San Juan 18 - TÄ̧DO Ä̧CUÄ̧ I̧HUȨNȨ

Jesúsru ȩmi̧pi̧nä̧tö̧do

¹ Jesús ja̧'hua̧nö̧ ucuocuäji o'ca'a, u̧huo̧juȩtä̧u̧cu̧ rä'opö, Cedrón aje ji̧jȩcu̧nä̧ 'chi̧nö̧do. Ju̧huȩnȩmä̧ pätta pi̧no̧mȩ. Jesús, u̧huo̧juȩtä̧u̧cu̧ juhuätta pättanä 'chi̧nö̧do.

² Judas, Jesúsru suronä jȩpä̧tö̧rö̧ i̧yä̧cua̧mä̧, ju̧huȩnȩ huo̧jui̧nö̧do, Jesúscu, u̧huo̧juȩtä̧u̧cu̧ ju̧huȩnȩ ttö̧ca̧ca̧cuä̧ri̧na̧'a̧ttö̧ ttucuocua pä'ö.

³ Ja̧'hua̧nö̧ ja̧'a̧ttö̧ Judas recuätö su̧ro̧da̧u̧cu̧, Diosrö ucuocuäcuähuode tta̧'ä̧rä̧tö̧cu̧, sacerdotes ruhuotö'inä, fariseos huotö'inä hue'ähuotöcu ichi'inätödo. Jahuätömä dauhuiyä'inä, curodiyä'inä, lámpara'inä ȩpi̧nä̧tö̧do.

⁴ Ja̧'hua̧nö̧ ja̧'a̧nä̧ Jesús o'ca juiyönä 'cuäopä̧cuȩ .u̧huo̧jua̧'a̧ttö̧, rä'oi'ö jä'epinödo: —¿Dirö cusätucuättö?

⁵ Ja̧'hua̧nö̧ jäepomenä, ädätinätödo: —Jesús Nazaret i̧sa̧rö̧ usätöjä. Jesús ädätinödo: —Ttötäsä. Jahuätöcu, Judas, Jesúsru suronä jȩpä̧tö̧rö̧ i̧yä̧cua̧mä̧, cue'ächinödo.

⁶ Jesús, “Ttötäsä” päomenä, tto'ca'acu ma̧'ä̧mi̧nä̧tö̧do rȩjȩ.

⁷ Ja̧'hua̧ ja̧'a̧ttö̧ Jesús pä'äji ta'anö jä'epinödo jahuätörö: —¿Dirö cusätucuättö? Jahuätö pä'inätödo: —Jesús Nazaret i̧sa̧rö̧ usätöjä.

⁸ Ja̧'hua̧nö̧ pättomenä, Jesús pä'inödo: —Täcö ji'ähuäjisä. Ttötäsä. Ttörö cusätucuttumä, pitömä huäinä tti̧'chä̧.

⁹ Jesús ja̧'hua̧nö̧ pä'inödo, chutä päinö ta'anö 'cuäopa pä'ö. Chutä pä'inödo: “Chä'o ttörö iyinä̧u̧ttu̧mä̧, ya̧tȩ'i̧nä̧ toei'ocö pi̧nö̧.”

¹⁰ Ja̧u̧nu̧ o'ca'a Simón Pedro, ucurodä ȩmo̧po̧'ö̧, ya̧tȩ sacerdote ru̧hua̧ u̧mö̧huä̧ya̧ Malco pä'ö mi̧cua̧rö̧ ä̧ja̧ u̧huo̧jua̧'a̧nä̧ i̧so̧ja̧ 'cui'opö icuinäcudo.

¹¹ Ja̧'hua̧nö̧ jȩo̧mȩnä̧, Jesús Pedrorö pä'inödo: —Cucurodä hua'adö ku̧ni̧. Chä'orö pä̧huä̧ rö̧jö̧ttö̧mä̧ pi̧yȩ surojö 'cuädopa pä'ö, ¿ja̧u̧ru̧tä̧ amöcuädö 'cuädopö juiyäcua'a tä̧ji̧?

Jesúsru sacerdotes ruhuotö ttä'ca jo̧mȩ ȩpi̧nä̧tö̧do

¹² Su̧ro̧da̧u̧cu̧, ttu̧ru̧hua̧cu̧'i̧nä̧, judíos ttö̧ja̧ hueähuä ruhuä'inä Jesúsru 'chu'ädö, ttönö'quinäcudo.

¹³ Ja̧u̧nu̧ o'ca'a, Anás ojusodera̧'a̧ ttȩpi̧nä̧cu̧do. Anás, Caifás i̧mi̧ya̧ pi̧nö̧do. Ja̧u̧ Caifás ja̧u̧nu̧ pä̧nä̧ sacerdotes ttu̧ru̧hua̧ pi̧nö̧do.

¹⁴ Ja̧u̧tä̧ Caifás pä'äji ji'ähuinödo judíos ttö̧ja̧rö̧: “Ya̧tȩtä̧ o'ca toi'önärö 'corupäi'öttömä, adihua'ado,” pä'inödo.

Pedro Jesúsru ä̧ppö̧tä̧ri̧nö̧do

¹⁵ Simón Pedrocu, ka̧ra̧ Jesús u̧huo̧juȩtä̧u̧ i̧sa̧cu̧ Jesús o'ca'anä 'chi̧nä̧tö̧do. Chutä sacerdote ru̧hua̧ ka̧ra̧ u̧huo̧jui̧'i̧nä̧cu̧do. Ja̧'hua̧ ja̧'a̧ttö̧ Jesúscu isodenä u̧mi̧ i̧so̧ca̧nä̧ do'ächinödo.

¹⁶ Pedromä äpate ä'ca ki̧nö̧do. Ja̧'hua̧nö̧ ja̧'a̧ttö̧ chutä sacerdotes ru̧hua̧ u̧huo̧juä̧cu̧ ichi'ö, äpate ä'ca tta̧'ä̧rä̧ju̧ru̧ ucuocuinödo Pedrorö doäda pä'ö.

¹⁷ Ja̧'hua̧ ja̧'a̧ttö̧ äpate ä'ca tta̧'ä̧rä̧ju̧mä̧ jä'epinäjudo Pedrorö: —¿Ucu'inä ja̧u̧tä̧ u̧huo̧juȩtä̧u̧ i̧sa̧jä̧ tä̧ji̧? Pedrotä ädätinödo: —Tta̧'a̧huä̧jä̧, ttömä u̧huo̧juȩtä̧u̧ i̧sa̧cö̧sä̧.

¹⁸ Ja̧u̧nu̧ pä̧nä̧ diyahuomenä, ruhuotö ttumöhuäyotöcu, ruhuotö hue'ähuotöcu ocu i̧sa̧ri̧ kuhuä'cotö tinätödo. Pedro jahuätöcu tinödo.

Sacerdotes ru̧hua̧ jä'epö ä̧ju̧cui̧nö̧do Jesúsru

¹⁹ Sacerdotes ru̧hua̧ Jesúsru jä'epinödo u̧huo̧juȩtä̧u̧ru̧'i̧nä̧, u̧huo̧juȩti̧nö̧'i̧nä̧.

²⁰ Jesús päinäcudo: —Ttömä o'ca toi'önä ttä'ca jo̧mȩttö̧ yecuäcuähuä juiyönä ucuocuinösä. 'Cuäopönä judíos ttu̧huo̧jui̧'i̧nodehuiyänä'inä, Diosrö ucuocuäcuähuodenä'inä judíos ttö̧ja̧ ttö̧ca̧ca̧cuä̧ro̧mȩ huo̧juȩti̧nö̧sä̧. Ja̧'hua̧nö̧ ja̧'a̧ttö̧ yä̧huä̧i̧nä̧ ucuocuocö pi̧nö̧sä̧.

²¹ Ja̧'hua̧nö̧mä̧, ¿dä̧bö̧ jäcuhue'ätucuättö ttörö? Ttörö ä̧ju̧cui̧nä̧tö̧rö̧ jä'epätucui chu̧huo̧juȩti̧nö̧ jittähua pä'ö. Jahuätö huo̧juä̧tö̧ ttö chu̧huo̧juȩti̧nö̧mä̧.

²² Jesús ja̧'hua̧nö̧ päomenä, ya̧tȩ Diosrö ucuocuäcuähuode tta̧huä̧rä̧cuä̧huä̧ i̧sa̧, Jesús ö'änä cuä'ö pä'inödo: —Sacerdotes ru̧hua̧rö̧, ¿ja̧'hua̧nö̧ ädätöjä tä̧ji̧?

²³ Jesús ja̧u̧ru̧ päinäcudo: —Suronä pädäjittömä, ji'ähuittö. Ja̧'hua̧ta̧nö̧ suronä pädäji juiyöttömä, ¿dä̧bö̧ cuäcuäjättö ttörö?

²⁴ Ja̧u̧nu̧ o'ca'a Jesús nö̧'cä̧hua̧ ö̧ja̧'a̧nä̧, Anás hue'inödo ja̧u̧ru̧ Caifásrö, ji̧nä̧ isocu sacerdotes ttu̧ru̧hua̧rö̧.

Pedro pä'äji ta'anö ä̧ppö̧tä̧ri̧nö̧do Jesúsru

²⁵ Ja̧'hua̧nö̧ 'cuäopomenä, Pedro ocurä jäyä ä̧rä̧mi̧'ö̧nö̧ tinödo. Ja̧u̧ru̧ pä'inätödo: —¿Ucu'inä ja̧u̧tä̧ u̧huo̧juȩtä̧u̧ i̧sa̧jä̧ tä̧ji̧? Pedro ä̧ppö̧tä̧rö̧ pä'inödo: —Ttömä ja̧u̧ u̧huo̧juȩtä̧u̧ i̧sa̧cö̧sä̧.

²⁶ Ja̧u̧nu̧ o'ca'a ka̧ra̧ sacerdotes ru̧hua̧ u̧mö̧huä̧ya̧ pä'inödo Pedrorö: —¿Yomä pättanä ucuru topocö päjisä täji, ja̧u̧tä̧cu̧ cu̧ja̧'a̧? Ja̧'hua̧nö̧ pä'inömä chutä Pedro ru̧hua̧ u̧mö̧huä̧ya̧ ä̧ja̧ 'cui'opö icuäjäcu a̧hua̧ru̧hua̧ pi̧nö̧do.

²⁷ Ja̧'hua̧nö̧ päomenä, Pedro pä'äji ta'anö ä̧ppö̧tä̧ri̧nö̧do. Yotäcu ä̧ppö̧tä̧ro̧mȩnä̧, äcärä huopinödo.

Pilato ä'ca jo̧mȩ ȩpi̧nä̧tö̧do Jesúsru

²⁸ Ja̧u̧nu̧ o'ca'a Caifás ojusodettö rä'opö, ji̧nä̧ isocu ttö̧ja̧ ttu̧ru̧hua̧ ojusodera̧'a̧ ȩpi̧nä̧tö̧do Jesúsru. Juhua'a tti̧'cho̧mȩnä̧, pä'ötä mo̧ro̧ juoina'ado. Jitötä judíos ttö̧ja̧, ru̧hua̧ ojusodenä jacuoju do'ächocotö pi̧nä̧tö̧do. Jahuätö amöcuädinätödo: Jacuoju ti̧'chö̧ttö̧mä̧ tamönä iditäcuähuätöjä. Ja̧'hua̧nö̧ jȩpö̧, pascua fiesta ttu̧cuȩ ttucuomettö cuocotöjä, pä'ö amöcuädinätödo judíos ttö̧ja̧. Ja̧'hua̧nö̧ ja̧'a̧ttö̧ ru̧hua̧ ojusodenä do'ächocotö pi̧nä̧tö̧do.

²⁹ Ja̧'hua̧nö̧ ja̧'a̧ttö̧ Pilato u̧mi̧cu̧ rä'oi'ö, jä'epinödo jahuätörö: —Pidemä, ¿däje jȩi̧nä̧ttö̧?

³⁰ Jahuätö ädätinätödo: —Ja̧u̧ suronä jȩö̧ juiyajittömä, ucuru i'cächocotö pajatöjä.

³¹ Ja̧'hua̧ ja̧'a̧ttö̧ Pilato pä'inödo jahuätörö: —Ucututä ȩpä̧tu̧cui̧rö̧, ucutu hueähuä huȩnȩ päö'a̧nö̧ cu̧tä̧bo̧tä̧tu̧cua̧rö̧ pä'ö. Ja̧'hua̧nö̧ päomenä, judíos ttö̧ja̧ ädätinätödo: —Ujutumä judíos ttö̧ja̧mä̧ ka̧ra̧rö̧ cuä'ö tticua pä'ö yoröiso hue'ocotöjä.

³² Ja̧'hua̧nö̧ pättomenä, Jesús, chutä 'corupäi'ä̧cuȩ huȩnȩ päinö ta'anö 'cuäopa pä'ö pä'inätödo.

³³ Pilato pä'äji ta'anö jacuoju do'ächi'ö, Jesúsru huopö jä'epinödo: —¿Ucumä judíos ttö̧ja̧ ttu̧ru̧hua̧jä̧ tä̧ji̧?

³⁴ Jesús ja̧u̧ru̧ ädätö pä'inödo: —¿Ucutä cuamönä cuamöcuädötä jä'epöjä tä̧ji̧? ¿Korotö ucuru ja̧'hua̧nö̧ jittähuäja'a jä'epöjä tä̧ji̧?

³⁵ Ja̧'hua̧ ja̧'a̧ttö̧ Pilato ädätinödo: —¿Ttömä judíos ttö̧ja̧ i̧sa̧sä̧ tä̧ji̧? Ucutä cuahuaruhuä isotöcu, sacerdotes ruhuotöcu ucuru i'cächö iyäjätö ttörö. Ucumä, ¿däje jȩcu̧'inä̧ttö̧?

³⁶ Ja̧u̧nu̧ o'ca'a Jesús ädätinödo Pilatorö: —Ttö huedömä pi̧jä̧nä̧mä̧cö̧. Ja̧'hua̧nö̧ jö̧ttö̧mä̧ ttö chumöhuäyotö rohuähuajatö, judíos ttö̧ja̧ ttörö ttȩpö̧ juiya pä'ö. Ja̧'hua̧nö̧ ja̧'a̧nä̧ ttö huedömä pȩnȩmä̧cö̧.

³⁷ Ja̧'hua̧nö̧ päomenä, Pilato jä'epinödo: —¿Ucumä ttö̧ja̧ ttu̧ru̧hua̧jä̧ tä̧ji̧? Jesús pä'inödo: —A̧'a̧, ucu päcu ta'anö ru̧hua̧sä̧. Ttömä uhuäpächö ichinösä pi̧jä̧ra̧'a̧ iso päi'önä huȩnȩ jidähua pä'ö. O'ca toi'önä iso päi'önä huȩnȩ päö'a̧nö̧ jȩpä̧tö̧mä̧, ttörö ä̧ju̧cuä̧tö̧.

³⁸ Ja̧'hua̧ ja̧'a̧ttö̧ Pilato pä'inödo: —¿Däjettö iso päi'önä huȩnȩ? Ja̧'hua̧nö̧ jä'epäji'ca̧, Pilato pä'äji ta'anö rä'opinödo judíos ttö̧ja̧rö̧ ucuocua pä'ö. Jahuätörö pä'inödo: —Ttö chamöcuädomenä, ja̧u̧ ubomä yoröiso suronä jȩpo̧cö̧ pi̧nö̧.

Jesúsru cuä'ö tticua pä'ö hue'inätödo

³⁹ Ja̧'hua̧nö̧ ja̧'a̧nä̧ ucutu cuihueyetucumä ya̧tȩ cärenä pö̧rö̧ pascua fiesta jȩcu̧'ä̧tu̧cuo̧mȩnä̧, rä'epö chicua pä'ö pä'ätöjä. ¿Jitämä judíos ttö̧ja̧ ttu̧ru̧hua̧rö̧ rä'epö chicua pä'ätöjä?

⁴⁰ Ja̧'hua̧nö̧ päomenä, o'ca toi'önä ji̧nä̧ yo̧mȩtȩnä̧ huopinätödo: —¡Ja̧u̧ru̧ pä'ocotöjä! ¡Barrabásrötä rä'epö icui! Ja̧u̧ Barrabás nä̧u̧cuä̧rö̧ i̧sa̧ pi̧nö̧do.