San Marcos 8 - TÄ̧DO Ä̧CUÄ̧ I̧HUȨNȨ

Cuatro mil jo̧mȩnä̧ ttö̧ja̧rö̧ ttu̧cuȩ iyinödo

¹ Ja̧u̧nu̧ pä̧nä̧ recuätö ttö̧ja̧ ca̧ca̧cui̧pi̧nä̧tö̧do. Ttu̧cuȩ'i̧nä̧ jui'inätödo. Ja̧u̧nu̧ o'ca'a Jesús u̧huo̧juȩtä̧u̧ru̧ huopö pä'inödo:

² —Pitörö cha̧'cua̧ tta̧ jö̧nä̧ topösä. Täcö huäbodäcuä mo̧ro̧ ja̧'a̧ ttöcu cuettächäja'amä ttu̧cuȩ beipächäja'a.

³ Ttojusodera̧'a̧ ttu̧cuȩ ttucuoca'amä huedöttömä, mä̧nä̧nä̧ 'chä̧nö̧ kä'cottö ttijuiyuhuächi'ö'a̧nö̧ ja̧'a̧. Korotömä otottö ichäjätö.

⁴ Ja̧'hua̧nö̧ päomenä, u̧huo̧juȩtä̧u̧ pä'inätödo: —Pottö, ttö̧ja̧ yoröiso tomettö, ¿tottö tȩmä̧cua̧'a̧jä̧ttö̧ cuäcuähuämä, ja̧'hua̧nö̧ recuätömä ttucua pä'ö?

⁵ Jesús jä'epinödo: —I̧ri̧si̧mä̧, ¿tta̧'a̧nö̧ rö̧ȩnä̧ ö̧si̧ ka̧'a̧jä̧ttö̧? Jahuätö pä'inätödo: —Ko̧ro̧mö̧ttö̧nö̧ to̧si̧rȩtä̧.

⁶ Ja̧'hua̧ ja̧'a̧ ttö̧ja̧rö̧ hue'inödo rȩjȩ ttö̧'ä̧mä̧da̧ pä'ö. I̧ri̧si̧ ko̧ro̧mö̧ttö̧nö̧ to̧si̧rȩ u̧mö̧nä̧ ȩmo̧po̧'ö̧ Diosrö ucuocuinödo. Ja̧'hua̧ ja̧'a̧ 'tȩ'chä̧rö̧ iyinödo u̧huo̧juȩtä̧u̧ru̧, juhua'a yabo ttiya pä'ö ttö̧ja̧rö̧.

⁷ Ja̧'hua̧ta̧nö̧ po̧i̧'i̧nä̧ ji̧'qui̧cha̧nö̧tä̧ ku̧nä̧ri̧nä̧tö̧do. Diosrö ucuocu, hue'inödo ttö̧ja̧rö̧ ttiya pä'ö.

⁸ O'ca toi'önä suttädi'önä cuinätödo. Ttucuäji o'ca'a, ka̧cui̧pä̧ji̧mä̧ uru'tiyu ko̧ro̧mö̧ttö̧nö̧ to'tare suhuädi'önä ȩni̧nä̧tö̧do.

⁹ Ja̧u̧nu̧ cuinätömä cuatro mil jo̧mȩnä̧ ttö̧ja̧ pi̧nä̧tö̧do. Ja̧u̧nu̧ o'ca'a Jesús röji ji'ähuinödo.

¹⁰ Ja̧'hua̧nö̧ ji'ähuäji'ca̧, u̧huo̧juȩtä̧u̧cu̧ huoi'canä pä̧mä̧dö̧, Dalmanuta rȩjȩra̧'a̧ 'chi̧nö̧do.

Fariseos huotö ttö̧ja̧ ttieru juäi totta pä'inätödo

¹¹ Ja̧'hua̧ ja̧'a̧ttö̧ fariseos huotö ichi'ö, jitötä ttamöcuädö ucuocuinätödo Jesúsru. Jesúsru ka̧cuä̧mö̧ topö, koro juäi mo̧ro̧jä̧ jähuä ttö̧ja̧ ttieru juäi totta pä'inätödo.

¹² Jesús pä̧i̧cu̧nä̧ juäpö pä'inödo: —Pitö ttö̧ja̧, ¿dä̧bö̧ totta pätta'ajä̧ttö̧ ttö̧ja̧ ttieru juäimä? Iso päi'önä pä'ösä ucuturu, ttö̧ja̧ ttieru juäi topocotö ttäcuotö.

¹³ Ja̧'hua̧ ja̧'a̧ Jesús jahuätörö jaropi'ö, pä'äji ta'anö huoi'canä pä̧mä̧dö̧, dubora ji̧jȩcu̧ 'chi̧nö̧do.

Fariseos huotö ttu̧cuȩ pan ppö̧ä̧mö̧ huȩnȩ ji'ähuinödo

¹⁴ Dubora ji̧jȩcu̧ tti̧'cho̧mȩnä̧, u̧huo̧juȩtä̧u̧ unichi'inätödo ttu̧cuȩ ttȩpa̧ pä'ö. I̧ri̧si̧ ji̧si̧tȩtä̧ ku̧nä̧ri̧nä̧tö̧do, huoi'canä tti̧'cho̧mȩnä̧.

¹⁵ Ja̧'hua̧ ja̧'a̧ Jesús pä'inödo jahuätörö: —Ä̧ju̧cuä̧tu̧cui̧. Fariseos huotö'inä, Herodes'inä ttu̧cuȩ pan ppö̧ä̧mö̧ juäi ttu̧ȩcuä̧nä̧ ka̧cuä̧tu̧cui̧.

¹⁶ U̧huo̧juȩtä̧u̧ ttamönä pä'inätödo: —¿Pan juita'attö, ja̧'hua̧nö̧ päö tä̧ji̧?

¹⁷ Jesús ttamöcuädö u̧huo̧jua̧'a̧ttö̧ pä'inödo: —¿Dä̧bö̧ päcuhuätucuättö pan juiya'a pä'ö? ¿Ji̧nä̧ ä̧ju̧cuo̧co̧tö̧jä̧ tä̧ji̧? ¿Ji̧nä̧ amöcuädocotöjä tä̧ji̧? ¿Cuami iso'quitucu 'qui'ätöjä tä̧ji̧?

¹⁸ ¿Cu'äretucunä topocotöjä tä̧ji̧? ¿Cuä̧ja̧tu̧cu̧nä̧ ä̧ju̧cuo̧co̧tö̧jä̧ tä̧ji̧? ¿Unichi'äjätöjä tä̧ji̧?

¹⁹ Cinco mil jo̧mȩnä̧ u̧mä̧tö̧rö̧ i̧ri̧si̧ ji̧mö̧tȩ jähuä ö̧si̧ 'tȩ'chä̧rö̧ chiyäji o'ca'a, ka̧cui̧pä̧ji̧ttö̧mä̧ ¿tta̧'a̧nö̧ rö̧ȩnä̧ uru'tiyunä cu̧ca̧ca̧ti̧nä̧tu̧cuä̧ttö̧? Jahuätö pä'inätödo: —Ttö̧jä̧pö̧ttö̧nö̧ to'tare ca̧ca̧ti̧nä̧tö̧jä̧.

²⁰ Ja̧u̧nu̧ o'ca'a Jesús pä'inödo: —Ja̧'hua̧ta̧nö̧ cuatro mil jo̧mȩnä̧ ttö̧ja̧rö̧ i̧ri̧si̧ ko̧ro̧mö̧ttö̧nö̧ to̧si̧rȩ 'tȩ'chä̧rö̧ chiyäji o'ca'a, ka̧cui̧pä̧ji̧ttö̧mä̧, ¿tta̧'a̧nö̧ rö̧ȩnä̧ uru'tiyu cu̧ca̧ca̧ti̧nä̧tu̧cuä̧ttö̧? Jahuätö pä'inätödo: —Ko̧ro̧mö̧ttö̧nö̧ to'tare ca̧ca̧ti̧nä̧tö̧jä̧.

²¹ Ja̧'hua̧ ja̧'a̧ttö̧ Jesús päinä̧u̧do: —¿Ji̧nä̧ 'cucuächi'önä ä̧ju̧cuo̧co̧tö̧jä̧ tä̧ji̧?

Ya̧tȩ ä̧to̧ca̧rö̧ Betsaida ötahuiyättö aditö icuinödo Jesús

²² Ja̧u̧nu̧ o'ca'a Betsaida ötahuiyära̧'a̧ 'chä̧hui̧'i̧nä̧tö̧do. Jesús ö̧jo̧mȩ ya̧tȩ ä̧to̧ca̧rö̧ i'cächö, Jesús ja̧u̧ru̧ mȩ'ö̧ aditö icuarö pä'inätödo.

²³ Ja̧'hua̧ ja̧'a̧ttö̧ Jesús ja̧u̧ ä̧to̧ca̧ u̧mö̧nä̧ 'chu'ädö, ötahuiyä abocu oipinäcudo. Jesús ä isoya tu'epö, u̧mö̧nä̧ mȩ'ö̧ jä'epinödo: —¿Ji̧'qui̧cha̧nö̧tä̧ topöjä tä̧ji̧?

²⁴ Ja̧u̧ ä̧to̧ca̧mä̧ topö pä'inödo: —Ttö̧ja̧rö̧ topösä. Dauhuiyä cueächa'a jä̧'i̧nö̧'a̧nö̧ ja̧'a̧ topösä.

²⁵ Ja̧'hua̧nö̧ päomenä, Jesús pä'äji ta'anö u̧mö̧nä̧ mȩ'i̧nö̧do ö'ärenä. Ja̧u̧ ubomä adiu topinödo. Adiu päi'inäcudo. O'ca juiyönä adiu uhuähua'a topinödo.

²⁶ Ja̧'hua̧ ja̧'a̧ Jesús hue'inödo ja̧u̧ uborö ojusodera̧'a̧ i̧'cha̧ pä'ö. Päinäcudo: —Ötahuiyära̧'a̧ cui̧'chä̧'. Ucuru 'cuäopäjimä yoröiso jicuhuähuä' ötahuiyä ttö̧ja̧rö̧.

Pedromä Jesúsru Cristojä päinö huȩnȩ

²⁷ Ja̧u̧nu̧ o'ca'a Jesúscu, u̧huo̧juȩtä̧u̧cu̧ Cesarea de Filipo ötahuiyä tö'cönä 'chi̧nä̧tö̧do. Mä̧nä̧nä̧ tti̧'cho̧mȩnä̧, Jesús jä'epinödo u̧huo̧juȩtä̧u̧ru̧: —¿Tta̧'a̧nö̧ pättättö ttö̧ja̧mä̧, ttörömä?

²⁸ Jahuätö ädätinätödo: —Korotö pä'ätö: “Ja̧u̧mä̧ Juan el Bautistado.” Korotö pä'ätö: “Ja̧u̧mä̧ Elíasdo.” Korotö pä'ätö: “Ja̧u̧mä̧ Dios i̧huȩnȩ jiäcuähuä i̧sa̧do.”

²⁹ Ja̧'hua̧nö̧ ja̧'a̧ jäepinä̧u̧do: —Ucutumä, ¿tta̧'a̧nö̧ päcuhuätucuättö ttörömä? Ja̧'hua̧nö̧ ja̧'a̧ Pedro ädätinödo: —Ucumä Cristojä.

³⁰ Ja̧'hua̧nö̧ ja̧'a̧nä̧ korotörö ja̧'hua̧nö̧ jittäu juiya pä'ö päinä̧u̧do.

Jesús 'corupäi'ä̧cuȩ huȩnȩ ji'ähuinödo

³¹ Ja̧u̧nu̧ o'ca'a huo̧juȩti̧nö̧do Jesús: —Ubo I̧tti̧mä̧ rö̧ȩnä̧ ubara ttu̧huä̧cua̧. Ja̧'hua̧ta̧nö̧ judíos ttö̧ja̧ ancianos huotö'inä, sacerdotes ruhuotö'inä, hueähuä huȩnȩ huo̧juȩtä̧tö̧'i̧nä̧ ttöjö'cococu jä̧cua̧. Cuä'ö tti̧cuä̧cua̧. Ja̧'hua̧nö̧ ja̧'a̧nä̧ huäbodäcuä mo̧ro̧ päi'omenä tto̧ä̧chä̧cua̧.

³² Ja̧'hua̧nö̧ päomenä, jueö pä'inödo jahuätörö. Ja̧'hua̧nö̧ päa'attö, Pedro Jesúsru koromecu o'ipächö ro̧'ȩpö̧ pä'inödo Jesúsru.

³³ Ja̧'hua̧ ja̧'a̧ Jesús kärächi'ö, u̧huo̧juȩtä̧u̧ru̧ topö, Pedrorö pä'inödo: —Ttöttö 'quȩ'i̧pä̧chi̧, Satanás. Dios amöcuädö ta'anö, yoröiso amöcuädocöjä. Pi̧jä̧ ttö̧ja̧ ttamöcuädö ta'anötä, amöcuädöjä.

³⁴ Ja̧'hua̧ ja̧'a̧ttö̧ u̧huo̧juȩtä̧u̧ru̧'i̧nä̧ ttö̧ja̧rö̧'i̧nä̧ huopö, pä'inödo Jesús: —Ya̧tȩ ttöcu cueächa pä'ömä, chutä amöcuädö jaropi'ö, ttö huedömä jȩpö̧ ja̧u̧ru̧ cuä'ö tticuttu'inä, ttöcu cuȩä̧chä̧cua̧.

³⁵ Ya̧tȩ chutä ö̧jö̧nä̧tä̧ ö̧ja̧ pä'ömä, to̧ȩi̧'ä̧cua̧. Ja̧'hua̧nö̧ ja̧'a̧nä̧ ya̧tȩ ttörö'inä, ttö adihuä chi̧huȩnȩ'i̧nä̧ esetö, a̧'cua̧rö̧ toei'öttömä, adiunä ö̧jä̧cuä̧.

³⁶ Ya̧tȩ pi̧jä̧ jähuä o'ca juiyönä ȩmo̧mȩnä̧, chutä toei'öttömä, ¿däje adihuä juäi u̧ju̧nä̧rä̧cua̧'a̧jä̧ttö̧?

³⁷ Ya̧tȩ a̧'cua̧rö̧ ȩma̧ pä'ömä, ¿tta̧'a̧nö̧ rö̧ȩnä̧ imitähuäcua'ajä̧ttö̧?

³⁸ Ja̧'hua̧ta̧nö̧ ya̧tȩ pitö ttö̧ja̧, suronä jȩpä̧tö̧ ttö̧ja̧, ttä'ca jo̧mȩ ödäpecuttumä ttörö'inä, adihuä chi̧huȩnȩttö̧'i̧nä̧, Ubo I̧tti̧'i̧nä̧ Jä'o öadihuänä'inä, adihuänä ángeles ttöadihuänä'inä ichomenä, ö̧dä̧pȩcuä̧cua̧ ja̧u̧ru̧, —pä'inödo Jesús.