San Juan 16 - TÄ̧DO Ä̧CUÄ̧ I̧HUȨNȨ

¹ Jesús juhua'a yabonö huo̧juȩtö̧ pä'inödo: —Pi̧yȩ huȩnȩ ji'äusä ucuturu, yodoji mo̧ro̧ päi'omenä jarocuhui'ätucu juiya pä'ö.

² Judíos ttu̧huo̧jui̧'i̧nodettö i̧mi̧cu̧nä̧ 'quȩ'ȩpö̧ tticuäcuotö ucuturu. Koronö'inä ucuturu cuä'ö tticuomenä, Diosrö pä̧huä̧ rö̧jö̧ jȩpä̧tö̧jä̧ a̧'cua̧ra̧'a̧ pä'ö ttamöcuädäcuotö.

³ Chä'orö'inä, ttörö'inä ttieruhua'attö, ja̧'hua̧nö̧ jȩttä̧cuo̧tö̧.

⁴ Ja̧'hua̧nö̧ ji'äusä ucuturu, ja̧u̧nu̧ mo̧ro̧ päi'omenä täcö ji'ähuinösä cuamöcuädätucuäcua'a̧nö̧. “Pä'äjimä ucutucu chö̧jo̧mȩnä̧, ji'ähuocö pi̧nö̧sä̧.

Espíritu Santo aditähuä huȩnȩ

⁵ Jitämä ttörö hue'inö ö̧ja̧'a̧ chi̧'chä̧cua̧sä̧. Ucutu chi̧'chä̧cua̧'a̧ jä'epocotöjä.

⁶ Ja̧'hua̧nö̧ jidähuomenä, ucutu rö̧ȩnä̧ cua̧'cua̧ tta̧ pä'i'ätöjä.

⁷ Iso päi'önä pä'ösä ucuturu, ttö chi̧'chä̧cua̧'a̧ adihuäcua'a ucuturu. Ttö chi̧'chö̧ juiyöttömä, ucuturu Ppädäcuähuä I̧sa̧ ichocö jä̧cua̧. Ja̧'hua̧nö̧ ja̧'a̧nä̧ chi̧'chö̧ttö̧mä̧, ja̧u̧ru̧ huȩdä̧cua̧sä̧ ucutucu ö̧ja̧ pä'ö.

⁸ Chutä ichomenä, pi̧jä̧ ttö̧ja̧rö̧ suronä jȩtta̧'a̧ u̧huo̧juȩtä̧cua̧. Ja̧'hua̧ta̧nö̧ adihuä jueä̧mä̧ mä̧nä̧ huȩnȩ'i̧nä̧ u̧huo̧juȩtä̧cua̧ jahuätörö. Ja̧'hua̧ta̧nö̧ Dios jahuätörö: “Ucu adiu jȩpö̧jä̧”, “Ucu suronä jȩpö̧jä̧” pä̧cuȩ huȩnȩ u̧huo̧juȩtä̧cua̧.

⁹ Jahuätömä suronä jȩpä̧tö̧, ttörö ttesetoca'attö.

¹⁰ Chä'o ö̧ja̧'a̧ chi̧'cha̧'a̧ttö̧, adihuä jueä̧mä̧ mä̧nä̧ ttu̧huo̧jui̧'ä̧cuo̧tö̧do. Ucutu'inä juhua'a yabonö topocotö cuäcuotöjä ttörö.

¹¹ Ja̧'hua̧ta̧nö̧ Dios pi̧jä̧nä̧ hue'örömä suronä 'cuäopa pä'ö hueina'attö, Dios adihuä pä̧cuȩ huȩnȩ tottäcuotödo.

¹² “Ucuturu rö̧ȩnä̧ jidähua pädomenä, ucutumä jitämä ä̧ju̧cuo̧co̧tö̧ pajatöjä.

¹³ Iso päi'önä Ppädäcuähuä I̧sa̧ Espíritu Santo ichomenä, ja̧u̧ iso päi'önä huȩnȩ u̧huo̧juȩtä̧cua̧ ucuturu. Chutä amönä amöcuädö ucuocuocö jä̧cua̧. O'ca juiyönä ä̧ju̧cuä̧ji̧tä̧ ji̧ä̧huä̧cua̧ ucuturu. Ja̧'hua̧ta̧nö̧ koronö 'cuäopä̧cuȩ'i̧nä̧ ji̧ä̧huä̧cua̧ ucuturu.

¹⁴ Ttö jidäu ä̧ju̧cu̧, u̧huo̧juȩtä̧cua̧ ucuturu. Ja̧'hua̧nö̧ u̧huo̧juȩto̧mȩnä̧, ttörö u̧cuo̧tä̧cua̧.

¹⁵ O'ca juiyönä Chä'o u̧ju̧nä̧rö̧, ttö'inä chöäre ja̧'a̧. Ja̧'hua̧nö̧ ja̧'a̧ttö̧ ja̧u̧ Espíritu Santo, ttö jidäu ä̧ju̧cu̧ u̧huo̧juȩtä̧cua̧ ucuturu, pä'äjisä.

Cua̧'cua̧ tta̧cu̧huȩcuä̧tu̧cu̧ huȩnȩ

¹⁶ “A̧'u̧cua̧'a̧tä̧ o'ca'a, ucutumä ttörö topocotö cuäcuotöjä. Ja̧'hua̧nö̧ ja̧'a̧nä̧ ja̧u̧nu̧ recuonänö o'ca'a, pä'äji ta'anö ttörö tocu'äcuotöjä Chä'o ö̧ja̧'a̧ chi̧'cha̧'a̧ttö̧, —huo̧juȩti̧nö̧do Jesús.

¹⁷ Ja̧'hua̧ ja̧'a̧ttö̧ korotö u̧huo̧juȩtä̧u̧ttu̧ ttamönä jä'ecuinätödo: —A̧'u̧cua̧'a̧tä̧ o'ca'a, ja̧u̧ru̧ topocotö täcuotöjä. Ja̧u̧nu̧ recuonänö o'ca'a, pä'äji ta'anö totäcuotöjä, Jä'o ö̧ja̧'a̧ i̧'cha̧'a̧ttö̧ päomenä, ¿tta̧'a̧nö̧ päa'ajo?

¹⁸ “A̧'u̧cua̧'a̧tä̧ o'ca'a”, ¿tta̧'a̧nö̧ päa'ajä̧ttö̧? Ja̧u̧ ucuocumä yoröiso jerupätöjä.

¹⁹ Jesús ja̧'hua̧nö̧ ttucuocua'a huo̧jui̧pö̧, pä'inödo: —Ttö pä'äjisä ucuturu, a̧'u̧cua̧'a̧tä̧ o'ca'a ttörö topocotö cuäcuotöjä. Ja̧u̧nu̧ recuonänö o'ca'a, pä'äji ta'anö ttörö tocu'äcuotöjä. ¿Ja̧u̧tä̧ cuamönätucutä jä'epäcuähuätöjä tä̧ji̧?

²⁰ Iso päi'önä pä'ösä ucuturu, ucutumä ajuäunu cua̧'cua̧ tta̧cu̧huȩcuä̧cuo̧tö̧jä̧. Ja̧'hua̧nö̧ ja̧'a̧nä̧ pi̧jä̧ ttö̧ja̧ ja̧u̧nu̧ ttesehuäcuotö. Ja̧'hua̧nö̧ ja̧'a̧nä̧ ucutu cua̧'cua̧ tta̧cu̧huȩcuä̧tu̧cu̧ pärocuätä pärohuächö cuesehuäcuotöjä.

²¹ Yajutä isaju ku̧mo̧du̧ba̧ ni̧yo̧mȩnä̧, ka̧'cua̧ tta̧'ȩcui̧pä̧ju̧. Ji̧'qui̧cha̧hua̧ uhuäpächö o'ca'a, kesehua'attö, ja̧u̧ ni̧yä̧ja̧'a̧ yoröiso amöcuädocoju ji̧'qui̧cha̧hua̧ pi̧jä̧nä̧ uhuäpächäja'a pä'ö.

²² Ja̧'hua̧ta̧nö̧ ja̧'a̧ ucuturu'inä. Jitä cua̧'cua̧ tta̧'ȩcuä̧tö̧jä̧. Ja̧'hua̧nö̧ ja̧'a̧nä̧ ucuturu pä'äji ta'anö to̧chä̧cua̧sä̧. Ja̧u̧nu̧mä̧ ttörö tocu'ätucuomenä, cuami iso'quitucunä suhuädi'önä cuesehuäcuotöjä. Ja̧u̧ eseäcuähuä pi̧jä̧ ttö̧ja̧ yoröiso jȩpö̧ icuocotö.

²³ “Ja̧u̧nu̧ mo̧ro̧ päi'omenä, yoröiso jä'epocotö cuäcuotöjä ttörö. Iso päi'önä pä'ösä ucuturu, o'ca juiyönä chi̧mi̧nä̧ jäcuhue'ätucumä, Chä'o i̧yä̧cua̧ ucuturu.

²⁴ Jitä mo̧ro̧ päi'önä ucutumä yoröiso jä'epocotö pi̧nä̧tö̧jä̧ chi̧mi̧nä̧. Jä'epätucui. Dios i̧yä̧cua̧ ucuturu o'ca juiyönä, cuesehuätucua pä'ö.

Jesucristo pi̧jä̧ttö̧'i̧nä̧ abonänö ju̧ru̧hua̧

²⁵ “Pi̧yȩ koro juäi jä̧'i̧nö̧'a̧nö̧ jö̧ huȩnȩ ji'ähuinösä ucuturu. Ja̧'hua̧nö̧ ja̧'a̧nä̧ koronö mo̧ro̧ päi'omenä, ja̧'hua̧nö̧mä̧ ucuocuocö chä̧cua̧sä̧ ucuturu. Chä'o i̧huȩnȩ huäjunä ji̧dä̧huä̧cua̧sä̧.

²⁶ Ja̧u̧nu̧ mo̧ro̧ päi'omenä, ttö chi̧mi̧nä̧ jäcuhue'äcuotöjä Diosrö. Ja̧'hua̧ta̧nö̧ ttö'inä “Ucuturu adiu chu̧cuo̧cuä̧cua̧sä̧ Chä'orö”, pä'ocösä.

²⁷ Chutä Chä'omä ucuturu repe'ö. Ucutu ttörö repecuhuätucua'attö, repe'ö ucuturu. Ttörö Diosttö ichinö pä'ö cuesetätucua'attö, repe'ö ucuturu.

²⁸ Ttömä Chä'ottö rä'opö, pi̧jä̧ra̧'a̧ ichinösä. Jitämä pi̧jä̧ jaropi'ö, pä'äji ta'anö Chä'o ö̧ja̧'a̧ chi̧'chä̧cua̧sä̧, —pä'inödo Jesús.

²⁹ Ja̧'hua̧ ja̧'a̧ttö̧ u̧huo̧juȩtä̧u̧ pä'inätödo Jesúsru: —Jitämä huäjunä ucuocujä, koro juäi jä̧'i̧nö̧'a̧nö̧ jö̧ huȩnȩ cucuocuoca'a.

³⁰ Jitä huo̧juä̧tö̧jä̧, ucumä o'ca juiyönä huo̧jua̧jä̧. Ja̧'hua̧nö̧ ja̧'a̧ttö̧ ucuru yoröiso jättepö juiyö'a̧nö̧ ja̧'a̧. Ucu Diosttö ichinöjä esetätöjä.

³¹ Jesús jahuätörö ädätinödo: —¿Jitämä esetätöjä tä̧ji̧?

³² Ucutu o'ca toi'önä döcuhuecuächätucuometä päi'äcua'a jitämä. Ttörö katä päi'önä jarocuhuipäcuotöjä. Ja̧'hua̧nö̧ jarocuhuipätucuomenä, katämä pä'i'ocösä, Chä'o ttöcu ö̧ja̧'a̧ttö̧.

³³ Ucuturu ji'äusä pi̧yȩ, ttörö esetö cuesehuätucua pä'ö. Pi̧jä̧nä̧ kä̧nö̧ ubara ttucuhuäcuotöjä. Ja̧'hua̧nö̧ ja̧'a̧nä̧ cujuruhuätucuaja. Ttömä pi̧jä̧ttö̧'i̧nä̧ abonänö ju̧ru̧hua̧sä̧, —pä'inödo Jesús.