San Juan 11 - TÄ̧DO Ä̧CUÄ̧ I̧HUȨNȨ

Lázaro 'corupäi'inö huȩnȩ

¹ Ya̧tȩ na̧'ä̧chö̧mä̧, Lázaro pä'ö mi̧cua̧, Betania ötahuiyänä ki̧nö̧do. María, kuböa Martacu ju̧huȩnȩ ötahuiyänä ka̧cui̧nä̧tö̧do.

² Ya̧ju̧tä̧ María, Lázaro na̧'ä̧chi̧nö̧ uböamä, amehuoya Jesús ö̧jä̧pö̧nä̧ da'epäjä'caju, kuhuo'chenä 'ca̧'i̧nä̧ju̧ pi̧nä̧ju̧do.

³ Ja̧'hua̧nö̧ ja̧'a̧ttö̧ jahuätömä, Martacu, Maríacu, Jesúsru jittähua pä'ö hue'inätödo. Pä'inätödo: —Tu̧ru̧hua̧, cua̧hua̧ru̧hua̧ na̧'ä̧chö̧ rö̧.

⁴ Jesús ja̧'hua̧nö̧ ä̧ju̧cuo̧mȩnä̧, pä'inödo: —Ja̧u̧ na̧huä̧cho̧mȩnä̧, 'corupä'i'ocö. Dios adihuä öadihuä'inä, Dios I̧tti̧ adihuä öadihuä'inä i̧jȩcua̧ pä'ö na̧'ä̧chö̧ ja̧u̧mä̧.

^5-6 Jesús Martarö'inä, köjähuajuru'inä, kö̧jä̧hua̧ Lázarorö'inä rö̧ȩnä̧ repea'anä, Lázaro na̧huä̧cha̧'a̧ jittähuäji o'ca'a, ji̧nä̧ todäre mo̧ro̧ päi'önä ki̧nö̧do ö̧jo̧mȩtä̧.

⁷ Ja̧u̧nu̧ o'ca'a u̧huo̧juȩtä̧u̧ru̧ pä'inödo: —Pä'äji ta'anö Judea rȩjȩra̧'a̧ ti̧'chä̧tu̧cua̧.

⁸ Ja̧'hua̧nö̧ päomenä, u̧huo̧juȩtä̧u̧ ädätinätödo: —Huo̧juȩcuä̧ I̧sa̧, ni̧po̧ ja̧'a̧cu̧ juhua'attö judíos ttö̧ja̧ ido'qui icu, ucuru cuä'ö tticua pä'inätödo. ¿Jitämä pä'äji ta'anö juhua'atä cui̧'cha̧ pä'öjä tä̧ji̧?

⁹ Jesús päinä̧u̧do: —¿Ya'ute mo̧ro̧ ttö̧jä̧pö̧ttö̧nö̧ todäre horas ka̧'a̧ tä̧ji̧? Ya̧tȩ mo̧ro̧ cue'ächömä, koro juäinä dö'ö ma̧'o̧cö̧, pi̧jä̧ tȩa̧u̧nä̧ topö cueächa'attö.

¹⁰ Ja̧'hua̧nö̧ ja̧'a̧nä̧ ya̧tȩ yodo cue'ächömä, tȩa̧u̧ juiya'attö koro juäinä dö'ö ma̧'ö̧.

¹¹ Ja̧u̧nu̧ o'ca'a Jesús jahuätörö pä'inödo: —Ta̧hua̧ru̧hua̧ Lázaro ä'ö icuäja'a. Ttötä ja̧u̧ ö'orächi'a pä'ö chi̧'chä̧cua̧sä̧.

¹² Ja̧'hua̧ ja̧'a̧ttö̧ u̧huo̧juȩtä̧u̧ pättinäcudo: —Tu̧ru̧hua̧, ä'ö icuäja'attömä, adiu ö̧'i̧pä̧cua̧'a̧nö̧.

¹³ Jesús ja̧'hua̧nö̧ päomenä, Lázaro 'corupä'i'äji pä'ö pä'inödo. Ja̧'hua̧nö̧ ja̧'a̧nä̧ chutä u̧huo̧juȩtä̧u̧ amönä ä'öcö̧ pä'ö amöcuädinätödo.

¹⁴ Ja̧'hua̧ ja̧'a̧ttö̧ Jesús jueönä pä'inödo jahuätörö: —Lázaro 'corupä'i'äji.

¹⁵ 'Corupäi'omenä, kara'a chö̧ja̧'a̧ttö̧ eseusä. Ja̧'hua̧nö̧ ja̧'a̧ ucutumä adiu cuesetätucuäcua'a̧nö̧, ja̧u̧ru̧ tota ti̧'chä̧tu̧cua̧.

¹⁶ Ja̧u̧nu̧ o'ca'a Tomás, Ta̧ju̧hui̧nö̧ pättinäcumä, pä'inödo korotö ahuaruhuärö: —Ujutu'inä ti̧'chä̧tu̧cua̧ ja̧u̧tä̧cu̧ ji̧nä̧ yo̧mȩtȩnä̧ 'corupäti'ätucua.

Jesús Ttoädäcuähuä I̧sa̧

¹⁷ Lázarorö idoränä pa̧ja̧cuä̧nö̧ mo̧ro̧ ttötäji o'ca'a, 'chä̧hui̧'i̧nö̧do Jesús.

¹⁸ Betania ötahuiyä, Jerusalén ötahuiyättö dos kilómetros y medio jo̧mȩnä̧ tö'cönänö ji̧na̧'a̧do.

¹⁹ Lázaro 'corupäi'omenä, recuätö judíos ttö̧ja̧ Martarö'inä, Maríarö'inä tta̧'cua̧ tta̧nö̧ amöcuädö topö 'chi̧nä̧tö̧do.

²⁰ Marta Jesús icha'a kä̧ju̧cuo̧mȩnä̧, rä'opächinäjudo ja̧u̧ru̧ toja pä'ö. Maríatä isodenä ki̧'i̧nä̧ju̧do.

²¹ Marta pä'inäjudo Jesúsru: —Chu̧ru̧hua̧, pȩnȩ cu̧ju̧ttu̧mä̧, chö̧jä̧hua̧ 'corupä'i'ocö paji.

²² Ja̧'hua̧nö̧ ja̧'a̧nä̧ o'ca juiyönä jäcuhue'ömä, Dios iyäcujä huo̧jua̧ju̧sä̧.

²³ Jesús jahuäjuru pä'inödo: —Cu̧jä̧hua̧mä̧ pä'äji ta'anö ö̧jä̧cua̧.

²⁴ Marta ädätö pä'inäjudo: —Iso päi'önä, röji mo̧ro̧ päi'omenä, 'corupättinomettö ttottächomenä, pä'äji ta'anö ö̧jä̧cua̧ huo̧jua̧ju̧sä̧.

²⁵ Ja̧'hua̧ ja̧'a̧ Jesús pä'inödo jahuäjuru: —Ttötäsä Ttoädäcuähuä I̧sa̧mä̧. Ttötäsä tta̧'cua̧rö̧mä̧ iyähuä i̧sa̧mä̧. Ttörö esetömä, hua'ö icuipö'inä, pä'äji ta'anö ö̧jä̧cua̧.

²⁶ Ya̧tȩ a̧'cua̧rö̧ ku̧nä̧rö̧mä̧ ttörö esetö, yoröiso hua'ö icuocö juhua'a yabomä. ¿Pi̧yȩ esetäjujä tä̧ji̧?

²⁷ Jahuäju pä'inäjudo: —A̧'a̧, Chu̧ru̧hua̧. Ucumä Cristojä, Dios I̧tti̧ pi̧jä̧ra̧'a̧ i̧chä̧cua̧ pättinäcu esetäjusä.

Lázarorö ttötinome topö Jesús ajuähuinö huȩnȩ

²⁸ Ja̧u̧ jijähuäji o'ca'a, Marta köjähuaju Maríarö huopö 'chi̧nä̧ju̧do. Yä̧huä̧i̧nä̧ päjinäcuado: —Huo̧juȩcuä̧ I̧sa̧ ichäji. Ucuru huopö.

²⁹ María ja̧'hua̧nö̧ kä̧ju̧cuo̧mȩnä̧, yotäcu ä̧rä̧mi̧'ö̧, Jesúsru topö 'chi̧nä̧ju̧do.

³⁰ Jesús ötahuiyära̧'a̧ ji̧nä̧ 'chä̧hui̧'o̧cö̧ pi̧nö̧do. Marta ja̧u̧ru̧ kö̧'o̧cui̧'ä̧jo̧mȩtä̧ ki̧nö̧do.

³¹ Jahuätö judíos ttö̧ja̧ tta̧'cua̧ tta̧nö̧ amöcuädö ichäjätömä, Maríacu isodenä ka̧cuä̧tö̧mä̧, yajutä o'ca päi'önä ä̧rä̧mi̧'ö̧ räjopächomenä topö, jahuäju ko'ca'anä 'chi̧nä̧tö̧do. Kö̧jä̧hua̧rö̧ ttötäjome ajuäu 'chä̧jä̧ju̧cö̧ pä'ö amöcuädinätödo.

³² Ja̧'hua̧ ja̧'a̧ María Jesús ö̧ja̧'a̧ 'chä̧hui̧'ö̧, ä'ca jo̧mȩttö̧ kihue'quiyunä kä̧mä̧dö̧ pä'inäjudo: —Chu̧ru̧hua̧, pȩnȩ cu̧ju̧ttu̧mä̧, chö̧jä̧hua̧ 'corupä'i'ocö paji.

^33-34 Maríacu, korotö judíos ttö̧ja̧ jahuäjucu ichäjätö ttajuähua'a topö, Jesús a̧'cua̧ tta̧'ȩcui̧nö̧do. Ami iso'quinä a̧'cua̧ tta̧nö̧ amöcuädö, jahuätörö jä'epinödo: —¿To cutäjätucuäröttö? Ädätinätödo: —Tu̧ru̧hua̧, topächi.

³⁵ Jesús ajuähuinödo.

³⁶ Ja̧'hua̧nö̧ tottomenä, judíos ttö̧ja̧ ju̧huȩnȩ ka̧cuä̧tö̧ pä'inätödo: —Topätucui. Rö̧ȩnä̧ repeinäcu.

³⁷ Ja̧'hua̧nö̧ ja̧'a̧nä̧ korotö pä'inätödo: —Pidemä ä̧to̧cä̧tö̧rö̧ aditö icuinömä, ¿Lázaro 'corujuoächö juiya pä'ö jȩpo̧cö̧ paji tä̧ji̧?

Lázarorö ttoädinö huȩnȩ

³⁸ Jesús pä'äji ta'anö a̧'cua̧ tta̧nö̧ amöcuädö, Lázarorö ttötäjome topö 'chi̧nö̧do. Idorä ji̧na̧'a̧do. Idorä ä'ca ido'qui rö̧o'qui mö̧ȩcui̧na̧'a̧do.

³⁹ Jesús pä'inödo: —Ido'qui mö̧ȩcuo'qui pporädö icuätucui. Marta, 'corupä'i'inö uböa, pä'inäjudo: —Tu̧ru̧hua̧, täcö huahua'a a̧'cua̧ra̧'a̧, ttötäja'a pa̧ja̧cuä̧nö̧ mo̧ro̧ päi'äja'attö.

⁴⁰ Ja̧'hua̧ ja̧'a̧nä̧ Jesús päinäcuado: —Adiu cuesetöttömä, Dios adihuä öadihuä tocu'äcuajujä ¿ucuru pä'ocö päjisä tä̧ji̧?

⁴¹ Ja̧'hua̧nö̧ päomenä, ido'qui pporädinätödo. Jesús mo̧ro̧jä̧ra̧'a̧ topö, ucuocuinödo: —Chä'o, ttörö cuä̧ju̧cuä̧ja̧'a̧ eseusä ucuru.

⁴² Ttörö 'cuäopönä ä̧ju̧cu̧jä̧ huo̧jua̧sä̧. Ja̧'hua̧nö̧ ja̧'a̧nä̧ pitö, pȩnȩ ka̧cuä̧tö̧, ttörö huecuhuina'a tteseta pä'ö ucuocusä jitä.

⁴³ Ja̧'hua̧nö̧ ucuocuäji'ca̧, pä̧i̧cu̧nä̧ huopinödo: —¡Lázaro, juhua'attö rä'opi!

⁴⁴ Ja̧'hua̧nö̧ päomenä, ja̧u̧ 'corupä'i'äjimä rä'opinödo u̧mö̧pi̧yä̧'i̧nä̧, ö̧jä̧pi̧yä̧'i̧nä̧ pö̧jä̧ta̧nä̧ juähua'a. Ö'ä'inä pö̧jä̧ta̧nä̧ juähuina'ado. Jesús ju̧huȩnȩ ka̧cuä̧tö̧rö̧ pä'inödo: —Ejädo icuätucuirö i̧'cha̧.

Jesúsru cuä'ö tticua pä'inätödo

⁴⁵ Ja̧'hua̧nö̧ 'cuäopa'a topö, recuätö judíos ttö̧ja̧ Maríacu ka̧cuä̧tö̧ Jesús jȩa̧'a̧ tottomenä, esetinätödo Jesúsru.

⁴⁶ Ja̧'hua̧nö̧ ja̧'a̧nä̧ korotömä, fariseos huotörö topö 'chä̧nö̧, o'ca juiyönä Jesús jȩa̧'a̧ tottäji ji'ähuinätödo.

⁴⁷ Ja̧'hua̧ ja̧'a̧ttö̧ fariseos huotö'inä, sacerdotes ruhuotö'inä, judíos ttö̧ja̧ ji̧nä̧ isocu ruhuotöcu, ca̧ca̧cui̧pö̧ pä'inätödo: —¿Tta̧'a̧nö̧ jȩtä̧cua̧'a̧jä̧ttö̧? Ja̧u̧ ubomä ttö̧ja̧ ttieru juäi rö̧ȩnä̧ jȩpö̧.

⁴⁸ Ja̧'a̧tä̧ to̧tä̧rö̧ttö̧mä̧, o'ca toi'önä ja̧u̧ru̧ ttesetäcuotö. Ja̧u̧nu̧ o'ca'a romanos ttö̧ja̧ tturuhuotö ichi'ö ujuturu'inä, Diosrö ucuocuäcuähuode'inä be'epö tticu'a̧nö̧ ja̧'a̧.

⁴⁹ Ja̧'hua̧nö̧ ja̧'a̧nä̧ jahuätöttö ya̧tȩ Caifásmä, ja̧u̧nu̧ pä̧nä̧ sacerdotes ttu̧ru̧hua̧mä̧, pä'inödo jahuätörö: —Ucutumä yoröiso jerupätöjä.

⁵⁰ Ucutu amöcuädocotöjä. Ya̧tȩtä̧ o'ca toi'önärö ppäda pä'ö 'corupäi'omenä, o'ca toi'önärö be'epö tticuomettö'inä abonänö adihua'a ujuturu.

⁵¹ Caifás ja̧'hua̧nö̧ päomenä, chutä amöcuädötä pä'ocö pi̧nö̧do. Chutä ja̧u̧nu̧ pä̧nä̧ sacerdotes ttu̧ru̧hua̧ ö̧ja̧'a̧ttö̧, Dios huo̧juȩcuä̧nä̧ pä'inödo: —Jesús 'co̧ru̧pä̧i̧'ä̧cua̧ judíos ttö̧ja̧rö̧ ppäda pä'ö.

⁵² Ja̧'hua̧ta̧nö̧ jahuätötämäcö̧. O'ca toi'önä Dios i̧tti̧mö̧ kara'a ka̧cuä̧tö̧rö̧'i̧nä̧ u̧ca̧ca̧ta̧ pä'ö 'co̧ru̧pä̧i̧'ä̧cua̧, —pä'inödo.

⁵³ Ja̧'hua̧nö̧ ja̧'a̧ttö̧ ja̧u̧nu̧ mo̧ro̧ kä̧mä̧dö̧ judíos ttö̧ja̧ tturuhuotö Jesúsru iso päi'önä cuä'ö tticuarö pä'ö ucuocuinätödo.

⁵⁴ Ja̧'hua̧nö̧ ja̧'a̧ttö̧ ja̧u̧nu̧ o'ca'a o'ca toi'önä ttu̧huo̧juo̧mȩcu̧ Jesús cue'ächocö pi̧nö̧do judíos ttö̧ja̧ ttö̧'quȩtȩnä̧. Judea rȩjȩttö̧ rä'opö, Efraín ötahuiyära̧'a̧, de'a tö'cönänö ji̧no̧mȩ 'chi̧nö̧do. Juhua'atä u̧huo̧juȩtä̧u̧cu̧ ki̧nö̧do.

⁵⁵ Judíos ttö̧ja̧ pascua fiesta jȩttä̧cua̧'a̧ mo̧ro̧ tö'cöhuächina'ado. Recuätö ttö̧ja̧ korome ötahuiyä ppo̧ö̧ttö̧ 'chi̧nä̧tö̧do Jerusalén ötahuiyära̧'a̧, pascua fiesta jȩttä̧cua̧'a̧ ä'canä suronä jȩtti̧nö̧ töcäu tticua pä'ö Diosrö ucuocuäcuähuodenä.

⁵⁶ Jahuätömä Jesúsru usinätödo. Diosrö ucuocuäcuähuodettö ttamönä jä'epäcuähuinätödo: —¿Tta̧'a̧nö̧ cuamöcuädätucuättö? ¿Fiesta jȩa̧ pä'ö i̧chä̧cua̧ tä̧ji̧?

⁵⁷ Fariseos huotöcu, sacerdotes ruhuotöcu hue'inätödo ttö̧ja̧rö̧ Jesús ö̧jo̧mȩ ttu̧huo̧ju̧ttu̧mä̧, jahuätörötä jittähua pä'ö. Jahuätö cärenä ttöta pä'inätödo Jesúsru.