San Lucas 2 - TÄ̧DO Ä̧CUÄ̧ I̧HUȨNȨ

Jesucristo uhuäpächinö huȩnȩ

¹ Ji̧yȩnö̧ mo̧ro̧ ji̧nä̧ isocu hueähuä i̧sa̧, ru̧hua̧ Augusto hue'inödo o'ca toi'önä tti̧mi̧ ttiyarö pä'ö.

² Äcuomenä tti̧mi̧ iyähuä jȩpi̧nä̧tö̧do ru̧hua̧ Cireniomä Siria rȩjȩnä̧ ö̧ji̧nö̧.

³ O'ca toi'önä 'chä̧cuä̧hua̧'a̧ ji̧na̧'a̧do tti̧mi̧ ttöta pä'ö jitötä ttamönä ttidepiyunä.

⁴ Ja̧'hua̧nö̧ ji̧yä̧cu̧ José'inä Nazaret ötahuiyättö Galilea rȩjȩttö̧ rä'opö 'chi̧nö̧do Judea rȩjȩnä̧ Belén ötahuiyära̧'a̧, ru̧hua̧ David uhuäpächinomecu, Josémä David isotö i̧sa̧ ja̧'a̧ttö̧.

⁵ Belén ötahuiyära̧'a̧ i̧mi̧ iyö i̧huä̧ji̧nö̧do Maríacu ji̧nä̧ yo̧mȩtȩnä̧, chucu kö̧ja̧ pä'ö ucuocu ttu̧ju̧ni̧nä̧cua̧cu̧. Jahuäju ku̧mo̧du̧ba̧ ri̧nä̧cua̧do.

⁶ Ja̧u̧nu̧ mo̧ro̧ Belén ötahuiyära̧'a̧ ki̧'chi̧'o̧mȩnä̧, María täcö ki̧tti̧rö̧ kuhuäbecuometä päi'ina'ado.

⁷ Juhuorö äcuomenä ki̧tti̧rö̧ uhuäbecuinäjudo. Cue'ächähuotö ttä'ä'ijode ttö̧ja̧ttö̧ suhuädi'a'attö̧, jäyähuodenä pö̧jä̧ta̧nä̧ juä'opö rötinäjudo ttäji cuäcuähuotö ttucuä'cua rötähuo̧ca̧nä̧.

O̧vȩja̧stö̧rö̧ tta̧huä̧rä̧cuä̧huä̧ isotö ángelesrö tottinö huȩnȩ

⁸ Belén ötahuiyä jäyänä ttä̧ji̧mö̧ o̧vȩja̧stö̧rö̧ tta̧huä̧rä̧cuä̧huä̧ isotö tta̧'ä̧ri̧nä̧tö̧do yodo 'cuäoi'önä.

⁹ Ju̧huȩnȩ ttö̧'ȩjo̧mȩ ya̧tȩ ángel Tu̧ru̧hua̧ huȩ'ä̧hua̧ i̧jȩcuä̧chi̧nö̧do. Tȩa̧u̧ Tu̧ru̧hua̧ttö̧ kä̧dȩi̧nä̧u̧do ttö̧ja̧cuo̧mȩ. Ja̧'hua̧nö̧ päi'omenä, rö̧ȩnä̧ ye'inätödo.

¹⁰ Ja̧'hua̧nö̧ ja̧'a̧nä̧ ángel pä'inödo jahuätörö: —Yecuhuecuätucuä'. Adihuä juäi huȩnȩ i'cächösä. Ja̧u̧ huȩnȩmä̧ rö̧ȩnä̧ eseäcuähuä jä̧cuȩ o'ca toi'önärö.

¹¹ Mo̧ro̧ji̧ mo̧ro̧ uhuäpächäji David idepiyuttu ya̧tȩ suronä jȩcu̧'ä̧tu̧cu̧ jȩpö̧ i̧cuä̧cua̧ ucuturu. Ja̧u̧tä̧ Tu̧ru̧hua̧ Cristomä.

¹² Ja̧'hua̧nö̧ cu̧huo̧juä̧cuo̧tö̧jä̧: Ucutu cu̧'o̧cui̧'ä̧cuo̧tö̧jä̧ ji̧'qui̧cha̧hua̧rö̧ pö̧jä̧ta̧ juäocua'a ö̧'a̧'a̧ ttäji cuäcuähuotö ttucuä'cua rötähuo̧ca̧nä̧.

¹³ Ja̧'hua̧nö̧ päi'omenä, ja̧u̧ ángelcu korotö ángeles recuätö i̧jȩcuä̧chi̧nä̧tö̧do mo̧ro̧jä̧ra̧'a̧ttö̧. Diosrö adiu ucuocu pä'inätödo:

¹⁴ Tucuotätucua Dios Ju'toju Ru̧hua̧rö̧. Tta̧'cua̧ adiunä ttö̧ja̧cua̧ pätä̧u̧ pi̧jä̧nä̧ ka̧cuä̧tö̧mä̧, Dios öjö'cä̧u̧mä̧.

¹⁵ Ja̧'hua̧nö̧ ja̧'a̧ ángeles mo̧ro̧jä̧ra̧'a̧ ppa̧ttä̧chä̧chä̧ji̧ o'ca'a o̧vȩja̧stö̧rö̧ tta̧huä̧rä̧cuä̧huä̧ isotö pä'ähuinätödo ka̧ra̧ ka̧ra̧rö̧: —Belén ötahuiyära̧'a̧ ti̧'chä̧tu̧cua̧, pi̧yȩ 'cuäopäji, Tu̧ru̧hua̧ jiähuäji totätucua.

¹⁶ Ja̧'hua̧ ja̧'a̧ pä̧i̧cu̧nä̧ 'chä̧nö̧, Maríarö, Josérö po̧cui̧pi̧nä̧tö̧do. Ji̧'qui̧cha̧hua̧rö̧'i̧nä̧ ttäji cuäcuähuotö ttucuä'cua rötähuo̧ca̧nä̧ ö̧'a̧'a̧ topinätödo.

¹⁷ Ja̧'hua̧nö̧ ja̧'a̧ttö̧ topäcuäumä ji'ähuinätödo ángel jahuätörö jiähuäji ji̧'qui̧cha̧hua̧rö̧.

¹⁸ Ja̧'hua̧ ja̧'a̧ o'ca toi'önä to̧pä̧rö̧ ka̧cui̧nä̧tö̧do o̧vȩja̧stö̧rö̧ tta̧huä̧rä̧cuä̧huä̧ isotö jittäu ä̧ju̧cu̧.

¹⁹ Ja̧'hua̧nö̧ ja̧'a̧nä̧ Maríamä tojö'inä, kä̧ju̧cu̧'i̧nä̧ o'ca juiyönä recuo a̧mö̧cuä̧ri̧nä̧ju̧do.

²⁰ O̧vȩja̧stö̧rö̧ tta̧huä̧rä̧cuä̧huä̧ isotö ppa̧'ä̧chä̧chi̧nä̧tö̧do Diosrö eseunu ucuocu o'ca juiyönä tottäji'inä, ttä̧ju̧cuä̧ji̧'i̧nä̧ päji ta'anö 'cuäopäjiyä̧u̧.

Ji̧'qui̧cha̧hua̧ Jesúsru tti̧jȩpi̧nö̧ huȩnȩ Diosrö ucuocuäcuähuodera̧'a̧

²¹ Ji̧'qui̧cha̧hua̧rö̧ ko̧ro̧mö̧ttö̧nö̧ huäbodäcuä mo̧ro̧ päi'omenä, circuncisión jȩpi̧nä̧tö̧do. I̧mi̧ Jesús o'inätödo, María ku̧mo̧du̧ba̧ rö̧ juiyäi ángel päinötä.

²² Pa̧ja̧cuä̧chi̧na̧'a̧do täcö ji̧yȩnö̧ mo̧ro̧ jahuätö surojöttö 'cuättopächa pä'ö Moisés hueähuä huȩnȩ päö ta'anö. Jerusalén ötahuiyära̧'a̧ ji̧'qui̧cha̧hua̧rö̧ ȩpi̧nä̧tö̧do tti̧jȩpa̧ pä'ö Tu̧ru̧hua̧ Diosrö.

²³ Ja̧'hua̧nö̧ jȩpi̧nä̧tö̧do Tu̧ru̧hua̧ hueähuä huȩnȩ pa̧'a̧nö̧ huȩyu̧cua̧'a̧ttö̧: “O'ca toi'önättö ubo äcuomenä uhuäpächömä Tu̧ru̧hua̧ Diosrö i̧yä̧hua̧ jä̧cua̧.”

²⁴ Ja̧'hua̧nö̧ ji̧yä̧u̧ Josécu, Maríacu sacrificio iyö 'chi̧nä̧tö̧do. Tu̧ru̧hua̧ hueähuä huȩnȩ päa'a: “Tȩyu̧tu̧ ta̧ju̧ru̧ sacrificio päi'önä ttiyö'a̧nö̧. Tȩyu̧tu̧ toöttömä, u̧nu̧cu̧tu̧ ta̧ju̧ru̧ ttiyö'a̧nö̧.”

²⁵ Ja̧u̧nu̧ pä̧nä̧ ya̧tȩ ki̧'ä̧ji̧nö̧do Jerusalén ötahuiyänä Simeón pä'ö mi̧cua̧. Ja̧u̧ adihuä i̧sa̧, Diosrö ucuotäcuähuä i̧sa̧ pi̧nö̧do. Ja̧u̧ tta̧'ä̧ri̧'ä̧ji̧nö̧do Israel ttö̧ja̧rö̧ suronä jȩttö̧ jȩpö̧ i̧cuä̧cua̧ icha'anä. Simeón ami iso'quinä Espíritu Santorö ku̧nä̧ri̧nö̧do.

²⁶ Ja̧'hua̧ta̧nö̧ Espíritu Santo u̧huo̧juȩti̧nä̧cu̧do: “Ucumä Cristorö, Dios huea päinäcuru tocu'u juiyäimä, 'corupä'i'ocö cuä̧cua̧jä̧.”

²⁷ Ja̧u̧ ubo 'chi̧nö̧do Diosrö ucuocuäcuähuodera̧'a̧ Espíritu Santo juȩpä̧ra̧'a̧nä̧. Ja̧'hua̧ta̧nö̧ ji̧'qui̧cha̧hua̧ ja̧ju̧ Maríacu, Josécu Diosrö ucuocuäcuähuodera̧'a̧ i'cächinätödo Jesúsru jȩtta̧rö̧ pä'ö Dios hueö ta'anö.

²⁸ Simeón ji̧'qui̧cha̧hua̧rö̧ jappahui'ö, Diosrö adiu ucuocuinödo. Pä'inödo:

²⁹ Chu̧ru̧hua̧, jitämä täcö huäinä eseunu hua'ö chicuaja ttö. Cu̧mö̧huä̧ya̧rö̧ cucuocuinömä 'cuäopäja'a.

³⁰ Ttötä chamönä chö'ärenä topösä suronä jȩttö̧ jȩpö̧ i̧cuä̧cua̧rö̧mä̧,

³¹ o'ca toi'önä ttö̧ja̧ ttä'ca jo̧mȩ huecuhuäjäcurumä.

³² Ja̧u̧tä̧ tȩa̧u̧mä̧, Israel huocotörö tȩa̧huä̧cuȩmä̧, cumöhuäyotö Israel ttö̧ja̧rö̧ ttucuota pä'ö, pä'inödo Simeón.

³³ Josécu, Jesús ja̧ju̧cu̧ eseunu ä̧ju̧cui̧nä̧tö̧do Simeón ucuocua'a ji̧'qui̧cha̧hua̧rö̧.

³⁴ Ja̧'hua̧nö̧ ja̧'a̧ttö̧ Simeón pä'inödo: —Diostä ppädätucuäcu. Ja̧'hua̧ta̧nö̧ Maríarö, Jesús ja̧ju̧ru̧ pä'inödo: —Topi, pide ji̧'qui̧cha̧hua̧ jȩä̧cua̧ Israel ttö̧ja̧ttö̧ recuätö tottei'a pä'ö. Ja̧'hua̧ta̧nö̧ jȩä̧cua̧ recuätö ttö̧ja̧cui̧'a̧ pä'ö. Ja̧'hua̧ta̧nö̧ ja̧u̧ru̧ recuätö ttöarodäcuotö.

³⁵ Ja̧'hua̧nö̧ ttu̧huo̧juä̧cuo̧tö̧ ya̧cu̧nä̧ ttami iso'quinä ttamöcuädö. Ja̧'hua̧nö̧ ja̧'a̧nä̧ ucurumä dacuo'quȩ cuamönä cuhuacuänä tahuähuächa'a jä̧'i̧nö̧'a̧nö̧ cua̧'cua̧ tta̧cu̧huȩcuä̧cua̧ju̧jä̧, —pä'inödo Simeón.

³⁶ Ja̧'hua̧ta̧nö̧ ju̧huȩnȩtä̧ ki̧nä̧ju̧do yajute yodoji 'cuäopä̧cuȩ jiäcuähuä isaju, Ana pä'ö micuaju. Aser isotö i̧sa̧ Fanuel ittiju pi̧nä̧ju̧do. Täcö juiyo böa isaju pi̧nä̧ju̧do. Möäyaju käi kirecuorö ȩmi̧nä̧ju̧ o'caju ki̧nä̧ju̧do ko̧ro̧mö̧ttö̧nö̧ todäre a̧'ȩtä̧ kirecuocu.

³⁷ Täcö recua ka'amä ochenta y cuatro a̧'ȩ ku̧nä̧ri̧nä̧ju̧do. Diosrö ucuocuäcuähuodettömä rä'opocoju pi̧nä̧ju̧do. Yodo'inä, mo̧ro̧'i̧nä̧ 'cuäopönä ucuocui'äjinäjudo Tu̧ru̧hua̧rö̧, ku̧cuȩ a̧do̧chö̧ kä̧nö̧.

³⁸ Ja̧u̧nu̧tä̧ Ana'inä ju̧huȩnȩtä̧ ki̧nä̧ju̧do. Ja̧'hua̧nö̧ ja̧'a̧ttö̧ Diosrö ucuocu cä'ädö, o'ca toi'önä Jerusalén ötahuiyä ttö̧ja̧rö̧, suronä jȩttö̧ jȩpö̧ i̧cuä̧cua̧rö̧ tta̧'ä̧rä̧'i̧jä̧tö̧rö̧, ucuocuinäjudo ji̧'qui̧cha̧hua̧ Jesúsru.

Nazaretra̧'a̧ ppa̧ttä̧chä̧chi̧nö̧ huȩnȩ

³⁹ Tu̧ru̧hua̧ hueähuä huȩnȩ o'ca juiyönä jȩpö̧ cä'ädäjä'cotö ppa̧'ä̧chi̧nä̧tö̧do Galilea rȩjȩra̧'a̧ adihuänä ttidepiyu Nazaret ötahuiyäcu.

⁴⁰ Ji̧'qui̧cha̧hua̧ böo juo'inödo. Ujuru'inä juruhuinödo. Ja̧'hua̧ta̧nö̧ rö̧ȩnä̧ huo̧juȩcuä̧ huo̧jui̧pi̧nö̧do. Dios'inä rö̧ȩnä̧ ppädinäcudo.

Ji̧'qui̧cha̧hua̧ Jesús Diosrö ucuocuäcuähuodenä ö̧ji̧pi̧nö̧ huȩnȩ

⁴¹ Ja̧ju̧cu̧, Josécu 'cuäopönä a̧'ȩ ji̧nö̧ a̧'u̧cuä̧ 'chi̧'ä̧ji̧nä̧tö̧do Jerusalén ötahuiyära̧'a̧ pascua fiesta jȩpö̧.

⁴² Ja̧'hua̧nö̧ ja̧'a̧ttö̧ Jesús täcö ttö̧jä̧pö̧ttö̧nö̧ todäre a̧'ȩ päi'omenä, 'chi̧nä̧tö̧do Jerusalén ötahuiyära̧'a̧ ttihueye ja̧'a̧ttö̧ pascua fiesta jȩpö̧.

⁴³ Ja̧'hua̧nö̧ ja̧'a̧ttö̧ ppa̧ttä̧cho̧mȩnä̧, pascua fiesta jȩpö̧ cättädäcuähuäji o'ca'a, ji̧'qui̧cha̧hua̧ Jesús Jerusalén ötahuiyära̧'a̧ ki̧'i̧nö̧do, yoröiso ja̧ju̧'i̧nä̧, José'inä ttieruhua'ara̧'a̧.

⁴⁴ Amöcuädinätödo Jesúsmä ttö̧ja̧ ttö̧'quȩtȩnä̧ ichöcö̧ pä'ö. Ja̧'hua̧nö̧ cue'ächinätödo ya'ute mo̧ro̧ mä̧nä̧nä̧mä̧. Ja̧'hua̧ ja̧'a̧ usinätödo ttahuaruhuä ttu̧huo̧juä̧u̧ ttö̧'quȩtȩttö̧.

⁴⁵ Yoröiso ja̧u̧ru̧ po̧cui̧po̧co̧tö̧ pi̧nä̧tö̧do. Ja̧'hua̧nö̧ ja̧'a̧ttö̧ ppa̧'ä̧chi̧nä̧tö̧do Jerusalén ötahuiyära̧'a̧ ttusarö pä'ö.

⁴⁶ Huäbodäcuä mo̧ro̧ o'come Diosrö ucuocuäcuähuodera̧'a̧ttö̧ ttö̧'o̧cui̧'i̧nä̧cu̧do, Moisés hueähuä huȩnȩ huo̧juȩtä̧tö̧ ttö̧'quȩtȩnä̧ jä̧'ȩpä̧rö̧ ä̧ju̧cu̧ ö̧'a̧'a̧.

⁴⁷ Ja̧'hua̧nö̧ ja̧'a̧ttö̧ o'ca toi'önä to̧pä̧rö̧ ttä̧ju̧cui̧nä̧cu̧do huo̧ju̧nä̧ ä̧dä̧to̧'ä̧ri̧yä̧u̧.

⁴⁸ Ja̧'hua̧nö̧ ja̧'a̧ttö̧ ja̧ju̧cu̧, Josécu topinätödo. Ja̧ju̧ pä'inäjudo: —Chi̧tti̧, ¿dä̧bö̧ jȩcu̧'ä̧jä̧ ja̧u̧mä̧ ujuturumä? Cuä'ocu, ttöcu ta̧'cua̧ tta̧'ȩcu̧ a̧mö̧cuä̧rö̧ usäjätöjä ucuru.

⁴⁹ Ja̧'hua̧nö̧ ja̧'a̧ttö̧ Jesús ädätinödo: —¿Dä̧bö̧ cusäjätucuättö ttörö? Ttö Chä'o ojusodenä chö̧jö̧'a̧nö̧ ja̧'a̧ ¿jerupätöjä tä̧ji̧?

⁵⁰ Ja̧'hua̧nö̧ ja̧'a̧nä̧ jahuätö huo̧juä̧chi̧'o̧co̧tö̧ pi̧nä̧tö̧do päömä.

⁵¹ Ja̧'hua̧ ja̧'a̧ttö̧ jahuätöcu ppa̧'ä̧chi̧nö̧do Nazaret ötahuiyära̧'a̧. Ja̧'hua̧ta̧nö̧ jahuätö huettö yabocutä jȩpö̧ ki̧nö̧do. Ja̧'hua̧ ja̧'a̧ ja̧ju̧ kami iso'quinä ja̧u̧ o'ca juiyönä a̧mö̧cuä̧ri̧nä̧ju̧do.

⁵² Ja̧'hua̧nö̧ ja̧'a̧nä̧ Jesús böo juo'inödo chutä'inä, u̧huo̧ju̧ttu̧'i̧nä̧. Ja̧'hua̧ta̧nö̧ Dios'inä, ttö̧ja̧'i̧nä̧ ja̧u̧ru̧ topinätödo adihuä i̧sa̧ ja̧'a̧mä̧.