San Juan 20 - TÄ̧DO Ä̧CUÄ̧ I̧HUȨNȨ

Jesús ttoächinö huȩnȩ

¹ Ja̧u̧nu̧ pä̧nä̧, semana äcuomenä mo̧ro̧, ji̧nä̧ yo̧ä̧sa̧ ja̧'a̧ pä'ötä mo̧ro̧ juomenä, María Magdalena idorära̧'a̧ topö 'chi̧nä̧ju̧do. Ido'qui, idorä ä'ca mö̧ȩcuo'qui, juiya'atä topinäjudo.

² Ja̧'hua̧nö̧ topo'ö Simón Pedrocu, ka̧ra̧ u̧huo̧juȩtä̧u̧ i̧sa̧, Jesús rö̧ȩnä̧ repeäcucumä ttö̧jo̧mȩ jopinäjudo. Jahuätörö pä'inäjudo: —Tu̧ru̧hua̧rö̧ ȩpä̧jä̧tö̧ idorättö. Jerupätöjä ttötäjome.

³ Ja̧'hua̧ ja̧'a̧ttö̧ Pedrocu, ka̧ra̧ u̧huo̧juȩtä̧u̧ i̧sa̧cu̧ rä'opächö jopinätödo idoränä totta pä'ö.

⁴ Ji̧nä̧ yo̧mȩtȩnä̧ jopinätödo. Ja̧'hua̧nö̧ ja̧'a̧nä̧ ka̧ra̧mä̧ Pedrottö'inä abonänö juruhuinödo. Ä'canä 'chä̧hui̧'i̧nö̧do idorära̧'a̧.

⁵ Ihue'quiyunä kä̧mä̧di̧nö̧do adiu toa pä'ö. Pö̧jä̧ta̧ pa̧'a̧tä̧ topinödo. Ja̧'hua̧nö̧ ja̧'a̧nä̧ do'ächocö pi̧nö̧do.

⁶ Simón Pedro o'ca'anä 'chä̧hui̧'ö̧, idorära̧'a̧ do'ächinödo. Ja̧u̧'i̧nä̧ pö̧jä̧ta̧ pa̧'a̧tä̧ topinödo.

⁷ Ja̧'hua̧nö̧ tomenä, Jesús unä juättopinä̧ta̧ koro pö̧jä̧ta̧ttö̧'i̧nä̧ i̧mi̧cu̧nä̧ pa̧'a̧ topinödo. Juhuä̧ta̧ unä juättopinä̧ta̧ aditö rötähua'a topinödo.

⁸ Ja̧u̧nu̧ o'ca'a ka̧ra̧ u̧huo̧juȩtä̧u̧ i̧sa̧ ä'canä 'chä̧hui̧'i̧nö̧'i̧nä̧ do'ächinödo toa pä'ö. O'ca juiyönä 'cuäopäja'a topö, esetinödo.

⁹ Ja̧'hua̧nö̧ ja̧'a̧nä̧ Huȩyu̧cuä̧ Huȩnȩ, Jesús ttoächäcuähuä huȩnȩ, ji̧nä̧ adiunä huo̧juä̧chi̧'o̧co̧tö̧ pi̧nä̧tö̧do.

¹⁰ Ja̧'hua̧nö̧ ja̧'a̧ttö̧ jahuätö u̧huo̧juȩtä̧u̧ ppa̧'ä̧chi̧nä̧tö̧do ttojusodera̧'a̧.

Jesús María Magdalenarö i̧jȩcui̧nö̧ huȩnȩ

¹¹ Jahuätö ppa̧ttä̧cho̧mȩnä̧, María idorä ä'ca ajuäu ki̧nä̧ju̧do. Ka̧juä̧huo̧mȩnä̧, kihue'quiyunä kä̧mä̧di̧nä̧ju̧do idoränä toja pä'ö.

¹² Ja̧'hua̧nö̧ tojomenä, ángeles ta̧ju̧ru̧, ttö̧'ca̧tä̧huä̧ti̧yu̧ teönä 'ca̧tä̧huä̧tö̧rö̧, topinäjudo. Jahuätömä Jesúsru ttötäjome pä̧nö̧ to̧pä̧ri̧nä̧tö̧do. Ka̧ra̧ u jä̧jo̧mȩ pi̧nö̧do. Ka̧ra̧mä̧ ö̧jä̧pö̧ jä̧jo̧mȩ pi̧nö̧do.

¹³ Angeles jahuäjuru jä'epinätödo: —Isaju, ¿dä̧bö̧ cuajuähuättö? Jahuäju ädätinäjudo: —Chu̧ru̧hua̧rö̧ ȩmi̧pä̧jä̧tö̧do. Ttötäjome jerupajusä.

¹⁴ Ja̧'hua̧nö̧ päjäji o'ca'a kärächi'ö tojomenä, Jesús ju̧huȩnȩtä̧ ö̧ja̧'a̧ topinäjudo. Ja̧'hua̧nö̧ ja̧'a̧nä̧ chutä Jesús ja̧'a̧nä̧ jerupinäjudo.

¹⁵ Ja̧'hua̧ ja̧'a̧ttö̧ Jesús jä'epinödo jahuäjuru: —Isaju, ¿dä̧bö̧ cuajuähuättö? ¿Dirö cusättö? Jahuäju, ju̧huȩnȩ pätta tta̧huä̧rä̧cuä̧huä̧ i̧sa̧ ucuocua'acö̧ pä'ö ädätinäjudo: —Cha̧hua̧ru̧hua̧, ja̧u̧ru̧ cuȩmi̧pä̧ji̧ttö̧mä̧, cutäjome ji'ähuittö, kara'acu chȩmi̧pa̧rö̧ pä'ö.

¹⁶ Ja̧hua̧ ja̧'a̧ttö̧ Jesús pä'inödo jahuäjuru: —¡María! Ki̧mi̧mä̧ ja̧'hua̧nö̧ päomenä, María kärächi'ö, hebreos tti̧huȩnȩnä̧ pä'inäjudo: —¡Raboni! Ja̧'hua̧nö̧ päjomenä, ujutu ti̧huȩnȩ Huo̧juȩcuä̧ I̧sa̧ pä'ö pä'inäjudo.

¹⁷ Jesús pä'inödo jahuäjuru: —Cä'ädö icuittö. Chä'o ö̧ja̧'a̧ ji̧nä̧ cä'ecuächocösä. Ja̧'hua̧nö̧ ja̧'a̧nä̧ chö̧jä̧hua̧tö̧rö̧ ji'ähuäji ttö Chä'o'inä, ucutu Cuä'otucu'inä ö̧ja̧'a̧ cä̧dȩcuä̧chä̧cua̧sä̧. Ja̧'hua̧ta̧nö̧ ttö Chä̧do̧ ä̧cua̧ Dios'inä, ucutu Cuä̧do̧ ä̧cua̧ Dios'inä ö̧ja̧'a̧ cä̧dȩcuä̧chä̧cua̧sä̧.

¹⁸ Ja̧'hua̧ ja̧'a̧ttö̧ María Magdalena Jesús u̧huo̧juȩtä̧u̧ru̧ Ttu̧ru̧hua̧rö̧ tojäja'a'inä, Jesús jiähua'a kä̧ju̧cuä̧ji̧ huȩnȩ'i̧nä̧ ji'äu 'chi̧nä̧ju̧do.

Jesús u̧huo̧juȩtä̧u̧ru̧ i̧jȩcui̧nö̧ huȩnȩ

¹⁹ Ja̧u̧nu̧ mo̧ro̧tä̧, semana äcuomenä mo̧ro̧, yodo päi'omenä, Jesús u̧huo̧juȩtä̧u̧ ca̧ca̧cui̧nä̧tö̧do. Ttö̧ca̧ca̧cui̧'ode äpate 'quiyönä mö̧'ȩpi̧nä̧tö̧do, judíos ttö̧ja̧rö̧ ye'ecu. 'Quiyönä mö̧ttȩpä̧ji̧ o'ca'a, Jesús do'ächi'ö, ttö'quȩtȩnä̧ kä̧mä̧dö̧, te'äu pä'inödo: —Eseäcuähuä ku̧nä̧rä̧tu̧cui̧.

²⁰ Ja̧'hua̧nö̧ pä'opo'ö, u̧mö̧'i̧nä̧, i'esubä'inä i̧jȩpi̧nö̧do jahuätörö. Jahuätö Ttu̧ru̧hua̧rö̧ topö esehuinätödo.

²¹ Ja̧u̧nu̧ o'ca'a Jesús pä'äji ta'anö pä'inödo jahuätörö: —Eseäcuähuä ku̧nä̧rä̧tu̧cui̧. Chä'o ttörö hueinö ta'anö, ucuturu'inä hue'ösä.

²² Ja̧'hua̧nö̧ päomenä, jahuätörö ami yuppa ppö'ö pä'inödo: —Espíritu Santorö ku̧nä̧rä̧tu̧cui̧.

²³ Ucutu korotö suronä jȩtti̧nö̧mä̧ jȩpö̧ cuicuätucuomenä, iso päi'önä suronä jȩttö̧ jȩpö̧ i̧cuä̧cua̧ Dios. Ja̧'hua̧ta̧nö̧ ucutu korotö suronä jȩtti̧nö̧mä̧ jȩpö̧ cuicuätucuoca'a, iso päi'önä suronä jȩttö̧ jȩpö̧ icuocö Dios, —pä'inödo Jesús.

Tomás U̧ru̧hua̧ ttoächäji o'ca'a esetinö huȩnȩ

²⁴ Ja̧'hua̧nö̧ ja̧'a̧nä̧ Tomás, ttö̧jä̧pö̧ttö̧nö̧ ta̧ju̧nu̧ u̧huo̧juȩtä̧u̧ttu̧ i̧sa̧ ja̧'a̧nä̧, korotö u̧huo̧juȩtä̧u̧cu̧ ko̧cö̧ pi̧nö̧do, Jesús i̧jȩcuo̧mȩnä̧. Ja̧'hua̧ta̧nö̧ ja̧u̧ Tomás koro i̧mi̧mä̧ Ta̧ju̧hui̧nö̧ pättinäcudo.

²⁵ Jesús i̧jȩcuä̧ji̧ o'ca'a, korotö u̧huo̧juȩtä̧u̧ pä'inätödo Tomásrö: —Ujutumä Tu̧ru̧hua̧rö̧ topäjätöjä. Ja̧'hua̧nö̧ pättomenä, chutä Tomás pä'inödo: —Ttömä u̧mö̧nä̧ i̧sa̧ri̧ pȩtto̧pi̧no̧mȩ tochö juiyöttömä, chudo'che i̧sa̧ri̧ doächinome rädädö juiyöttömä, i'esubänä'inä dacuodänä tattinome chu̧mö̧ rädädö juiyöttömä, yoröiso esetocösä.

²⁶ Ko̧ro̧mö̧ttö̧nö̧ huäbodäcuä mo̧ro̧ o'ca'a, Jesús u̧huo̧juȩtä̧u̧ pä'äji ta'anö ca̧ca̧cui̧pi̧nä̧tö̧do. Ja̧u̧nu̧mä̧ Tomás jahuätöcu pi̧nö̧do. Ja̧'hua̧ ja̧'a̧ttö̧ äpate 'quiyönä mö̧ttȩpä̧ji̧ o'ca'a Jesús do'ächi'ö, ttö̧'quȩtȩnä̧ kä̧mä̧dö̧, te'äu pä'inödo jahuätörö: —Eseäcuähuä ku̧nä̧rä̧tu̧cui̧.

²⁷ Ja̧u̧nu̧ o'ca'a Tomásrö pä'inödo: —Cudo'che pȩnȩ rä'ädi. Chu̧mö̧ topi. Ucutä cu̧mö̧ cä'epö chi'esubänä rä'ädi. Juhua'a yabonö cu'arodä'. Adiunätä eseti.

²⁸ Ja̧'hua̧ ja̧'a̧ttö̧ Tomás ädätinödo: —¡Chu̧ru̧hua̧jä̧! ¡Chä̧do̧ ä̧cua̧ Diosjä!

²⁹ Jesús ja̧u̧ru̧ pä'inödo: —Tomás, ucutä tocuhuomenätä esetäjijä. Korotömä tottoca'anä esetinätömä, iso päi'önä eseunu ttö̧ja̧cuä̧cuo̧tö̧.

Pi̧yȩ tti̧huȩyu̧ti̧nö̧ huȩnȩ

³⁰ Pi̧yȩ cuyäru'tänä huȩyu̧cuä̧ttö̧'i̧nä̧ abonänö koro ttö̧ja̧ ttieru juäi rö̧ȩnä̧ jȩpi̧nö̧do Jesús u̧huo̧juȩtä̧u̧ ttä'ca jo̧mȩttö̧. Ja̧u̧mä̧ o'ca juiyönä pi'tänä huȩyu̧cuo̧ca̧'a̧do.

³¹ Pi̧yȩ huȩyu̧cuä̧ ka̧'a̧ ucutumä iso päi'önä Jesúsmä Cristo ja̧'a̧ pä'ö cuesetätucua pä'ö. Ja̧'hua̧ta̧nö̧ Jesúsmä, Dios I̧tti̧ ja̧'a̧ pä'ö cuesetätucua pä'ö. Ja̧'hua̧ta̧nö̧ ja̧u̧ru̧tä̧ cuesetätucuttumä, kä̧cuä̧huä̧ i'co cu̧ju̧nä̧rä̧tu̧cua̧ pä'ö huȩyu̧cua̧'a̧ pi̧yȩ huȩnȩ.