San Marcos 11 - TÄ̧DO Ä̧CUÄ̧ I̧HUȨNȨ

Jesús Jerusalénra̧'a̧ 'chä̧hui̧'i̧nö̧do

¹ Jerusalén ötahuiyära̧'a̧ tö'cönänö tti̧'chi̧'o̧mȩnä̧, Betfagé ötahuiyä'inä, Betania ötahuiyä'inä tö'cönä, Olivos inähuä kada'ca ji̧no̧mȩ 'chä̧hui̧'i̧nä̧tö̧do. Juhua'attö Jesús u̧huo̧juȩtä̧u̧ru̧ ta̧ju̧ru̧ hue'inödo.

² Pä'inödo: —Ötahuiyä pätecuänö tätucui. Pä'ötä cui̧'chi̧'ä̧tu̧cuo̧mȩnä̧, ya̧tȩ burrorö, ttö̧ja̧ ji̧nä̧ ttö̧huä̧mä̧do̧co̧cu̧ru̧, ti̧ä̧dä̧cuä̧hua̧ ö̧ja̧'a̧ cu̧'o̧cui̧'ä̧cuo̧tö̧jä̧. Ejädi'ö pocu cui'cächätucuaja.

³ Korotö ucuturu “¿Dä̧bö̧ jȩcu̧'ä̧tu̧cuä̧ttö̧?” jättepöttömä, jicuhuähuätucuaja: “Tu̧ru̧hua̧ hueä̧u̧jä̧. Pä'äji ta'anö pocutä huȩä̧cua̧.”

⁴ Jahuätö 'chi̧nä̧tö̧do. Ya̧tȩ burrorö äpate ä'ca, mä̧nä̧ jäyänä ti̧ä̧dä̧cuä̧hua̧ ö̧ja̧'a̧ po̧cui̧pi̧nä̧tö̧do. Ja̧u̧ru̧ ejädi'inätödo.

⁵ Ja̧'hua̧nö̧ ttejädomenä, ju̧huȩnȩ ka̧cuä̧tö̧ttö̧ korotömä pä'inätödo: —¿Däje jȩcu̧'ä̧tu̧cuä̧? ¿Dä̧bö̧ cuejädätucuä burrorö?

⁶ Ja̧'hua̧ ja̧'a̧ttö̧ Jesús päji ta'anö ädätinätödo. Ja̧'hua̧nö̧ pättomenä, burrorö ttȩpa̧ pä'ö hue'inätödo.

⁷ Ja̧u̧ burrorö ȩpi̧nä̧tö̧do Jesús ö̧jo̧mȩ. Ttö̧'ca̧tä̧huä̧ti̧yu̧ cä'epö hueninätödo burrorö. Ja̧u̧nu̧ o'ca'a Jesús 'cha'ächö huä̧mä̧di̧nö̧do.

⁸ Ja̧'hua̧ta̧nö̧ recuätö ttö̧ja̧ ttö̧'ca̧tä̧huä̧ti̧yu̧ mä̧nä̧nä̧ ppä'ö rötinätödo. Korotö dau adiyä'inä 'cui'ö rötinätödo mä̧nä̧nä̧.

⁹ Korotömä ä'canä 'chä̧tö̧'i̧nä̧, tto'ca'anä 'chä̧tö̧'i̧nä̧ huopinätödo: —¡Eseäcuähuätucui! Tu̧ru̧hua̧ i̧mi̧nä̧ ichömä adiunä ö̧jä̧cua̧.

¹⁰ Tä'o David ru̧hua̧ päi'önä ö̧jä̧cua̧mä̧, adiu ö̧jä̧cua̧. ¡Diosrö eseäcuähuätucui!

¹¹ Ja̧'hua̧nö̧ huotta'anä Jesús 'chä̧hui̧'i̧nö̧do Jerusalén ötahuiyära̧'a̧. Diosrö ucuocuäcuähuodenä'inä do'ächinödo. Ja̧'hua̧ta̧nö̧ o'ca juiyönä topäji'ca̧, ni̧pä̧cha̧'a̧ttö̧, Betania ötahuiyära̧'a̧ 'chi̧nö̧do ttö̧jä̧pö̧ttö̧nö̧ ta̧ju̧nu̧ u̧huo̧juȩtä̧u̧cu̧.

Higuera huȩjo̧co̧i̧ suronä ucuocuinödo

¹² Ja̧u̧nu̧ o'comenä mo̧ro̧ päi'omenä, Betania ötahuiyättö rättopomenä, Jesús ucua ppäi rö̧ji̧nä̧cu̧do.

¹³ Mä̧nä̧ttö̧ otomenänö topinödo cuäcuähuäi, higuera pä'ö micuäi, ojiyä ppöröhuäi. U̧huä̧ju̧ huȩja̧ pä'ö topö 'chi̧nö̧do. 'Chä̧hui̧'ö̧ tomenä, ojiyätä ji̧na̧'a̧do, u̧huä̧ju̧ huȩjo̧cö̧ pä̧nä̧ ja̧'a̧ttö̧.

¹⁴ Ja̧'hua̧ ja̧'a̧ Jesús pä'inödo: —Korotö'inä yoröiso ttucuocoijä cu̧huä̧ju̧mä̧. Ja̧'hua̧nö̧ päomenä, u̧huo̧juȩtä̧u̧mä̧ ä̧ju̧cui̧nä̧tö̧do.

Diosrö ucuocuäcuähuodettö do'opö icuinödo suronä jȩpä̧tö̧rö̧

¹⁵ Jerusalén ötahuiyära̧'a̧ 'chä̧hui̧'i̧nä̧tö̧do. Jesús Diosrö ucuocuäcuähuodenä do'ächi'ö, o'ca toi'önä ttȩmä̧'i̧jä̧u̧ru̧'i̧nä̧, ttiyä'ijä̧u̧ru̧'i̧nä̧ dochäu icuinödo. Pärätä päroäcuähuä isotö ttöäre mesa isodä ä̧ppä̧tö̧ icuinödo. U̧nu̧cu̧tu̧ru̧ ttiyä'ijö ttöäre päcuähuodiyä'inä ä̧ppä̧tö̧ icuinödo.

¹⁶ Ja̧'hua̧ta̧nö̧ Diosrö ucuocuäcuähuodenä koro juäi'inä ttȩpö̧ juiya hueinä̧u̧do.

¹⁷ Jahuätörö huo̧juȩtö̧ pä'inödo: —Huȩyu̧cuä̧ Huȩnȩ päa'a: “Ttö chojusode i̧mi̧mä̧ Diosrö ucuocuäcuähuode ja̧'a̧ o'ca toi'önä ttö̧ja̧rö̧.” Ja̧'hua̧nö̧ ja̧'a̧nä̧ ucutu nä̧u̧cuä̧rä̧tö̧ ttö̧ca̧ca̧cuode a̧'cua̧rö̧nä̧ jȩpä̧'i̧jä̧tö̧jä̧.

¹⁸ Sacerdotes ruhuotö'inä, hueähuä huȩnȩ huo̧juȩtä̧tö̧'i̧nä̧ ä̧ju̧cui̧nä̧tö̧do ja̧'hua̧nö̧ päomenä. Ja̧'hua̧ ja̧'a̧ Jesúsru cuä'ö tticua pä'ö usinätödo. Jahuätömä Jesúsru ye'ecuinätödo, o'ca toi'önä ttö̧ja̧ Jesús u̧huo̧juȩta̧'a̧ eseunu ttä̧ju̧cua̧'a̧ttö̧.

¹⁹ Ja̧'hua̧nö̧ ja̧'a̧nä̧ yodo päi'a'a, Jesús ötahuiyättö rä'opächö 'chi̧nö̧do.

Higuera huȩjo̧co̧i̧ huȩnȩ

²⁰ Koro mo̧ro̧ juomenä, mä̧nä̧nä̧ ppa̧ttä̧cho̧mȩnä̧, Jesús ucuocuäjäi, higuera dau, kada'cattö hua'ö icuäja'a topinätödo.

²¹ Ja̧'hua̧ ja̧'a̧ Pedro amöcuädi'ö, pä'inödo Jesúsru: —Huo̧juȩcuä̧ I̧sa̧, topi. Dau cu̧ra̧huä̧räimä täcö hua'ö icuäja'a.

²² Jesús ja̧u̧ru̧ ädätinödo: —Diosrö esetätucui.

²³ Iso päi'önä pä'ösä ucuturu, ya̧tȩ ji'caja möä'ca päomenä: “Pporächi'ö jacuoto ma̧'ä̧chi̧”, jarodäcuähuä juiyönä ami iso'quinä esetö, päji ta'anö 'cuäopäcua'a pä'ö esetö päöttömä, ji'caja pporächi'ö jacuoto ma̧ä̧chä̧cua̧'a̧.

²⁴ Ja̧'hua̧nö̧ ja̧'a̧ttö̧ pä'ösä ucuturu, o'ca juiyönä Diosrö jäcuhue'ätucumä, täcö ȩmä̧jä̧tö̧jä̧ pä'ö adiunä cuesetätucuttumä, cuȩmä̧cuo̧tö̧jä̧.

²⁵ Ja̧'hua̧ta̧nö̧ Diosrö cucuocuätucuomenä, cu̧jä̧hua̧rö̧ suronä cuamöcuädätucuttumä, suronä cuamöcuädätucumä unichi'ätucuirö, Cuä'otucu mo̧ro̧jä̧nä̧ kö̧'i̧nä̧ ucutu suronä jȩcu̧'ä̧tu̧cu̧ unichi'äcua'a̧nö̧.

²⁶ Ja̧'hua̧nö̧ ja̧'a̧nä̧ cu̧jä̧hua̧rö̧ suronä päcuhuätucu cunichi'ätucuoca'a jö̧ttö̧mä̧, Cuä'otucu mo̧ro̧jä̧nä̧ kö̧'i̧nä̧ unichi'ocö ucutu suronä jȩcu̧'ä̧tu̧cu̧, —pä'inödo Jesús.

Jesúsru hueinö huȩnȩ huo̧juȩti̧nö̧do

²⁷ Ja̧'hua̧ ja̧'a̧ttö̧ Jerusalén ötahuiyära̧'a̧ ppa̧'ä̧chi̧nä̧tö̧do. Jesús Diosrö ucuocuäcuähuodenä cueächomenä, sacerdotes ruhuotö'inä, hueähuä huȩnȩ huo̧juȩtä̧tö̧'i̧nä̧, judíos ttö̧ja̧ ancianos huotö'inä Jesús ö̧jo̧mȩ ichi'inätödo.

²⁸ Jättepinäcudo: —¿Di ujurunä jȩcu̧'ä̧ttö̧ jȩcu̧'u̧mä̧? ¿Di hueinättö ucuru?

²⁹ Jesús ädätinä̧u̧do: —Ucuturu'inä jä'epö chä̧ju̧cuä̧tu̧cua̧cu̧. Cuädätätucuttumä, ttö'inä ucuturu ji̧dä̧huä̧cua̧sä̧ ttörö hue'inörö.

³⁰ ¿Di hueinättö Juanrö bautizando jȩa̧ pä'ö? ¿Dios tä̧ji̧ hue'inömä? ¿Pi̧jä̧ ttö̧ja̧ tä̧ji̧ hue'inätömä? Ädätätucuittö.

³¹ Ja̧'hua̧nö̧ jäepomenä, jitötä ttamönä ucuocuäcuähuinätödo: —Dios hueinäcu pätöttömä, ujuturutä pä̧cua̧ a̧'cua̧ra̧'a̧: “¿Dä̧bö̧ cuesetätucuoca'ajä̧ttö̧ ja̧u̧ru̧?”

³² Ja̧'hua̧ta̧nö̧ pi̧jä̧ ttö̧ja̧ huȩ'ä̧hua̧ pi̧nö̧ ¿pätö'a̧nö̧ ja̧'a̧ tä̧ji̧? —pä'inätödo ttamönä. Pi̧jä̧ ttö̧ja̧ “Juanmä Dios huȩ'ä̧hua̧ pi̧nö̧” pätta'attö, ye'ecuinätödo pi̧jä̧ ttö̧ja̧rö̧.

³³ Ja̧'hua̧ ja̧'a̧ttö̧ Jesúsru pä'inätödo: —Ujutu jerupätöjä. Ja̧'hua̧nö̧ pättomenä, chutä ädätinödo: —Ja̧u̧ttu̧mä̧ ttörö hue'inörömä ji'ähuocösä, —ädätinödo Jesús.