Hebreos 8 - TÄ̧DO Ä̧CUÄ̧ I̧HUȨNȨ

Jesús, jareö huȩnȩ tta̧huä̧rä̧cuä̧huä̧ ru̧hua̧

¹ Jitä pätäjimä pi̧yȩjä̧: ujutu adihuä ji̧nä̧ isocu sacerdote ru̧hua̧ ku̧nä̧rä̧tö̧jä̧ mo̧ro̧jä̧ra̧'a̧ttö̧, Dios i̧dȩä̧cä̧ u̧huo̧jua̧'a̧nä̧ pö̧rö̧.

² Ja̧'hua̧ta̧nö̧ ji̧nä̧ isocu Dios adihuä ö̧jo̧mȩ, Tu̧ru̧hua̧ aditinome, pi̧jä̧ ttö̧ja̧ ttaditocomettö, sacerdote ru̧hua̧ päi'önä kö̧.

³ O'ca toi'önä sacerdotes ruhuotö ofrendas'inä, sacrificios'inä jȩtta̧ pä'ö hue'ähuotödo. Ja̧'hua̧nö̧ ja̧'a̧ttö̧ Jesucristo'inä ofrenda jö̧'a̧nö̧ iyäcua'a̧nö̧.

⁴ Pi̧jä̧nä̧ ö̧jö̧ttö̧mä̧, sacerdote hua̧ päi'önä ko̧cö̧ paji, korotö Moisés hueähuä huȩnȩ päö ta'anö, ofrendas jȩpä̧tö̧ ttö̧ja̧cua̧'a̧ttö̧.

⁵ Ja̧'hua̧nö̧ ja̧'a̧nä̧ jahuätö sacerdotes huotö jȩttö̧mä̧, mo̧ro̧jä̧nä̧ ka̧cu̧ a̧'cua̧rö̧nä̧tä̧ jȩpä̧tö̧do. Ja̧'hua̧ta̧nö̧ Moisés Diosrö ucuocuäcuähuode adita päomenä, chutä Dios pä'inödo: “Möä'canä cu̧ja̧'a̧ ucuru chi̧jȩpä̧ji̧ ta'anö, o'ca juiyönä topö aditi.”

⁶ Jesús ujutu ji̧nä̧ isocu sacerdote ru̧hua̧mä̧, ja̧u̧ juäittö'inä abonänö adiu jȩpö̧. Ja̧u̧ jareö huȩnȩ, korottö'inä abonänö adihuä juäi iyähuä huȩnȩ tta̧huä̧rä̧cuä̧huä̧ ru̧hua̧ päi'önä kö̧.

⁷ Iso päi'önä äcuomenä hueähuä huȩnȩ adihuinöttömä, koro jareö huȩnȩ Dios hueoca'a ji̧na̧'a̧.

⁸ Ja̧'hua̧nö̧ ja̧'a̧nä̧ jahuätö ttö̧ja̧ suronä jȩtta̧'a̧ topinödo Dios. Dios Huȩyu̧cuä̧ Huȩnȩnä̧ päa'a jahuätörö: Tu̧ru̧hua̧ pä'ödo: koronö mo̧ro̧ päi'äcua'a Israel ttö̧ja̧rö̧'i̧nä̧, Judá ttö̧ja̧rö̧'i̧nä̧ jareö huȩnȩ chiyäcuotö.

⁹ Täbocö, ttä̧do̧tö̧ mi̧nä̧rö̧ chi̧huȩnȩ iyö Egipto rȩjȩttö̧, ttu̧mö̧nä̧ 'chu̧'ä̧rö̧ rädepinö'a̧nö̧mä̧ jȩpo̧cö̧sä̧. Chi̧huȩnȩ päinö ta'anö jȩpo̧co̧tö̧ pi̧nä̧tö̧. Ja̧'hua̧nö̧ ja̧'a̧ttö̧ jahuätörö jarochi'inä̧u̧, pä'ödo Tu̧ru̧hua̧mä̧.

¹⁰ Ja̧u̧nu̧ pä̧nä̧ o'ca'a, Israel ttö̧ja̧rö̧ pi̧yȩ huȩnȩ chiyäcuotö, pä'ödo Tu̧ru̧hua̧. Ttö huedömä, ttamöcuädönä chiyäcuotö. Ttami iso'quinä'inä ttö huedömä chi̧huȩyu̧tä̧cua̧sä̧. Ja̧'hua̧ ja̧'a̧ttö̧ ttö jitötä Dios pä̧di̧'ä̧cua̧sä̧. Jahuätö'inä chumöhuäyotö pätti'äcuotö.

¹¹ Ttu̧ru̧hua̧rö̧ ttu̧huo̧jua̧ pä'ö, ttumöhuäyotörö'inä, ttö̧jä̧hua̧tö̧ ttahuaruhuärö'inä huo̧juȩto̧co̧tö̧ ttäcuotö. O'ca toi'önä, ppo̧'ä̧tö̧'i̧nä̧, tä̧mö̧'i̧nä̧ ttörö ttu̧huo̧juä̧cuo̧tö̧.

¹² Suronä jȩtta̧'a̧ jȩpö̧ chi̧cuä̧cua̧sä̧. Pä'äji ta'anö yoröiso amöcuädocösä suronä jȩttö̧mä̧, pä'ödo Tu̧ru̧hua̧.

¹³ Dios jareö huȩnȩ ucuocuomenä: “Pä'äji huȩnȩ täcö täbo jähuä ja̧'a̧” pä'ödo. Ja̧'hua̧ta̧nö̧ ja̧u̧mä̧ pä'äji jähuämä, täbo jähuä päi'omenä, yodojinänö yoröiso juiyönä beipächäcua'a.