Hebreos 7 - TÄ̧DO Ä̧CUÄ̧ I̧HUȨNȨ

Jesús, Melquisedec ö̧ji̧nö̧ ta'anö sacerdote i̧sa̧ pi̧nö̧do

¹ Ja̧u̧ Melquisedec Salem ötahuiyä ru̧hua̧ pi̧nö̧do. Ja̧'hua̧ta̧nö̧ chutä Dios, Ju'toju Ru̧hua̧, hueinäcudo sacerdote i̧sa̧ ö̧ja̧ pä'ö. Abraham korotö ruhuotörö rohuäu ujuruhuäji o'ca'a, ojusodecu ppa̧huä̧cho̧mȩnä̧, Melquisedec ja̧u̧ru̧ toa pä'ö rä'opinödo. Ja̧'hua̧ta̧nö̧ Abrahamrö adiu ppä'ädinödo.

² Abraham örohuähuomenä ȩmi̧nö̧ttö̧, to̧mö̧rȩ jähuättömä, ji̧yȩtȩ 'quȩ'ȩpö̧ iyinödo Melquisedecrö. Chutä Melquisedec i̧mi̧mä̧ ujutu ti̧huȩnȩnä̧ “adihuä ru̧hua̧” pä'ätöjä. Ja̧'hua̧ta̧nö̧ Salem ötahuiyä ru̧hua̧ ö̧ji̧no̧mȩ i̧mi̧mä̧ pä'ätöjä “eseäcuähuä” pä'ö. Ja̧'hua̧ta̧nö̧ koro'inä i̧mi̧mä̧ “eseäcuähuä ru̧hua̧” pä'ätöjä.

³ Jä'o'inä, ja̧ju̧'i̧nä̧, jä̧do̧tö̧ mi̧nä̧'i̧nä̧ toina'ado. Uhuäpächinö huȩnȩ'i̧nä̧, 'corupäi'inö huȩnȩ'i̧nä̧ yoröiso juiya'a. Ja̧'hua̧nö̧ ja̧'a̧ttö̧ Dios I̧tti̧ jä̧'i̧nö̧'a̧nö̧ hua̧. Ja̧'hua̧ta̧nö̧ sacerdote i̧sa̧ päi'önä 'cuäopönä ö̧jä̧cua̧.

⁴ Jitä, chutä Melquisedec, adihuä i̧sa̧ pi̧nö̧mä̧ amöcuädätucui. Ujutu tä̧do̧ mi̧nä̧ Abrahammä, korotö ruhuotöcu rohuäu, o'ca juiyönä ȩmi̧nö̧ttö̧ to̧mö̧rȩ jähuättö, ji̧yȩtȩ 'quȩ'ȩpö̧ iyinäcudo.

⁵ Moisés hueähuä huȩnȩ päa'ado: Leví ahuaruhuä o'cotömä, sacerdotes huotö ka̧cui̧nä̧tö̧mä̧, Abraham ahuaruhuä o'cotö tta'anä'inä, ttahuaruhuä Abraham ahuaruhuä o'cotörö jä'epö, jitötä ttu̧ju̧nä̧rö̧ttö̧ to̧mö̧rȩ jähuättö, ji̧yȩtȩ 'quȩ'ȩpö̧ ttȩmö̧'a̧nö̧ ja̧'a̧, päa'ado.

⁶ Ja̧'hua̧nö̧ ja̧'a̧nä̧ Melquisedec Leví a̧hua̧ru̧hua̧ o̧'ca̧ pocö pi̧nö̧do. Ja̧'hua̧nö̧ joca'anä, Abraham u̧ju̧nä̧rö̧ttö̧ to̧mö̧rȩ jähuättö, ji̧yȩtȩ 'quȩ'ȩpö̧ ȩmi̧nö̧do. Ja̧'hua̧nö̧ ȩmö̧ Melquisedec Abrahamrö, Dios adihuä juäi iya pä'inörö, adiu ppä'ädinödo.

⁷ Ja̧'hua̧ta̧nö̧ ya̧tȩrö̧ ppättädomenä, ja̧u̧ru̧ ppädäjittö'inä abonänö adihuä i̧sa̧do yoröiso pättö juiyö'a̧nö̧ ja̧'a̧.

⁸ Jitämä ujututtu ju'tometä ȩmä̧tö̧mä̧, hua'ä ttö̧ja̧do. Ja̧'hua̧nö̧ ja̧'a̧nä̧ Melquisedec 'cuäopönä ö̧jö̧'a̧nö̧ hua̧, päa'a Huȩyu̧cuä̧ Huȩnȩ.

⁹ Ja̧'hua̧ta̧nö̧ Levícu, o'ca toi'önä sacerdotes huotö Leví ahuaruhuä o'cotöcu, jitä ttu̧ju̧nä̧rö̧ttö̧ ju'tometä ȩmä̧tö̧mä̧, Abraham Melquisedecrö iyomenä, jahuätö'inä ja̧u̧ru̧ ttiyina'a jä̧'i̧nö̧'a̧nö̧ ja̧'a̧.

¹⁰ Melquisedec Abrahamrö topö ichomenä, Abraham ahuaruhuä o'cotö ji̧nä̧ ttuhuäpächoca'anä, chutä Abraham jä̧ttä̧pä̧ya̧nä̧ ȩpi̧na̧'a̧ jä̧'i̧nö̧'a̧nö̧ ji̧na̧'a̧do.

¹¹ Israel ttö̧ja̧, Aarón ahuaruhuä o'cotö, Leví isotö sacerdotes huotöttö hueähuä huȩnȩ ȩmi̧nä̧tö̧do. Iso päi'önä, jahuätömä ja̧u̧ hueähuä huȩnȩ päö'a̧nö̧ jȩpö̧, pi̧jä̧ ttö̧ja̧ adiunä jȩtta̧ pä'ö huettinöttömä, ka̧ra̧ sacerdote hua̧, Melquisedec ta'anö hua̧mä̧, ichocö paji. Chutä Melquisedec Aarónttö'inä i̧mi̧cu̧nä̧ hua̧ pi̧nö̧do.

¹² Chutä sacerdote hua̧rö̧, pä̧ro̧cua̧rö̧ ö̧ja̧ pä'ö huettomenä, hueähuä huȩnȩ'i̧nä̧ pärocuänä hue'ätö.

¹³ Ujutu Tu̧ru̧hua̧mä̧, Huȩyu̧cuä̧ Huȩnȩ päcuru, Israel ttö̧ja̧ i̧sa̧ ja̧'a̧nä̧, korotöttö i̧sa̧ pi̧nö̧. Jahuätöttömä sacerdote hua̧mä̧ yoröiso toina'a.

¹⁴ Iso päi'önä o'ca toi'önä huo̧juä̧tö̧do, ujutu Tu̧ru̧hua̧, Judá ahuaruhuättö i̧sa̧ pi̧nö̧. Ja̧'hua̧nö̧ ja̧'a̧nä̧ Moisés sacerdotes huotö ttö̧jä̧cuȩ jiähuomenä, Judá ahuaruhuärö pä'ö ji'ähuocö pi̧nö̧.

¹⁵ Ja̧'hua̧ta̧nö̧ ka̧ra̧ sacerdote hua̧ ja̧rȩpa̧, Melquisedec ta'anö hua̧mä̧ ichomenä, iso päi'önä ja̧u̧ huȩnȩ adiu huo̧juä̧tö̧jä̧.

¹⁶ Ja̧u̧mä̧ pi̧jä̧ hueähuä huȩnȩ, pitö ttö̧ja̧ttö̧ chutä sacerdote hua̧ päi'önä ö̧jä̧cua̧, päö'a̧nö̧ ko̧cö̧ pi̧nö̧do. Ja̧u̧mä̧ beipocö juäi, kä̧cuä̧huä̧ i'co ujurunä ki̧nö̧do.

¹⁷ Dios pa̧'a̧nö̧ pä'ödo ja̧u̧ru̧: Ucutä ihueye 'cuäopönätä sacerdote hua̧ päi'önä cu̧jä̧cua̧jä̧, Melquisedec ö̧ji̧nö̧ ta'anö.

¹⁸ Ja̧'hua̧nö̧ ja̧'a̧ttö̧ pä'äji hueähuä huȩnȩ si'epö tticuina'ado. Ja̧u̧ huȩnȩmä̧ yoröiso juiyuhua'attö ppädoca'a ji̧na̧'a̧do.

¹⁹ Moisés hueähuä huȩnȩ yoröiso aditö icuoca'a ji̧na̧'a̧do ttö̧ja̧rö̧. Jitämä ja̧u̧ huȩnȩ jaropi'ö, koro adihuä juäi tta̧'ä̧rä̧tö̧jä̧. Ja̧u̧ juäi jareönä tta̧tä̧ro̧mȩnä̧, Diosrö tö'cöpächätöjä.

²⁰ Diosmä, ja̧u̧ jareönä tta̧tä̧rö̧mä̧ iso päi'önä jȩa̧ pä'ö pä'inödo.

²¹ Korotö sacerdotes huotö koro päö huȩnȩ juiyönä hue'ähuotö pi̧nä̧tö̧do. Ja̧'hua̧nö̧ ja̧'a̧nä̧ pide sacerdote hua̧mä̧, koro päö huȩnȩnä̧ huȩ'ä̧hua̧ pi̧nö̧do. Huȩyu̧cuä̧ Huȩnȩ päa'ado ja̧u̧ru̧: Tu̧ru̧hua̧ iso päi'önä pä'inö. Koromä amöcuädocö. “Ucutä ihueye 'cuäopönätä sacerdote hua̧ päi'önä cu̧jä̧cua̧jä̧, Melquisedec ö̧ji̧nö̧ ta'anö.”

²² Ja̧'hua̧nö̧ ja̧'a̧ttö̧ Jesúsru esetäcuähuänä pä'äji huȩnȩttö̧'i̧nä̧ abonänö adihua'ado.

²³ Korotö sacerdotes huotö recuinätödo. Jahuätö hua'ö tticuomenä, juhua'a yabonä ko̧co̧tö̧ pi̧nä̧tö̧do.

²⁴ Ja̧'hua̧nö̧ ja̧'a̧nä̧ Jesús 'cuäopönä ö̧ja̧'a̧ttö̧, ka̧ra̧rö̧ hueähuoca'a sacerdote hua̧ päi'önä ö̧ja̧ pä'ö.

²⁵ Ja̧'hua̧nö̧ ja̧'a̧ttö̧ ja̧u̧ru̧ esetö, Diosrö tö'cöpächätörö suronä jȩttö̧mä̧ jȩpö̧ icu. Ja̧u̧ 'cuäopönä kö̧, Diosrö ucuocua pä'ö jahuätörö.

²⁶ Ja̧'hua̧ ja̧'a̧ttö̧ chutä Jesús ujuturu adihua'ado ji̧nä̧ isocu sacerdote ru̧hua̧ päi'önä ö̧ja̧ pä'ö. Ja̧u̧mä̧ adihuä i̧sa̧do. Ja̧u̧ suronämä yoröiso jȩpo̧cö̧. Suronä jȩpä̧tö̧ttö̧'i̧nä̧ i̧mi̧cu̧nä̧ kö̧. Ja̧'hua̧ta̧nö̧ mo̧ro̧jä̧ttö̧'i̧nä̧ juhua'a yabo ru̧hua̧do.

²⁷ Ja̧u̧mä̧, korotö sacerdotes ruhuotö ta'anö, äji cuäcuähuotö isotörö, mo̧ro̧ji̧nö̧ a̧'u̧cuä̧, chutä suronä jȩö̧'i̧nä̧, korotö ttö̧ja̧ suronä jȩttö̧'i̧nä̧ jȩpö̧ icuäu, sacrificios jȩa̧ pä'ö, cuä'ö icuocödo. Chutä sacrificio päi'önä 'corupäi'omenä, ya'utenätä o'ca toi'önärö sacrificio päi'önä iyähuinödo Jesús.

²⁸ Moisés hueähuä huȩnȩ ttö̧ja̧ juiyupätörö huea'ado sacerdotes ruhuotö päi'önä ttö̧ja̧ pä'ö. Ja̧'hua̧nö̧ ja̧'a̧nä̧ Moisés hueähuä huȩnȩ o'ca'a, Dios päinö huȩnȩ, chutä I̧tti̧rö̧, 'cuäopönä adiunätä jȩpö̧rö̧ huea'ado sacerdotes ru̧hua̧ päi'önä ö̧ja̧ pä'ö.