San Juan 13 - TÄ̧DO Ä̧CUÄ̧ I̧HUȨNȨ

Jesús u̧huo̧juȩtä̧u̧ ttö̧jä̧pi̧yä̧ ötöquinö huȩnȩ

¹ Pascua fiesta jȩttä̧cua̧'a̧ ä'canä mo̧ro̧ ji̧na̧'a̧do. Jesús pi̧jä̧ jaroi'a pä'ö, Jä'o ö̧ja̧'a̧ i̧'cho̧mȩ päi'a'a huo̧jui̧nö̧do. Chutä i̧tti̧mö̧rö̧, pi̧jä̧nä̧ ka̧cuä̧tö̧rö̧, 'cuäopönä repe'inödo. Iso päi'önä 'corupäi'ome jubö päi'önä repe'inödo jahuätörö.

² Ähuettämä Judas Iscariote, Simón i̧tti̧rö̧, ami iso'quinä hue'inö Jesúsru suronä jȩpä̧tö̧rö̧ iya pä'ö.

³ Chutä Jesús, Dios ö̧jo̧mȩttö̧ ichina'a pä'ö huo̧jui̧nö̧do. Ja̧'hua̧ta̧nö̧ Dios ö̧ja̧'a̧cu̧ ppa̧huä̧chä̧cua̧ huo̧jui̧nö̧do. Ja̧'hua̧ta̧nö̧ Dios o'ca juiyönä ujuru iyinäcu huo̧jui̧nö̧do Jesús.

⁴ Ja̧'hua̧nö̧ ja̧'a̧ttö̧ ttu̧cuȩ ttucua'a, Jesús mesa isodättö ä̧rä̧mi̧'ö̧, ö̧'ca̧tä̧huä̧ta̧ huäme i̧sä̧ta̧ ko̧'ä̧dö̧ icuipö, korota̧ pö̧jä̧ta̧ äcänä juä'ocuinödo.

⁵ Ja̧u̧nu̧ o'ca'a, ajiya sä̧rä̧bä̧ rö̧ä̧bä̧nä̧ da'epö, u̧huo̧juȩtä̧u̧ ttö̧jä̧pi̧yä̧ töquinödo. Töcäji'ca̧ pö̧jä̧ta̧nä̧ äcänä juäocuä̧ta̧nä̧ 'ca̧'i̧nö̧do.

⁶ Simón Pedro ö̧jä̧pö̧ ötöca päomenä, Pedro pä'inödo Jesúsru: —Chu̧ru̧hua̧, ¿ttö chö̧jä̧pö̧ cu̧tö̧cä̧cua̧jä̧ tä̧ji̧?

⁷ Jesús ädätinödo: —Jitä jȩchö̧mä̧ jȩru̧pa̧jä̧. Yodojitä adiu cu̧huo̧juä̧cua̧jä̧.

⁸ Ja̧'hua̧ ja̧'a̧ Pedro pä'inödo: —Ttö chö̧jä̧pö̧mä̧ yoröiso töcocöjä. Jesús päinäcudo: —Cu̧jä̧pö̧ chötöcö juiyöttömä, ttöcu cue'ächocöjä juhua'a yabonömä.

⁹ Ja̧'hua̧ ja̧'a̧ Simón Pedro pä'inödo: —Ja̧'hua̧ ja̧'a̧ttö̧, Chu̧ru̧hua̧, chö̧jä̧pö̧tä̧ cutöcä'. Chu̧mö̧'i̧nä̧, chu'inä o'ca juiyönä töquittö.

¹⁰ Ja̧'hua̧ ja̧'a̧nä̧ Jesús päinäcudo: —Ya̧tȩ mo̧ro̧ji̧nä̧nö̧ töcähuäjirömä, ö̧jä̧pö̧tä̧ ötöcö'a̧nö̧ ja̧'a̧ koro idicuoca'attö. Ucututtu ya̧tȩtä̧ idicumä, korotö ttiditoca'anä.

¹¹ Jahuätöttö ya̧tȩ churutä suronä jȩpä̧tö̧rö̧ iyäcua'a u̧huo̧jua̧'a̧ttö̧: “Ucututtu ya̧tȩtä̧ idicumä, korotö ttiditoca'anä,” pä'inödo.

¹² Ttö̧jä̧pi̧yä̧ töcö cä'ädö, chutä ö̧'ca̧tä̧huä̧ta̧ pä'äji ta'anö 'ca̧tä̧u̧, mesa isodänä pä̧mä̧di̧nö̧do. Jahuätörö pä'inödo: —¿Jȩchä̧ji̧mä̧ jȩru̧pä̧tö̧jä̧ tä̧ji̧ ucutumä?

¹³ Ucutumä, Huo̧juȩcuä̧ I̧sa̧'i̧nä̧, Tu̧ru̧hua̧'i̧nä̧ pä'ätöjä ttörö. Ja̧'hua̧nö̧ päcuhuätucuomenä, ttötäsä. Adiu pä'ätöjä ja̧'hua̧nö̧mä̧.

¹⁴ Ja̧'hua̧nö̧ ja̧'a̧ttö̧ ttömä, Huo̧juȩcuä̧ I̧sa̧'i̧nä̧, Cu̧ru̧hua̧'i̧nä̧ cha'anä, ucutu cu̧jä̧pi̧yä̧ chötöcöttömä, ucutu'inä ka̧ra̧rö̧'i̧nä̧, ka̧ra̧rö̧'i̧nä̧ chötöcäji ta'anö ttö̧jä̧pi̧yä̧ cutöcätucuäcua'a̧nö̧.

¹⁵ Ttö jȩchä̧ji̧ ta'anö jȩcu̧'ä̧tu̧cua̧ pä'ö jȩpä̧ji̧sä̧.

¹⁶ Iso päi'önä pä'ösä ucuturu, ya̧tȩ adicuä i̧sa̧mä̧ u̧ru̧hua̧ttö̧'i̧nä̧ abonänö juruhuocö. Ja̧'hua̧ta̧nö̧ ya̧tȩ huȩ'ä̧hua̧mä̧, chutä hue'inöttö'inä abonänö hue'ocö.

¹⁷ Pi̧yȩ pädö ä̧ju̧cu̧ jȩcu̧'ä̧tu̧cu̧ttu̧mä̧, eseunu cu̧ja̧cuä̧cuo̧tö̧jä̧.

¹⁸ “Ucutu o'ca toi'önärö ji'ähuocösä. Odipinä̧u̧ru̧ huo̧jua̧sä̧ ttömä. Ja̧'hua̧nö̧ ja̧'a̧nä̧ Huȩyu̧cuä̧ Huȩnȩ päö'a̧nö̧ 'cuäopäcua'a pä'ösä. Ja̧u̧ huȩnȩ päa'a: “Ya̧tȩ ttöcu cumä, cha̧bo̧i̧ya̧ pä'i'äji.”

¹⁹ Pi̧yȩ ä'canä ji̧'ä̧huä̧rö̧sä̧ ja̧'hua̧nö̧ 'cuäopa'a tocu'ätucuomenä, iso päi'önä ttörö cu̧huo̧juä̧tu̧cuä̧cua̧'a̧nö̧.

²⁰ Iso päi'önä pä'ösä ucuturu, ya̧tȩ ttö huȩdä̧cua̧rö̧ ppä'ädömä, ttörö'inä ppä'ädö. Ja̧'hua̧ta̧nö̧ ya̧tȩ ttörö adiu ppä'ädömä, ttörö hue'inörö'inä ppä'ädö, —pä'inödo Jesús.

Jesúsru suronä jȩpä̧tö̧rö̧ i̧yä̧cuȩ huȩnȩ

²¹ Ja̧'hua̧nö̧ ucuocuäji o'ca'a, Jesús ami iso'quinä rö̧ȩnä̧ a̧'cua̧ tta̧'ȩcui̧nö̧do. Ja̧u̧ jahuätörö adiunä ucuocu pä'inödo: —Iso päi'önä pä'ösä ucuturu, ya̧tȩ ucututtu ttörö i̧yä̧cua̧ suronä jȩpä̧tö̧rö̧.

²² Ja̧'hua̧nö̧ päomenä, u̧huo̧juȩtä̧u̧ ka̧ra̧rö̧'i̧nä̧, ka̧ra̧rö̧'i̧nä̧ topäcuähuinätödo, Jesús ucuocuäcuru ttieruhua'attö.

²³ Ya̧tȩ Jesús u̧huo̧juȩtä̧u̧ttu̧ i̧sa̧, Jesús rö̧ȩnä̧ repeäcumä, Jesús ippeyänä pä̧nö̧ cuinödo mesa isodänä.

²⁴ Simón Pedro Jesús ippeyänä pö̧rö̧ udo'chenä tȩ'o̧pä̧rö̧ jȩpi̧nö̧do Jesús ucuocuäcuru ttu̧huo̧juä̧chi̧'a̧ pä'ö jä'epö ä̧ju̧cua̧ pä'ö.

²⁵ Ja̧'hua̧ ja̧'a̧ttö̧ Jesúsru tö'cönänö pä̧nö̧ jä'epinödo: —Chu̧ru̧hua̧, ¿dijä̧ttö̧ ucuru i̧yä̧cua̧mä̧?

²⁶ Jesús ja̧u̧ru̧ ädätinödo: —I̧ri̧si̧ ji̧'qui̧cha̧nö̧tä̧ ajiyanä pötädo'ö chiyäcu, ja̧u̧tä̧do. Ja̧'hua̧nö̧ pä'äji'ca̧ i̧ri̧si̧ ji̧'qui̧cha̧nö̧tä̧ ȩmo̧po̧'ö̧, ajiyanä pötädo'ö iyinödo Judas Iscarioterö, Simón i̧tti̧rö̧.

²⁷ Judas juhuä̧si̧ ȩmo̧mȩnä̧, ähuettämä ami iso'quinä do'ächi'inödo. Ja̧'hua̧ ja̧'a̧ Jesús päinäcudo: —Jȩcu̧'ä̧cuȩmä̧, jurunä jȩcu̧'a̧ja̧.

²⁸ Ja̧'hua̧nö̧ päomenä, mesa isodänä cuä̧nö̧ pȩjä̧tö̧mä̧, yoröiso ä̧ju̧cuo̧co̧tö̧ pi̧nä̧tö̧do.

²⁹ Chutä Judas, ttöäre pärätä tta̧huä̧ra̧'a̧ttö̧: “Koro juäi fiesta jȩttä̧cua̧'a̧ juäi ȩma̧ pä'ö pä'äjicö̧”, amöcuädinätödo. Ja̧'hua̧ta̧nö̧: “Koro juäi ȩmö̧ usurä isotörö iya pä'öcö̧”, amöcuädinätödo.

³⁰ Judas i̧ri̧si̧ ȩmä̧ji̧ o'ca'a, rä'opächinödo. Täcö yodo ji̧na̧'a̧do.

Jareönä hueähuä huȩnȩ

³¹ Judas räopächäji o'ca'a, Jesús pä'inödo: —Jitä Ubo I̧tti̧ öadihuä tottäcuotö. Ja̧'hua̧ta̧nö̧ ja̧u̧ru̧ topö Dios öadihuä'inä tottäcuotö.

³² Ubo I̧tti̧mä̧ Dios öadihuä i̧jȩpö̧ttö̧mä̧, Dios Ubo I̧tti̧ öadihuä'inä i̧jȩpä̧cua̧. Jitä a̧'u̧cua̧'a̧tä̧ o'ca'a ja̧'hua̧nö̧ i̧jȩpä̧cua̧.

³³ Chi̧tti̧mö̧, ttömä ucutucu recuomä ko̧cö̧sä̧. Ucutu ttörö cusäcuotöjä. Ja̧'hua̧nö̧ ja̧'a̧nä̧ judíos ttö̧ja̧rö̧ pädinö ta'anö, ucuturu'inä pä'ösä jitä: Ttö chi̧'chä̧cua̧'a̧ 'cho̧co̧tö̧jä̧.

³⁴ Ucuturu jareönä hueähuä huȩnȩ iyösä jitä. Korotö korotönörö repe'ätucui. Ucuturu repedinö ta'anö ucutu'inä korotö korotönörö repecuhuätucuäcua'a̧nö̧.

³⁵ Korotö korotönörö repecuhuätucuttumä, o'ca toi'önä pi̧jä̧ ttö̧ja̧ ttu̧huo̧juä̧cuo̧tö̧ ucutumä ttö chu̧huo̧juȩtä̧u̧jä̧ pä'ö.

Pedro Jesúsru ä̧ppö̧tä̧rä̧cuȩ huȩnȩ

³⁶ Simón Pedro jä'epinödo Jesúsru: —Chu̧ru̧hua̧, ¿to cui̧'chä̧cua̧'a̧jä̧ttö̧? Jesús ja̧u̧ru̧ ädätinödo: —Ttö chi̧'chä̧cua̧'a̧, jitä 'cho̧cö̧jä̧. Yodojitä ttö chi̧'chä̧cua̧'a̧ cui̧'chä̧cua̧jä̧.

³⁷ Ja̧'hua̧ ja̧'a̧ Pedro pä'inödo Jesúsru: —Chu̧ru̧hua̧, ¿dä̧bö̧ chichö juiyäcua'ajä̧ttö̧ jitä'inä? Ucuru esetö jitä'inä 'corupädi'ö'a̧nö̧ ja̧'a̧.

³⁸ Ja̧'hua̧nö̧ päomenä, Jesús ädätinödo: —Iso päi'önä ¿ttörö esetö 'corupäcuhui'ö'a̧nö̧ ja̧'a̧ tä̧ji̧? Iso päi'önä pä'ösä ucuru, äcärä huoäcua'a ä'canä, ucumä huäbodäcuä jo̧mȩnä̧ cuä̧ppö̧tä̧rä̧cua̧jä̧ ttörö, —pä'inödo Jesús.