Hebreos 6 - TÄ̧DO Ä̧CUÄ̧ I̧HUȨNȨ

¹ Ja̧'hua̧nö̧ ja̧'a̧ttö̧ äcuomenä Cristorö tesetinö huȩnȩttö̧'i̧nä̧ yabonö ti̧'cha̧ pä'ö, tä̧mö̧ ttö̧ja̧'a̧ jä̧'i̧nö̧'a̧nö̧ tö̧jä̧cua̧'a̧nö̧. Äcuomenä Diosrö esetö, pi̧jä̧ jähuä 'corupäi'äcuähuä jȩtö̧mä̧ jaropi'ö, tesetinö huȩnȩttö̧'i̧nä̧ yabonö tu̧huo̧jui̧'ä̧cua̧'a̧nö̧.

² Ja̧'hua̧ta̧nö̧ bautizando jȩä̧cuä̧huä̧ huȩnȩttö̧'i̧nä̧, Diosrö esetätörö ttu̧mö̧nä̧ mȩ'ö̧ ucuocuäcuähuä huȩnȩttö̧'i̧nä̧, 'corupätti'omettö ttoächäcuähuä huȩnȩttö̧'i̧nä̧, Dios ö̧tä̧bo̧tä̧cuȩ huȩnȩttö̧'i̧nä̧ yabonötä tu̧huo̧jui̧'ä̧cua̧'a̧nö̧.

³ Diosrö pä̧huä̧ rö̧jö̧ttö̧mä̧, yabonö tu̧huo̧jui̧'ä̧cuo̧tö̧jä̧.

^4-6 Korotö tȩa̧u̧ ȩmi̧nä̧tö̧'i̧nä̧, Dios iyö ka̧cuä̧mö̧ topinätö'inä, Espíritu Santorö ku̧nä̧ri̧nä̧tö̧'i̧nä̧, Dios adihuä i̧huȩnȩ'i̧nä̧, yodoji 'cuäopä̧cuȩ huȩnȩ'i̧nä̧, ka̧cuä̧mö̧ topinätö'inä, pä'äji ta'anö jaropi'ö ma̧ttä̧chö̧ttö̧mä̧, pä'äji ta'anö jareönä pärocuäcutä ttamöcuäda pä'ö hueyecua'a. Ja̧'hua̧nö̧ jaropi'ö, Dios I̧tti̧rö̧ pä'äji ta'anö daunä pȩ'o̧pö̧ ku̧nu̧, cuä'ö icuätö jä̧'i̧nö̧'a̧nö̧ jȩpä̧tö̧. Korotö ttä'ca jo̧mȩttö̧ suronä ya̧'ä̧huȩ'ä̧tö̧ Dios I̧tti̧rö̧.

⁷ Jahuätö pi̧jä̧ rȩjȩ ajiya ichomenä, ajiya 'cuhuädi'a'a jä̧'i̧nö̧'a̧nö̧ ka̧cuä̧tö̧. Ja̧u̧ rȩjȩ ttaditomenä, adiu bauttumä, Dios ppädäcuähuä ja̧'a̧.

⁸ Ja̧'hua̧nö̧ ja̧'a̧nä̧ so̧ö̧ bauttumä, yoröiso suroja'a. Dios ppädoca'attö, cuo'ö icuäcua'a ja̧u̧ rȩjȩ.

Dios ujuturu ppädä̧cuȩ huȩnȩ

⁹ Ja̧'hua̧nö̧ ja̧'a̧nä̧ adihuä chö̧jä̧huä̧tö̧, ja̧'hua̧nö̧ tucuocuomenä, ucuturu pä'ocotöjä iso päi'önä huo̧juä̧tö̧jä̧ ucutu cuesetätucuomenä, Dios rö̧ȩnä̧ ppädinä̧u̧jä̧.

¹⁰ Diosmä amönä pä'ocö. Yoröiso unichi'ocö ucutu cuaditinätucu. Cuahuaruhuärö, Diosrö esetätörö, repe'ö ppäcuhuädinätucu'inä unichi'ocö. Jitä'inä ja̧u̧tä̧ juäi jȩpä̧tö̧jä̧.

¹¹ Ujutumä pä'ätöjä ucutu ka̧ra̧'i̧nä̧, ka̧ra̧'i̧nä̧ röji mo̧ro̧ päi'ome jubö päi'önä ja̧'hua̧nö̧ eseunu cu̧ja̧cuä̧tu̧cua̧ pä'ö, o'ca juiyönä tta̧cu̧huä̧rä̧tu̧cu̧mä̧ cuȩmä̧tu̧cuä̧cua̧'a̧nö̧.

¹² Kö'cocotöjä cutähuätucuttumä. Dios adihuä juäi iya päinö Diosrö esetö ttami 'qui'ächi'önö ȩmö̧ jȩttö̧'a̧nö̧, ucutu'inä jȩcu̧'ä̧tu̧cua̧ pä'ätöjä.

¹³ Dios adihuä juäi iya päomenä Abrahamrö, ka̧ra̧ Diosttö'inä abonänö ju̧ru̧hua̧mä̧ toa'attö, chutä i̧mi̧nä̧ iya pä'inödo.

¹⁴ Chuta pä'inödo: “Iso päi'önä rö̧ȩnä̧ ppä̧dä̧dä̧cua̧sä̧ ucuru. Cuahuaruhuä o'cotörö recuätö chi̧yä̧cua̧jä̧.”

¹⁵ Abraham ami 'qui'ächi'ö tta̧'ä̧ri̧nö̧do. Ja̧'hua̧nö̧ tta̧huä̧ro̧mȩnä̧, Dios iya päinömä ȩmi̧nö̧do.

¹⁶ Pi̧jä̧ ttö̧ja̧ koro juäi jȩtta̧ pätta'anä, ka̧ra̧ jahuätöttö'inä abonänö ju̧ru̧hua̧ i̧mi̧nä̧ jȩtta̧ pä'ö ucuocuätödo. Ja̧'hua̧nö̧ jȩtta̧ pä'ö ttucuocuomenä, juhua'a yabonö ucuocuäcuähuocö.

¹⁷ Ja̧'hua̧nö̧ ja̧'a̧ttö̧ Dios, chutä i̧mi̧nä̧ ucuocu iya pä'inödo. Ja̧u̧ adihuä juäi iya päinö ttȩmä̧cuo̧tö̧mä̧, o'ca juiyönä päinö ta'anö i̧yä̧cua̧, adiunä ttu̧huo̧jua̧ pä'ö pä'inödo.

¹⁸ Ja̧'hua̧nö̧ ja̧'a̧ttö̧ koro juäi todäre jo̧mȩnä̧mä̧, yoröiso pärohuocö ja̧'a̧. Ja̧u̧ juäimä, Diosmä yoröiso yapareu pä'ocö. Ja̧u̧ juäi amöcuädö, Diosrö esetö kä̧nö̧, ujuturu ppä'ädö eseunu tö̧ja̧cua̧ pä'ö Dios iya päinö tta̧tä̧ro̧mȩnä̧.

¹⁹ Huoi'ca ti̧ä̧dä̧cuä̧huä̧'quȩ 'quiyönä 'chu̧huä̧ra̧'a̧ jä̧'i̧nö̧'a̧nö̧, ja̧u̧ iya päinö tta̧tä̧ro̧mȩnä̧ tami iso'quinä 'quiyönä tta̧huä̧rö̧. Ujuturu tta̧huä̧rä̧cuä̧huä̧ Dios adihuä ö̧jo̧mȩttö̧ i̧sä̧ta̧ abonä isäcä todehua'a jä̧'i̧nö̧'a̧nö̧ ja̧'a̧.

²⁰ Jesús juhua'a do'ächinödo, tu̧mä̧nä̧ ötodeta pä'ö. Ja̧'hua̧nö̧ ja̧'a̧ttö̧ Jesús Melquisedec ö̧ji̧nö̧ ta'anö, sacerdote hua̧ päi'önä kö̧do 'cuäopönä.