San Juan 2 - TÄ̧DO Ä̧CUÄ̧ I̧HUȨNȨ

Caná ötahuiyättö ya̧tȩ irecuarö ȩmi̧nö̧ huȩnȩ

¹ Huäbodäcuä mo̧ro̧ päi'omenä, Caná ötahuiyänä Galilea rȩjȩttö̧, ya̧tȩ irecuarö ȩmo̧mȩnä̧, fiesta jȩpi̧nä̧tö̧do. Jesús ja̧ju̧ juhua'atä ki̧nä̧ju̧do.

² Jesúsru'inä, u̧huo̧juȩtä̧u̧ru̧'i̧nä̧ tticha pä'ö o'ipinätödo fiesta jȩtta̧ pä'ö.

³ Ja̧'hua̧nö̧ fiesta jȩtto̧mȩnä̧, ttahuoya vino beipächina'ado. Ja̧'hua̧nö̧ ja̧'a̧ttö̧ Jesús ja̧ju̧ pä'inäjudo Jesúsru: —Ttahuoya vino juiya'a. Beipächäja'a.

⁴ Ja̧'hua̧nö̧ ja̧'a̧nä̧ Jesús ädätinödo: —Isaju, ja̧'hua̧nö̧mä̧, ¿dä̧bö̧ päcuhuättö ttörö? Chaditähuä ji̧nä̧ jo̧mȩ päi'oca'a.

⁵ Ja̧'hua̧nö̧ päomenä, juhuode ru̧hua̧ umöhuäyotörö pä'inäjudo: —Ja̧u̧ o'ca juiyönä päömä jȩpä̧tu̧cui̧.

⁶ Ttippeyänä ko̧ro̧mö̧ttö̧nö̧ ji̧yu̧tȩnö̧ 'cä̧nä̧ri̧yu̧ ido'quittö adicua'a ki̧na̧'a̧do. Judíos ttö̧ja̧ ttamönä ttesetönä ttötöcähuomenä, ja̧u̧ o̧yu̧ttu̧tä̧ ȩmö̧ töcähuinätödo. Ko̧ro̧yu̧'i̧nä̧, ko̧ro̧yu̧'i̧nä̧ ya'ute cien litros jo̧mȩnä̧ a̧cui̧na̧'a̧do̧ ajiya.

⁷ Isode ru̧hua̧ umöhuäyotörö pä'inödo Jesús: —Ja̧u̧ 'cä̧nä̧ri̧yu̧ o'ca juiyönä su̧'pȩnö̧ 'carätucui. Hueö ta'anö su̧'pȩnö̧ 'carinätödo.

⁸ Ja̧u̧nu̧ o'ca'a Jesús pä'inödo jahuätörö: —Jitämä ji̧'qui̧cha̧nö̧tä̧ huä'opo'ö, fiesta ru̧hua̧rö̧ iyätucui. Päji ta'anö jȩpi̧nä̧tö̧do.

⁹ Fiesta ru̧hua̧ ka̧cuä̧mö̧ pa̧ja̧ti̧nö̧do ja̧u̧ vino ajiyattö adicua'a. Ja̧u̧mä̧ ajiyattö ttaditäja'a yoröiso jerupinödo. Umöhuäyotötä ja̧'hua̧nö̧ huo̧jui̧nä̧tö̧do, huättäja'attö. Ja̧'hua̧nö̧ ö̧ja̧cuä̧mä̧ji̧ o'ca'a, fiesta ru̧hua̧ irecuarö ȩmö̧rö̧ huopinödo.

¹⁰ Pä'inödo: —O'ca toi'önämä ttahuoya vino adihuoya ä'canä iyätö. Ttö̧ja̧ täcö rö̧ȩnä̧ ttahuäji o'ca'a, amönä sa̧do̧ya̧tä̧ iyätö. Ja̧'hua̧nö̧ ja̧'a̧nä̧ ucumä röjinä adihuoya iyöjä.

¹¹ Pi̧yȩmä̧, Caná ötahuiyänä Galilea rȩjȩttö̧, Jesús jȩi̧nö̧mä̧, äcuomenätä ttö̧ja̧ ttieru juäi jȩpi̧nö̧do. Ja̧'hua̧nö̧ jȩo̧mȩnä̧, ttö̧ja̧ öadihuä topinätödo. U̧huo̧juȩtä̧u̧mä̧ ja̧u̧ru̧ adiu ttesetinäcudo.

¹² Ja̧'hua̧nö̧ jȩi̧nö̧ o'ca'a, Capernaum ötahuiyära̧'a̧ 'chi̧nö̧do. Ja̧ju̧'i̧nä̧, ö̧jä̧hua̧tö̧'i̧nä̧, u̧huo̧juȩtä̧u̧'i̧nä̧, 'chi̧nä̧tö̧do. Ju̧huȩnȩ recuonänö ka̧cui̧nä̧tö̧do.

Diosrö ucuocuäcuähuodettö do'opö icuinödo suronä jȩpä̧tö̧rö̧

¹³ Judíos ttö̧ja̧ pascua fiesta jȩttö̧ mo̧ro̧ tö'cöhuächi'a'a, Jesús Jerusalén ötahuiyära̧'a̧ 'chi̧nö̧do.

¹⁴ Juhua'atä Diosrö ucuocuäcuähuodenä korotömä pä̧cä̧yö̧rö̧'i̧nä̧, o̧vȩja̧stö̧rö̧'i̧nä̧, u̧nu̧cu̧tu̧ru̧'i̧nä̧ iyä'ijätöcu, pärätä päroäcuähuä isotöcu ttöäre mesa isodänä ttö̧'a̧'a̧ topinödo.

¹⁵ Ja̧'hua̧nö̧ tomenä, i̧sä̧'chu̧ aditäji'ca̧, jahuätörö ttä̧ji̧mö̧ o̧vȩja̧stö̧cu̧, pä̧cä̧yö̧cu̧ dochäu icuinödo Diosrö ucuocuäcuähuodettö. Pärätä pärohuätö ttöäre pärätä rȩjȩ dochäu icuinödo. Ttöäre mesa isodä'inä ä̧ppä̧tö̧ icuinödo.

¹⁶ U̧nu̧cu̧tu̧ru̧ iyätörö pä'inödo: —Podettö rä'epö icuätucui. Chä'o ojusodemä koro jua̧'a̧ iyähuode päi'önä jȩcu̧'ä̧tu̧cuä̧'.

¹⁷ Ja̧'hua̧nö̧ ja̧'a̧ttö̧ u̧huo̧juȩtä̧u̧ Huȩyu̧cuä̧ Huȩnȩ päö'a̧nö̧ amöcuädinätödo. Ja̧u̧ Huȩnȩ päa'a: “Cuojusode rö̧ȩnä̧ re rö̧jö̧nä̧ amöcuädö, cha̧'cua̧ tta̧'ȩcu̧nu̧ barahuäcusä.”

¹⁸ Ja̧u̧nu̧ o'ca'a judíos ttö̧ja̧ ja̧u̧ru̧ jä'epinätödo: —Ucumä ja̧'hua̧nö̧ jȩcu̧'a̧ pä'ö huettina'a, ¿däje cui̧jȩpä̧cua̧'a̧jä̧ttö̧ ujuturu, tu̧huo̧jua̧ pä'ö ucuru?

¹⁹ Jesús ädätinödo: —Pode Diosrö ucuocuäcuähuode cuä'epö cuicuätucuttumä, ttömä huäbodäcuä mo̧ro̧ päi'omenä jareode cha̧di̧tä̧cua̧sä̧.

²⁰ Ja̧'hua̧nö̧ päomenä, judíos ttö̧ja̧ pä'inätödo: —Cuarenta y seis a̧'ȩ jo̧mȩnä̧ aditinätödo pode aditö. ¿Ucumä huäbodäcuä mo̧ro̧tä̧ cua̧di̧tä̧cua̧jä̧ tä̧ji̧?

²¹ Jesús ja̧'hua̧nö̧ ucuocuomenä, chutätä amönä jä̧ttä̧pä̧ya̧tä̧ pä'inödo.

²² Ja̧'hua̧nö̧ ja̧'a̧ttö̧ 'corupäi'omettö ttoächomenä, u̧huo̧juȩtä̧u̧mä̧ päinö huȩnȩ amöcuädö, Huȩyu̧cuä̧ Huȩnȩ'i̧nä̧, chutä u̧huo̧juȩti̧nö̧'i̧nä̧ adiu esetinätödo.

Jesús o'ca toi'önärö huo̧jua̧

²³ Pascua fiesta jȩpö̧, Jesús Jerusalén ötahuiyära̧'a̧ kä̧nö̧, ttö̧ja̧ ttieru juäi jȩo̧mȩnä̧ topö, recuätö ttö̧ja̧ esetinätödo ja̧u̧ru̧.

²⁴ Ja̧'hua̧nö̧ ja̧'a̧nä̧ Jesús jahuätörö esetocö pi̧nö̧do. O'ca toi'önärö huo̧jui̧nö̧do.

²⁵ Korotömä pi̧jä̧ ttö̧ja̧ ttö̧jö̧mä̧ jittähuarö pä'ö, pä'ocö pi̧nö̧do. Ja̧u̧mä̧ pi̧jä̧ ttö̧ja̧ ttami iso'quinä ttamöcuädömä huo̧jui̧nö̧do.