San Juan 4 - TÄ̧DO Ä̧CUÄ̧ I̧HUȨNȨ

Jesús Samaria ttö̧ja̧ isajuru ucuocuinö huȩnȩ

¹ Juanttö'inä abonänö recuätö ttö̧ja̧ Jesús o'ca'anä cuettächa'a ä̧ju̧cui̧nä̧tö̧do fariseos huotö. Ja̧'hua̧ta̧nö̧ Juanttö'inä abonänö recuätörö bautizando jȩi̧nö̧'i̧nä̧ ä̧ju̧cui̧nä̧tö̧do.

² Ja̧'hua̧nö̧ ttä̧ju̧cuo̧mȩnä̧, Jesúsmä bautizando jȩpo̧cö̧ pi̧nö̧do. Chutä u̧huo̧juȩtä̧u̧tä̧ bautizando jȩpi̧nä̧tö̧do.

³ Jesús ja̧'hua̧nö̧ ttä̧ju̧cua̧'a̧ huo̧jui̧'ö̧, Judea rȩjȩttö̧ rä'opächinödo, Galilea rȩjȩra̧'a̧ ppa̧huä̧chä̧cua̧ pä'ö.

⁴ Juhua'attö ppa̧huä̧cho̧mȩnä̧, mä̧nä̧ i̧'chä̧mä̧ Samaria rȩjȩra̧'a̧ 'cuäopina'ado.

⁵ Ja̧'hua̧ ja̧'a̧ttö̧ Sicar ötahuiyära̧'a̧, Samaria rȩjȩttö̧ 'chä̧hui̧'i̧nö̧do. Ja̧u̧ ötahuiyä Jacob, i̧tti̧ Josérö iyinä̧jä̧ttö̧ töcönänö ji̧na̧'a̧do.

⁶ Ju̧huȩnȩmä̧ ajiya reju acuinäjudo. Juhuäju Jacob iso'u pä'ö micuino'udo. Jesús mä̧nä̧nä̧ i̧'cho̧mȩttö̧ 'cuä'ächi'ö, ju̧huȩnȩ iso'u jäyä pä̧mä̧di̧nö̧do. Ja̧u̧nu̧mä̧ kä̧hua̧ jueö kö̧rö̧ ji̧na̧'a̧do.

^7-8 Ju̧huȩnȩtä̧ ö̧'a̧'a̧nä̧, chutä u̧huo̧juȩtä̧u̧ ötahuiyära̧'a̧ ttu̧cuȩ ȩmo̧po̧'ö̧ 'chi̧nä̧tö̧do. Ja̧'hua̧nö̧ ja̧'a̧nä̧ yajute Samaria ttö̧ja̧ isaju ajiya huäja pä'ö ichinäjudo. Jesús jahuäjuru pä'inödo: —Ajiya chahua iyittö.

⁹ Ja̧'hua̧nö̧ ja̧'a̧ttö̧ jahuäju Samaria ttö̧ja̧ isaju Jesúsru pä'inäjudo: —Ucumä judíos ttö̧ja̧ i̧sa̧mä̧, ¿tta̧'a̧nö̧ pä'ö jäcuhue'ättö ttörö, Samaria ttö̧ja̧ isajuru, ajiya chiyacu pä'ö? Ja̧u̧nu̧ pä̧nä̧mä̧, judíos ttö̧ja̧mä̧ yoröiso ucuocuocotö pi̧nä̧tö̧do Samaria ttö̧ja̧rö̧.

¹⁰ Ja̧'hua̧ ja̧'a̧ Jesús pä'inödo jahuäjuru: —Iso päi'önä Dios iyö'inä, ucuru ajiya jä'epörö'inä cu̧huo̧ju̧ttu̧mä̧, ttörötä jä'epajajujä. Ja̧'hua̧nö̧ jäcuhue'öttömä ucurutä kä̧cuä̧huä̧ ajiya iyajisä.

¹¹ Ya̧ju̧tä̧ pä'inäjudo: —Ucu ajiya huäcuhua pä'ö jui̧'a̧jä̧. Ja̧'hua̧ta̧nö̧ iso'u täcua'ado. ¿Tottö cuiyäcua'ajä̧ttö̧ ttörö kä̧cuä̧huä̧ ajiya?

¹² Ujutu tä̧do̧ mi̧nä̧ Jacob ujuturu iyinödo pȩnȩmä̧. Ja̧u̧'i̧nä̧, i̧tti̧mö̧'i̧nä̧, ä̧ji̧mö̧'i̧nä̧ pottö ahuinätödo. Ja̧'hua̧ ja̧'a̧ttö̧ ¿ucumä Jacobttö'inä abonänö adihuä i̧sa̧jä̧ tä̧ji̧?

¹³ Jesús jahuäjuru ädätinödo: —O'ca toi'önä poyattö ahuätömä, pä'äji ta'anö a̧di̧ rö̧jä̧cuo̧tö̧.

¹⁴ Ja̧'hua̧nö̧ ja̧'a̧nä̧ ajiya ttötä chiyomettö ahuätömä, yoröiso a̧di̧ rö̧jo̧co̧u̧ ttäcuotö. Ttötä ajiya chiyömä, aje i̧sä̧rä̧ ta'anö juoächäcua'a ami iso'quinä. Ttö chiyömä aumä, kä̧cuä̧huä̧ i'co u̧ju̧nä̧rä̧cua̧.

¹⁵ Ja̧'hua̧ ja̧'a̧ttö̧ jahuäju isaju pä'inäjudo: —Juhuoyattö iyittö, koronö mo̧ro̧ päi'omenä, chahua a̧di̧ rö̧jö̧ juiyönä chö̧jä̧cua̧'a̧nö̧. Ja̧'hua̧ta̧nö̧ ichö pottö ajiya huädö juiyäcua'a̧nö̧, iyittö.

¹⁶ Ja̧'hua̧nö̧ päjomenä, Jesús päinäcuado: —Cuirecuorö ji'ähuäji. Ja̧u̧cu̧ pä'äji ta'anö pocu cuichaja.

¹⁷ Yajutä ädätinäjudo: —Ttö chirecuo to'ajusä. Ja̧'hua̧ ja̧'a̧ttö̧ Jesús pä'inödo: —“Chirecuo to'ajusä” päcuhuomenä, adiu pä'äjäjujä.

¹⁸ Ucumä cui̧rȩcuo̧mö̧rö̧ ji̧mö̧tȩ ruhuärö ki̧nä̧ju̧jä̧. Jitä cu̧jä̧cu̧mä̧ cuirecuomäcö̧. Ja̧'hua̧nö̧ päcuhuomenä, iso päi'önä pä'äjäjujä.

¹⁹ Ja̧'hua̧nö̧ kä̧ju̧cuo̧mȩnä̧, pä'inäjudo: —Ucumä Dios i̧huȩnȩ jiäcuähuä i̧sa̧jä̧ a̧'cua̧ra̧'a̧.

²⁰ Ujutu Samaria ttö̧ja̧ tä̧do̧tö̧ mi̧nä̧ Diosrö tta̧'cua̧ huȩnä̧ri̧nä̧tö̧ pȩnȩtä̧ möä'canä. Ucutumä, judíos ttö̧ja̧, “Jerusalén ötahuiyära̧'a̧ttö̧ ujutu ta̧'cua̧ tu̧huȩnä̧rä̧cua̧'a̧nö̧” pä'ätöjä.

²¹ Jesús jahuäjuru ädätö pä'inödo: —Isaju, ttörö eseti. Yodoji mo̧ro̧ päi'omenä, ucutumä Diosrötä cua̧'cua̧ cu̧huȩnä̧rä̧cuo̧tö̧jä̧ Jerusalén ötahuiyära̧'a̧'i̧nä̧, pi'ca möä'cara̧'a̧'i̧nä̧ cui̧'chä̧tu̧cuo̧ca'a̧.

²² Ucutumä, Samaria ttö̧ja̧mä̧, cua̧'cua̧ cu̧huȩnä̧rä̧tu̧cu̧mä̧ jerupätöjä. Ujutumä ta̧'cua̧ tu̧huȩnä̧rö̧mä̧ iso päi'önä huo̧juä̧tö̧jä̧. Iso päi'önä ttö̧ja̧ suronä jȩttö̧ jȩpö̧ icuähuä, judíos ttö̧ja̧ttö̧ räopa'a.

²³ Ja̧'hua̧nö̧ ja̧'a̧nä̧ yodoji mo̧ro̧ päi'omenä, jitä mo̧ro̧'i̧nä̧ Tä'o Diosrö iso päi'önä tta̧'cua̧ huȩnä̧rä̧tö̧mä̧, Espíritu Santonä iso päi'önä tta̧'cua̧ ttu̧huȩnä̧rä̧cuo̧tö̧. Dios ja̧'hua̧nö̧ jȩtta̧ pä'ö pä̧huä̧ rö̧jä̧cu̧, ja̧u̧ru̧ tta̧'cua̧ huȩnä̧rä̧tö̧mä̧.

²⁴ Diosmä Espíritu hua̧do. Ja̧u̧ru̧ tta̧'cua̧ huȩnä̧rä̧tö̧mä̧ tta̧'cua̧ru̧hua̧nä̧'i̧nä̧, iso päi'önä jȩpö̧'i̧nä̧ tta̧'cua̧ ttu̧huȩnä̧rä̧cua̧'a̧nö̧.

²⁵ Ja̧'hua̧nö̧ päomenä, yajutä isaju pä'inäjudo: —Mesíasmä, Cristo pädäcu, ichäcua'a huo̧jua̧ju̧sä̧. Chutä ichomenä, o'ca juiyönä ji̧ä̧huä̧cua̧ ujuturu.

²⁶ Jesús päinäcuado: —Ja̧u̧mä̧ ttötäsä. Ja̧u̧cu̧ ucuocuäjujä.

²⁷ Ja̧'hua̧nö̧ päomenä, u̧huo̧juȩtä̧u̧ ichi'inätödo. Jesús isajuru ucuocua'a tottomenä, to̧pä̧rö̧ ka̧cui̧nä̧tö̧do. Ja̧'hua̧nö̧ ja̧'a̧nä̧ jahuätöttö ya̧tȩ'i̧nä̧ yoröiso jä'epocö pi̧nö̧do Jesúsru ucuocua'a isajuru.

²⁸ Ja̧'hua̧nö̧ ja̧'a̧nä̧ yajutä isaju köäre 'cä̧nä̧ri̧yu̧ ku̧ni̧pö̧, ötahuiyära̧'a̧ jijähua pä'ö 'chi̧nä̧ju̧do.

²⁹ Ttö̧ja̧rö̧ pä'inäjudo: —Ya̧tȩ ttö o'ca juiyönä jȩchi̧nö̧mä̧ ji'ähuäjirö topächätucui. Cristo pättinäcu, ¿pidetä tä̧ji̧?

³⁰ Ja̧'hua̧nö̧ jijähuomenä, ötahuiyättö rä'opächö, Jesús ö̧jo̧mȩ 'chi̧nä̧tö̧do.

³¹ Yajutä isaju ötahuiyära̧'a̧ ki̧'chä̧ji̧ o'ca'a, Jesús u̧huo̧juȩtä̧u̧ ja̧u̧ru̧ pä'inätödo: —Huo̧juȩcuä̧ I̧sa̧, ji̧'qui̧cha̧nö̧tä̧ cuiti.

³² Ja̧u̧mä̧ jahuätörö pä'inödo: —Ttömä cuieruhuätucu juäi ku̧nä̧rö̧sä̧ chu̧cuȩmä̧.

³³ Ja̧'hua̧nö̧ päomenä, u̧huo̧juȩtä̧u̧ ttamönä jä'epäcuähuinätödo: —¿Korotömä u̧cuȩ i'cächö ttiyäjäcu tä̧ji̧?

³⁴ Jesús jahuätörö pä'inödo: —Ttörö hue'inörö pä̧huä̧ rö̧jö̧tä̧ jȩcho̧mȩnä̧, ja̧u̧tä̧ ttö chu̧cuȩmä̧. Chutä aditähuä'inä cädädomenä, ja̧u̧tä̧ ttö chu̧cuȩmä̧.

³⁵ Ucutumä pä'ätöjä: “Ya̧mö̧ setta pä'ö ji̧nä̧ pa̧ja̧cuä̧nö̧ kä̧hua̧tö̧ päi'äcua'a.” Ja̧'hua̧nö̧ ja̧'a̧nä̧ ttö pä'ösä ucuturu, ttu̧ju̧ni̧no̧mȩ topätucui. Ttu̧ju̧ni̧nö̧mä̧ täcö jo̧mȩ päi'a'a.

³⁶ Ya̧tȩ se'ömä, seäji micuä ȩmö̧. Ja̧u̧ se'ömä, kä̧cuä̧huä̧ i'co ȩmö̧nö̧ se'ö. Ja̧'hua̧nö̧ ja̧'a̧ttö̧ ku̧ni̧nö̧'i̧nä̧, se'inö'inä ji̧nä̧ yo̧mȩtȩnä̧ ttesehuäcuotö.

³⁷ Korotö pättinömä, iso päi'önä pä'inätödo: “Ya̧tȩ u̧ju̧ni̧nö̧ o'ca'a, ka̧ra̧ se'inö.”

³⁸ Ucuturu cu̧ju̧nä̧tu̧cuo̧co̧mȩttö̧ secuhuätucua pä'ö hue'äjisä. Korotömä cuä'catucunä ttaditinömä ȩmä̧tö̧jä̧ ucutumä, —pä'inödo Jesús.

³⁹ Jahuäju isaju: “O'ca juiyönä jȩchi̧nö̧mä̧ ji'ähuäji ttörö” jijähua'a ä̧ju̧cu̧, recuätö ttö̧ja̧ Samaria rȩjȩttö̧ esetinätödo Jesúsru.

⁴⁰ Ja̧'hua̧ ja̧'a̧ttö̧ Samaria ttö̧ja̧ Jesús ö̧jo̧mȩ ttichi'omenä, recuonänö jahuätöcu ö̧ja̧ pä'inätödo. Jesús ju̧huȩnȩmä̧ jahuätucu todäre mo̧ro̧ jo̧mȩnä̧ ki̧nö̧do.

⁴¹ Juhua'atä ö̧jo̧mȩnä̧, recuätö ttö̧ja̧ ja̧u̧ru̧ esetinätödo ja̧u̧ jiähua'a ä̧ju̧cu̧.

⁴² Ja̧u̧nu̧ o'ca'a jahuäju isajuru pä'inätödo: —Jitämä adiu esetätöjä. Ucutä jicuhuähuomenätä ä̧ju̧cu̧ esetocotöjä. Ujutu'inä ja̧u̧ru̧ ä̧ju̧cuä̧jä̧tö̧jä̧. Täcö huo̧juä̧tö̧jä̧, ja̧u̧mä̧ iso päi'önä Cristodo, pi̧jä̧ ttö̧ja̧ suronä jȩttö̧ jȩpö̧ i̧cuä̧cua̧.

Jesús ru̧hua̧ i̧tti̧rö̧ aditö icuinö huȩnȩ

⁴³ Todäre mo̧ro̧ o'come, Jesús Samaria rȩjȩttö̧ rä'opö, Galilea rȩjȩra̧'a̧ 'chi̧nö̧do.

⁴⁴ Chutä Jesús pä'inödo: —Ya̧tȩ Dios i̧huȩnȩ jiäcuähuä i̧sa̧rö̧ chutä adihuä idepiyu ttö̧ja̧ ttucuotococu.

⁴⁵ Galilea rȩjȩra̧'a̧ i̧'chi̧'o̧mȩnä̧, juiyo ttesehuinäcudo. Jahuätö pascua fiesta jȩpö̧ 'chi̧nä̧tö̧do Jerusalén ötahuiyära̧'a̧. Juhua'atä ttö̧ja̧cuo̧mȩnä̧, Jesús o'ca juiyönä jȩi̧nö̧mä̧ topinätödo, fiesta jȩtto̧mȩnä̧.

⁴⁶ Ja̧u̧nu̧ Jesús ppa̧'ä̧chä̧chi̧nö̧do Caná ötahuiyära̧'a̧ Galilea rȩjȩttö̧. Juhuorö ajiyattö aditinödo vino isoya pä'äjimä. Capernaum ötahuiyänä, ya̧tȩ ru̧hua̧ ippeyä ru̧hua̧ ki̧nö̧do. Ja̧u̧ i̧tti̧ na̧'ä̧chi̧nö̧do.

⁴⁷ Jesús Judea rȩjȩttö̧ ichäji o'ca'a, Galilea rȩjȩnä̧ ö̧ja̧'a̧ ä̧ju̧cu̧, ja̧u̧ ippeyä ru̧hua̧ Jesúsru topö 'chi̧nö̧do. Jesús ojusodera̧'a̧ i̧'cha̧ pä'inödo i̧tti̧rö̧ aditö icua pä'ö. I̧tti̧ täcö 'corujuoächometä päi'inäcudo.

⁴⁸ Ja̧'hua̧ ja̧'a̧ttö̧ Jesús päinäcudo: —Ucutumä ttö̧ja̧ ttieru juäi tocu'ätucu juiyöttömä, esetocotöjä.

⁴⁹ Ja̧u̧ ru̧hua̧ ippeyä ru̧hua̧ pä'inödo: —Chu̧ru̧hua̧, jurunä ichi. Chi̧tti̧ 'corujuoächö'a̧nö̧ ja̧'a̧.

⁵⁰ Ja̧'hua̧nö̧ päomenä, Jesús ja̧u̧ru̧ pä'inödo: —Cuojusodera̧'a̧ ppa̧'ä̧chi̧. Cui̧tti̧mä̧ ö̧jä̧cua̧. Ja̧u̧ ru̧hua̧ Jesús päcu esetinödo. Ojusodera̧'a̧ ppa̧'ä̧chä̧chi̧nö̧do.

⁵¹ Ojusodera̧'a̧ tö'cönänö i̧'chi̧'o̧mȩnä̧, yotöte ojusodenä aditätömä ja̧u̧ru̧ ttö̧'o̧cui̧'a̧ pä'ö rä'opächinätödo. Ja̧u̧ru̧ tottomenä pä'inätödo: —Cui̧tti̧mä̧ täcö pi̧'ä̧ji̧.

⁵² Ja̧'hua̧nö̧ pättomenä, jä'epinödo: —Kä̧hua̧ ¿tȩnȩ kö̧rö̧ ö̧'i̧pä̧jä̧ttö̧? Jahuätö ädätinätödo: —Ni̧po̧ mo̧ro̧ kä̧hua̧ huerächi'örö pi̧'ä̧ji̧.

⁵³ Ja̧u̧ ru̧hua̧ Jesús ja̧u̧ru̧ päji amöcuädomenä, kä̧hua̧ ja̧u̧nu̧tä̧ pä'inödo Jesús: “Cui̧tti̧ ö̧jä̧cua̧.” Ja̧'hua̧nö̧ amöcuädö chutä'inä, ahuaruhuä'inä Jesúsru esetinätödo.

⁵⁴ Ja̧u̧mä̧ Judea rȩjȩttö̧ ichö, Galilea rȩjȩra̧'a̧cu̧ todäre jo̧mȩnä̧ ttö̧ja̧ ttieru juäi jȩpi̧nö̧do Jesús.