Hechos 14 - TÄ̧DO Ä̧CUÄ̧ I̧HUȨNȨ

Pablocu, Bernabécu Iconiottö Tu̧ru̧hua̧ i̧huȩnȩ jittähuinö huȩnȩ

¹ Iconio ötahuiyänä kä̧nö̧, Pablocu, Bernabécu ji̧nä̧ yo̧mȩtȩ do'ächinätödo judíos ttu̧huo̧jui̧'i̧nodera̧'a̧. Jittähuomenä recuätö Jesucristorö esetinätödo, judíos ttö̧ja̧'i̧nä̧, judíos huocotö'inä.

² Ja̧'hua̧nö̧ ja̧'a̧nä̧ judíos ttö̧ja̧ Jesucristorö esetocotömä ucuocuinätödo judíos huocotörö, suronä ttamöcuäda pä'ö Jesucristorö esetätörö.

³ Ja̧'hua̧nö̧ ja̧'a̧ttö̧ Pablocu, Bernabécu recuo ka̧cui̧nä̧tö̧do Iconio ötahuiyära̧'a̧. Tu̧ru̧hua̧rö̧ tta̧'cua̧ huȩnä̧rö̧ yettecuoca'a ji'ähuinätödo Tu̧ru̧hua̧ i̧huȩnȩ. Tu̧ru̧hua̧mä̧ ttö̧ja̧rö̧ adiu jȩpö̧ repe'ö pä'ö ji'ähuinätödo. Jittähuäji ta'anö iso päi'önä ja̧'a̧ Tu̧ru̧hua̧ jahuätörö hue'inödo ttö̧ja̧ ttieru juäi jȩtta̧ pä'ö.

⁴ Iconio ötahuiyä ttö̧ja̧ttö̧ korotö judíos ttö̧ja̧ jittäu huȩnȩ esetinätödo. Ja̧'hua̧ta̧nö̧ korotö Pablocu, Bernabécu jittäu huȩnȩ esetinätödo.

⁵ Ja̧'hua̧ ja̧'a̧ judíos huocotöcu, judíos ttö̧ja̧cu̧, tturuhuotöcu ji̧nä̧ yo̧mȩtȩ ucuocuinätödo suronä jȩtta̧ pä'ö, inädu tticuähua pä'ö Pablorö, Bernabérö cuä'ö tticua pä'ö.

^6-7 Pablocu, Bernabécu ttä̧ju̧cuo̧mȩnä̧, tö'ipächinätödo Listra ötahuiyära̧'a̧, Derbe ötahuiyära̧'a̧'i̧nä̧. Listra ötahuiyä'inä, Derbe ötahuiyä'inä Licaonia rȩjȩnä̧ ji̧na̧'a̧do. Ju̧huä̧jä̧ rȩjȩ ttö̧ja̧rö̧ adihuä huȩnȩ Jesucristo i̧huȩnȩ ji'ähuinätödo.

Listrattö Pablorö inädu tticuähuinö huȩnȩ

⁸ Listra ötahuiyära̧'a̧ttö̧ ya̧tȩ ö̧jä̧pi̧yä̧ su̧ro̧pa̧, uhuäpächina'atä päi'önä cueächoca'a pi̧nö̧do.

⁹ Ja̧u̧mä̧ adiu ä̧ju̧cui̧nö̧do Pablo ucuocua'a. Pablo ja̧u̧ru̧ topö huo̧jui̧nö̧do ja̧u̧ cue'ächocömä, Dios ttörö aditö i̧cuä̧cua̧ pä'ö esetäji.

¹⁰ Ja̧'hua̧ ja̧'a̧ Pablo pä̧i̧cu̧nä̧ päinäcudo: —Cu̧jä̧pi̧yä̧nä̧tä̧ jueönä ä̧rä̧mi̧'i̧. Ja̧'hua̧nö̧ ja̧'a̧ tö'önänö ä̧rä̧mi̧'ö̧ cue'ächinödo.

¹¹ Ttö̧ja̧mä̧ Pablo jȩä̧ja̧'a̧ topö, Licaonia rȩjȩ ttö̧ja̧ jitötä tti̧huȩnȩnä̧ huopinätödo: —Tä̧do̧ ä̧cua̧tö̧mä̧ ttö̧ja̧ jö̧ ta'anö huotö mȩyȩhuä̧jä̧tö̧ ujutu tö̧jo̧mȩ.

¹² Bernabémä tä̧do̧ ä̧cua̧ Júpiter. Pablomä tä̧do̧ ä̧cua̧ Mercurio, —pä'inätödo, Pablo rö̧ȩnä̧ jiäcuähuä i̧sa̧ ja̧'a̧ttö̧.

¹³ Licaonia rȩjȩ ttö̧ja̧ ttä̧do̧ ä̧cua̧ Júpiterrö ucuocuäcuähuode ötahuiyättömä tö'cönänö huinodedo. Juhuode ru̧hua̧ äpate ä'ca i'cächinödo pä̧cä̧yö̧rö̧'i̧nä̧, ȩ'u̧'i̧nä̧. Ru̧hua̧cu̧, ttö̧ja̧cu̧ ttä̧do̧ ä̧cua̧ jȩtti̧nö̧ ta'anö jȩtta̧ pä'inätödo Bernabérö, Pablorö. Jahuätömä Bernabérö, Pablorö ttucuota'attö pä̧cä̧yö̧rö̧ cuä'ö tticua pä'inätödo.

¹⁴ Jesús hue'ähuotö Bernabécu, Pablocu ttö̧ja̧ ja̧'hua̧nö̧ jȩtta̧'a̧ tottomenä, tta̧'cua̧ tta̧'ȩcu̧nu̧ jitötä ttö̧'ca̧tä̧huä̧ti̧yu̧ serächönä jopinätödo ttö̧ja̧ ttö̧'quȩtȩnä̧.

¹⁵ Huopinätödo: —¡Chahuaruhuä! ¿Dä̧bö̧ ja̧'hua̧nö̧ jȩcu̧'ä̧tu̧cua̧'a̧ttö̧? Ujutumä ucutu ta'anö u̧mä̧tö̧jä̧. Ujutumä ucuturu ji'äu ichäjätöjä adihuä huȩnȩ, ja̧u̧ juäi, micuähuocö juäimä jȩcu̧'ä̧tu̧cumä̧, jarocu'ipätucu'a̧nö̧ ja̧'a̧, kö̧ Diosrö cuesetätucua pä'ö. Kö̧ Diosmä mo̧ro̧jä̧'i̧nä̧, mo̧ro̧jä̧nä̧ ka̧cu̧'i̧nä̧, pi̧jä̧'i̧nä̧, pi̧jä̧nä̧ ka̧cu̧'i̧nä̧, ajehuiyä'inä, ajehuiyänä kä̧cu̧'i̧nä̧, o'ca juiyönä aditinödo.

¹⁶ Pä'äjimä Dios o'ca toi'önä pa̧ja̧cu̧nä̧ ka̧cuä̧tö̧rö̧ ja̧'a̧tä̧ topinö, jitötä ttamöcuädötä jȩpö̧ ttö̧ja̧cua̧'a̧nä̧.

¹⁷ Ja̧'hua̧nö̧ ja̧'a̧nä̧'i̧nä̧ chutä adihuä i̧sa̧ päi'önä kö̧ tu̧huo̧jua̧ pä'ö, 'cuäopönä ttö̧ja̧rö̧ adiu jȩpö̧ kö̧. Mo̧ro̧jä̧ttö̧ hue'ö ajiya icha pä'ö. Pi̧jä̧ttö̧'i̧nä̧ hue'ö cuähuä adiu huȩja̧ pä'ö. Ja̧'hua̧nö̧ tu̧cuȩ iya'attö eseunu ka̧cuä̧tö̧jä̧, —pä'inätödo Jesús hue'ähuotö.

¹⁸ Jahuätö ttä̧do̧ ä̧cua̧tö̧rö̧ jȩtti̧nö̧ ta'anö jȩtta̧ pä'inätödo Bernabérö, Pablorö. Ja̧'hua̧nö̧ ja̧'a̧nä̧ Pablocu, Bernabécu juruhuächi'ö ttucuocua'a ä̧ju̧cuä̧jä̧'co̧tö̧, jȩpo̧co̧tö̧ pi̧nä̧tö̧do.

¹⁹ Ja̧'hua̧ ja̧'a̧ korotö judíos ttö̧ja̧ Antioquía ötahuiyättö, Iconio ötahuiyättö'inä ichö rö̧ȩnä̧ ucuocuinätödo ttö̧ja̧rö̧. Jahuätö jittäu huȩnȩ amöcuädö esetinätödo Listra ötahuiyä ttö̧ja̧mä̧. Ja̧'hua̧nö̧ ja̧'a̧ inädu icuähuinätödo Pablorö. Täcö 'corupä'i'äji amöcuädö, ötahuiyä jäyäcu dottinäcudo.

²⁰ Ja̧'hua̧nö̧ ja̧'a̧nä̧ Jesucristorö esetätömä Pablo ö̧'o̧mȩ so̧bö̧cuä̧ päi'önä ttö̧ca̧ca̧cui̧'o̧mȩnä̧, Pablo ä̧rä̧mi̧'ö̧ pä'äji ta'anö ötahuiyära̧'a̧ 'chä̧hui̧'i̧nö̧do. I̧'chi̧'ä̧ji̧ koro mo̧ro̧ päi'omenä, Bernabécu rä'opinödo Derbe ötahuiyära̧'a̧ i̧'cha̧ pä'ö.

²¹ Pablocu, Bernabécu adihuä huȩnȩ Derbe ötahuiyättö ji'ähuinätödo. Recuätö Jesucristorö esetinätödo. Ja̧'hua̧nö̧ ja̧'a̧ Pablocu, Bernabécu ppa̧'ä̧chä̧chi̧nä̧tö̧do Listra ötahuiyära̧'a̧. Juhuorö kä̧nö̧ Iconio ötahuiyära̧'a̧ ppa̧'ä̧chä̧chi̧nä̧tö̧do. Juhuorö kä̧nö̧ Antioquía ötahuiyära̧'a̧ ppa̧'ä̧chä̧chi̧nä̧tö̧do.

²² Koro ötahuiyänä'inä, koro ötahuiyänä'inä Jesucristorö esetätörö huo̧juȩtö̧ ji'ähuinätödo, juhua'a yabonö adiu tteseta pä'ö. —Adiu esetö cu̧ja̧cuä̧tu̧cu̧'a̧nö̧ ja̧'a̧. Rö̧ȩnä̧ surojö 'cuäopäcua'a ujuturu, Dios ö̧jo̧mȩ dotächäcua'a ä'canä, —pä'inätödo.

²³ Pablocu, Bernabécu korome iglesia ruhuättö'inä, korome iglesia ruhuättö'inä hue'inätödo ancianos huotö päi'önä ttö̧ja̧cua̧ pä'ö. Ttu̧cuȩ ttucuoca'a Diosrö ucuocuäjä'cotö hue'inätödo Dios, tta̧'cua̧ ttu̧huȩnä̧ri̧nä̧cu̧, tta̧huä̧ra̧ pä'ö jahuätörö.

Pablocu, Bernabécu Antioquía ötahuiyära̧'a̧ Siria rȩjȩnä̧ ppa̧ttä̧chi̧nö̧ huȩnȩ

²⁴ Pablocu, Bernabécu Pisidia rȩjȩ 'cuä'opäjä'cotö, Panfilia rȩjȩra̧'a̧ 'chä̧hui̧'i̧nä̧tö̧do.

²⁵ Juhuorö Perge ötahuiyättö adihuä huȩnȩ ji'ähuinätödo. Juhua'attö Atalia ötahuiyära̧'a̧ 'chi̧nä̧tö̧do.

²⁶ Ttaditähuä cä'ädö, juhuorö huoi'canä ichö ppa̧'ä̧chi̧nä̧tö̧do Antioquía ötahuiyära̧'a̧. Jesucristorö esetätömä Antioquía ötahuiyänä ka̧cuä̧tö̧mä̧ Pablocu, Bernabécu tti̧'chä̧cua̧ ä'canä hue'inätödo Diosrö, Ppädäcuähuä Ru̧hua̧rö̧, ttaditähuä ttadita'anä tta̧huä̧ra̧tö̧ pä'ö.

²⁷ Antioquía ötahuiyära̧'a̧ 'chä̧hui̧'ö̧, iglesia ruhuärö ji̧nä̧ yo̧mȩtȩ ca̧ca̧tö̧ ji'ähuinätödo o'ca juiyönä Dios jahuätöcu jȩi̧nö̧mä̧. Dios jähuä ba'epö i̧jȩpi̧nö̧ judíos huocotö'inä ttesetarö pä'ö ji'ähuinätödo.

²⁸ Pablocu, Bernabécu Antioquía ötahuiyättö Jesucristorö esetätöcu recuo ka̧cui̧nä̧tö̧do.