San Juan 10 - TÄ̧DO Ä̧CUÄ̧ I̧HUȨNȨ

O̧vȩja̧stö̧rö̧ tta̧huä̧rä̧cuä̧huä̧ huȩnȩ

¹ Jesús huo̧juȩti̧nö̧do: —Iso päi'önä pä'ösä ucuturu, ya̧tȩ o̧vȩja̧stö̧ dodettatenä doächoca'a, kara'anätä do'ächömä, ja̧u̧ nä̧u̧cuä̧rö̧ i̧sa̧.

² Ja̧'hua̧nö̧ ja̧'a̧nä̧ chutä o̧vȩja̧stö̧ dodettatenä do'ächömä, ja̧u̧ o̧vȩja̧stö̧ tta̧huä̧rä̧cuä̧huä̧ i̧sa̧.

³ Chutä o̧vȩja̧stö̧ tta̧huä̧rä̧cuä̧huä̧ i̧sa̧ ichomenä, äpate tta̧'ä̧rö̧mä̧ äpate ba'epö doächa pä'ö. Ja̧'hua̧ta̧nö̧ o̧vȩja̧stö̧ i̧huȩnȩ huo̧juä̧tö̧. Äji̧mö̧ o̧vȩja̧stö̧ tti̧mi̧ huopö o'ipö, i̧so̧ca̧ u̧mi̧ cuettächa pä'ö rä'epödo.

⁴ U̧mi̧ cuettächomenä, chutä ä̧ji̧mö̧ ttä'canä 'chö̧. Ja̧u̧ o'ca'anä cue'ächätö, i̧huȩnȩ ttu̧huo̧jua̧'a̧ttö̧.

⁵ Ja̧'hua̧nö̧ ja̧'a̧nä̧ ka̧ra̧ ttieruhuäcu o'ca'anä yoröiso cue'ächocotö. Ja̧u̧ ö̧jo̧mȩttö̧ tö'ipächätö, i̧huȩnȩ ttieruhua'attö.

⁶ Jesús pi̧yȩ koro juäi jä̧'i̧nö̧'a̧nö̧ jö̧ huȩnȩ u̧huo̧juȩto̧mȩnä̧, 'cucuächi'oca'a ä̧ju̧cui̧nä̧tö̧do.

Jesús, adihuä tta̧huä̧rä̧cuä̧huä̧ i̧sa̧ päi'önä kö̧do

⁷ Ja̧u̧nu̧ o'ca'a Jesús pä'äji ta'anö jahuätörö huo̧juȩti̧nö̧do: —Iso päi'önä pä'ösä ucuturu, ttötäsä äpate, o̧vȩja̧stö̧ dodettatemä.

⁸ O'ca toi'önä ttö chä'canä ichinätömä, suronä jȩpö̧, nä̧u̧cuä̧rä̧tö̧ isotö pi̧nä̧tö̧. Ja̧'hua̧nö̧ ja̧'a̧nä̧ o̧vȩja̧stö̧ jahuätörö ä̧ju̧cuo̧co̧tö̧ pi̧nä̧tö̧.

⁹ Ttötäsä äpate. Ttörö esetö do'ächömä, adiunä ö̧ji̧pä̧cua̧. Ja̧u̧, ya̧tȩ oveja i̧so̧ca̧ttö̧ rä'opächö, ucuome adihuome po̧cui̧pö̧ ö̧jö̧'a̧nö̧, ö̧jä̧cua̧.

¹⁰ “Nä̧u̧cuä̧rö̧ i̧sa̧, nä̧u̧cuä̧rö̧ cuä'ö icua pä'ö ichö bettipächönä. Ttömä ichinösä o'ca juiyönä eseunu adiunätä ttö̧ja̧cua̧ pä'ö.

¹¹ Ttötäsä adihuä tta̧huä̧rä̧cuä̧huä̧ i̧sa̧mä̧. Chutä adihuä tta̧huä̧rä̧cuä̧huä̧ i̧sa̧, ä̧ji̧mö̧rö̧ tta̧'ä̧rö̧ 'corupäi'ö'a̧nö̧ hua̧.

¹² Ja̧'hua̧nö̧ ja̧'a̧nä̧ ya̧tȩ aditähuä micuätä a̧mö̧cuä̧rö̧ aditömä, yähui icha'a tomenä, o̧vȩja̧stö̧rö̧ jaropi'ö, tö'ipächö. Ja̧u̧ adihuä tta̧huä̧rä̧cuä̧huä̧ i̧sa̧cö̧. Ja̧'hua̧ta̧nö̧ o̧vȩja̧stö̧, chutä ä̧ji̧mö̧ huocotö. Ja̧'hua̧nö̧ töipächomenä, yähui o̧vȩja̧stö̧rö̧ 'chu'ädö ya'opö icu döttecuächönä.

¹³ Ja̧u̧ ubomä aditähuä micuätä a̧mö̧cuä̧ra̧'a̧ttö̧, tö'ipächö. O̧vȩja̧stö̧rö̧ yoröiso tta̧huä̧ra̧ pä'ö amöcuädocö.

^14-15 “Ttötäsä adihuä tta̧huä̧rä̧cuä̧huä̧ i̧sa̧mä̧. Chä'o ttörö u̧huo̧ju̧'a̧nö̧, ja̧u̧ru̧'i̧nä̧ huo̧jua̧sä̧ ttömä. Ja̧'hua̧ta̧nö̧ chä̧ji̧mö̧ o̧vȩja̧stö̧rö̧ chu̧huo̧ju̧'a̧nö̧, ttörö'inä huo̧juä̧tö̧. Ttömä chä̧ji̧mö̧ o̧vȩja̧stö̧rö̧ ppä'ädö 'co̧ru̧pä̧di̧'ä̧cua̧sä̧.

¹⁶ Ja̧'hua̧ta̧nö̧ korotö chä̧ji̧mö̧ o̧vȩja̧stö̧ i̧so̧ca̧nä̧ ka̧cuo̧co̧tö̧do. Jahuätörö ȩmö̧ chi̧'chä̧cua̧sä̧. Ttö pädömä jȩttä̧cuo̧tö̧. Ja̧'hua̧nö̧ ja̧'a̧nä̧ o'ca toi'önä o̧vȩja̧stö̧ ji̧nä̧ yo̧mȩtȩ ttö̧ja̧cuä̧cuo̧tö̧. Ja̧'hua̧ta̧nö̧ ya̧tȩtä̧ adihuä tta̧huä̧rä̧cuä̧huä̧ i̧sa̧ ö̧jä̧cua̧.

¹⁷ “Ttö cha̧'cua̧rö̧ iyö, pä'äji ta'anö chö̧ja̧ pä'ö 'corupädi'a'attö, ttörö pä̧huä̧ rö̧jä̧cu̧ Chä'omä.

¹⁸ Yoröiso cha̧'cua̧rö̧ jȩpö̧ icuocotö. Ttörötä pä̧huä̧ rö̧jo̧mȩnä̧ iyösä cha̧'cua̧rö̧. Ttö 'corupädi'a'anä'inä pä'äji ta'anö ttörötä pä̧huä̧ rö̧jo̧mȩnä̧, tto'ächi'ö'ca̧ chö̧jä̧cua̧sä̧. Ja̧'hua̧nö̧ hueinäcusä Chä'omä, —pä'inödo Jesús.

¹⁹ Judíos ttö̧ja̧ ja̧u̧ huȩnȩ ttä̧ju̧cuo̧mȩnä̧, ji̧nä̧ yo̧mȩtȩnä̧ amöcuädocotö pi̧nä̧tö̧do.

²⁰ Jahuätöttö recuätö pä'inätödo: Ja̧u̧ espíritu su̧ro̧pa̧rö̧ u̧ju̧nä̧ra̧'a̧ttö̧ suripächö ucuocumä, ¿dä̧bö̧ cuä̧ju̧cuä̧rä̧tu̧cuä̧rö̧ttö̧ ja̧u̧ päömä?

²¹ Korotö pä'inätödo: —Ya̧tȩ espíritu su̧ro̧pa̧rö̧ ku̧nä̧rö̧mä̧, ja̧'hua̧nö̧ ucuocuocö yoröiso. ¿Ya̧tȩ espíritu su̧ro̧pa̧mä̧ ä̧to̧cä̧tö̧rö̧ aditö icu tä̧ji̧?

Judíos ttö̧ja̧ Jesúsru esetocotö pi̧nä̧tö̧do

²² Ja̧u̧nu̧ pä̧nä̧, a̧'ȩ kä'conä ji̧na̧'a̧do. Ja̧u̧nu̧ Diosrö ucuocuäcuähuode ttaditinö o'ca'a fiesta jȩtti̧nö̧mä̧ jȩpi̧nä̧tö̧do Jerusalén ötahuiyära̧'a̧ttö̧.

²³ Jesús Diosrö ucuocuäcuähuodenä, Salomón i̧so̧ca̧ pättino̧ca̧nä̧ cue'ächinödo.

²⁴ Judíos ttö̧ja̧ ja̧u̧ru̧ ichi'ö pä'inätödo: —Ucuru adiunä tu̧huo̧jua̧ pä'ö, ¿ti̧yȩnö̧ jicuhuähuäcua'ajä̧ttö̧? Iso päi'önä Cristo cu'uttumä, jueönätä ji'ähuitö.

²⁵ Jesús jahuätörö ädätö pä'inödo: —Täcö ji'ähuinösä. Ucututä esetocotöjä. O'ca juiyönä Chä'o u̧ju̧ru̧nä̧ jȩchö̧mä̧, ja̧u̧ Cristo cha'a i̧jȩcua̧'a̧.

²⁶ Ja̧'hua̧nö̧ ja̧'a̧nä̧ ucutu esetocotöjä. Ucuturu pädäji ta'anö, ucutu chä̧ji̧mö̧ o̧vȩja̧stö̧ huocotöjä ucutumä.

²⁷ Chä̧ji̧mö̧ o̧vȩja̧stö̧ chi̧huȩnȩ huo̧juä̧tö̧. Ttö'inä jahuätörö huo̧jua̧sä̧. Ttö cho'ca'anä cue'ächätö.

²⁸ Jahuätörö kä̧cuä̧huä̧ i'co iyösä. Yoröiso 'corupä'i'ocotö ttäcuotö. Ja̧'hua̧ta̧nö̧ chu̧mö̧ttö̧, ka̧ra̧ yoröiso 'cho'ipocö jahuätörö.

²⁹ Chä'omä, korotöttö'inä abonänö ju̧ru̧hua̧mä̧, ttörö iyinä̧u̧. Ja̧'hua̧ta̧nö̧ chutä u̧mö̧ttö̧, ka̧ra̧mä̧ yoröiso 'cho'ipocö jahuätörö.

³⁰ Ttöcu, Chä'ocu, ji̧nä̧ ya̧tȩnä̧tä̧ ja̧'a̧.

³¹ Ja̧'hua̧nö̧ päomenä, judíos ttö̧ja̧ pä'äji ta'anö ido'qui ȩmo̧po̧'ö̧, Jesúsru tticua pä'inätödo.

³² Ja̧'hua̧ ja̧'a̧ Jesús pä'inödo jahuätörö: —Ucutu cuä'catucu jo̧mȩttö̧, Chä'o ujurunä, rö̧ȩnä̧ adihuä juäi jȩpi̧'ä̧nö̧sä̧. Ja̧u̧ jȩchi̧nö̧ ¿ti̧yȩttö̧ amöcuädö cuä'ö cuicuätucua päcuhuätucua'ajä̧ttö̧ ttörö?

³³ Judíos ttö̧ja̧ ja̧u̧ru̧ ädätinätödo: —Adihuä juäi jȩcu̧'i̧na̧'a̧, ido'qui icu, cuä'ö icuocotöjä. Diosrö suronä cucuocua'attö cuä'ö ticuäcuotöjä. Ucutä pi̧jä̧ ttö̧ja̧ i̧sa̧ cu'a'anä: “Ttötäsä Dios” pä'öjä, —pä'inätödo.

³⁴ Ja̧'hua̧ ja̧'a̧ Jesús päinä̧u̧do: —Ucutu hueähuä huȩnȩnä̧ Dios päinö huȩyu̧cua̧'a̧. Pa̧'a̧nö̧ päa'a: “Ucutumä pi̧jä̧ttö̧ dioses huotöjä.”

³⁵ Iso päi'önä Huȩyu̧cuä̧ Huȩnȩ päömä yoröiso ä̧ppö̧tä̧rä̧cuä̧huo̧cö̧ huo̧juä̧tö̧jä̧. Dios, pi̧jä̧ ttö̧ja̧rö̧, chutä i̧huȩnȩ jiähuinä̧u̧ru̧ dioses huotöjä pä'inödo.

³⁶ Ja̧'hua̧nö̧ ja̧'a̧ttö̧ iso päi'önä Dios ttörö 'quȩ'ȩpö̧, pi̧jä̧ra̧'a̧ hueinöttömä, “Dios I̧tti̧sä̧” pädomenä, ¿tta̧'a̧nö̧ päcuhuätucua'ajä̧ttö̧ Diosrö suronä pä'öjä pä'ö?

³⁷ Chä'o jȩö̧'a̧nö̧ jȩchö̧ juiyöttömä, ttörö cuesetätucuä'.

³⁸ Ja̧'hua̧ta̧nö̧ ja̧u̧ jȩchö̧ttö̧'i̧nä̧ ttörö cuesetätucu juiyöttömä, jȩchö̧tä̧ esetätucui, Chä'o ttöcu kö̧ cu̧huo̧juä̧tu̧cua̧ pä'ö. Ja̧'hua̧ta̧nö̧ ttö'inä Chä'ocu kö̧sä̧ cu̧huo̧juä̧tu̧cua̧ pä'ö, —pä'inödo Jesús.

³⁹ Ja̧'hua̧nö̧ päomenä, pä'äji ta'anö cärenä ttötarö pä'inätödo. Ja̧'hua̧nö̧ ja̧'a̧nä̧ Jesús jahuätöttö rä'opächö, tö'ipächinödo.

⁴⁰ Ja̧'hua̧ ja̧'a̧ Jesús Jordán aje ji̧jȩcu̧nä̧ 'chi̧nö̧do. Juan pä'äji bautizando jȩi̧no̧mȩ ki̧nö̧do.

⁴¹ Recuätö ttö̧ja̧ ja̧u̧ru̧ topö 'chi̧nä̧tö̧do. Pä'inätödo: —Iso päi'önä, Juan ttö̧ja̧ ttieru juäi jȩo̧ca̧'a̧nä̧, piderö o'ca juiyönä päinömä iso päi'önä pä'inö, —pä'inätödo.

⁴² Juhua'attö recuätö ttö̧ja̧ Jesúsru esetinätödo.