttö̧ ttö̧ja̧ ttieru juäi jȩpö̧, —pä'inödo.

³ Herodes Juanrö cärenä rötinödo. Ja̧'hua̧nö̧ cärenä ö̧'a̧'a̧ cuoräusanä nö̧'cä̧rö̧ ttu̧ju̧na̧rö̧ pä'ö hue'inödo, Herodías pä'ö micuaju kesehua pä'ö. Yajutä Herodíasmä, Herodes ö̧jä̧hua̧ Felipe irecua pi̧nä̧ju̧do.

⁴ Juanmä Herodesrö pä'inödo: —Jahuäjuru cuirecua päi'önä cu̧jä̧', —pä'inödo.

⁵ Ja̧'hua̧nö̧ ja̧'a̧ttö̧ Herodes Juanrö cuä'ö icua päomenä, ye'ecuinödo ttö̧ja̧rö̧. Jahuätö ttö̧ja̧mä̧: —Juan Dios i̧huȩnȩ ji'äu, —pä'inätödo.

⁶ Herodes uhuäpächinö mo̧ro̧ pätecuächomenä, fiesta jȩtto̧mȩnä̧, Herodías kittiju o'ca toi'önä ttä'ca jo̧mȩttö̧ baile tö'inäjudo. Ja̧'hua̧nö̧ töja'a Herodes juiyo esehuinödo.

⁷ Jahuäjuru o'ca juiyönä jäjepömä iya pä'inödo.

⁸ Ja̧'hua̧nö̧ ja̧'a̧ttö̧ ka̧ju̧ päjinö ta'anö, Herodesrö pä'inäjudo: —Sä̧rä̧bä̧nä̧ ȩnö̧, Juan el Bautista u iyittö.

⁹ Ja̧'hua̧nö̧ päjomenä, ru̧hua̧ Herodes a̧'cua̧ tta̧'ȩcui̧nö̧do. Ja̧'hua̧ ja̧'a̧ korotö ttä'ca jo̧mȩ päji ta'anö, hue'inödo jäjepäjimä ttiya pä'ö.

¹⁰ Juan cärenä ö̧'a̧'a̧, ru̧hua̧ hue'inö u 'cui'opö tticuarö pä'ö.

¹¹ Ja̧u̧nu̧ o'ca'a sä̧rä̧bä̧nä̧ ȩja̧'a̧ i'cächö, iyinätödo möäyajuru. Jahuäjumä ka̧ju̧ru̧ juhua'a yabo iyinäjudo.

¹² Ja̧'hua̧ ja̧'a̧ttö̧ Juan umöhuäyotö ichi'ö Juan jä̧ttä̧pä̧ya̧rö̧ ȩmi̧pö̧ 'turu icuinätödo. Ja̧u̧nu̧ o'ca'a Jesúsru ji'äu 'chi̧nä̧tö̧do.

Jesús cinco mil jo̧mȩnä̧ u̧mä̧tö̧rö̧ ttucua pä'ö iyinö huȩnȩ

¹³ Jesús ja̧u̧ huȩnȩ ä̧ju̧cuo̧mȩnä̧, huoi'canä pä̧mä̧dö̧ katä 'chi̧nö̧do korome ttö̧ja̧ tomecu. Ja̧'hua̧nö̧ i̧'chä̧ji̧ o'ca'a ttö̧ja̧ ä̧ju̧cu̧, ttidepiyuttu rä'opö de'anä 'chi̧nä̧tö̧do Jesús i̧'chä̧ja̧'a̧.

¹⁴ Jesús huoi'cattö huä̧mi̧'ö̧, recuätö ttö̧ja̧rö̧ topinödo. Jahuätörö a̧'cua̧ tta̧ jö̧nä̧ topinödo. Na̧'ä̧chä̧tö̧rö̧ tti'cächäjä̧u̧ru̧ aditö icuinödo.

¹⁵ Täcö ni̧pä̧chi̧'o̧mȩnä̧, Jesús u̧huo̧juȩtä̧u̧ Jesúsru ichi'ö pä'inätödo: —Täcö ni̧pä̧cha̧'a̧. Pȩnȩmä̧ ttö̧ja̧ toa'a. Ttö̧ja̧rö̧ ji'ähui, ötahuiyära̧'a̧ tti̧'cha̧ pä'ö ttu̧cuȩ ttȩma̧ pä'ö.

¹⁶ Ja̧'hua̧ ja̧'a̧ Jesús pä'inödo jahuätörö: —Tti̧'cha̧ pä'ö ji'ähuocösä. Ucututä ttucua iyätucuitö.

¹⁷ Ja̧'hua̧nö̧ pä̧u̧ pä'inätödo: —Pȩnȩmä̧ i̧ri̧si̧ ji̧mö̧tȩ jähuä ö̧si̧'i̧nä̧, po̧i̧'i̧nä̧ ta̧ju̧ru̧tä̧ ku̧nä̧rä̧tö̧jä̧.

¹⁸ Jesús pä'inödo: —Pocu i'cächätucui.

¹⁹ Ja̧'hua̧nö̧ ja̧'a̧ttö̧ ttö̧ja̧rö̧ hue'inödo rȩjȩ ttö̧'ä̧mä̧da̧ pä'ö. Ja̧u̧nu̧ o'ca'a i̧ri̧si̧ ji̧mö̧tȩ jähuä ö̧si̧'i̧nä̧, po̧i̧ ta̧ju̧'i̧nä̧ u̧mö̧nä̧ 'chu̧'ä̧rö̧, mo̧ro̧jä̧ra̧'a̧ topö ucuocuinödo Diosrö. Ja̧u̧nu̧ o'ca'a 'tȩ'chä̧rö̧ iyinödo u̧huo̧juȩtä̧u̧ru̧, juhua'a yabo ttiya pä'ö ttö̧ja̧rö̧.

²⁰ O'ca toi'önä suttädi'önä cuinätödo. Ja̧'hua̧nö̧ ja̧'a̧nä̧ uru'tiyu ttö̧jä̧pö̧ttö̧nö̧ to'tare suhuädi'önä ȩni̧nä̧tö̧do ttucua'anä ka̧cui̧pä̧ji̧mä̧.

²¹ Ja̧u̧nu̧ cuinätömä, nä̧tö̧'i̧nä̧, ppo̧'ä̧tö̧'i̧nä̧ pa̧ja̧cuä̧ juiyönä, cinco mil jo̧mȩnä̧ u̧mä̧tö̧ ji̧na̧'a̧do.

Jesús ajiya huämoyanä cue'ächinödo

²² Ja̧u̧nu̧ o'ca'a Jesús u̧huo̧juȩtä̧u̧ru̧ hue'inödo ä'canä tti̧'cha̧ pä'ö huoi'canä dubora ji̧jȩcu̧, chutä ö̧ji̧pa̧'a̧nä̧ ttö̧ja̧rö̧ röji ji'äu ttojusodera̧'a̧ tti̧'cha̧ pä'ö.

²³ Ttö̧ja̧rö̧ röji jiähuäji o'ca'a, möä'cara̧'a̧ katä huä̧mi̧pi̧nö̧do Diosrö ucuocua pä'ö. Ni̧pä̧cho̧mȩnä̧, Jesús katä ki̧nö̧do möä'canä.

²⁴ U̧huo̧juȩtä̧u̧mä̧ dubora kä'cora ni̧'ȩcuä̧chi̧nä̧tö̧do. Juhua'a kä̧ru̧'coppa rö̧ȩnä̧ kä̧rö̧'co̧hua̧'a̧ttö̧, dubora ppahuina'ado.

²⁵ Täcö mo̧ro̧ tö'cöhuächi'a'a ajiya huämoyanä u̧huo̧juȩtä̧u̧ru̧ tö'cönänö 'chä̧hui̧'i̧nö̧do.

²⁶ Jahuätömä ajiya huämoyanä cueächa'a tottomenä, ye'ecu huopinätödo: —¿Di̧jua̧'a̧jä̧ttö̧ ja̧'hua̧nö̧ cue'ächömä?

²⁷ Ja̧'hua̧nö̧ ja̧'a̧nä̧ Jesús jahuätörö ucuocu pä'inödo: —¡Esehuätucui! Ttötäsä. Yecuhuecuätucuä'.

²⁸ Ja̧'hua̧nö̧ päomenä, Pedro pä'inödo: —Chu̧ru̧hua̧, iso päi'önä ucu jö̧ttö̧mä̧, ttö'inä ajiya huämoyanä cu̧jo̧mȩ chichi'a pä'ö hue'ittö.

²⁹ Jesús päinäcudo: —Ja̧u̧ttu̧mä̧, ichi. Pedro ja̧'hua̧nö̧ ä̧ju̧cuo̧mȩnä̧, huoi'cattö huä̧mi̧'ö̧ ajiya huämoyanä cue'ächinödo Jesús ö̧jo̧mȩ i̧'cha̧ pä'ö.

³⁰ Ja̧'hua̧nö̧ i̧'cho̧mȩnä̧, kä̧ru̧'coppa rö̧ȩnä̧ kä̧ru̧'co̧huä̧cu̧ amöcuädö ye'ecuinödo. Ja̧'hua̧nö̧ päi'omenä, jacuoto ma̧'ä̧chö̧ huopinödo: —Chu̧ru̧hua̧, ppä'ädittö.

³¹ Yotäcu Jesús u̧mö̧nä̧ 'chu'ädö pä'inödo: —¡Yoröiso adiunämä esetocöjä! ¿Tta̧'a̧nö̧ pä'ö jarode'ö cuamöcuädäjättö?

³² Huoi'canä ttö̧'ö̧jä̧mi̧'o̧mȩnä̧, kä̧ru̧'coppa huirochi'ina'ado.

³³ Ja̧'hua̧ ja̧'a̧ huoi'canä pȩji̧nä̧tö̧mä̧, Jesús ä'ca jo̧mȩ ttihue'quiyunä kä̧mä̧dö̧ pä'inätödo: —Iso päi'önä ucumä Dios I̧tti̧jä̧, —pä'inätödo.

Genesaret rȩjȩttö̧ na̧'ä̧chä̧tö̧rö̧ aditö icuinödo

³⁴ Ja̧u̧nu̧ o'ca'a dubora käjähuächö, Genesaret rȩjȩra̧'a̧ 'chä̧hui̧'i̧nä̧tö̧do.

³⁵ Juhua'a ttö̧ja̧ Jesúsru ttä̧ju̧cuo̧mȩnä̧, o'ca toi'önärö ji'ähuinätödo. O'ca toi'önä na̧'ä̧chä̧tö̧rö̧ i'cächinätödo Jesús ö̧jo̧mȩ.

³⁶ Jahuätömä na̧'ä̧chä̧tö̧mä̧ ö̧'ca̧tä̧huä̧ta̧'i̧nä̧ mȩtta̧ pä'ö jä'epinätödo. O'ca toi'önä ja̧u̧ ö̧'ca̧tä̧huä̧ta̧ mȩ'ä̧tö̧'i̧nä̧ aditö icuinä̧u̧do.