San Juan 17 - TÄ̧DO Ä̧CUÄ̧ I̧HUȨNȨ

Jesús u̧huo̧juȩtä̧u̧ru̧ Diosrö ucuocuinödo

¹ Ja̧u̧ huȩnȩ ji'ähuäji'ca̧, Jesús mo̧ro̧jä̧ra̧'a̧ topö ucuocuinödo: —Chä'o, ttörö täcö jo̧mȩ päi'a'a. Cui̧tti̧rö̧ esehui, ucurutä Cui̧tti̧ esehuäcua'a̧nö̧.

² Ucumä Cui̧tti̧rö̧ hue'inöjä pi̧jä̧ ttö̧ja̧ttö̧'i̧nä̧ abonänö ujuruhua pä'ö, kä̧cuä̧huä̧ i'co iyäcua'a̧nö̧ ja̧u̧ru̧ cuiyinä̧u̧ru̧.

³ Ja̧u̧ kä̧cuä̧huä̧ i'co ttu̧ju̧nä̧ro̧mȩnä̧, ucurutä, ya̧tȩrö̧tä̧, iso päi'önä Ttä̧do̧ ä̧cua̧ Diosrötä, huo̧juä̧tö̧. Ja̧'hua̧ta̧nö̧ Jesucristorö, ucutä huecuhuinäcuru'inä huo̧juä̧tö̧.

⁴ “Pi̧jä̧nä̧ kä̧nö̧ ucurutä eseunu ucuocu jȩpä̧'i̧jö̧sä̧. Jȩcha̧ pä'ö huecuhuinömä cä'ädösä jitämä.

⁵ Ja̧'hua̧ ja̧'a̧ttö̧ Chä'o, jitä pi̧jä̧ juiyäi'inä ucucu chö̧ji̧nö̧ ta'anö, hue'ittö pä'äji ta'anö ucucu eseunu chö̧ja̧ pä'ö.

⁶ “Pi̧jä̧ttö̧ ttörö iyö huecuhuinä̧u̧ru̧, ucurutä ttu̧huo̧jua̧ pä'ö huo̧juȩtö̧ ji'ähuinösä. Jahuätömä ucutä cui̧tti̧mö̧ huotö pi̧nä̧tö̧. Ja̧'hua̧ ja̧'a̧ ttörö iyö huecuhuinä̧u̧. Jahuätö cui̧huȩnȩ päö ta'anö jȩpi̧nä̧tö̧.

⁷ Jitämä o'ca juiyönä ttörö cuiyinömä, ucuttu räopa'a huo̧juä̧tö̧.

⁸ Iso päi'önä ucutä cui̧huȩnȩ ttö̧rö̧ huecuhuinö ta'anö, ji'ähuinösä jahuätörö. Ja̧'hua̧nö̧ jidähuomenä, adiu esetinätö. Iso päi'önä ucuttu chichina'a huo̧juä̧tö̧. Ja̧'hua̧ta̧nö̧ ucutä ttörö huecuhuinö esetätö.

⁹ “Jahuätörö jä'epö ucuocusä ucuru. Pi̧jä̧ ttö̧ja̧rö̧ jä'epö ucuocuocösä. Ucutä cui̧tti̧mö̧rö̧tä̧, ttörö cuiyinä̧u̧ru̧tä̧, jä'epö ucuocusä.

¹⁰ O'ca toi'önä chu̧ju̧nä̧rä̧u̧mä̧, ucutä cui̧tti̧mö̧ huotödo. Ja̧'hua̧ta̧nö̧ o'ca toi'önä cu̧ju̧nä̧rä̧u̧mä̧, ttötä chi̧tti̧mö̧ huotödo. Ja̧'hua̧nö̧ ja̧'a̧ttö̧ ttesehua pä'ö eseunu jȩpä̧tö̧.

¹¹ “Jitä ttömä pi̧jä̧nä̧ ko̧cö̧sä̧. Jahuätötä pi̧jä̧nä̧ ttö̧ja̧cuä̧cuo̧tö̧. Ttömä ucucu chö̧ja̧ pä'ö chi̧chä̧cua̧sä̧. Adihuä Chä'o, ucutä cujurunä tta̧'ä̧ri̧tö̧ pitörö, ttörö cuiyinä̧u̧ru̧, ji̧nä̧ yo̧mȩtȩ adiunä ucucu, ttöcu ttö̧ja̧cuä̧cua̧'a̧nö̧.

¹² Ttömä jahuätöcu pi̧jä̧nä̧ chö̧jomȩnä̧, cujurunä tta̧'ä̧ri̧nö̧sä̧, suronä 'cuäopö juiya pä'ö ttörö cuiyinä̧u̧ru̧. Jahuätöttö Huȩyu̧cuä̧ Huȩnȩ päö'a̧nö̧ 'cuäopa pä'ö, ya̧tȩtä̧ ihueye suropinötä to'ei'inö, korotöttö ya̧tȩ'i̧nä̧ toei'oca'a tta̧'ä̧ri̧nö̧sä̧.

¹³ “Jitämä ucu cu̧ja̧'a̧cu̧ chi̧chä̧cua̧sä̧. Ja̧'hua̧nö̧ ja̧'a̧nä̧ pi̧jä̧nä̧ ji̧nä̧ chö̧jä̧i̧, pi̧yȩ huȩnȩ ji'äusä, jahuätö'inä ttö cheseu ta'anö ttesehua pä'ö.

¹⁴ Ucu huecuhuinö huȩnȩ jahuätörö ji'ähuinösä. Ja̧'hua̧nö̧ ja̧'a̧nä̧ pi̧jä̧ ttö̧ja̧ jahuätörö kö'cocotö. Ttö pi̧jä̧ ttö̧ja̧ i̧sa̧cö̧sä̧. Jahuätö'inä ttö ta'anö pi̧jä̧ ttö̧ja̧ huocotö.

¹⁵ Ja̧'hua̧ta̧nö̧ pi̧jä̧ttö̧ rä'epö cuicuatö pä'ö jä'epö ucuocuocösä. Ähuettä jȩa̧'a̧cu̧ tta̧cu̧huä̧ra̧tö̧ pä'ö ucuocusä.

¹⁶ Ttö pi̧jä̧ ttö̧ja̧ i̧sa̧cö̧sä̧. Jahuätö'inä ttö ta'anö pi̧jä̧ ttö̧ja̧ huocotö.

¹⁷ Iso päi'önä huȩnȩ jȩpö̧, ucurutä pä̧huä̧ rö̧jo̧mȩnä̧ aditö icuitö. Ucutä cui̧huȩnȩ iso päi'önä huȩnȩ ja̧'a̧.

¹⁸ Ttörö pi̧jä̧ ttö̧ja̧ ttö̧'quȩtȩnä̧ chö̧ja̧ pä'ö huecuhuinö ta'anö, jahuätörö'inä hue'ösä pi̧jä̧ ttö̧ja̧ ttö̧'quȩtȩnä̧ ttö̧ja̧cua̧ pä'ö.

¹⁹ Ja̧'hua̧ta̧nö̧ jahuätörö amöcuädö, ttötä chamönä ucuru iyäusä huecuhuinö jȩcha̧ pä'ö, jahuätö'inä iso päi'önä huȩnȩ jȩpö̧, ucuru ttamönä iyäu ucu huecuhuinö jȩtta̧ pä'ö.

²⁰ “Ja̧'hua̧nö̧ ja̧'a̧nä̧ jahuätörötä jä'epö ucuocuocösä ucuru. Korotö, jahuätö tti̧huȩnȩ ä̧ju̧cu̧ ttörö ttesetäcuotörö'inä jä'epö ucuocusä.

²¹ Jahuätömä o'ca toi'önä ji̧nä̧ yo̧mȩtȩ amöcuädö ttö̧ja̧cua̧ pä'ö jä'epösä. Chä'o, ujutumä, ucucu, ttöcu ji̧nä̧ yo̧mȩtȩ tö̧ja̧cu̧'a̧nö̧, jahuätö'inä ujutucu ttö̧ja̧cua̧ pä'ösä. Ja̧'hua̧ta̧nö̧ pi̧jä̧ ttö̧ja̧ jahuätörö ja̧'hua̧nö̧ ttö̧ja̧cua̧'a̧ topö, ttörö huecuhuina'a ttu̧huo̧juä̧cua̧'a̧nö̧ pä'ösä.

²² Ucucu, ttöcu ji̧nä̧ ji̧yȩtȩ jö̧ ta'anö, jahuätö'inä ji̧nä̧ ji̧yȩtȩ pätti'a pä'ö ttörö adiu cuiyinömä, iyinösä jahuätörö.

²³ Ucumä ttöcu cu̧ja̧'a̧nä̧, ttömä jahuätöcu kö̧sä̧, adiunä ji̧nä̧ ji̧yȩtȩ pätti'a pä'ö. Ja̧'hua̧nö̧ ja̧'a̧ pi̧jä̧ ttö̧ja̧ jahuätörö topö, iso päi'önä ttörö huecuhuina'a ttu̧huo̧juä̧cua̧'a̧nö̧. Ja̧'hua̧ta̧nö̧ ttörö repecu ta'anö, jahuätörö'inä repecuhua'a ttu̧huo̧juä̧cua̧'a̧nö̧.

²⁴ “Chä'o, ttörö cuiyinä̧u̧. Ttö chö̧jo̧mȩ'í̧nä̧ ttö̧ja̧cua̧ pä'ösä, chöadihuä, ttörö cuiyinömä, totta pä'ö. Pi̧jä̧ juiyäi'inä ttörö repe'inöjä.

²⁵ Adihuä Chä'o, pi̧jä̧ ttö̧ja̧mä̧ ucuru jerupätö. Ja̧'hua̧nö̧ ja̧'a̧nä̧ ttötä ucuru huo̧jua̧sä̧. Ja̧'hua̧ta̧nö̧ pitö täcö huo̧juä̧tö̧ ttörö hue'inöjä pä'ö.

²⁶ Ucuru ttu̧huo̧jua̧ pä'ö ji'ähuinösä. Ji̧nä̧ juhua'a yabonö ji̧dä̧huä̧cua̧sä̧ ttörö repecu ta'anö, jahuätörö'inä repecuhua pä'ö. Ja̧'hua̧ta̧nö̧ jahuätöcu chö̧jä̧cua̧'a̧nö̧ ji̧dä̧huä̧cua̧sä̧, —pä'ö ucuocuinödo Jesús Jä'o Diosrö.