San Juan 7 - TÄ̧DO Ä̧CUÄ̧ I̧HUȨNȨ

Jesús ö̧jä̧hua̧tö̧ esetocotö pi̧nä̧tö̧do

¹ Ja̧'hua̧nö̧ u̧huo̧juȩti̧nö̧ o'ca'a, Jesús Galilea rȩjȩnä̧ cue'ächinödo. Judea rȩjȩttö̧ judíos ttö̧ja̧ ja̧u̧ru̧ cuä'ö tticua pä'inätödo. Ja̧'hua̧nö̧ ja̧'a̧ttö̧ juhua'a ö̧ja̧ pä'ocö pi̧nö̧do.

² Ja̧'hua̧ ja̧'a̧ judíos ttö̧ja̧ ttojusode ji̧'qui̧cha̧jodettö fiesta jȩttä̧cuȩ mo̧ro̧ tö'cöhuächi'ina'ado.

³ Jesús ö̧jä̧hua̧tö̧ Jesúsru pä'inätödo: —Pȩnȩmä̧ cu̧jä̧'. Judea rȩjȩra̧'a̧ täi, ucuru esetätö ju̧huȩnȩ ka̧cuä̧tö̧'i̧nä̧, o'ca juiyönä jȩcu̧'u̧ totta pä'ö.

⁴ Iso päi'önä ya̧tȩ korotö ttu̧huo̧jua̧rö̧ päöttömä, yä̧huä̧i̧nä̧ jȩpo̧cö̧. Ucu jȩcu̧'u̧mä̧, o'ca toi'önä ttä'ca jo̧mȩttö̧ jȩpi̧.

⁵ Jahuätö ö̧jä̧hua̧tö̧ Jesúsru ttesetoca'attö, ja̧'hua̧nö̧ pä'inätödo.

⁶ Ja̧'hua̧ ja̧'a̧ttö̧ Jesús pä'inödo jahuätörö: —Ttörömä ji̧nä̧ jo̧mȩ päi'oca'a. Ja̧'hua̧nö̧ ja̧'a̧nä̧ ucuturu 'cuäopönä täcö jo̧mȩ pä'i'ätöjä.

⁷ Pi̧jä̧ ttö̧ja̧ ucuturu ttaboiyotö päi'önä topocotö. Ttörötä yoröiso kö'cocotö, suronä jȩttö̧ jidähua'attö.

⁸ Ucututä fiesta jȩcu̧'ä̧tu̧cua̧ pä'ö tätucui. Ttömä jitämä ichocösä. Ttörömä ji̧nä̧ jo̧mȩ päi'oca'a.

⁹ Ja̧'hua̧nö̧ päji o'ca'a, Galilea rȩjȩnä̧ ki̧'i̧nö̧do.

Jesús fiesta jȩtta̧'a̧ topö 'chi̧nö̧do

¹⁰ Ja̧'hua̧nö̧ ja̧'a̧nä̧ chutä ö̧jä̧hua̧tö̧ tti̧'chi̧nö̧ o'ca'a, Jesús'inä yä̧huä̧i̧nä̧ tti̧'cha̧'a̧ jä̧'i̧nö̧'a̧nö̧ 'chi̧nö̧do.

¹¹ Judíos ttö̧ja̧ fiesta jȩtta̧'a̧, ja̧u̧ru̧ usu pä'inätödo: —Ja̧u̧ ubomä ¿to ö̧jä̧ttö̧?

¹² Ja̧'hua̧ta̧nö̧ recuätö ttö̧ja̧ ttamönä ucuocuäcuähuinätödo ja̧u̧ru̧. Korotö pä'inätödo: “Ja̧u̧mä̧, adihuä i̧sa̧.” Korotö pä'inätödo: “Ja̧u̧mä̧, adihuä i̧sa̧cö̧. Ja̧u̧mä̧ yapareu ji'ähue'ä'chö ttö̧ja̧rö̧.”

¹³ Ja̧'hua̧nö̧ ttucuocuomenä, pä̧i̧cu̧nä̧ korotö ttä̧ju̧cu̧nä̧ ucuocuocotö pi̧nä̧tö̧do, judíos ttö̧ja̧rö̧ ye'ecu.

¹⁴ Fiesta täcö kä'co päi'önä jȩtta̧'a̧, Jesús Diosrö ucuocuäcuähuodenä do'ächi'ö huo̧juȩti̧nö̧do.

¹⁵ Judíos ttö̧ja̧ u̧huo̧juȩta̧'a̧ ä̧ju̧cu̧, to̧pä̧rö̧ pä'inätödo: —Pidemä cuyäru u̧huo̧jui̧'o̧ca̧'a̧nä̧, ¿tottö rö̧ȩnä̧ u̧huo̧jui̧'i̧na̧'a̧jä̧ttö̧?

¹⁶ Jesús jahuätörö ädätö pä'inödo: —Ttö chu̧huo̧juȩtö̧mä̧, ttötä chamönä jähuämäcö̧. Ttörö hueinötä huo̧juȩtö̧sä̧.

¹⁷ ¿Ttötä chamönä huȩnȩ huo̧juȩtö̧sä̧ tä̧ji̧? ¿Dios i̧huȩnȩ huo̧juȩtö̧sä̧ tä̧ji̧? Ya̧tȩ Diosrö pä̧huä̧ rö̧jö̧ jȩa̧ pä'ö amöcuädöttömä, ttö chu̧huo̧juȩtö̧mä̧ u̧huo̧juä̧cua̧.

¹⁸ Ya̧tȩ chutä amönä amöcuädäu ucuocuttumä, ttö̧ja̧ ja̧u̧ru̧ ttucuotarö pä'ö ucuocu. Ja̧'hua̧nö̧ ja̧'a̧nä̧ ya̧tȩ ja̧u̧ru̧ hue'inörö ttö̧ja̧ ttucuotarö päöttömä, ja̧u̧ iso päi'önä huȩnȩ ji'äu. Ja̧u̧mä̧ yapareu yoröiso ucuocuocö.

¹⁹ “¿Moisés ucuturu hueähuä huȩnȩ iyinödi̧? Ja̧'hua̧nö̧ ja̧'a̧nä̧ ja̧u̧ hueähuä huȩnȩ päö'a̧nö̧ jȩpo̧co̧tö̧jä̧ ucutumä. Ttörö, ¿dä̧bö̧ cuä'ö cuicuätucua päcuhuätucua'ajä̧ttö̧?

²⁰ Jahuätö ttö̧ja̧ ädätinätödo: —Ucumä espíritu su̧ro̧pa̧rö̧ ku̧nä̧rö̧jä̧. ¿Dijä̧ttö̧ ucuru cuä'ö icua pä'ömä?

²¹ Jesús jahuätörö pä'inödo: —Ya'ute ttö̧ja̧ 'cuättächi'ö mo̧ro̧ ttö̧ja̧ ttieru juäi ya'utenätä jȩcho̧mȩnä̧, ucutu to̧pä̧rä̧tö̧jä̧ ttörö.

²² Moisés circuncisión jȩcu̧'ä̧tu̧cua̧ pä'ö hue'inödo. Juhuorö'inä chutä äcuomenä ja̧'hua̧nö̧ jȩpo̧cö̧ pi̧nö̧do. Ucutu cuä̧do̧tö̧ mi̧nä̧ äcuomenä jȩpi̧nä̧tö̧do ja̧u̧ juäi. Ja̧'hua̧nö̧ ja̧'a̧nä̧ ucutu ya̧tȩ ji̧'qui̧cha̧hua̧rö̧ ttö̧ja̧ 'cuättächi'ö mo̧ro̧'i̧nä̧ circuncisión jȩpä̧tö̧jä̧.

²³ Jitä ucutu Moisés hueinö ta'anö ji̧'qui̧cha̧hua̧rö̧ circuncisión jȩpö̧ ttö̧ja̧ 'cuättächi'ö mo̧ro̧ jȩcu̧'ä̧tu̧cua̧'a̧nä̧, ¿tta̧'a̧nö̧ pä'ö cu̧ra̧huä̧rä̧tu̧cuä̧ttö̧ ttörö, ya̧tȩ na̧'ä̧chö̧rö̧ ttö̧ja̧ 'cuättächi'ö mo̧ro̧ aditö chicuäja'amä?

²⁴ Ttö̧ja̧rö̧ topötä, päcuhuätucuä'. Päcuhuätucuomenä, adiu amöcuädö jȩpä̧tu̧cui̧, —pä'ö huo̧juȩti̧nö̧do Jesús.

Jesús ichinö huȩnȩ ucuocuinödo

²⁵ Ja̧u̧nu̧ o'ca'a korotömä, Jerusalén ötahuiyänä ka̧cuä̧tö̧mä̧, jä'epinätödo: —¿Piderö usocotö päjätö tä̧ji̧, cuä'ö tticuarö pä'ö?

²⁶ Topi. O'ca toi'önä ttä'ca jo̧mȩttö̧ ucuocu ö̧ja̧'a̧. Ja̧u̧ru̧ yoröiso pä'ocotö. ¿Ruhuotö'inä ja̧u̧ Cristocö̧ pä'ö esetätö tä̧ji̧?

²⁷ Ja̧u̧ ichinomemä huo̧juä̧tö̧jä̧. Cristo ichomenä, ichomemä yoröiso ttieruhuäcuotö pi̧jä̧ ttö̧ja̧, —pä'inätödo.

²⁸ Jesús, Diosrö ucuocuäcuähuodenä u̧huo̧juȩto̧mȩnä̧, ja̧'hua̧nö̧ ttucuocua'a ä̧ju̧cu̧, pä̧i̧cu̧nä̧ pä'inödo: —Ttörö huo̧juä̧tö̧jä̧. Ttö chichinome huo̧juä̧tö̧jä̧, pä'ätöjä. Ttörö chamönä pä̧huä̧ rö̧jo̧mȩnä̧tä̧, ichocö pi̧nö̧sä̧. Ya̧tȩ iso päi'önä kö̧mä̧ hueäcu ichinösä. Ja̧u̧ru̧ yoröiso jerupätöjä ucutumä.

²⁹ Ttö ja̧u̧ ö̧jo̧mȩttö̧ chichina'attö, huo̧jua̧sä̧ ja̧u̧ru̧. Ja̧u̧ ttörö hue'inö.

³⁰ Ja̧'hua̧nö̧ päomenä, cärenä ttötarö pä'ö ttȩpa̧ pä'inätödo. Ja̧'hua̧nö̧ ttamöcuädomenä, yoröiso 'chu'ädocotö pi̧nä̧tö̧do, ja̧u̧ru̧ ji̧nä̧ jo̧mȩ päi'oca'attö.

³¹ Ja̧'hua̧ta̧nö̧ recuätö ja̧u̧ru̧ esetö pä'inätödo: —Cristo ichomenä, ¿pidettö'inä abonänö rö̧ȩnä̧ ttö̧ja̧ ttieru juäi jȩä̧cua̧ tä̧ji̧? —pä'inätödo.

Fariseos huotö Jesúsru cärenä ttötarö pä'ö hue'inätödo

³² Fariseos huotö, korotö ttö̧ja̧ Jesúsru pätta'a ä̧ju̧cui̧nä̧tö̧do. Ja̧'hua̧nö̧ ja̧'a̧ttö̧ jahuätöcu, sacerdotes ruhuotöcu su̧ro̧da̧u̧ru̧, Diosrö ucuocuäcuähuode tta̧'ä̧rä̧tö̧rö̧, hue'inätödo Jesúsru 'chuttäda pä'ö.

³³ Ja̧'hua̧ ja̧'a̧ttö̧ Jesús pä'inödo: —Beometä ucutucu chö̧jä̧cua̧sä̧. Ja̧u̧nu̧ o'ca'a ttörö hue'inö ö̧ja̧'a̧ ppa̧dä̧chä̧cua̧sä̧.

³⁴ Ucutumä ttörö cusäcuotöjä. Ja̧'hua̧nö̧ cusätucuomenä, ttörö po̧cui̧po̧co̧tö̧ cuäcuotöjä. Ttö chi̧'chä̧cua̧'a̧, 'cho̧co̧tö̧jä̧.

³⁵ Ja̧'hua̧nö̧ päomenä, judíos ttö̧ja̧ jitötä ttamönä jä'epäcuähuinätödo: —Ujutu tö̧'o̧cui̧'o̧co̧mȩ, ¿to i̧'chä̧cua̧'a̧jä̧ttö̧ pidemä? ¿Korotö judíos ttö̧ja̧, griegos ttö̧ja̧ ttö̧'quȩtȩnä̧ ka̧cuä̧tö̧ ttö̧ja̧cuo̧mȩ i̧'chä̧cua̧'a̧ tä̧ji̧, griegos ttö̧ja̧rö̧ u̧huo̧juȩta̧ pä'ö?

³⁶ “Ttö chi̧'chä̧cua̧'a̧ 'cho̧co̧tö̧jä̧. Ttörö cusätucuomenä, po̧cui̧po̧co̧tö̧ cuäcuotöjä” päomenä, ¿tta̧'a̧nö̧ päa'ajä̧ttö̧? —pä'inätödo.

Kä̧cuä̧huä̧ i'co huȩnȩ

³⁷ Ja̧u̧ fiesta jȩtto̧mȩnä̧, röji mo̧ro̧tä̧ ji̧nä̧ isocu adiu amöcuädö jȩpi̧nä̧tö̧do. Ja̧u̧nu̧ mo̧ro̧ Jesús ä̧rä̧mi̧'ö̧, pä̧i̧cu̧nä̧ ucuocu pä'inödo: —Ya̧tȩ a̧di̧ rö̧jä̧cu̧mä̧, ttörö ichö ahui.

³⁸ Huȩyu̧cuä̧ Huȩnȩ päö ta'anö, ttörö esetömä, ami iso'quittö kä̧cuä̧huä̧ ajiya aje i̧sä̧rä̧ räopö'a̧nö̧ rä̧o̧pä̧cua̧.

³⁹ Jesús ja̧'hua̧nö̧ päomenä, ja̧u̧ru̧ esetätö Espíritu Santorö ttȩmä̧cuo̧tö̧ pä'ö pä'inödo. Ja̧u̧nu̧ pä̧nä̧ Espíritu Santo ji̧nä̧ ichoca'a ji̧na̧'a̧do, Jesús ji̧nä̧ ttoächoca'attö ttucuotarö pä'ö.

Ttö̧ja̧ ji̧nä̧ yo̧mȩtȩ amöcuädocotö pi̧nä̧tö̧do

⁴⁰ Korotö ttö̧ja̧, Jesús ja̧'hua̧nö̧ päomenä ä̧ju̧cu̧, pä'inätödo: —Iso päi'önä, Dios i̧huȩnȩ jiäcuähuä i̧sa̧ i̧chä̧cua̧ pättinäcu, pidetä a̧'cua̧ra̧'a̧.

⁴¹ Korotö pä'inätödo: —Pidemä Cristodo. Korotö'inä pä'inätödo: —¿Cristomä, Galilea rȩjȩra̧'a̧ttö̧ i̧chä̧cua̧ tä̧ji̧?

⁴² Huȩyu̧cuä̧ Huȩnȩ päa'a: “Cristo, ru̧hua̧ David a̧hua̧ru̧hua̧ jä̧cua̧. Ja̧'hua̧ta̧nö̧ David ö̧ji̧no̧mȩ, Belén ötahuiyänä u̧huä̧pä̧chä̧cua̧,” päa'a.

⁴³ Ja̧'hua̧nö̧ pättomenä, yoröiso ji̧nä̧ yo̧mȩtȩnä̧ amöcuädocotö pi̧nä̧tö̧do Jesúsru.

⁴⁴ Korotömä cärenä ttötarö pä'inätödo. Ja̧'hua̧nö̧ ja̧'a̧nä̧ yoröiso 'chu'ädocotö pi̧nä̧tö̧do.

Ruhuotömä Jesúsru esetocotö pi̧nä̧tö̧do

⁴⁵ Su̧ro̧da̧u̧ Diosrö ucuocuäcuähuode tta̧'ä̧rä̧tö̧mä̧, fariseos huotöcu, sacerdotes ruhuotöcu ttö̧ja̧cuo̧mȩ ppa̧'ä̧chä̧chi̧nä̧tö̧do. Ppa̧ttä̧cha̧'a̧ su̧ro̧da̧u̧ru̧ jä'epinätödo: —Ja̧u̧ru̧ ¿dä̧bö̧ cui'cächätucuoca'ajä̧ttö̧?

⁴⁶ Jahuätö su̧ro̧da̧u̧ ädätinätödo: —Ja̧u̧ ucuocu'a̧nö̧, ka̧ra̧mä̧ yoröiso ucuocuocö.

⁴⁷ Ja̧'hua̧ ja̧'a̧ttö̧ fariseos huotö pä'inätödo: —¿Ucutu'inä ja̧u̧ yapareu jiähua'a esetätöjä tä̧ji̧?

⁴⁸ ¿Ujutu turuhuotöttö'inä, fariseos huotöttö'inä ja̧u̧ru̧ esetäjätö tä̧ji̧?

⁴⁹ Pitö ttö̧ja̧rö̧, hueähuä huȩnȩ jerupätörö, suronä 'cuäopäcua'a jahuätörö, —pä'inätödo.

⁵⁰ Nicodemo, Jesúsru yodo topö 'chi̧nö̧mä̧, fariseo i̧sa̧ pi̧nö̧do. Ja̧u̧ pä'inödo jahuätörö:

⁵¹ —Ujutu hueähuä huȩnȩ päö ta'anö, ya̧tȩ jȩö̧ ä'canä tä̧ju̧cuo̧ca̧'a̧mä̧, ja̧'a̧tä̧mä̧ pätö juiya pä'ö päa'a.

⁵² Ja̧'hua̧ ja̧'a̧ttö̧ ja̧u̧ru̧ ädätinätödo: —¿Ucu'inä Galilea ttö̧ja̧ i̧sa̧jä̧ tä̧ji̧? Huȩyu̧cuä̧ Huȩnȩ cucuocuttumä, ya̧tȩ Dios i̧huȩnȩ jiäcuähuä i̧sa̧ Galilea rȩjȩttö̧ yoröiso ichocö pi̧nö̧ to̧cu̧'ä̧cua̧jä̧, —pä'inätödo.

⁵³ Ja̧u̧nu̧ o'ca'a o'ca toi'önä ttojusodera̧'a̧ 'chi̧nä̧tö̧do.