Hebreos 5 - TÄ̧DO Ä̧CUÄ̧ I̧HUȨNȨ

¹ Pi̧jä̧ttö̧ sacerdote ru̧hua̧mä̧, pi̧jä̧ ttö̧ja̧ttö̧ pojopö topö ku̧nä̧hua̧, Diosrö jä'epö ucuocua pä'ö, Dios pi̧jä̧ ttö̧ja̧rö̧ ppäda pä'ö. Ja̧'hua̧ta̧nö̧ pi̧jä̧ ttö̧ja̧ suronä jȩtto̧mȩnä̧, sacrificios jȩpö̧ Diosrö jä'epö ucuocu.

² Chutä sacerdote ru̧hua̧rö̧'i̧nä̧ korotörö 'cuäopö ta'anö, 'cuäopäcudo. Ja̧'hua̧nö̧ ja̧'a̧ttö̧ jerupätörö'inä, re'tehuächätörö'inä ami 'qui'ächi'ö kö̧.

³ Ja̧'hua̧ta̧nö̧ chutä'inä ijuiyuhua'attö, sacrificio jȩpö̧, jä'epö ucuocu Diosrö chutä suronä jȩö̧'i̧nä̧, pi̧jä̧ ttö̧ja̧ suronä jȩttö̧'i̧nä̧.

⁴ Ya̧tȩ, chutä amöcuädötä jȩpö̧mä̧, sacerdote ru̧hua̧ päi'önä ko̧cö̧. Diostä ja̧u̧ru̧ huopö hue'ömä ja̧'hua̧nö̧ ö̧ja̧ pä'ö, Aarónrö hueinö ta'anö.

⁵ Ja̧'hua̧ta̧nö̧ 'cuäopa'a Cristorö'inä. Chutä amöcuädömä sacerdote ru̧hua̧ päi'önä ku̧nä̧huo̧cö̧ pi̧nö̧. Dios hueinäcu ja̧'hua̧nö̧ ö̧ja̧ pä'ö i̧huȩnȩ päinö ta'anö: Ucutä ttö chi̧tti̧jä̧. Jitä mo̧ro̧ ttömä ucu cuä'osä.

⁶ Korome'inä Huȩyu̧cuä̧ Huȩnȩ ja̧u̧ru̧ päa'a: Ucutä ihueye 'cuäopönätä sacerdote hua̧ päi'önä cu̧jä̧cua̧jä̧, Melquisedec ö̧ji̧nö̧ ta'anö.

⁷ Cristo pi̧jä̧nä̧ ö̧jä̧i̧, juruhuächi'ö ajuäunu, Diosrö jä'epö ucuocuinödo. Diosrö, 'corupäi'äcuähuä jȩpö̧ icu'a̧nö̧ hua̧rö̧, ajuäunu i̧huȩnȩ pä̧i̧cu̧nä̧ ucuocu jä'epinödo. Ja̧'hua̧nö̧ ucuotönö jäepomenä, Dios ä̧ju̧cui̧nö̧do.

⁸ Ja̧'hua̧ta̧nö̧ Cristo, chutä Dios I̧tti̧'i̧nä̧, ubara ttu'u kä̧nö̧, Diosrö pä̧huä̧ rö̧jö̧tä̧ jȩa̧ pä'ö huo̧jui̧pi̧nö̧do.

⁹ Ja̧'hua̧nö̧ huo̧jui̧pö̧, yoröiso adihuä i̧sa̧ pä'i'inödo. Jitämä chutä kä̧cuä̧huä̧ i'co iyödo, o'ca toi'önä ja̧u̧ru̧ esetätörö.

¹⁰ Ja̧'hua̧ta̧nö̧ Dios hueinäcudo sacerdote hua̧ päi'önä ö̧ja̧ pä'ö, Melquisedec ö̧ji̧nö̧ ta'anö.

Dios i̧huȩnȩ eseti'ö'cotö jaroi'äcuähuänämä ra̧huȩpi̧ja̧'a̧do

¹¹ Pi̧yȩ huȩnȩ rö̧ȩnä̧ tucuocu'a̧nö̧ ja̧'a̧ ucuturu. Ja̧'hua̧nö̧ ja̧'a̧nä̧ jiäcuähuänä jeruhua'a, ucutu cuä̧ju̧cuä̧tu̧cuo̧ca̧'a̧ttö̧.

¹² Recuo cuesetinätucua'attö, huo̧juȩcuä̧ ttö̧ja̧ cu'ätucu'a̧nö̧ ja̧'a̧. Ja̧'hua̧nö̧ ja̧'a̧nä̧ Dios i̧huȩnȩ äcuomenä cuä̧ju̧cui̧nä̧tu̧cu̧ huȩnȩ, pä'äji ta'anö jittähua'a jä̧u̧jä̧. Cuijuiyuhuätucua'attö, lechetä ahuätöjä. Adihuä juäi cuäcuähuämä ji̧nä̧ cuocotöjä.

¹³ Iso päi'önä lechetä ahuätömä, ppo̧'ä̧tö̧ atate isoya ahuätö jä̧'i̧nö̧'a̧nö̧ huotödo. Adiunä kä̧cuä̧huä̧nä̧ yoröiso jerupätödo.

¹⁴ Ja̧'hua̧nö̧ ja̧'a̧nä̧ adihuä juäi cuäcuähuämä, tä̧mö̧tä̧ ttucudo. Jahuätömä ja̧u̧ cuäcuähuä ttucuina'attö, adiunä'inä, surojö'inä huo̧juä̧tö̧do.