San Marcos 3 - TÄ̧DO Ä̧CUÄ̧ I̧HUȨNȨ

Ya̧tȩ u̧mö̧ joi'inäcuru aditö icuinödo

¹ Jesús pä'äji ta'anö do'ächinödo judíos ttu̧huo̧jui̧'i̧nodenä. Juhuodenä ya̧tȩ u̧mö̧ joi'inäcu ki̧nö̧do.

² Korotömä Jesúsru yä̧huä̧i̧nä̧ to̧pä̧ri̧nä̧tö̧do, ja̧u̧ru̧ aditö icuaja pä'ö, ttö̧ja̧ 'cuättächi'ö mo̧ro̧ ja̧'a̧ttö̧. Jahuätömä suronä ttucuocua pä'inätödo Jesúsru.

³ Ja̧'hua̧ ja̧'a̧ttö̧ Jesús pä'inödo u̧mö̧ joi'inäcuru: —Ä̧rä̧mi̧'i̧. Pȩnȩ tö̧'quȩtȩnä̧ kä̧hui̧.

⁴ Ja̧u̧nu̧ o'ca'a korotörö jä'epinödo: —Ttö̧ja̧ 'cuättächi'ö mo̧ro̧, ¿ya̧tȩrö̧ adiu jȩttö̧'a̧nö̧ tä̧ji̧? ¿Suronä jȩttö̧'a̧nö̧ tä̧ji̧? ¿Ya̧tȩrö̧ aditö tticu'a̧nö̧ tä̧ji̧? ¿Ya̧tȩrö̧ cuä'ö tticu'a̧nö̧ tä̧ji̧? Ja̧'hua̧nö̧ ja̧'a̧nä̧ jahuätömä 'corunätä ka̧cui̧nä̧tö̧do.

⁵ Ja̧'hua̧ ja̧'a̧ttö̧ jahuätö ttu̧huo̧jua̧ pättoca'attö, ra̧huä̧rö̧nä̧nö̧ a̧'cua̧ tta̧'ȩcu̧nu̧ toinä̧u̧do. Ja̧u̧ u̧mö̧ joi'inäcuru pä'inödo: —Cu̧mö̧ te'ädi. U̧mö̧ te'ädinödo. Ja̧'hua̧nö̧ teädomenä, adiu päi'inäcudo.

⁶ Ja̧'hua̧nö̧ topö, fariseos huotö rä'ächö, Herodes ahuaruhuäcu, Jesúsru cuä'ö tticua pä'ö ucuocuinätödo.

Recuätö ttö̧ja̧ dubora jäyora cue'ächinätödo

⁷ Ja̧'hua̧nö̧ ja̧'a̧nä̧ Jesús u̧huo̧juȩtä̧u̧cu̧ 'chi̧nö̧do dubora jäyoracu. Recuätö ttö̧ja̧ Galilea rȩjȩttö̧ 'chi̧nä̧tö̧do ja̧u̧cu̧.

⁸ Ja̧'hua̧ta̧nö̧ rö̧ȩnä̧ adihuä juäi jȩä̧ja̧'a̧ ttä̧ju̧cuo̧mȩnä̧, recuätö ttö̧ja̧ Judea rȩjȩttö̧'i̧nä̧, Jerusalén ötahuiyättö'inä, Idumea rȩjȩttö̧'i̧nä̧, Jordán aje ji̧jȩcu̧ttu̧'i̧nä̧, Tiro ötahuiyä tö'cöttö'inä, Sidón ötahuiyä tö'cöttö'inä Jesúsru topö ichinätödo.

⁹ Ja̧'hua̧nö̧ ja̧'a̧ttö̧ ttö̧ja̧ tä̧mö̧hua̧'a̧ttö̧, 'quiyönä 'co̧ttä̧dä̧cuä̧u̧ juiya pä'ö u̧huo̧juȩtä̧u̧ru̧ hue'inödo huoi'ca 'chu'ädö tta̧ttä̧ra̧ pä'ö.

¹⁰ Recuätörö aditö icuäja'attö, o'ca toi'önä na̧'ä̧chä̧tö̧mä̧ chutä ö̧jo̧mȩ borepäcuähuinätödo mȩtta̧rö̧ pä'ö.

¹¹ Ja̧'hua̧ta̧nö̧ espíritus suropätö ja̧u̧ru̧ tottomenä, chutä ä'ca jo̧mȩttö̧ ttihue'quiyunä kä̧mä̧dö̧ huopinätödo: —¡Ucumä Dios I̧tti̧jä̧!

¹² Ja̧'hua̧nö̧ ja̧'a̧nä̧ pä̧i̧cu̧nä̧ ucuocu hue'inödo, ja̧'hua̧nö̧ pättö juiya pä'ö.

Ttö̧jä̧pö̧ttö̧nö̧ ta̧ju̧nu̧ hue'ähuotörö huopinödo Jesús

¹³ Ja̧u̧nu̧ o'ca'a Jesús 'cha'ächinödo möä'cara̧'a̧. Churutä pä̧huä̧ rö̧jä̧u̧ru̧ o'ipinödo. Jahuätömä chutä ö̧jo̧mȩ ichinätödo.

¹⁴ Jahuätöttö hue'inödo ttö̧jä̧pö̧ttö̧nö̧ ta̧ju̧nu̧ chutäcu cuettächa pä'ö. Ja̧'hua̧ta̧nö̧ adihuä huȩnȩ jittähua pä'ö hueäcua'a̧nö̧.

¹⁵ Na̧'ä̧chä̧tö̧rö̧ aditö tticua pä'ö iyinä̧u̧do ujuru. Ja̧'hua̧ta̧nö̧ espíritus suropätörö rä'epö tticua pä'ö iyinä̧u̧do ujuru.

¹⁶ Jahuätö ttö̧jä̧pö̧ttö̧nö̧ ta̧ju̧nu̧ pitötä ji̧na̧'a̧: Ka̧ra̧mä̧ Simón, Jesús koro i̧mi̧ Pedro pä'ö oinäcudo.

¹⁷ Ka̧ra̧mä̧ Jacobo, ö̧jä̧hua̧ Juancu Zebedeo pä'ö mi̧cua̧ i̧tti̧mö̧ pi̧nä̧tö̧do. Jahuätörö koro tti̧mi̧ Boanerges pä'ö o'inödo Jesús. Boanerges pä'ö ujutu ti̧huȩnȩnä̧ Cu'upä i̧tti̧mö̧ pä'ätöjä.

¹⁸ Ja̧'hua̧ta̧nö̧ ka̧ra̧mä̧ Andrés, ka̧ra̧mä̧ Felipe, ka̧ra̧mä̧ Bartolomé, Ka̧ra̧mä̧ Mateo, Ka̧ra̧mä̧ Tomás, ka̧ra̧mä̧ Jacobo, Alfeo i̧tti̧, ka̧ra̧mä̧ Tadeo, ka̧ra̧mä̧ Simón, cananista i̧sa̧ pi̧nö̧do.

¹⁹ Ka̧ra̧mä̧ Judas Iscariote, Jesúsru i̧yä̧cua̧ pi̧nö̧do. Jahuätö Jesús hue'ähuotö pi̧nä̧tö̧do. Ja̧u̧nu̧ o'ca'a Jesús u̧huo̧juȩtä̧u̧cu̧ ka̧ra̧ ojusodenä do'ächi'inödo.

Jesús espíritu su̧ro̧pa̧rö̧ ku̧nä̧rö̧ pä'inätödo

²⁰ Pä'äji ta'anö recuätö ttö̧ja̧ ca̧ca̧cui̧pi̧nä̧tö̧do. Ttu̧cuȩ'i̧nä̧ yoröiso ttucuocua'a ji̧na̧'a̧do, ttö̧ja̧ tä̧mö̧hua̧'a̧ttö̧.

²¹ Ttö̧ja̧ “Ja̧u̧mä̧ suripächöto” pätta'a ä̧ju̧cu̧, Jesús ahuaruhuä isotö otticharö pä'ö ichinätödo.

²² Ja̧'hua̧ta̧nö̧ hueähuä huȩnȩ huo̧juȩtä̧tö̧, Jerusalén ötahuiyättö ichäjätö'inä pä'inätödo: —Pidemä Beelzebú, espíritus suropätö ttu̧ru̧hua̧rö̧, ku̧nä̧rö̧. Chutä Beelzebú ujurunä rä'epö icu espíritus suropätörö.

²³ Ja̧'hua̧ ja̧'a̧ Jesús jahuätörö huopö, koro juäi jä̧'i̧nö̧'a̧nö̧ jö̧ huȩnȩ ucuocu, pä'inödo: —Satanásmä, ¿tta̧'a̧nö̧ pä'ö, rä'epö icua'ajä̧ttö̧ chutä Satanásrö?

²⁴ Ya̧tȩ ru̧hua̧mä̧ chutä umöhuäyotöcu örohuäuttumä, yoröiso recuo ko̧cö̧.

²⁵ Ja̧'hua̧ta̧nö̧ ya̧tȩ chutä ahuaruhuäcu örohuäuttumä, yoröiso recuo ko̧co̧tö̧.

²⁶ Ja̧'hua̧ ja̧'a̧ttö̧ Satanás'inä chutä amönätä örohuäuttumä, yoröiso recuo ko̧cö̧. Ja̧'hua̧nö̧ jȩpö̧ o'ca päi'önä bȩi̧pä̧chä̧cua̧.

²⁷ “Ya̧tȩ ju̧ru̧hua̧ ojusodenä do'ächö öäre ttö̧nä̧u̧cua̧ pä'ö, ä'canä isode ru̧hua̧rö̧ nö'cö ttötö juiyöttömä, yoröiso do'ächocotö. Nö'cö rötipötä öäre ttö̧nä̧u̧cu̧'a̧nö̧.

²⁸ “Iso päi'önä pä'ösä ucuturu, pi̧jä̧ ttö̧ja̧rö̧ o'ca juiyönä suronä jȩttö̧'i̧nä̧, ttucuocu'inä, jȩpö̧ icudo.

²⁹ Ja̧'hua̧nö̧ ja̧'a̧nä̧ ya̧tȩ Espíritu Santorö suronä ucuocuttumä, ja̧u̧mä̧ suronä ucuocumä, yoröiso jȩpö̧ icuocödo. Ja̧u̧mä̧ suronä ucuocumä 'cuäopönä u̧ju̧nä̧rä̧cua̧, —pä'inödo Jesús.

³⁰ Ja̧'hua̧nö̧ pä'inödo, jitötä “Espíritu su̧ro̧pa̧rö̧ ku̧nä̧rö̧to” pätta'attö.

Jesús ja̧ju̧'i̧nä̧ ö̧jä̧hua̧tö̧'i̧nä̧ Jesúsru topö ichinätödo

³¹ Ja̧'hua̧nö̧ 'cuäopa'anä Jesús ja̧ju̧'i̧nä̧, ö̧jä̧hua̧tö̧'i̧nä̧ ichi'inätödo. Ja̧'hua̧nö̧ ja̧'a̧nä̧ u̧mi̧nä̧ kä̧nö̧ hue'inätödo Jesúsru jittähua pä'ö.

³² Korotömä Jesúsru tö'cö pȩjä̧tö̧mä̧ pättinäcudo: —Cua̧ju̧'i̧nä̧ cu̧jä̧hua̧tö̧'i̧nä̧ u̧mi̧nä̧ kä̧nö̧ ucuru usätö.

³³ Ja̧'hua̧nö̧ ja̧'a̧nä̧ chutä pä'inödo jahuätörö: —¿Dijä̧ttö̧ cha̧ju̧'i̧nä̧ chö̧jä̧hua̧tö̧'i̧nä̧?

³⁴ Ja̧'hua̧nö̧ pä'äji'ca̧, ö̧jo̧mȩ tö'cö pȩjä̧tö̧rö̧ topö, pä'inödo: —Pitötä cha̧ju̧'i̧nä̧, chö̧jä̧hua̧tö̧'i̧nä̧.

³⁵ O'ca toi'önä Diosrö pä̧huä̧ rö̧jo̧mȩnä̧ jȩpä̧tö̧tä̧, jahuätötä ttö cha̧ju̧'i̧nä̧, chö̧jä̧hua̧tö̧'i̧nä̧ pä'i'ätö, —pä'inödo Jesús.