San Marcos 16 - TÄ̧DO Ä̧CUÄ̧ I̧HUȨNȨ

Jesús ttoächinö huȩnȩ

¹ Ttö̧ja̧ 'cuättächi'ö mo̧ro̧ o'come mo̧ro̧, María Magdalena'inä, María, Jacobo ja̧ju̧'i̧nä̧, Salomé'inä amehuoya ȩmi̧nä̧tö̧do, Jesús o'co jähuä ttuttepäcuoya.

² Semana äcuomenä mo̧ro̧ päi'omenä, kä̧hua̧ räopomenä, idorära̧'a̧ 'chä̧hui̧'i̧nä̧tö̧do.

³ Jahuätö ttamönä pä'inätödo: —Idorä ä'ca mö̧ȩcuo'qui, ¿dijä̧ttö̧ pporädö i̧cuä̧cua̧mä̧?

⁴ Ja̧'hua̧nö̧ ja̧'a̧ 'chä̧hui̧'ö̧ tottomenä, ido'qui rö̧o'qui, idorä mö̧ȩcuo'qui pporädö icuähua'a topinätödo.

⁵ Idoränä do'ächi'ö, ya̧tȩ mö̧ä̧ya̧rö̧, ö̧'ca̧tä̧huä̧ta̧ o̧to̧ä̧ta̧ tȩä̧ta̧ 'ca̧tä̧u̧ru̧, ttu̧huo̧jua̧'a̧cu̧nä̧ ö̧'a̧'a̧ topinätödo. Ja̧u̧ru̧ topö, ye'inätödo.

⁶ Ja̧'hua̧nö̧ ja̧'a̧nä̧ ja̧u̧ mö̧ä̧ya̧ pä'inödo jahuätörö: —Yecuhuecuätucuä'. Jesús, Nazaret i̧sa̧rö̧, dau isodänä pȩ'o̧pö̧ ttu̧ju̧nä̧jä̧cu̧ru̧, topö ichäjätöjä. Ja̧u̧mä̧ täcö tto'ächäji. Pȩnȩmä̧ toa'a. Ja̧u̧ru̧ ttötäjome topächätucui.

⁷ U̧huo̧juȩtä̧u̧ru̧'i̧nä̧, Pedrorö'inä pa̧'a̧nö̧ ji'ähuäjätucui: “Cuä'catucunä 'chö̧ Galilea rȩjȩra̧'a̧. Juhua'atä ja̧u̧ru̧ tocu'äcuotöjä, chutä päinö ta'anö,” —pä'inödo ja̧u̧ mö̧ä̧ya̧.

⁸ Ja̧'hua̧ ja̧'a̧ttö̧ jahuätö nä̧tö̧mä̧ jurunä rä'opächinätödo idorättö. Jahuätömä ye'ö ttö̧'ä̧hui̧nä̧tö̧do. Ja̧'hua̧ta̧nö̧ jahuätö yettecua'attö, yoröiso ji'ähucotö pi̧nä̧tö̧do korotörö.

Jesús María Magdalenarö i̧jȩcui̧nö̧ huȩnȩ

⁹ Semana äcuomenä mo̧ro̧ juomenä, Jesús ttoächäji o'ca'a, María Magdalena, ko̧ro̧mö̧ttö̧nö̧ ta̧ju̧nu̧ espíritus suropätörö rä'epö icuinäcuarö, äcuomenä i̧jȩcui̧nö̧do.

¹⁰ Ja̧u̧nu̧ o'ca'a jahuäju 'chä̧nö̧, ji'ähuinäjudo chutäcu cue'ächinätörö. Jahuätömä tta̧'cua̧ tta̧'ȩcu̧nu̧ ajuähuinätödo.

¹¹ Jesús kö̧. Täcö topäjäjusä pä'ö jijähuomenä, esetocotö pi̧nä̧tö̧do.

U̧huo̧juȩtä̧u̧ ta̧ju̧nu̧ru̧ i̧jȩcui̧nö̧do Jesús

¹² Ja̧u̧nu̧ o'ca'a u̧huo̧juȩtä̧u̧ ta̧ju̧nu̧ru̧ mä̧nä̧nä̧ tti̧'cho̧mȩnä̧, ka̧ra̧ a̧'cua̧rö̧nä̧ i̧jȩcui̧nö̧do Jesús.

¹³ Jahuätö'inä 'chä̧nö̧ ji'ähuinätödo korotö u̧huo̧juȩtä̧u̧ru̧. Ja̧'hua̧nö̧ ja̧'a̧nä̧ jahuätörö'inä esetocotö pi̧nä̧tö̧do.

Jesús u̧huo̧juȩtä̧u̧ru̧ hueinö huȩnȩ

¹⁴ Ja̧u̧nu̧ o'ca'a u̧huo̧juȩtä̧u̧ ttö̧jä̧pö̧ttö̧nö̧ ya̧tȩnö̧rö̧, mesa isodänä ttö̧'a̧'a̧, i̧jȩcui̧nö̧do Jesús. Korotömä Jesús tto'ächäjirö topäjä'cotö jittähua'a, ttesetoca'attö, ttami iso'qui 'quitta'attö, ra̧huä̧rö̧nä̧nö̧ ucuocuinä̧u̧do.

¹⁵ Jahuätörö pä'inödo: —Pi̧jä̧ pa̧ja̧cu̧nä̧ tätucui. Ji'ähuäjätucui pi̧yȩ ttö̧ja̧ suronä jȩttö̧ jȩpö̧ icu huȩnȩ o'ca toi'önärö.

¹⁶ Ya̧tȩ esetömä, bautizando hua̧mä̧, suronä jȩi̧nö̧ jȩpö̧ icu Dios. Ja̧'hua̧nö̧ ja̧'a̧nä̧ esetocömä, Dios ö̧tä̧bo̧tä̧cua̧ ja̧u̧ru̧.

¹⁷ Ja̧'hua̧ta̧nö̧ esetätömä pa̧'a̧nö̧ ttö̧ja̧ ttieru juäi jȩttä̧cuo̧tö̧. Ttö chi̧mi̧nä̧ espíritus suropätörö rä'epö tticuäcuotö. Korotö tti̧huȩnȩ'i̧nä̧ jareönä ttucuocuäcuotö.

¹⁸ Ttu̧mö̧nä̧ 'chu̧ttä̧dä̧cuo̧tö̧ ä̧ca̧tö̧rö̧. Ni̧yȩcuä̧ ttauttu'inä, ni̧yȩcuo̧co̧tö̧. Ja̧'hua̧ta̧nö̧ na̧'ä̧chä̧tö̧rö̧ ttu̧mö̧nä̧ mȩ'ö̧ aditö tticuäcuotö, —pä'inödo Jesús.

Jesús mo̧ro̧jä̧ra̧'a̧ 'chahuächinö huȩnȩ

¹⁹ Jahuätörö ucuocuäji'ca̧, Tu̧ru̧hua̧ Jesús mo̧ro̧jä̧ra̧'a̧ cä'ecuächinödo. Dios u̧huo̧jua̧'a̧nä̧ pä̧mä̧di̧nö̧do.

²⁰ Jahuätö rä'opächö, o'ca juiyönä pa̧ja̧cu̧nä̧ ji'ähuinätödo ttö̧ja̧ suronä jȩttö̧ jȩpö̧ icu huȩnȩ. Chutä Tu̧ru̧hua̧ jahuätörö ppä'ädinödo. I̧huȩnȩ jittähuomenä, chutä ujurunä ttö̧ja̧ ttieru juäi jȩpi̧nä̧tö̧do, ttö̧ja̧ tteseta pä'ö. Amén.