Hechos 6 - TÄ̧DO Ä̧CUÄ̧ I̧HUȨNȨ

Diáconos huotörö ko̧ro̧mö̧ttö̧nö̧ ta̧ju̧nu̧ ottinö huȩnȩ

¹ Ja̧u̧nu̧ pä̧nä̧ Jesucristorö esetätömä ttirecuächina'attö, griegos ttö̧ja̧ tti̧huȩnȩ ucuocuätömä pä'ähuinätödo judíos ttö̧ja̧ tti̧huȩnȩ ucuocuätörö. Griegos ttö̧ja̧ tti̧huȩnȩ ucuocuätöttö rȩcua̧mö̧rö̧ iyocotö pi̧nä̧tö̧do, mo̧ro̧ji̧nö̧ a̧'u̧cuä̧ ttu̧cuȩ ttiya'anä.

² Ja̧'hua̧nö̧ ja̧'a̧ ttö̧jä̧pö̧ttö̧nö̧ ta̧ju̧nu̧ Jesús hue'ähuotömä, Jesucristorö esetätörö o'ca toi'önä ca̧ca̧tö̧ pä'inätödo: —Dios i̧huȩnȩ jitähuoca'a, ttu̧cuȩtä̧ tiyöttömä adihuoca'a.

³ Ja̧'hua̧nö̧ ja̧'a̧ttö̧ chö̧jä̧hua̧tö̧, ucututtu ko̧ro̧mö̧ttö̧nö̧ ta̧ju̧ru̧ u̧mä̧tö̧rö̧ ȩmä̧tu̧cui̧. Ucututtu korotö adiu ucuocuätörö, Espíritu Santo hueomenä huo̧ju̧nä̧ jȩpä̧tö̧rö̧ ȩmä̧tu̧cui̧, jahuätörö ttaditähuä tiyatö.

⁴ Ujutu 'cuäopönä Diosrö tucuocuäcuotöjä. I̧huȩnȩ'i̧nä̧ huo̧juȩtö̧ jitähuäcuotöjä, —pä'inätödo Jesús hue'ähuotö.

⁵ O'ca toi'önä eseunu ä̧ju̧cui̧nä̧tö̧do Jesús hue'ähuotö pättäjimä. Ȩmi̧nä̧tö̧do adiu esetörö, Espíritu Santo hueäcuru, Esteban pä'ö mi̧cua̧rö̧. Feliperö'inä, Prócororö'inä, Nicanorrö'inä, Timónrö'inä, Parmenasrö'inä, Nicolás Antioquía ötahuiyä ttö̧ja̧ i̧sa̧rö̧'i̧nä̧ ȩmi̧nä̧tö̧do. Ja̧u̧ Nicolás judío huocö ja̧'a̧nä̧, judíos ttö̧ja̧ Diosrö ä'canä esetinödo.

⁶ Jahuätörö ȩpi̧nä̧tö̧do Jesús hue'ähuotö ttä'ca jo̧mȩ. Jesús hue'ähuotö Diosrö ucuocu, ttu̧mö̧nä̧ mȩ'i̧nä̧tö̧do jahuätörö.

⁷ Dios i̧huȩnȩ yabocutä rö̧ä̧chö̧nä̧ ji'ähuinätödo. Jesucristorö esetätömä juiyo recuächinätödo Jerusalén ötahuiyättö. Recuätö sacerdotes'inä Jesucristo i̧huȩnȩ adiu esetinätödo.

Estebanrö 'chu'ädö ttȩpi̧nö̧ huȩnȩ

⁸ Esteban Dios ppädäcuähuänä, ujurunä'inä ttö̧ja̧ ttä'ca jo̧mȩ rö̧ȩnä̧ ttö̧ja̧ ttieru juäi jȩpi̧nö̧do.

⁹ Ja̧'hua̧nö̧ ja̧'a̧nä̧ korotö judíos ttu̧huo̧jui̧'i̧nodettö, juhuode i̧mi̧ Libertados pättinodettö ichi'ö, ra̧huä̧rö̧ pä'ähuinätödo Estebanrö. Jahuätö Cirene ötahuiyättö'inä, Alejandría ötahuiyättö'inä, Celicia rȩjȩttö̧'i̧nä̧, Asia rȩjȩttö̧'i̧nä̧ ichinätödo.

¹⁰ Ja̧'hua̧nö̧ ja̧'a̧ttö̧ Estebanrö ttädätö juiyö'a̧nö̧ ja̧'a̧, Espíritu Santo huo̧ju̧nä̧ jiähua'attö.

¹¹ Ja̧'hua̧nö̧ ja̧'a̧ korotörö pärätä mitinätödo, yapareu ucuocu jittähua pä'ö. —Pide Esteban suronä ucuocua'a ä̧ju̧cuä̧jä̧tö̧jä̧ Moisésrö'inä, Diosrö'inä.

¹² Ja̧'hua̧nö̧ pättomenä, ttö̧ja̧'i̧nä̧, judíos ttö̧ja̧ ancianos huotö'inä, hueähuä huȩnȩ huo̧juȩtä̧tö̧'i̧nä̧ ä̧ju̧cu̧ ra̧huä̧ri̧nä̧tö̧do. Jahuätö ichi'ö 'chu'ädinätödo Estebanrö. Judíos ttö̧ja̧ ji̧nä̧ iso ruhuotö ttä'ca jo̧mȩ ttȩpi̧nä̧cu̧do.

¹³ Ja̧'hua̧nö̧ ja̧'a̧ korotörö usinätödo ji̧nä̧ iso ruhuotö ttä'ca jo̧mȩttö̧ Estebanrö yapareu jittähua pä'ö. Pä'inätödo: —Pide 'cuäopönä ji'äu Diosrö ucuocuäcuähuodemä surojode pä'ö, hueähuä huȩnȩ'i̧nä̧ suroja'a pä'ö.

¹⁴ Ujutu ä̧ju̧cuä̧jä̧tö̧jä̧ jiähua'a “Jesús Nazaret i̧sa̧ Diosrö ucuocuäcuähuode cuä'epö i̧cuä̧cua̧. Ja̧'hua̧ta̧nö̧ Moisés hueinömä Jesús pärotö i̧cuä̧cua̧”, pä'äji, —pä'inätödo.

¹⁵ Ja̧'hua̧nö̧ ja̧'a̧ judíos ttö̧ja̧ ji̧nä̧ iso ruhuotö o'ca toi'önä ju̧huȩnȩtä̧ pȩjä̧tö̧mä̧ Estebanrö topö, ö'ä ángel ö'ä ta'anö uhuähua'a topinätödo.