San Juan 6 - TÄ̧DO Ä̧CUÄ̧ I̧HUȨNȨ

Jesús cinco mil jo̧mȩnä̧ u̧mä̧tö̧rö̧ ttucua pä'ö iyinö huȩnȩ

¹ Ja̧u̧nu̧ o'ca'a, Jesús Galilea dubora ji̧jȩcu̧nä̧ 'chi̧nö̧do. Juhuora Galilea dubora koro i̧mi̧mä̧ Tiberias pä'ö micuora.

² Recuätö ttö̧ja̧ koro juäi ttö̧ja̧ ttieru juäi, na̧'ä̧chä̧tö̧rö̧ aditö icua'a tottinö o'ca'a, chutä o'ca'anä cue'ächinätödo.

³ Ja̧'hua̧ ja̧'a̧ Jesús u̧huo̧juȩtä̧u̧cu̧ möä'cara̧'a̧ 'cha'ächö pä̧mä̧di̧nö̧do.

⁴ Judíos ttö̧ja̧ pascua fiesta jȩttö̧ mo̧ro̧ tö'cöhuächi'ina'ado.

⁵ Jesús recuätö ttö̧ja̧ o'ca'anä cue'ächätörö topö, Feliperö pä'inödo: —Pa̧'a̧nö̧ ttirecua'a, ¿tottö tȩmä̧cua̧'a̧jä̧ttö̧ cuäcuähuä ttucua pä'ö?

⁶ Ja̧'hua̧nö̧ pä'inödo, Felipe ädäta'a ä̧ju̧cua̧ pä'ö. Chutä Jesús jȩä̧cuȩmä̧ huo̧jui̧nö̧do.

⁷ Felipe ädätö pä'inödo: —Doscientos bolívares jo̧mȩnä̧ i̧ri̧si̧ tȩmö̧ttö̧mä̧, ppo̧ö̧cu̧nä̧ tiyä'cha'anä, yoröiso ttö̧'a̧ja̧cuä̧chö̧ juiyö'a̧nö̧ ja̧'a̧.

⁸ Ja̧'hua̧ ja̧'a̧ttö̧ Simón Pedro ö̧jä̧hua̧ Andrés, ka̧ra̧ Jesús u̧huo̧juȩtä̧u̧ttu̧ i̧sa̧, pä'inödo:

⁹ —Ya̧tȩ ji̧'qui̧cha̧hua̧ pȩnȩ kö̧. Ja̧u̧ i̧ri̧si̧ ji̧mö̧tȩ jähuä ö̧si̧'i̧nä̧, po̧i̧'i̧nä̧ ta̧ju̧ru̧tä̧ ku̧nä̧rö̧. Ja̧'hua̧nö̧ ja̧'a̧nä̧ recuätö ttucua pä'ö ¿tta̧'a̧nö̧ rö̧ȩnä̧ pa̧ja̧cuä̧cha̧'a̧jä̧ttö̧?

¹⁰ Ja̧'hua̧nö̧ ja̧'a̧ Jesús pä'inödo: —O'ca toi'önä ttö̧'ä̧mä̧da̧ pä'ö ji'ähuitö. Ju̧huȩnȩmä̧ rȩjȩ isä'cua rö̧ȩnä̧ pi̧no̧mȩdo. Ja̧'hua̧nö̧ ja̧'a̧ttö̧ u̧mä̧tö̧mä̧ cinco mil jo̧mȩnä̧ pä̧mä̧di̧nä̧tö̧do.

¹¹ Ja̧'hua̧ ja̧'a̧ Jesús u̧mö̧nä̧ i̧ri̧si̧ 'chu̧'ä̧rö̧, Diosrö ucuocuinödo. Ucuocuäji'ca̧ u̧huo̧juȩtä̧u̧ru̧ iyinödo, juhua'a yabo rȩjȩnä̧ pȩjä̧mä̧tö̧rö̧ ttiya pä'ö. Ja̧'hua̧ta̧nö̧ jȩpi̧nö̧do po̧i̧rö̧'i̧nä̧, suttädi'önä ttucua pä'ö.

¹² Täcö suttädi'önä ttucuäji o'ca'a, Jesús pä'inödo u̧huo̧juȩtä̧u̧ru̧: —Ttucuäji o'ca'a ka̧cui̧pä̧ji̧mä̧ ca̧ca̧tä̧tu̧cui̧ surojuoächa'acu.

¹³ Ja̧'hua̧nö̧ hueä̧u̧ ca̧ca̧ti̧pö̧, uru'tiyu ttö̧jä̧pö̧ttö̧nö̧ to'tare suhuädi'önä ȩni̧nä̧tö̧do i̧ri̧si̧ ji̧mö̧tȩ jähuä ö̧si̧ttö̧ ka̧cui̧pä̧ji̧mä̧.

¹⁴ Ja̧'hua̧ ja̧'a̧ jahuätö ttö̧ja̧ Jesús ja̧'hua̧nö̧ tottocö jȩo̧mȩnä̧ topö pä'inätödo: —Iso päi'önä Dios i̧huȩnȩ jiäcuähuä i̧sa̧ pi̧jä̧ra̧'a̧ i̧chä̧cua̧ pättinäcu, pidetä a̧'cua̧ra̧'a̧.

¹⁵ Ja̧'hua̧nö̧ ja̧'a̧nä̧ Jesús ttu̧ru̧hua̧ päi'önä ö̧ja̧ pä'ö ttȩmi̧pa̧rö̧ pä'ö ttucuocuomenä u̧huo̧jua̧'a̧ttö̧, 'chi̧nö̧do möä'ca ju'täcara̧'a̧ katä ö̧ja̧ pä'ö.

Jesús ajiya huämoyanä cue'ächinödo

¹⁶ Täcö ni̧pä̧cho̧mȩnä̧, Jesús u̧huo̧juȩtä̧u̧ duborara̧'a̧ mȩjä̧hui̧nä̧tö̧do.

¹⁷ Jahuätö huoi'canä pä̧mä̧dö̧, dubora kähuächinätödo Capernaum ötahuiyära̧'a̧ 'chä̧nö̧. Jesús ji̧nä̧ ichoca'a. Täcö yo̧i̧na̧'a̧do.

¹⁸ Jahuätö tti̧'cho̧mȩnä̧, kä̧ru̧'coppa rö̧ȩnä̧ kä̧ru̧'co̧hui̧na̧'a̧do. Dubora'inä rö̧ȩnä̧ ppahuina'ado.

¹⁹ Täcö otonänö cinco kilómetros jo̧mȩnä̧ tti̧'cho̧mȩnä̧, Jesús ajiya huämoyanä cue'ächö tö'cönänö ichi'a'a topinätödo. Jahuätömä juiyo ye'ecuinätödo.

²⁰ Ja̧'hua̧nö̧ yettecua'a topö, Jesús pä'inödo jahuätörö: —Ttötäsä. Yecuhuecuätucuä'.

²¹ Ja̧'hua̧nö̧ ja̧'a̧ttö̧ jahuätöcu huoi'canä ö̧'ä̧mä̧da̧ pä'ö eseunu pä'inätödo ja̧u̧ru̧. Chutä ö̧'ä̧mä̧dä̧ji̧ o'ca'a, dubora ji̧jȩcu̧ jurunänö rȩbȩhui̧nä̧tö̧do.

Jesúsru usinätödo ttö̧ja̧mä̧

²² Ja̧u̧nu̧ o'ca'a mo̧ro̧, ttö̧ja̧mä̧ dubora ji̧jȩcu̧nä̧ ka̧cui̧pi̧nä̧tö̧mä̧ huoi'ca juiya'a topinätödo. Ju̧huȩnȩmä̧ huoi'ca ji'catetä ji̧na̧'a̧do. Ja̧'hua̧nö̧ ja̧'a̧ttö̧ Jesús u̧huo̧juȩtä̧u̧ juhuä'ca huoi'canä tti̧'chi̧na̧'a̧ huo̧jui̧nä̧tö̧do. Ja̧'hua̧ta̧nö̧ Jesús jahuätöcu i̧'cho̧ca̧'a̧ huo̧jui̧nä̧tö̧do.

²³ Ja̧'hua̧nö̧ ja̧'a̧nä̧'i̧nä̧ koro huoi'quiyu Tiberias ötahuiyättö ichö, jahuätö ttö̧ja̧ i̧ri̧si̧ Jesús Diosrö ucuocuäji o'ca'a ttucuinome tö'cönänö huä̧mi̧pä̧chi̧nä̧tö̧do.

²⁴ Ja̧'hua̧nö̧ ja̧'a̧ttö̧ jahuätö ttö̧ja̧ Jesús'inä, u̧huo̧juȩtä̧u̧'i̧nä̧ tottepa'a tottomenä, ja̧u̧ huoi'quiyunä pä̧mä̧dö̧, Capernaum ötahuiyära̧'a̧ 'chi̧nä̧tö̧do Jesúsru usu.

Kä̧cuä̧huä̧ i̧ri̧si̧ huȩnȩ

²⁵ Jahuätö ttö̧ja̧ dubora ji̧jȩcu̧nä̧ tti̧'chi̧'o̧mȩnä̧, Jesúsru po̧cui̧pö̧, jä'epinätödo: —Huo̧juȩcuä̧ I̧sa̧, ¿ti̧yȩnö̧ cuichäjättö pocumä?

²⁶ Jesús pä'inödo jahuätörö: —Iso päi'önä pä'ösä ucuturu, ucutu sucuhuädi'ätucunä cucuätucu o'ca'a usätöjä ttörö. Ji̧yȩ ttö̧ja̧ ttieru juäi jȩchä̧ji̧ amöcuädömä, usocotöjä ttörö.

²⁷ Cuäcuähuä surojuoächä̧cuȩmä̧ a̧mö̧cuä̧rö̧, cuaditätucuä'. Yoröiso surojuoächocömä, kä̧cuä̧huä̧ i'co iyötä, a̧mö̧cuä̧rö̧ aditätucui. Ja̧u̧tä̧ juäi, ttötä, Ubo I̧tti̧mä̧ iyösä ucuturu, Chä'o Dios ttörö ja̧'hua̧nö̧ hueina'attö.

²⁸ Ja̧'hua̧ ja̧'a̧ttö̧ ja̧u̧ru̧ jä'epinätödo: —Diosrö pä̧huä̧ rö̧jö̧ jȩta̧ pä'ö, ¿tta̧'a̧nö̧ jȩtä̧cua̧'a̧jä̧ttö̧?

²⁹ Jesús jahuätörö ädätinödo: —Dios pä̧huä̧ rö̧jä̧cu̧ chutä hueinäcuru cuesetätucua pä'ö.

³⁰ Ja̧'hua̧nö̧ päomenä, jä'epinätödo: —Ujutu topö teseta pä'ö, ¿däje cui̧jȩpä̧cua̧'a̧jä̧ttö̧? ¿Däje jȩcu̧'ä̧cua̧'a̧jä̧ttö̧?

³¹ Ujutu tä̧do̧tö̧ mi̧nä̧ de'anä kä̧nö̧, mo̧ro̧jä̧ra̧'a̧ttö̧ ma̧i̧nä̧si̧ i̧ri̧si̧ cuinätödo Huȩyu̧cuä̧ Huȩnȩ päö'a̧nö̧: “Dios jahuätörö i̧ri̧si̧ mo̧ro̧jä̧ra̧'a̧ttö̧ iyinödo ttucua pä'ö,” —pä'inätödo.

³² Jesús jahuätörö ädätö pä'inödo: —Iso päi'önä pä'ösä ucuturu, Moisésmä ja̧u̧ juäi i̧ri̧si̧ mo̧ro̧jä̧ra̧'a̧ttö̧ iyocö pi̧nö̧do. Chä'otä iso päi'önä i̧ri̧si̧ mo̧ro̧jä̧ra̧'a̧ttö̧ iyö ucuturu.

³³ I̧ri̧si̧mä̧, Dios iyömä, mo̧ro̧jä̧ra̧'a̧ttö̧ mȩyȩhui̧nö̧do. Ja̧u̧mä̧ pi̧jä̧ ttö̧ja̧rö̧ kä̧cuä̧huä̧ iyö.

³⁴ Ja̧'hua̧nö̧ päomenä, Jesúsru pä'inätödo: —Tu̧ru̧hua̧, ja̧u̧ i̧ri̧si̧ 'cuäopönä iyi ujuturu.

³⁵ Jesús pä'inödo jahuätörö: —Ttötä i̧ri̧si̧mä̧ kä̧cuä̧huä̧ i'co iyömä. Ttörö ichömä, yoröiso ppäi rö̧jo̧co̧cu̧ jä̧cua̧. Ja̧'hua̧ta̧nö̧ ttörö esetömä, yoröiso a̧di̧ rö̧jo̧co̧cu̧ jä̧cua̧.

³⁶ Ja̧'hua̧nö̧ ja̧'a̧nä̧ ucuturu pädäji ta'anö, ttörö tocu'ätucua'anä, yoröiso esetocotöjä.

³⁷ O'ca toi'önä Chä'o ttörö i̧yä̧u̧mä̧, ttörötä ichätö. Ja̧'hua̧ta̧nö̧ ttörö ichätörömä, yoröiso ya'opö icuocösä.

³⁸ Ttötä chamönä pä̧huä̧ rö̧jö̧tä̧ jȩcha̧ pä'ö ichocö pi̧nö̧sä̧ mo̧ro̧jä̧ra̧'a̧ttö̧. Ttörö hue'inörö pä̧huä̧ rö̧jö̧tä̧ jȩcha̧ pä'ö ichinösä.

³⁹ Chä'o, ttörö hue'inömä, pä̧huä̧ rö̧jä̧cu̧ o'ca toi'önärö, ttörö iyinä̧u̧ru̧, röji mo̧ro̧ päi'omenä ttodäda pä'ö, ya̧tȩ'i̧nä̧ ire'tehuächö juiyönä.

⁴⁰ Ja̧'hua̧ta̧nö̧ ttörö hue'inömä pä̧huä̧ rö̧jä̧cu̧ o'ca toi'önä Dios I̧tti̧rö̧ topö esetätömä kä̧cuä̧huä̧ i'co ttu̧ju̧nä̧ra̧ pä'ö. Röji mo̧ro̧ päi'omenä, jahuätörö tto̧dä̧dä̧cuä̧u̧, —pä'inödo Jesús.

⁴¹ Jesús, “Ttötäsä i̧ri̧si̧ mo̧ro̧jä̧ra̧'a̧ttö̧ mȩyȩhui̧nö̧mä̧” päomenä, judíos ttö̧ja̧ suronä ttucuocuinäcudo.

⁴² Jahuätö pä'inätödo: —¿Pidemä, José i̧tti̧ Jesúscö̧? Jä'orö'inä, ja̧ju̧ru̧'i̧nä̧ huo̧juä̧tö̧jä̧ ujutumä. “Mo̧ro̧jä̧ra̧'a̧ttö̧ mȩyȩhui̧nö̧sä̧”, ¿tta̧'a̧nö̧ pä'ö päa'ajä̧ttö̧?

⁴³ Ja̧'hua̧ ja̧'a̧ Jesús pä'inödo jahuätörö: —Suronä cucuocuätucuä'.

⁴⁴ Chä'o, ttörö hue'inömä, i'cächö juiyöttömä, yoröiso ichocotö ttörö. Ttörö ichätörö, röji mo̧ro̧ päi'omenä tto̧dä̧dä̧cua̧sä̧.

⁴⁵ Dios i̧huȩnȩ jiäcuähuä isotö tti̧huȩyu̧ti̧nä̧'tä̧nä̧ pa̧'a̧nö̧ päa'a: “Dios o'ca toi'önärö u̧huo̧juȩtä̧cua̧,” päa'a. Ja̧'hua̧nö̧ ja̧'a̧ttö̧ o'ca toi'önä Chä'orö ä̧ju̧cu̧ huo̧jui̧pä̧tö̧mä̧, ttörö esetö ichätö.

⁴⁶ “Chä'orö topinömä, yoröiso toa'a. Ya̧tȩtä̧ Dios ö̧jo̧mȩttö̧ ichinötä, ja̧u̧ru̧ topinö.

⁴⁷ Iso päi'önä pä'ösä ucuturu, ttörö esetömä, kä̧cuä̧huä̧ i'co ku̧nä̧rö̧.

⁴⁸ Ttötä i̧ri̧si̧mä̧, kä̧cuä̧huä̧ i'co iyömä.

⁴⁹ Ucutu cuä̧do̧tö̧ mi̧nä̧ de'anä kä̧nö̧, mo̧ro̧jä̧ra̧'a̧ttö̧ ma̧i̧nä̧si̧ i̧ri̧si̧ cuinätödo. Ja̧'hua̧nö̧ ttucuomenä'inä hua'ö icuinätödo.

⁵⁰ Ja̧'hua̧nö̧ ja̧'a̧nä̧ koro i̧ri̧si̧ mo̧ro̧jä̧ra̧'a̧ttö̧ mȩyȩhui̧nö̧mä̧ pä'ösä ttö. Ja̧u̧ i̧ri̧si̧ttö̧ cumä, yoröiso hua'ocödo.

⁵¹ Ttötäsä ja̧u̧ kä̧cuä̧huä̧ i'co i̧ri̧si̧ mo̧ro̧jä̧ra̧'a̧ttö̧ mȩyȩhui̧nö̧mä̧. Pi̧yȩ i̧ri̧si̧ttö̧ cumä, 'cuäopönä ö̧jä̧cua̧. Ja̧u̧ i̧ri̧si̧ chiyömä, ttötä chidepä chi̧yä̧huä̧cua̧sä̧. Pi̧jä̧ ttö̧ja̧ ttö̧ja̧cua̧ pä'ö chi̧yä̧huä̧cua̧sä̧, —pä'inödo Jesús.

⁵² Ja̧'hua̧ ja̧'a̧ttö̧ judíos ttö̧ja̧ ttamönä ucuocuäcuäu, pä'inätödo: —Pidemä chutä idepämä, ¿tta̧'a̧nö̧ pä'ö iyäcua'ajä̧ttö̧ ujuturu tucua pä'ö?

⁵³ Jesús ädätö pä'inödo: —Iso päi'önä pä'ösä ucuturu, ucutumä Ubo I̧tti̧ idepättö'inä cucuätucu juiyöttömä, ucuojattö'inä cuahuätucu juiyöttömä, yoröiso kä̧cuä̧huä̧ i'co jui'ätöjä.

⁵⁴ Ttötä chidepättö'inä cumä, chucuojattö'inä aumä, ja̧u̧tä̧ kä̧cuä̧huä i'co ku̧nä̧rö̧. Ja̧'hua̧ta̧nö̧ ja̧u̧ru̧ röji mo̧ro̧ päi'omenä tto̧dä̧dä̧cua̧sä̧.

⁵⁵ Ttö chidepämä iso päi'önä cuäcuähuä. Ja̧'hua̧ta̧nö̧ ttötä chucuojamä iso päi'önä ahuähuä.

⁵⁶ Ttötä chidepättö'inä cumä, chucuojattö'inä aumä, ttöcu eseunu kö. Ttö'inä ja̧u̧cu̧ eseunu kö̧sä̧.

⁵⁷ Chä'o, ttörö hue'inömä, kä̧cuä̧huä̧ i'co iyö. Ja̧'hua̧ta̧nö̧ chutä ö̧ja̧'a̧ttö̧, ttö'inä kö̧sä̧. Ja̧'hua̧ta̧nö̧ ya̧tȩ ttö chidepättö cumä, ö̧jä̧cua̧ ttö chö̧ja̧'a̧ttö̧.

⁵⁸ Ttö i̧ri̧si̧ mo̧ro̧jä̧ra̧'a̧ttö̧ mȩyȩhui̧nö̧mä̧ pä'ösä. Ucutu cuä̧do̧tö̧ mi̧nä̧ de'anä kä̧nö̧, i̧ri̧si̧ ttucuinä̧si̧'a̧nö̧mä̧ pä'ocösä. Ja̧u̧ i̧ri̧si̧ttö̧ ttucuomenä, o'ca toi'önä hua'ö icuinätödo. Ttö pädäjittö cumä, 'cuäopönä ö̧jä̧cua̧, —pä'inödo Jesús.

⁵⁹ Jesús pi̧yȩ huȩnȩ Capernaum ötahuiyättö judíos ttö̧ja̧ ttu̧huo̧jui̧'i̧nodenä huo̧juȩti̧nö̧do.

Kä̧cuä̧huä̧ i'co huȩnȩ

⁶⁰ Pi̧yȩ huȩnȩ ä̧ju̧cu̧, recuätö Jesús o'ca'anä cue'ächätö pä'inätödo: —Jitä päjimä tesetö juiyö'a̧nö̧ ja̧'a̧to. ¿Dijä ja̧'hua̧nö̧ jȩä̧cua̧mä̧?

⁶¹ Ja̧'hua̧ ja̧'a̧ jahuätö ja̧'hua̧nö̧ ttucuocuäcuähua'a huo̧jui̧'ö̧, Jesús jä'epinödo: —Jitä pädäjimä, ¿suronä pä'äjisä tä̧ji̧, ucuturu?

⁶² Ubo I̧tti̧ pä'äji ö̧ji̧na̧'a̧ cä'ecuächö tocu'ätucuttumä, ¿tta̧'a̧nö̧ päcuhuätucuäcua'ajä̧ttö̧?

⁶³ Iso päi'önä Espíritu Santotä ta̧'cua̧rö̧ iyömä. Tidepämä yoröiso micuähuoca'a. Pi̧yȩ jidähuäjimä, iso päi'önä huȩnȩ ja̧'a̧. Ja̧'hua̧ta̧nö̧ jidähuäjimä kä̧cuä̧huä̧ i'co iyö.

⁶⁴ Ja̧'hua̧nö̧ ja̧'a̧nä̧ ji̧nä̧ korotömä ucututtu esetocotöjä. Jesús ja̧'hua̧nö̧ ucuocuäji ä'canä, jahuätö esetocotörö huo̧jui̧nö̧do. Ja̧'hua̧ta̧nö̧ ja̧u̧ru̧ suronä jȩpä̧tö̧rö̧ iyä̧cua̧rö̧'i̧nä̧ huo̧jui̧nö̧do.

⁶⁵ Chutä pä'inödo: —Ja̧'hua̧nö̧ ja̧'a̧ttö̧ ucuturu pä'äjisä, Chä'o i'cächö juiyöttömä, ttörö yoröiso ichocotödo.

⁶⁶ Ja̧'hua̧nö̧ päomenä, recuätö o'ca'anä cue'ächäjätömä, ja̧u̧ru̧ jaropi'inätödo. Juhua'a yabonö cue'ächocotö pi̧nä̧tö̧do Jesúscu.

⁶⁷ Ja̧'hua̧ ja̧'a̧ttö̧ Jesús u̧huo̧juȩtä̧u̧ru̧, ttö̧jä̧pö̧ttö̧nö̧ ta̧ju̧nu̧ huotörö, pä'inödo: —¿Ucutu'inä jarocu'ipätucua pä'ätöjä tä̧ji̧?

⁶⁸ Simón Pedro ädätö pä'inödo: —Tu̧ru̧hua̧, ucuru jaroti'öttömä, ¿dirö tesetäcua'ajä̧ttö̧? Ucutä kä̧cuä̧huä̧ i'co huȩnȩ huo̧juȩtö̧jä̧.

⁶⁹ Ujutu täcö esetinätöjä. Ucumä Dios kö̧ I̧tti̧ Cristojä, huo̧juä̧tö̧jä̧ ujutumä.

⁷⁰ Jesús ja̧u̧ru̧ ädätinödo: —Ucuturu ttö̧jä̧pö̧ttö̧nö̧ ta̧ju̧ru̧, ¿ttötä o'ipocö pi̧nö̧sä̧ tä̧ji̧? Ja̧'hua̧nö̧ ja̧'a̧nä̧ ucututtu ya̧tȩ ähuettärö ku̧nä̧rö̧ ami iso'quinä.

⁷¹ Ja̧'hua̧nö̧ päomenä, Simón i̧tti̧rö̧, Judas Iscarioterö, ucuocuinödo. Ja̧u̧mä̧ u̧huo̧juȩtä̧u̧ ttö̧jä̧pö̧ttö̧nö̧ ta̧ju̧nu̧ huotö ja̧'a̧nä̧, Jesúsru suronä jȩpä̧tö̧rö̧ i̧yä̧cua̧ ji̧nö̧do.